Stories

MI DAWILOK PA

MI DAWILOK PA

By:- Kattie Mawite | www.thaikawitongluan.com

Tangvalte, nungak ngaih leh hoihsak neikha lou na om uhia? Neikha lou nahihleh bel,a bukim lou deuh na hi de aw, chih uthuai ding hi. A ziak bel, Pathian in numei leh pasal kiteng ding leh mit kilatuah a, ki-it thei dinga a ahon siam ahih ziak in.
Himahleh, huchia ngaih guk leh hoihsak guk, amah na houpih khak chianga na hinkhua nuam hulhul leh zangkhai tuan mahmah hi a na theihte bang na loh a? Kitheihmoh bawl maimah nahi hia? Ahihkeileh 'direct' pah mai? Ahihkei leh vel nilouh nahi hia?

Hiai ah mibuai khat ka om hi. Na hon panpih theih ua leh na hon panpih uh ka hon ngen masa hi. Ka buaina hiai bang ahi.

'Nungak khat ka ngai a, ka ngaih mahmah hang in ka ngaihna leh itna thu amah kiang ah ka gen ngamkei hi'.

A hong kipat dan hiai bang a hi.

Whatsapp group member tamlou chik a omna khat ah ka omkha hi. Ka omnung sawtlou in, adminte lak a khat in tua ka migen nu a hon add lut hi. Tua group ahihleh, thutak lua genna a hikei a, zuau leh thu thanghuai leh limlak thanghuai bel a kiphal kei. A kimeltheih ka tamkei ua, kei nasan in leng mi khat hiam lel atak in ka thei hi.

Group nuamtak ahi a, chiamnuih siangthou tak in nuamtak in ka houlim ua, kei bang ngial thawlmut khat leh paunuam, lawm ngaina tak khat kahihman in nuam kasa a, ka hun awl huai group ah ka zangbei hilhial thei hi.

Kei tanchin leh dinmun hichi bang ahi. Laisiamna lam ah mi sang in ka niamzaw. Khosakna ah ngawl zenlou. Mel leh puam ah alaihawl pawl. Din sang dan ah leng 5+feet. Chiamnuih hat kahih hang in mi zumthei tak kahi a, lawm ka ngaihnat hang in lawmbawl ka siamkei a, lawm thak ka nei vang mahmah. Ahi a, ka lawm neih sunsunte bel ka it in ka ngaina mahmah hi.

Ka gen bang in tua ka gen group ah nuam ka sathei mahmah uhi. Ka migennu ngei leng, kei bang deuh hi ding in ka gingta. A paunuam a, chiamnuih bang a siam petmah hi. Chiamnuih leng a dawl thei a, group khawng a heh vut chihte a ching hetkei. Nuamsa chiat ka hi ding ua, kuamah group left chih leng a om kholkei hi.

Nikhat, bang thu thei a hiam chih zaw ka theikei, ka migen nun a hon inbox mawk hi. Mimal buaina a neihte a hon kum nilouh mawk a, kei ngaihdan leh hoihsak dan khawng hon dong hi. Kenle'ng mi'n hon kum chu, chi in chitak deuhmai in ka hihtheih tawp in ka kum a, ka houpih sam hi. Thutak a ka kihoupih patna uleh mimal a ka kihou patna uh ahi hi.

Huai nung mimal in ka kihou nawnkei vengveng uhi. Kenleng ka ngaihsak kei a, aman leng a hon ngaihsak tuankei. Group ah bel a ngeingei in ka houlim un ka chiak lai thou uhi.

Kha bangzahhiam a hong liam nung in khatvei a hon houpih nawn a, huai hun in ka in uleh omna leh nasep khawng a hon dong a kenleng im nei hetlou in ka hihna ka hilh hi. Amah leng a hihna leh nasep khawng ka dong hi. Aman leng zuau a hon hilh ka gingta kei.

Kum khawng ka kidot chiang un, kei sanga naupang zaw deuh lel ahihdan ka hon theikhia hi.

