Stories

'MAWLTUAL' KA HI ZENZEN KEI

'Mawltual' Ka Hi Zenzen Kei

K Lianthansang | www.thaikawitongluan.com

Nuthawi himahleng, pasal lunggulh law vungvung a, taksa-pumpi zanga zol hial di'n zaw hon gingta dah un!. Kei ut ziak a nuthawi leng ka hisam kei. Ka kum et in zaw naupang mah e, himahleh n'on gintakdan uh ka hikei chih k'on gen masa ding.

Khut-le-khe banah lungsim ngaihtuahna bukim takin ka na piang sam. Nungak(tulai a dia kum 15 le nungak hita) ka hong hi a, tangval hoihsak leng k'on nei tou sam. Kum 19 ka hih in, ka nu'n leng tangval sai ka hihdan hon theigu a, hon thuhilh zelzel hi(pilvanna di tampi om ahihdan tel in. Ka pa damlai hileh leng hon thuhilh thou dingin ka gingta). Huai hun in, Bible zil pasal khat toh ka kingai ua, ka nu'n leng hon deihsak mahmah hi'n ka thei.

Hunte hong paizel a, ka tangvalpa toh ka kithuzak vaang hiaihiai uhi. Aziak ahihleh, lehkha sim di ahauh luat ziak ahi. Aman bel, " Gin-om takin ana om in la, ke'n leng kuhkal takin Bible kon zil ding. Kei a dia ana om gige di na hi chih ka theih ziak in, lai hoihtak in ka simthei zel " chih khawng, hon gensek tangpi ahi(ka kihoukhak sunsun chiang un).

Huchia hun hong paizel in, pasal tuamtuam toh kong kimaikha tou uhi. Lungsim naupang chih mahtak, pasal muhkhak peuh a meel-le-puam banah a figure khawng un ka en pah. Mel et a kisetuan hetlou ahihna ah, hon deih leng a tam a, ken ka deih leng a tam mahmah. Tangval nei ka hihlam bang ka kitheikei dek sek.

Nikhat, keikia inn a ka omlai in, facebook a ka kihoupihsek, a limlak khawng ka va comment sek khat hong hoh hi. Ama a, ka inn uh omna mun ka hilhsa ahihman in, lamdang ka sa kei. A taksa ahoih mahmah mai a, asam ahihleh C. Ronaldo' a toh a kibang. Khekol bel a tengkip zou taktak kei. Himahleh, a taksa hoihna leh a melhoihna ziakin ka mit hon la mahmah mai a, a painung tanpha in leng, a malam a ka kihouna uh sanga thuuk zaw in ka kihouta uhi. Hiai hun in zaw, lungmuang taka Bible zil a om, ka tangvalpa ka phawkpha nawn kei.

Ka nu'n le hon thei a, hon tai mahleh, a thu, laak di'n ka koih nawn himhim kei. Tua ka pasal muhthak pa'n hon zoulua a hingei dia, ka laisimna lam bang a bahloh hial hi. Bang chituk in ngai mahleng, ka sianthouna bel hon suknitsak zou tuan kei. Kiteen chianga ding chi'n ka kembit thiinthen hi.

Nitak khat, hong hoh sawm mahleh ka nu'n hon deihsaklouhlam atheih di ka deihlouh ziakin, " Kei kong pawtkhe mai dia, pawtkhawm zaw ni(khawlak ah kiheel zaw ni)" chi'n ka dawng hi. Kei leng kisa in ka pawtkheta a, phone leng ka tawi sese kei. Ka pawtkhiat dek in bel, lawmte' inn a hoh didan in ka kigen hi.

Khawlak dung teng ah ka kizui ua, zan sawtpi hun zangkhawm ka hihlam uh leng ka phawkkei uhi. A phone a sana hon etleh dak 10pm lam ana gingman mawk hi. Phone tawi hileng bel ka sungte'n hon call khin tham ding uh. Huai nitak, sawt pawtlua ka hihman in, inn pai di ka huphulh mahmah ta hi. Ka tangvalpa'n, " Huchia, na sungte'n hon tai di uh laulua na hihleh, hon zui mai ve leh. Na lawmnu i hilh dia, na sungte kiah ana gen dia himai eivoi" hon chi a, tua dan in ka kizuita uhi.

