Stories

VANGNGAIH VANGNGAIH III

VANGNGAIH…VANGNGAIH

© thaikawitongluan.com

A tak a om hinkhua, Simtute lungtai na ding a phuahtawm sawn a ki gelh ahi.

Zangiak zou, zingkal in ka pai ngal hi. A nizan a hun nuam ka zat uh ka lungsim ah a thaamden hi. Ka kal uah bangteng hong tung ta lehleng, ka ki itna uh zaw kua hon khenvual hi lou ahi ka chisim hi. Ahi a maban bangmah ka genthei kei, hihna kibang ka hihna un lungsim khat ah hon nuamsakkei hi. Himahleh tuhun inbel ka nanau toh ka ki ngaihnatna mah uh a thupipen in ka koih hi.

Inn ka tung a, annnek hun nailou deuh ahihman in TV ka en hi. Himahleh ka TV et ah ka lunglut kha kei himhim. Ka nanau toh ka kihouna te uh ka leh ngaihtuah nilouh hi. Ka phone msg ahong gingkauh a ka et leh, ka nanau in Uu? Chikawm a duattak ahon msg a hi a ka dawngkikpah hi. Ka sungte’n ann thuk uh ahihlam theina zeenpi in ka msg lam ka buaipih daih hi. A zannitak a ka va gaih a zumlua ka hi ngei dia, ka omdan leh ka pautamlouhdan khong hon gen a, ka kisuanglah gu mahmah hi. Tuban huchi zum ngailou, huchidan a na zum nawn mahmah louh di, kei adia nuamlou ahi ahon chi zomah a, ka gendi a bei deuhdeuh hi. Koimun peuh ah, ka zumhatna in hon vuallelsak gige mah ahi; insnsung hi in lawm leh vual thuahna ah hitaleh, ka zumna ziak in ka lawmte’n hon thazoh mahmah uhi.

Ka zumhat leh ka pautawm mahmah hang in, ka nanau in hon theisiam mahmah a, kei a din nuamtuam mahmah hi. Hon duat ahon deihsak a hampha kakisa mahmah hi. Ama itna ka tankhak ka ngaihtuahchiang in vangpha ka kisa sawnsawn hi. Ka nanau toh ka ki houtam zohphot uleh ka ngaihna a lian semsem hi. Hun tam zaw ah a kiang a o mom ka ut mai a, himahleh ka omchiang inlah gendi theilou pen ka hi zel hi. Ka lungngaihna leh khasiatna omchiang ahon hehnem tu pen leh hon awlmoh pen a suahman in ka ngaina diak hi.

Ka hinkhua kana zatkhelh khak ziak in mi muanngamna ka neihte ka sumang a, huai in keilungsim hon sukip loukhasek in ka thei hi. Hiaiziakmah leng a hiding, a chang a ka nanau toh ka ki hehsan khak nak uh. Ka kihehsuahkhak hun chaing un leng kei a lungsim piching zaw di pen sang in ka nanau in hon hehnem zawdaih a ka leh ngaihtuah kikchiang in ka ki sit mahmah hun a tam hi. Kei hetluat leh lungnop louhluat di a lauhna lam in ngaihdam ahon leh nget gige a, ka naunau ahihkhak mahmah leng khovel a mi hampha pen kakisa hi. Bangchi zawngteng in ki suheh kha sek in om mahle ung, ka ki itpetmah ua ka ki ngai petmah uhi.

Ka nanau laisim a kuhkal a, laisiam thei mahmah khat leng ahi. Damlouh na thupi lua a neihkei nak leh skulkai a thulh ngeikei hi. A skul kai hun chiang in ka chim thei mahmah hi. Lawm dangte polh ding om mahleh ka lungsim in thildang ngaihtuahlou in ka nanau ahong lang gige hi. A skul kuan di chiang in message hon khakzel a, Uu lungsim nuam in ana om in aw, kong tun kikchiang in kon text pah di aw.. chi in a kuanzel hi. Kei mama in afelzosek a ka zahkaina a ki langdiak abang. Sunchiang in ka ki textna te uh ka bansim kik zel a, suntanglai chilou in kana lungleng lo vungvung sek hi. Nuihzathuai simpi ka genkhahna te uh bang ka simkik khak chiang in ka guk nuih heuhau zel hi. Skul kai tawp inn a tunchiang in kei hon khualna mah in a phone lapah in ahon text a tungta ahihdan hon hilh sek hi. A formte na tan khekman lou zel a kei hon message ahihdante khong hon gen chiang in ka ngaihna ahon puangsak zou hial hi. Ka nanau kei a dia a kipiakzoh na lamdang bang kasa lehlam zezen hi. Nitak ahong hi a lah, a laisim hunkal kana ngak a, ngaklahhuai ka sa thei mahmah hi. Ka nanau toh hun zangkhawm hiam ka ki text nak uh leh, ka poimoh dang omlou hitop mai in ka om hi. Lungsimnuam tak a ka ki hou chiang un tuh a nuam viau na a, hehna hiam lungsimnuamlou a ka omkhak chiang un ka nanau hon itna muphalou hileh kilawm khop in ka house zialzial khasek hi.

Nikhat ka nanau toh ka pawtkhawm ua, huai nib el nidangteng sang in adan ka omzaw hi. Ka zumna inna nusezek ka hi ngei dia, ka nanau inle nuam a satuam mahmah hi. Mun thoveng khat ah ka khawl ua, tutna ding awnglou hiawmtak in ka tukhawm tittet uhi. Thu tuamtuam ka gen ua aching in ka nanau in chiamnuih hon bawl in ka nui khawm lalaih uhi. Ka angsung ah ka nanau ka koibelh a aman leng hon kawi in zingchiang omnawnlou ding bang sak hial in om hi. Kou gel ka omkhawm chiang un hun in hon noh a bang sese hi. Ki khelah pipi in hun ka zangbei ua, a paihak khak sim chiang bang in a sungten ana tai sek uh hidi hiven, ahon hilhzel a, himahleh keiziak a taithuak poi salou ahihdan bang hon gen hi.