Huainung khawl vengveng nawn. Kumlui September lak a hi a, vuah a hah zuk mahmah lai ahi. Nasem a kuan theilou kahihman in chim kisa lua in ka inbox kha a, a online hunhun in hon thukpah hi. Mimal ka kihou chiang un ka chitak mahmah ua, kou di ka bangkei zozen uhi. Mi chitak mahmah hi ding in gintakna khat ka  neita hi.

Huchi in, mimal in ka hong kihou mun zawdeuh ta uhi. Munlua bel a hikei. A kal simna dan a zang ka bang uh. Huaileng nitak khat khawng a hilel hi.

Huchih chiang in bel ka kilawmbawl mahmah ta uhi. Himahleh mel ka kimutuah naikei uh. Facebook min gelhdan khawng group a ka kihilhsa uh ahihman in a mel bel ka theita a, aman leng kei mel a theitum huntawk ta. Atak in ka kimukha naikei uh chih thu lel ahi.

Hunte hong pailiam zel in, demonetization in hon lap hi. Huaite khawng gen in group ah ka chiak ngei un ka chiak nilouh lai uhi. Huai hunlai in bel kuapeuhmah, a zawng hi in a hau hitaleh, kisumbuai chiat a, ahau te buai zawsem hi a theih in om hi.

December kha a hong hi a, phalbi leng a uang mahmah ta hi. Huchih lai in Tangnuam a ka Papi' ta a lianpen in zi nei dek ahihman in Lamka ka hong pha hi. Lamka ka phak ding thu leng group ah ka gen a, chiamnuih in ah, na hong pawt ding, kou in a leng na hong hoh ding ahi, chi khawng in hon chial souhsouh ua, kenleng hoh tham ding kahih dan khawng ka gen a, zinpak khawng kingen in nuam kasa mahmah uhi.

Lamka ah ka om petmah ta ua, sum mah kibuai pah hiven ATM khawng mitkha ah hong lang pah hi. Himahleh mi a tam luat ziak in huai a va din netnot a, dakkal li dakkal nga va zatbei ding thasial huai mahmah hi. Huai leng sang nih chauh lakhe ding hilai!

Lamka a tanau a tamzaw om ahihna ah nuam kasa mahmah hi. Kitenna bang leng nuamtak in ka zouthei uhi. 'Keile khatvei tei zi bang neisam di hi inga.....' Chih khawng ka ngaihtuahna ah a hong lut neuhneuh hi. 'Tu dinmun a lah ngaihzawng le kineilou hi a, hun zaw sawt kivei kha maithei' chi bang in ka ngaihtuah hi.

Ziltawpni ahi a, District Transport Office a ka driving license renew ding in ka hoh a, auto in ka tuang suk hi.

Hawkdak deuh ka hi ding a, ka migen nu SBI Main Branch mai a ding ka mukha chitchiat hi. A limlak ka muhmuh sa ahihman in ka theitum pah hi. Aman bel a hon muh ka gingta kei.

Kei hohna ah leng mi tam ahihman in ka group mah uah ka lut nawn a, tua nu mukha kahihdan ka gen hi. Aman leng a heh chih dandeuh in a hong nuakbawl a, houpih tak leng hilou ka hi ding maw na hon houpih kei a, chi khawng in a hon gen hi. Chiamnuih thutaka agen ahi chih ka man ngal hi.

Bangtan hiam nung in kei vai ka zou a, auto mah in ka paikik tou hi.

Ka gennu ana omlai a leh houpih ding chih lungsim toh tuangtou kahi hi. Ka dak giaugiau a, mi ki-queue netnotna mun a ana dinglai ahihman in kei leng ka kum a, kava naih bawl hi.

Hon lamen hetlou a hi ding a, muangchang tak in ding eu-au maimah hi. A tanna ding chu a gamlat chi nawnkei. Keileng va pai nai in, amah' kiang ka tun tak in awl in a min in kava sam hiau hi. A hon za pah a, hong kihei in, lamdang sak chi tak in a hon en heihuai hi. A hon muh in a hon theipah chih ka thei, group a ka thugen uh hon zom thei ngal ahihman in.