Chikmah a ka lutngeilouhna a lut a, ka lupkhak ngeilouhna a va lum ka hihman in, ka ihmu thei kei zozen. Ka pasal bel, sawtlou nungun  ihmutpah thei hi. Zingkal hong hi a, thohkhiat pah di lah hilou, va lupdet di lah hihiallou dan in ka omkha leiluai; ka pasal phawng in, amah ka thoukhe sak masa hi. Aman leng,  a nu leh pa kiangah thil omden gen a, huchi'n kei leng ka thoukheta hi. Ihmulou chih mahtak, mit bang sansim gelgual in ka om a,anuam hetkei. A zing mah a mou en a hong hohte' chiamnuih bawlna hoihpen in a pang zomah!(ka mit)

A tom lamlam in gen ni. Hunte hong paizel a, ka pasal in zu dawn leh no.4 kikap' ana thuah ahihdan ka theikhe phiing hi. Ka kisiik panta. Himahleh, Pathian in kei kep dia muang taka hon piak hidi hive'n chi'n ka hihtheih tawp suah in bawlhoih ka tum zel. Nitak bang hong paihakthei mahmah mai a, hong pai chiangin akhamsa ngen in hong pai zomah. Nungak dang sai a vialvak bel a hikei di(?), himahleh inn a kei hon lunggulh sangin khawlak ah alunggulh - ZU leh No.4 toh hun tam a zang zaw sek. Huai ziakin, inn hong tun chiangin, kei a di'n chance a om nawn kei( a lunggulhpen ngahzou hitaven).

Kiteen nung kum khat bang hong vaal hialta. Nau lah kipaai nailou. A sungkuante un lah, invengte kiang peuh a, " Nau le paaitheilou..." chi peuh a honna gen uh. Himahleh, ka naupan hang in, theihsiam teitei ka sawm sek. Pasal nei a kuankhe tavet, kuhkal taka om di chih ka tup pipen ahi. Khamtheih man di, ka nu uh kiang a ngen zel ahih manin, " Nu, sum piapia nawn dah in la, a ngawltheihna di lampi dang ken kon ngaihtuah zaw di" chisek mahleng, ana piapia thou hi. Ka nu toh kithutuak in pangkhawm le ung zaw, ka pasal bawlhoih zou ngei di'n ka kigingta.

Kum 2 bang kiteng di hitamah le ung, ka pasal' lunggulhlouh chii ana hikha ka hi chih ka kitheih man in, paisan mai di'n thupukna ka lata hi. Ka pianna nu kianga ka gen leh, " Haksa lele pang teitei in aw bawi"  hon chi hi. Himahleh, ka va lutna sungkuante' kampau banah ka pasal' hon ngaihsaklouhdan ka muhtam deuhdeuh ziakin ka nawkik san mai hi. Ut nawnlou leh lungkia nanana tuh, hon khamtang di om zenzen leh leng phupaisuak dia mansa ka himai. Ka pasalte' hon sapkik di kinem leng ka hi zenzen kei. Ta neitheilou chi a hon deihlouhsa uh ka hihman in, sam le hong samkik kei uh. A diktak in gen le, amau' tapa' ziak a ta neilou ka hizaw.

Huai sawng teng, phone leng ka khoih kei. Inn a kikulkhum in - thumna nei leh Bible khawng sim in ka om hi. Kum 1 bang hong pailiam nungin, lawmte'n, " Facebook khawng na khoih dia, whatsapp khawng toh...mi' lak ah le na kihel dia, kisuhalh leh lungsim thaksak sawm di ahi " hon chih ziak un, facebook leh WhatsApp khawng khoih in ka khawdak zel hi. Ka pasal bel ka 'block' ngal. WhatsApp group Pathianthu lam a ki hihhatna khenkhat khawng a tel in, thugelh manpha pipi khawng ka sim zel hi.

