Stories

'VIRGIN' A PASAL NEIH KA SAWM ZAW HIVEN!

'VIRGIN' A PASAL NEIH KA SAWM ZAW HIVEN!

By: K Lianthansang. | www.thaikawitongluan.com

"Aw nang ZU, ana omlou himai lechin zaw; khawvel a mihing hiaizahta' lungkham' luankhi luanglou ding hiven maw!"

- T Liana Tonsing

Zoudawn ah sikul kai ka na pan a; pawl(class) 9 ahihleh, Lamka ah ka kai hi. Numei himahleng, lai ka siamtheih thou ziak a, ka nu leh pa'n asum neih sunsun ua Lamka a hon kaisak uh ka hi. Ka paneute inn ah ka om a, amau ta numei sontheih(zattheih) di aneih nailouh ziak un kizen kawikawi abang. A naute uh neulai ahih zawkmah toh, azun leh ek uh sawp di'n leng ka phatuam mahmah hi.

Ka nuneu ahihleh, damthei khollou ahihman in, a gamtang law taktak kei a; kei ngen gamtang le ka hisim. Sikul kaina  khiamzen a(absent zen a)  inn nna sem bel ka hihial kei. Himahleh, zan sawtnung chihlouh, laisimna di hun ka muvaang mahmah. Ka paneu bel, niteng nektawm zong a kilohtawm himahleh, a nasepna ua a heutu lam ahih ziakin nuam a sa huntawk mahmah. A tate sikul kaithei nailou uh ahih ziak mah leng a hidia - a duhduh a nezou a, a dawn nopnop a dawnzou gige hi.

Nitak khat, nasem hong tunghaksim mahmah hi. Ann nedi'n ana ngak kei le ung lah hon hensan dia, haang phawnphawn di ahihman in, ka neksan ngamkei uh. Hong tunhakluat takin, ka nuneu in phone in a call nilouh a, a pick-up ngei kei. Atawp in, a lawmte nih toh hong lut ua, tui suak di'n hon sawl ngal hi. Tui ka va piak leh, a lawmte leng pe di'n honna sawl a, hon sawlkawm in a lawmte kiang ah, " Hiai, ka upa' tanu ahi. Melhoih leh duangchiang mahmah. Fel leng fel-a-fel ahi. Kon na khaamsak diam " chih khawng peuh gen in a chiakkawm nuanua zozen hi.

Ka paneu in Zu dawn gige ahihman in ka theisiam(kingeinaseh sim le ka himaita). Himahleh, a thilgen pen a lawmten atak dan a lak di uh ka lau. Adiktakin gen lehang, kei laisim dia Lamka a om ka hi a; tangval sai dia om leng ka hihlouh man in, class room ah leng huchidan lam di himhim in pasal ka en ngei kei. Ka paneu' lawmte le inn tungsuak nailou ngen ahi uh chih, a van silh-le-teen te uapan in ka thei a; a zudawn uh khamlou lakloh uh ahihdan leng ka man ngal.

Ann nek sawm mawk di lah, a lawmte omlai; hon hehsan law mawk leh nuamlou di. A kisilna di meiphu a, tui ka suan uh himahleh, " Na kisilkhe phot diam " bek le kichi ngamlou. A lawmte toh om ahih man un, bangmah ka gen ngamkei uh. Dak 9 bang hong gingtou dek, gil lah kial mahmah. Ka nuneu pauzek lelah, bak suk pah phekphek di ahihman in, ana dai khiinkhen a, ata neulaipen angpom in meiphu gei ah tu diinden hi. A ta lianpen bel ihmuzou ahita.

Ka paneu in hon sam a, " Zu, hon va leisak mai in aw " hon chi mawk hi. Kei, zu zuakna thei le hilou, Lamka a kum kimkhat khawng ompan lel a di'n a mangbathuai sim. Ken le, " Zu kizuakna ka theihlouh " ka chihleh, a paididan lampi hoihtak in hon hilh uhi. Atawp in, a lawmte khat hon zuihsak sawm mahleh, denciah ahoihloulam ahizaw di ka chih ziakin kei kia in ka va kuan kheta hi. Zu kizuakna lam ahihleh, ana dai simta. A inn chet bel ka thei chian kei, himahleh, mi ana pau nuanua ding un bel ka gingta(kei suangtuahna dan in).

Ka paipai leh, pasal liansim mahmah khat hong pai a, zu gim ka za hiauhiau. Zu zuakna a hong kipan mah hidia gingta in, zu zuakna inn ka dot leh, aman leng hon enen a , atawp in amun hon hilh hi. Ka kiklam in lampi ah huaipa mah ka tuakkha nawn a, honna houpih hi. Liing kawmin ka dawng a, aman leng hong naih in ka kam hon humsak a, ka kikoukhiat leh thah a om di ka hihdan hon hilh ngal a, ka lau mahmah. Ka sa vengvung zozen a, ka awm abing mai. Sual(rape) a om chu ka hita mai ve.  Phim i suk liing leh, abil vang sung ah khawlkhau baihlam tak in a kikhum thei kei. Himahleh, ka thiltuah chet zaw,  numei' tha in a zou mahmah kei. Kikou louh di chih hitop ahihman in, kikou lou a, tha neihteng suah a kipeek ka himai. Mialnuai ahih man in, temta khawng tawi hia tawilou chih tanpha le kitheilou. 'Sih' sangin 'Rape' a om teel zaw tuh ka hitamai ve.