Chibai khawng kibuk in ka kinuihsan tuah heuhau ua, huai hun apan ahi a puaklek khat a om. Hohna di neilai kahihleh hihlouh khawng a hon dong a, nei nawnlou kahihdan leh, amah ka houpih ut ziak liuliau a auto tuangsuak lou kahihdan ka hilh in. Ka ngaihtuahna a hi hiam chih zaw ka theikei. A mel ah kipahna mel hong dawk hi in ka mu hi.

Milak a va huchi kihou nuam khollou ahihman in kenleng sawtlou nung in ka paisan hi.

Tua nu din san dan feet 5.2 khawng a hi a, a mel a se kei. A lim a sang mah in a hoihzaw. A thau lawkei a, lah a gawng se tuankei. A kisaphut hun litlet hi.

Khekol lum teng in, jumper a vut rong sim khiuhkheuh a silh a, amah a ngou heuhau toh a kilawm mahmah hi.

Tunitan in huai a ka kihoulai ua amelsuah leh a kicheina ka mangngilh theikei.
A melhoih ziak a ngai ka maw? A tak a ka muh ma in lah vei inle ka neikha hetkei a. A silh-le-ten kilawm ziak in maw? Huai chu theih ngeihlouh khat va ngaih hial na din gentham ching kasa kei.

Huaini a ka muhni apan ka ngaihtuahna a la khin ngal. Mak ka kisa petmah. Ama inle ka houpih kha tham a, bangmah in ka ngai kei a. Tua bang chi kahia? Chi in ka lungsim in ka kidong mun mahmah hi. Huai nung sang amah toh kihou tuh kei a ding a kipahna thupipente lak a khat a hita hi.

Himahleh amah kiang ah kamkhat in leng ka genkha kei a, ngeina bang in ka om ngei in ka om thou hi. Amah leng tua bang mah in.

Huai nung seppatni in Imphal lam ka kiksuk nawn hi. Huai nung sang ka lungsim a luah den mai hi. A nuih mai selsal bang ka mitkha ah a lang mun mahmah a, a lusip apan a khetaw tan ka ngaihtuahna in a zuisuak dundun hial sek hi.

Kei kia ka om khak chiang in, amah toh kihou bang a kingaihtuah in ka nuikha heuhau zel a, ka sungkuan ten a hon muhkhak chiang un lamdang hon sa thei mahmah uhi.

Nu leh pa, u leh naute toh omkhawm kahihhang in kei a kisam om hi in ka thei heuhuau den hi. Khristmas leh kumthak leng nidang a kilawp thei lua hina pi, nuam ahih lamlam leng ka theikei.

A chik a ka kithuahpih le hilou, pianpih sanggam leh tanau nai, sisan a kinaihna nei leng hilou huchitel a ka ngaihtuah leh ka miss tuntun pen keileng lamdang ka kisa.

Tangval khat hihna zar in nungak bang kana nei kha sam hi. Himahleh huaite sang in leng huai khatvei lel ka houpih khak minu'n ka ngaihtuahna nakpitak in a luah dim zaw mawk hi.

Ngai tuntun hipen mai in ka kithei. Amah toh omkhawm a, itna simthu lel ding bang ka ngaihtuahna ah hong lian thei mahmah hi.

Alangkhat a lah, kei bang leltak, pilna siamna neilou, neih le lam a mipha leng hisam lou, kuaman hon deihkei ding. Ka mel bek hoih leh..... Chih bang ngaihtuahna ah a lut zungzung sek hi. Himahleh ka lungtang tawng apan amah ka paaikhe thei mahmah kei.

Lamka bang ka ngaina tuntun hial a, va zin kia ka ut hi. Himahleh sum haksat ziak leh, hih di om leng hilou ahihna ah zin mawk thei dinmun in ka om kei. Himahleh ka lunggulh mahmah mai hi.