Hun bangtan hiam nungin, WhatsApp group khat ah hon ki-add guih mawk a, ka kiguih zozen. Ken le, hon add tu' kiang ah, " Bang chidan e, kei hon thei ngei maw? Ka number koi a na laak e? " ka chihleh, " Hon thei ngeilou e. Kihouhou di hanga kithei mai di i vo-oi. Na no. maw, group khat apan ka na laak ahi " chi'n hon dawngkik hi. Ken leng, ka pasal' a lamte hikhaleh chi in,hon add na group bang ka 'left' hial. Hon add kik nawn sam kei.

Hon add kik nawnlouh hangin, hon message den a, alimlak khawng hon khak zelzel hi. Ei le, a hitak in gen mai lehang kilungleng sim thou ahihna ah, ka na kihoupihpih a, ka inn khawng uah le hong hoh zel hi. A piltuak mahmah mai a, tei leng a tei tuak mahmah. Hih di poimoh ka neihte, online hi'n onlou-line hitaleh hon hihsak hun atam mahmah. A omdan leh kamsiamna in hon zoulua ahihman in, ka kingaikha mawk ta uhi.

Ka kingaih nung un, ka fon khawng hon etsak zel a, ken bel ama' aa ka enthei kei. Contact list a pasal' number om teng bang hon baan delete sak a, hon thuneihkhum mahmah. Himahleh, itna grape gui a zaamhoihna di ahih nakleh chi'n, ka lungsimloulam omtele chillum toh ka valh zelzel hi. Nuthawi ka hihlam hon theih ziak a hon hichi nopneh hidi'n leng ka gingta. A diktak in gen mai le, nuthawi  ka hih hangin 'Mawltual' banga zattheih  ka hi zenzen kei.

Huai nungin, ka lawmte khat, Damdawi Inn a damlou om ahihman in vahoh ka sawm hi. Ka khe suhekkha ka hihman in, khe a paitung zoh ka kigingta kei. Ka tangvalpa (chimaini) kia ka genleh, "Ke'n ka hong kha ding" chi'n hong taitung pah a, a Bike in hong kha hi. Ka kiklam in leng hong pi a, ka inn uah hong kha nawn a; kipahthu gen in, ka kikhen uhi.

A nitak hong hi a, phone call hong pai mawk hi. Ke'n leng, aw neemdeuh a, " Hallo..." ka chih patpat leh, " Nang minu, zaktamoh na chia, tusun ka pasal koilam teng a dianpih e. Numei thulimlou. Tangval na muhzoh keileh leng mi' pasal lou deuh zong ve. Na bangbang ana pezel e, na taksa pum tah kei lechin, ka pasal in hon delh kei hial inteh....zum moh!" hon chisuk motmot a, ka awm kawm bang sa vengvung in, ka liing zozen hi. Huai apan, tangval ka chih, zi neisa ahihdan ka theikhia. Kei pilvanlouh ziak mah leng ahi.

Ka omdan ka kimohsa, himahleh ken bel apasal, ka taksapum apan bangmah piak ka nei kei. A pasal in, 'Mawltual(Playground)' di'n hon enlah mahleh, kei phalna tellou in a zangthei tuan kei. Huai ziak mah leng ahi, abul tuung a, " Nuthawi himahleng, pasal lunggulh law vungvung a, taksapumpi zanga zol hial di'n zaw hon gingta dah un. Kei ut ziak a nuthawi leng ka hisam kei. Ka kum et in zaw naupang mah ing, himahleh n'on gintakdan uh ka hikei chih k'on gen masa ding " ka chih pah lawlaw.

Huai ni apan in, ama' kiang ah " Na zi' kiang ah ngaihdam ngen in la, hoihtak in inkuan hon bawl un. Kei hon ngaihsak nawn ke'n la, ken leng kon ngaihsak nawn kei ding. Ke'n, tangvallai konna sakha a ahi. Selung ka mawlman hi, hon ngaidam un.." chi'n ka gen a, mangpha ka khakta. Maban ah pilvang zawsem a om dingin leng thupukna ka la ngal hi.

- Ka Kipak -

Add comment


Security code
Refresh

© 2017. Thaikawitongluan.

We have 54 guests and no members online