Stories

LEHLUAN SIMTHU

LEHLUAN SIMTHU

Based on a True Story | www.thaikawitongluan.com

Ka lungsim in a kip a kawi in a mu dundun sek a himahleh, ka hihtheih bangmah a omnawn ta kei. Nunlui ngai a vulding ka hiam aw, chi in kei leh kei ka ki hehnem zel hi. Common room tutna tung a la ngai a ka omlai tak in, ka nu’n hon sam a, ann huan hun ahihdan hon hilh hi. Kei leng thou khia in peihlou sasa kawm in annhuan innlam naihphei in buhbel ka la hi.

Veng ah misi hong om a, nungak khat ihihtei sam na ah, Lengkhawm ding in ka kisa hi. Ka lawmnu mannu toh ka kuan uhi. Lenkhop a nuam a, lasak a nuam mahmah hi. A nopdiak na dang khat tuh, ka ma zawn ua, ka muh ngei nailouh duang etlawm, maban hun a Umuan ka chih ding tu ana hi phiangsan hi. Muhchilpan a lung hong kuai chih tuh kei adin a dik mahmah hi. Ama lungsim bang hiding hiam chihbel ka thei kei. Ka ki melh kha den ua, a tawp in a nuihmai mel ka mu hi.

A kichei siam a, siangthou tak leh feltak in a om hi. Lenkhop tawp kuan in, a hon mitsai zauh sese a, huai in ka lungsim a nuamsak tuan mahmah hi. Chikchiang mel I ki mu nawn zen tam! Ka chi lungsim hi. Phattuamngaihna gah loh a nuamtel ka chi hi.

Sunchiang in Siam-gan in hun ka zang zel hi. Nitak ka awl a, hun ka hau mahmah hi. Nungak khat hihna toh lengla bang ka nei zeuhzeuh sam hi. Himahleh, huai a lenkhopna a ka ki galsai pih pa mel tuh ka lungsim ah hong langzel hi. Kei vei bang in ahon vei mawk dia aw chihbang ka ngaihtuah kha thepthup hi. Zawlngai tuh ka hi peuhmah tave.

Lamet phaklouh chihzen hial ding ahiam, Sian lemgel hiam aw. Nitak khat kong hong ki kiuh a, hong lut in ka chih leh ka lawmnu Maman a honglut a, “Hoih, hong paidih iva pawtzual, ka ni teh van piak di ka nei” ahong chi guih hi. Keile manthou ka hihman in ka zui hi. A nite inn uh ka tun un, ka Umuan ana om mawk a, ka ki guih phial hi. Ka lawmnu nite naupa toh lawmte ana hi uhi. Kenle maingal bawl in ka houpih suk mawkmawk hi. Amin bang kava dong chat a, kisuanglah sim in a hon hilh hi. “Ka vang mubang nong ngaih aleh, itna simthu hong zawl ve” chihsuk mai di bang in a hoih hi. Himahleh, kei pentak, mibang a hoih leh siamna nei le hilou chi in ka kisit hi.

Mannu ni tapa, Khanlal kiang ah honna kanpan ta hi. Min ki theituah, ban ah, ki hou kha ka hihtakman un, aman leng honna veikha sam a hingei ding a, ka sulnung a hon zuun pan ta hi. Khanlal toh khatvei a hong lengla uhi. Huaizan tuh a nuamtel, himahleh, va pautam luat zukzuk khak ding ka lau a, ki ventheih tawp in kaki veng hi. I hihna in hon zillou chihbang in kei leh kei kaki zumpih hi. Ka Umuan, a pautam luatlouh hang in, thuvantang tuh a gensiam mahmah hi. Polhnop a hingei dia, ka innkuanpih ten leng a hong lenglat sung uh, nuam asa mahmah uhi. A paiding kuan un, kenleng kava zui pawt a gate kong tan va kha kawm in, “Umuan hong hohzel un aw” ka chi a, mangpha ka khak hi.