Nidang in, rape a omte khawng ka na mohsa sek tei. Tu'n zaw, thil omtheimah ahihdan ka chiang. " Numei utkei leh Pasal khat in sualzou lou law di ahi " chih ana hisek, ken le 'full support' ka na pekha ngei tei. Tu zet in zaw, huaidan ngaihdan ka na neihkhak ngei pen haihuai abang. Sual' a om kichi thil hithei ahi chih ka chian mahmah ta. Sih di ana kilau law sam ahihna ah, ut leh utlouh genlou a thuak mai ngai. Hon mohsa nuamten bel non mohsa mahmah duh. Kei bel ka kimohsa kei(ahun taka gamtat didan kithei tuanlou ahihna ah). Kimohsa kei magleng,  Virgin a pasal neih ka na sawm gige pen, hithei nawn vuallou a hita. Ka pawna mahmah chihlouh ngal gen di dang a om kei.

Lampai haksa sa pipi in inn ka tung a, ka tunhak luat ziakin 'salh' in ka om zomah. Ka thiltuah kuamah kiang ah ka gen nuam kei. Kei' zahlakna di phet in genkhiat leng ka sawm kei. A mi' mel theichian hileng bel ka gen ding. Hiaibang thil ka tuah apan in, lungngai vungvung a hun zat ka tantawk a hita. Huai nitak in ann leng ka ne kei a, a ninawn in ka bah mahmah; sikul leng ka kai ngap kei. Sikul kai di nasan leng ka uttha a suak nawn kei.

Achang in kithah khawng peuh ka na sawm zel hi. Ka lawmte(ka khawte uh, class 10 sim lel) khat kiang ah ka thiltuah hoihtak in ka gen a, aman leng hon iimpih in, ka kingaihsiatlouna di'n thumna khawng hon neihsak sek hi. Ka lawmnu bel Hostel a om ahih manin, sikul kai tawp khawng chiangin ka va baang zel a, hon hehnem zel hi. Ama tungtawn a Pathian in nna sem a, ka hinna ana kilalou le ka himai.

Hun-le-nite hong pailiam zel a, nau paai ka hihdan ka kithei ta hi. Ka lawmnu mah kiang ah ka tai a, " Abortion bawl mai diam" hon chi a, kei leng kingaihtuah in, " Hiai paai toutou in nei hita mawk lengle a pa di kua a chih theih butlouh. Huai kia hilou, ka khua uh leh ka sikul uh tanpha a minse di. Pasal lah neilou inga, ka nu leh pan muang mahmah a Lamka a sikul hon kaisak ua, kei hichi maimah a ka minsiat di thil hithei ahi kei " chi'n, abortion ka bawl mai hi. A nau kisiam panpan ahih manin ka thuaklah lawkei a, sum leng tam a bei law kei(abortion bawl dia kuamah hasuanna hilou).

Huai nungin, ka kingaihtuah den a, ka gawng hulhul zozen. Lai leng ka simhoih thei nawn kei. Class 9 fail manlou in ka tawp mai hi. Ka ngaihtuah kik chiangin, ka paneute kiang a omlou in, Hostel ah ana omkha himai leng zaw, ka chisek. Aban ka ngaihtuah thuuk lai chiangin, ka paneu' zu dawn bang ka ngoh thepthup zel. Achang in, ka nu leh pa ka mohsa dek sek a, himahleh sum haksat ziak mah a, haksa leh le huaimun a om dia hon koih uh hidan in ka ngaihtuah tung zel hi. Ka thiltuah bawllem theih nawn vual a hikei. "Virgin' A Pasal Neih Ka Sawm Zaw Hiven!" chihchih mai tuh ka tantawk a hita.

Tu'n bel ka lungsim a thawveng tuan mahmah. Pathian kiang ah leng ka kilaan khe top mai a, saptuam ah leng kiheltheih dandan in ka kihelta. Himahleh, Tangval neih di lam himhim ka ngaihsak kei. Lau in ka lauhthoh mawk. Ka lungsim venglou adia aw khawng ka kichi sek a, lah huai kichithei, a venglou zaw hihial kei ning ka kichi zel hi.

Ka gennop pen bel, sum-le-pai haksa mahleh, tate mi' inn a i omsak ding chiang un, i omsakna dite hoihtak in suichian masa le. Tanau naichik hilehleng, i tate' khankhiatna dia hoih i sakkei leh omsak teitei kei ni. Denchia a hinkhua uh bawlhoih theih nawn vuallouh a kisethei ahi. Kei thiltuah a tawpna hileh chih ka deih mahmah.

Facebook a, 'T Liana Tonsing' kichi in, " ...Aw nang ZU, ana omlou himai lechin zaw khawvel a mihing hiaizahta' lungkham' luankhi luanglou ding hiven maw!..." chih, a 'wall' a apost bang dik ka sa law mahmah. Ka thiltuah zaw, a kipatna bulpi pen - ZU ahi ka chi tinten lai(tuni tanpha in).

- Ka Kipak –

© thaikawitongluan.com

Add comment


Security code
Refresh

© 2017. Thaikawitongluan.

We have 63 guests and no members online