Sum lah buai sim lai, economic blockade lah pai lailai ahihman in khosakna bang ah leng haksatna lianpi kituak sawnsawn lai hi.

Gas bang tasam ta, nektak man lah khang deuhdeuh mai ahihman in haksa ka sa gu mahmah uhi. Inkuan a solkal pang sawk omlou, ka pa lah sing lam nasem, kei lah khut siam vaklou kahihman in cement tok khawng a kuan lel kahi hi.

Nasep di bang lah om gige lou zomah ahihna ah, khosakna haksa nalailai, nawngkai diak lai hi.

January kha bei kuan in khatvei ka Papite'n hon houpih ua, Mizoram apan a lak uh gas cylinder khat om ahihdan a hon hilh ua, mikhat in hong la un chi in hon sam hi. A gas cylinder lamlam sang in Lamka hohna di hunlem om chi in kana kipak mahmah phet hi.

Ka pa'n a hon sawl pah ngei a, thumu kisa mahmah in, keileng kilawp tak in ka kuan hi. Himahleh ka ngaih ziak a hi ding a, zahtak gawp kahihman in Lamka pha ding kahihdan ka kamteh kha hetkei hi. Gen lengle kua' kipahna hi ding in ka kikoih kei. Hoh ta vanglak, nikhat bek nituang ka sawm hi. Huai bel, tua nu muhkhak ka kinep ziak lel ahi.

Winger a tuang in ka kuan ngei a, dakkal khat valzek lel kitai himahleh sawt kasa mahmah hi. Tuma a ka muhna leh ka kihouna mun uh bang ka muhkhak louh ding lau in ka dak gawkgawk mai hi.


Ana om nawn ding peuh in ka ngaihtuah a, kantuntouh hial tak in kuamah leng ana omlou in ana awng hiuhiau maimah hi. A khonung in sum omlou ahihdan ka theikhia hi.

A in ua hoh ding in lah ka ngamkei a, lah amah mulou a ka kik ding ka ngaingam kei. Ka tun nitak tuh call a, a in ua va hoh ding leh hohlouh ding saikak na in ka zangbei hilhial hi.

A zing nawn in ka upa'n bazar hoh ding in hon zawn a, kava zui hi. Auto a tuang suk in, tedim road ah ka taisuk uhi. Ka muhnawn khak leh chi in ka mit ka taivial sak den a, lamtawn in ka dak nilouh hi.

Bazar pha dingkuan in ka mit in a muhnop pen a muta. Lamgei ah amah kia in ana ding a, ka kinepphak hetlouh in aman leng a hon mu a, a hon nuihsan silsial hi.
Auto khaam a, kumkhia a va houpih ka ut petmah. Himahleh a hithei kei. Munuam lai mah leng, hon tailiampih maimah hi. Kinunghei gawkgawk ding lah haihuai bang sa kahihman in khelah pi in ka kiheisan ta hi.

Ka ngaihtuahna a luahzou ngei mai. Ka upa hon houpihna bang leng ka zakei khanak a, nihvei thumvei bang a gentuan ngai sek hi. Lamdang hon sasim a, bangmah bel a gen kei.

Ka kiklam chiang un ana om lai de aw? Banghih a amah chauh huai a ding a de aw? Chihte bang kei buaina ana hi khemkhem zel hi.

Vangsiat huai tak in ka kiklam un ana om nawnkei. Deihkhop kei mah leng, a mel mukha kahihman in ka lungkim veve a, nitak leng lungmuang tak in inn ah ka om mai hi
A zing in ka inn lam uah ka kik hi.

Ka gen bang in tunitan in group ah ka omkhawm den ua,  nidang sang mah in leng mimal tak in ka kihou tam zaw tham ta uhi.

Niteng in kihou hial kei mah le ung, nikhat hal in bel ka kihou gige uhi. Nuam kasa a, hun leng paisot hi in ka thei. Nitak lou lah kihouna ding hun neilou kahihman un, kihou pan ka kichih chiang un zan ana sawt kan khanak sek hi.