Mannu ka sam a, sun nileng in ka Umuan thu ka gen chimkei hial uhi. Mannu in leng theitam kei mahleh, “Umuan in, ka ulal kiang a honna kan ahi” chihtan hon genthei hi. Huai ka zaklel inleng, ka kipahna a lian mahmah hi. Nungak piching a kihihna toh, pasal neihding khawng I lungsim in gelkha sam ahihman in, lungtup hileh, Umuan ang a zaalding tuh utpen a kinei ahi peuhmah hi.

Hun in ka kal uh hon gawm hiai hiai in, a tawp in itna simthu ka hon lelta uhi. Atakgam ka hong tunhial uleh, ka kisitna hong lian mahmah hi. Ka Umuan ichih, laisiam pi leh milak a vallou ding khat, keituh, mibang a laisiam a mi tunna tan tung leng hilou, siamna leh chitna ding bangmah neilou ka hihna in hon ki koihniamsak mahmah hi. Himahleh, Umuan itna katan keiding in, ka kipahna pen leh ka deihpen ahihman in, hampha ka kisa hi.

Laisim a kuhkal a, khenchiang bang in, “keisang in na laisim na awlmohzaw!” chih khawng in ka nuaksan maimah khazel hi. Huai hun chiang in, “Hoih ei, I maban ding khualna hi ei, keile, nang kiang utmah ing” hon chihchiang in, hi kasa a, lemgel siam kasa mahmah hi. Numei te kipahna neu chikchik a hihbang in khasiatna leng neu chikchik ana hizel hi. Huchibang hun ah, ka Umuan in hon housiam thei mahmah a, ka lungnem na dingdan a thei mahmah hi.

Vangsiat huai hia, kipahhuai ahizaw hia, ka theikei. Ka it ka ngaih, ka Umuan, tuh mel et lel a leng sithuai lou ahihban ah, laisimna lam ah leng a siam mahmah a, nungakte lung a kuai zou mahmah hi. Himahleh, kei ngaihtuahna in a batna tan ah, hon it in ahon ngai thuk in ka thei a lungmuanna ka nei hi. Nungak, tangval tuak kihi a, khatvei bek na inn uah hong pawtleng hilou maw chi in ka Umuan ka dong hi. Aman leng, “eimahve, introduction kon bawl kei dia maw” hon chi a, nikhat tuh a Inn uah kava hohta ngei hi. Ka Umuan innkuanpihte ana siam mahmah ua, ka lung a nuam mahmah hi. Himahleh, ka lungsim tawng in hon kai kik a bang! Ka kisitna a lian deuhdeuh hi. Ka Umuan te innsung a lutdin ka kisit vungvung hi. Himahleh, hon itna ka muhchiang in, kipahna toh ka itna ziak in, khamuanna ka muzel hi.

Ki ngai kahi uh chih a sungte hon theihpih ka hita uhi. Hiai in ka kal uh hon suling zou mahmah hi. Ka Umuan pa’n kei bangleltak chi in honna mitsin pah ahingei ding a, huai nung ka Umuan omdan hong tuam sot in ka thei hi. Kei lou ngaihdang nei ahi hiam chi a ka dot chiang in, om in a genkei a himahleh, ka haihkei hial hi. Ka Umuan melhoihna haihvual ahihlouh man in, nungak tampi, a mai a puk ding uh chihleng ka haih kei. Himahleh, ka itna leh ka ngaihna a let luat man in khending simthu ka lelngam kei hi. Nanglou it ka neikei, nanglou ka lungkuai ding omlou. Chi in kei leh kei ka kisuhat zel hi.

A laisimna maban M.A. sunzom ding in khopi lam hon zotsan hi. Sep leh bawl ah mibang in siam kei mah leng, kei hihtheih khomkhom in siam ka gan zel hi. Ka Umuan in hon omlouhsan kal in ka ommun ah ginomtak in kana ngak ngitnget hi. Himahleh, ka Umuan in a lungsim a, a ngaihtuah ka theipha bankei. Ka lungtang hon sun mahmah tuh, nungak dang te’n ka Umuan hoih asak tuan uah hun hileh phave, kei kiang hilhial khawng a ki houtheihna ding lampi omhiam chia a contact number peuh uh hong nget sese un ka chi a nasak zou hial hi. Kei leh ka Umuan kal a itna guizaam mite’n bangchi muh uhiam, ka chi a, ka pona mahmah hi. Ka Umuan in milak a, ka ngaih ahi hon chi lou maimah adiam kachi a, ka khitui luanna khop apha hi.