Hichituk a ki it ki ngai a ka om hun un leng kei lungsim ginlahna in midang toh hon kop a himaimah dia aw chihkhawng ka ngaihtuah maimah a, ka genchiang in ahon hehsan thei mahmah a, kei huchi bang mi ka hikei. Mi kop didan le ka theikei, lungsim nih nei lah kihi lou a ahon chihkhum in, ngaihkhat ka nei a ginomtak in ka ngai. Nangmah na hi kon ngaih midang ka ngaikei, ahonchi hi. A kamsuak te ka zakchiang in ka lungsim a nuam a thudang ka ki kup pih zel hi.

Innmun a sep na di omngellou ahihman in mundang khawng a paikhiak a sep theih omleh ka lunggulh a, ka ki lamet bang in mundang ah kava paikhe thei khong hi.

Ka lawmnu Aizawl a om kiang ah ka gen leh hon zawlmohna toh,”hong pai ou, sepna di I zongkhawm dia, innluah ding bang I zongkhawm dia sepdi muhlah zen in omkei ni. Christmas hun chia leng paikhawmthei zel di ihi” hon chih leh ka lung a nuamtuam mahmah hi. Ka innkuanpih te’n leng ka utna hon dal hetlou in hon phal vanglak u aka kipak sawnsawn hi. Kei lou ka lawmdang nih ka zawn a, a mautoh ka zin uhi. Ka nanau thudot inleng ka neise kei a, bang lungsim a neidiam chihleng ka thei kei. Keimah utna leh lemsakna a zinkhia tuh kahi peuhmah a…

Ka nanu kiang ah sepna di zong dia zindi ka hi chih ka hilh ta ngei a, hichia kalsuan ut a lungsim nei thei chia hon kipahpihsim di kasak leh, a ngaihtuahlouh lamtak ana hikha daih hi. Kei lah ka utna ahihtoh, ka lungsim in a khentatkhit ahih kawmkawm in ka thulh utkei hi. Ka nanau in ahon phalkei chihtuh a melet mai in leng ki lang hi. Himahleh ka utna hon tangkham ngamlou ahihman in,”Na utna zaw kon kham teitei theikei. Himahleh na omna ah hoihtak in nava om dia, ginomtak in va khosa in aw…” chi in kamnem a suah a, ka lung anuam sak tuan mahmah hi. Kei kipahna di lam ka nanau in a ngaihtuah leh a genkhiak chiang in ka kipak a, himahleh kei lam ah ka nanau ka sukkipahdan di ka ngaihtuah kik chiang in avaang hial hi.

Ka zinni ding hong tung dek petmah a hihman in, ka nanau toh hun zatkhop uthuai chi in ki muhtheih didan ka geel ua, ka zinnima thohtanni suunhun in ka kimu uhi. A zingchiang a zinsan ding ka hihman in ka kimuh ni un tuh ka lungsim a gik in a gik a ka oma nuamzou kei hial hi. Zinsan leng ka ki muh ut hun ua ki mu pahpah theilou di ka hi uh chih khawng peuh ngaihtuah in ka ki su gim mahmah hi. Mun khat ah ka tukhawm ua a pau zawsam omlou in ka ki khiaklahna un mun ahong nei mahmah hi.Hichibang dinmun a ka din uh keiziak a hi chih ka haihkei himahleh ka maban di khualna a sep theihtheih sepding zong a zinkhe dia kisa ka hihman in adiklou lua in ka ngai tuan kei hi. Himahleh kaki khiaklahna uh tuh gensiam ahaksa mahmah.Ka nanau ka zinsak di ki awilua a honsakdan a hon gen a, kenleng,”I lungsim nang kiang a ateng det nak leh bang a poi dia nau? I taksa nang kiang ah om gige khol kei lehleng ka chih thu a” ka chih leh, "na kamsiam ka tantok hi uu” a hon chi hi. “huai lam thu ah bel ken nang non itna sang in kon itna a lian zawtham ding, nang toh omkhom a minute khat sung lel khosak tuh midang toh kumkhat om khom sang in ka tel zaw”,ka chi a, pausak man lou in “nau…??” chi kom in ka nanau khut ka len a amuk ka tawpsak a, a man leng hon na tawp thuk teisam hi. Uu nang hon it taktak maw chi’n hon dong a, kon it taktak, ka damsung teng in ka hon it gige ding a, nang na ginom nakleh zaw a hakksa ding om di’n ka gingta kei ka chi hi. A hon muandan a hon hilh a, ken bel,”Nau, nang lah laisiam pi khat hichi a, hon zahtak lua kahi. Tunungchiang a na zaarzou tu penpen a hampha hidi eive…”ka chih leh, “hon huchi phatphat ngai kei uu, zarzoh nang a om leh nang mah na hi a zarzou tu ding" a hon chi a, ka lungsim tawng ah tuh bang a ka ngaihtuah pen ka thei kei. A zarzou kha ding a kinepna nei ka hi hia neilou ka hihia chih leng ka ngaihtuah kha chitchiat kei.Hun ana paihatlua ahi hiam ah, nitaklam dak 4:00 bang a na gingman a innlam ka zot uh a hong hunta zel mai hi.

 © thaikawitongluan.com

 PART - I | PART - II

Add comment


Security code
Refresh

© 2017. Thaikawitongluan.

We have 60 guests and no members online