Ka kihou tam deuhdeuh uh dungzui in khosakdan leh duh leh deih, hoihsak leh saklouh khawng ka hong kithei tam sem ua, ka ngaih luat ziak a hi hiam a, kei toh bang kituak kana kisa mahmah a, ka deihna leh itna a khang sem hi in ka thei hi.

Khatvei ka nasepna a ka kuanpih zel,papi khat in hon zetheih in ka buaina hon dong a, kenleng imlou in ka gen hi. Ka dinmun niam ka sak dan, khosak haksa, pilna siamna ka neihlouh ziak a ka kisit dan leh amah ka it leh veidan ka hilh hi.

Aman leng hon awlmoh mahmah hi in ka thei a, hon kum hoih mahmah a, hon khamuan mahmah hi in ka thei. Hichi in a hon gen hi. "Numei i chih ziak in mitsang leh a hoih, neizou leh mipil kia en a hipah kei uh. Itna diktak a itte, amau duat leh deihthoh tak a kem ding, a haksatna uh theisiam ding leh, a khasiat ni leh haksatna a tuah ni ua itna toh hehnemtu ding te telzaw uh ahi. Numei pil in neih le lam, mel le puam khawng en masa lou ahi uh. Mihoih, zu le sa a kibuallou, amau ittu diktakte mah telzaw uh ahi. Bang a nang na kisit na? Gen inla, hoihtak in na itna kum lechin a hon nial ka gingta kei" chi in lamet huai tak in hon gen hi.

A hon thugente a khonung sawtpi leh tutan in ka lungsim ah a mang naikei.
Amahnu ngei leng, kihong mahmah hi in ka thei.

Ka gen dek sek a, himahleh ka melhmang zel. Ka ngaihtuah chiang in lah, zou lah keileng kilawm, a hon houpih dan apan in. Himahleh mi' kamsiam lel a ka kithalseh khak ding ka lau zel.

Ka lungtang tawng a itna in lah a hon phu teitei a, kei kisitna in a hon kham zel. Ka buai petmah mai hi. Kei kizephawk man in aman leng thei di bang in ka ngaihtuah a, a chang in ka zum tuntun hi.

Genkhe mai leng, hon pom lelah hampha, hon pomkei lelah ka puak zang zaw ding in ka ngaihtuah. A langkhat a lah, a ngaihdan lou hihenla, aman lawmta tan lel a ana ngaihtuah bang hileh, ka kal uh nuamloupi a atan ding ka lau zel.

Ka sawm sung leng a sawt ta. Himahleh genkhe ngam nai tuanlou in ka om nilouh. Hon daltu pen bel, amau tuh khosakna hi in pilna siamna lam ah hitaleh, kou tunglam pek ate a hih ziak uh a hipen mai. Banah, whatsapp tungtawn a kitheikha maimai, nihvei lel hiam atak a kimukha pan, chi in hon houngaih sak diam? Chih bang ka lungsim ah lian mahmah nawn hi.

A khenchiang in, pa bang ka kisakei a, a khenchiang in genlouh mai hoih kasa. Huai ka chih chiang in ka lungtang tawng apan, "Hiai minu sang a na itzawk ding mi om ding a lamen lai nahi hia? Amah lungsim na thei a maw na huchi lauhthawng? Mi dawilok pa" chi a hong kihoupih hi in ka thei zel hi.

Ka it petmah. Ka deih petmah. Ngaih leng ka ngai. Huai kawmkal ah, kei a kisitna, niamzaw kisakna leh nawlkhin a om ding lauhna in a hon tuam zel.

Ka itna thu gen leng, a hon sang diam?

Aw……… duangkuai lianu. Ithuai hina tel chia. Na siang ah itna simthu hong lel leng, nau bang non sang ngam diam??

 © thaikawitongluan.com

Add comment


Security code
Refresh

© 2017. Thaikawitongluan.

We have 53 guests and no members online