Ka it ziak in ka thuak teitei a, thuak mualsuah ka sawm tinten hi. A innkuan te hon deihsaklouh thuaksuah ding a ka hanchiamlai lai in, ka Umuan in nungakdang hon ngaihsan sek maimah hi. Hihtheih, gentheih ka neikei, Ka itdan leh ka ngaihdan thu ka genlouh hihdingdan tuan ka thei kei. A kiang ah om ut leng leng, ka neih ka lam in a chin kei, ka siamna inleng ama siamna a ban kei hial. A innkuanpih te un, kei siamna neilou sang in, amah toh kituak hun ding, pilna siamna a leng mi phalahlou ding nungak melhoih mah a deihsak ua, huchibangmah in ka Umuan lungsim leng huaimah hingeiding in ka koih hi.

Ka Umuan ading a ka ginomna, ka kipiakna te a thawn a beimai ding a hihlam, ka ngaihtuahna ah a omkha zenzen kei. Himahleh, hun a sawt dungzui in, khovel siamna pilna te ziak in ka kal uh van leh lei bang in hong ki khai hiai hiai hi. Ut leh utlouh a, haih vual hilou ahihman in, ka lungkiakthu ka gen hi. Himahleh, Ka Umuan in a lungsim ningkil a kei hon neikha sam ahi dia, a utkei hi. A laisin zoudek a, a zoh hunchiang a, lawmlou omlou, chia a lemtang bang a kipi ding chihbang a hon genchiang in, kei a hai chihmahtak in, lem kasakpih suk zel a, ka Umuan ading in zaw chi in, ka vang ningbang zounuam te kana nawlnawl sam hi. Himahleh, ka lamet a bangkei zel, kipahna in hon tuamdek ka chihchiang in koi kil hiam apan in, thu zaknop huailou pi khat zak ding hong tung zel a, Umuan in zi neidek, chih khawng… ka bil in a amthei mahmah a, himahleh ka lohdingdan tuan ka thei kei.

A hunsawng teng a ki it ki ngai a om hun te lou zaw, lunggimna leh khasiat huai na ngen in hon tuam chih ka ngaihtuah khe phing hi. Misiam, mi hoih, mi lal te ading a kei phiangsan a chinding hi mahmah lou kei leltak vele, chih ka ngaihtuah khia hi. Achang in hai kakisa a, kei leh kei ki gawt bang in kaki ngai a, ka khasiatna ding lel a hun kana piak kachisek hi. Sian laitan hiam aw, Zinmang Dougal nanzohlouh ziak hiam… atawp in ka it ka ngaih mahmah ka Umuan in, kei sang a siamzaw leh melet a leng chinzaw nungak hoih mahmah, hon na neihsan hiau hi. Bang ka genta dia… Kap in mau leng lah phatuam lou, khasia kisa in thazoi in omleng lah phatuam lou. Maizumna ngen in ka kidim hi.

Ka hinkhua, mi abang a sang ahikei, mideih tak leh mi etlah tak hilou kahi chi a lamet phaklouh ding pi mitsuan kha kahi chih tuh ka kihehnep theihna omsun ahi. Bangziak a..chichi a duangvul in omleng, tua ka haina sang a haizaw sem ding ka hi chih ka theih ziak a, ka hinkhua in bahlam a manoh louhna ding a ka dinmun, ka hihna a ka ki lungkimsak a ngai mai hi.

 

I lenna vangkhua tualnuam ah ngaih nanglou singdang omlou, Itna simthu I lel a, kei din ka lungnop kichinna hi.

Khending simthu lellou nunnuam heikhawm leng, lungtup tuibang ching dia mawngbang ki koi leng maw…

Lehluan Simthu lel maw ka tantawk!

Siam Tonsing © thaikawitongluan.com

Add comment


Security code
Refresh

© 2017. Thaikawitongluan.

We have 6 guests and no members online