Stories

VANGNGAIH VANGNGAIH - II

VANGNGAIH…VANGNGAIH

© thaikawitongluan.com

 

A tak a om hinkhua, Simtute lungtai na ding a phuahtawm sawn a ki gelh ahi.

 

-2-

Ka nanau toh ka kal ua itna gui zam ziak a ka mailam hun a haksatna ka tuah ding ka phawk kha ban kei. Ngaihtuah inle ka nei kha kei himhim. Kei lungsim ngaihtuahna a mawl man hi aka thei kei. Hun leh nite a ngeingei in a pai liam a, kei tuh nidang a ka hinkho zat toh ka ki bang nawn kei. Ka nanau itna ziak in ka omdan, khohei dan teng le tuam vek in ka thei. Kipahna in ka dim a ka ngaihtuahna ka paisau sak ka sek a, ka nanau toh hun nuam ka zatding dan khawng uh manglam bang in ka man kha sek hi.

            Innsung kiningching a om ka hihlouh man un, ka nnasep ding hunting in ka zong a, kuan theihna na ah ka kuan zel hi. Ka mel pianzia ah numei a piang khia himahleng, ka neu apat ka u pasal hon toh ki thuah a ana khangkhia ka hihna ziak leng ahi deuh mai diam ah, pasal chet in ka che a a lamdang lua in leng ka kikoih tuan kei. Himahleh, mite hon etdan a chang in nuam kasa kei sek hi. A lehlam ah, kei a diklou deuh ka dia aw ka chihhun bang om a, Pathian kiang ah ka thum hun chang in dawnna kichian bang ka phutsek hi. Pasal lungsim pu kha pian ka hihman in mite hon etdan ka ngeingaih vak kei a ka om dandan in ka om suk a, lawm leh vual polhna ah leng ka val tuansam kei hi.

Ka nanau leng a skul kai sunzom in kuhkal tak in a pang trantran hi. Kei laisinna lam ana sau tunlou ka hihman in huhtheihdi dan lam ka nei tam vak kei hi. Himahleh, khawlhun chiang in kava hoh sek a a chang in a assignment te bang kana gelh pih thei sam hi. A hun in hon pokia ahi ngei dia, kei lah ka nekzonna uh kichian omlou nnasep a buai gige ngai, ka nanau lah a laisin khawlsan thei mawklou ahihna ah ka hihna chiat uah kuhkalna ka suah uh poimoh deuhdeuh hi. Huchi kawmkawm in ka itna guizam uh a pak suah deuhdeuh hi.

Ka ki ngaihna uh lian semsem ahihman in, ki hazatna bang hong piang theih hun bang om hi. Ka nnasep pih te a tamzaw pasal ahihna uah, ka nanau in a chang in hon itthik a, ka lawm pasal te toh ki ngai hidi chi khawng in a lungsim ana suna kha sek a huai hunchiang in a hihlouhdan kamnem in ka genzel hi. Kei mahmah in leng a chang a ka lungnoplouh dan te ka hilh zel hi. Ka nanau melhoih pian kilawm ahihna ah, a skul kaina ua a classmate a schoolmate pasal te khawng in ana thohthoh di ua chihkhawng peuh in kei leh kei kaki supatau sek a, huai hunchiang in ka nanau in kei kia mah a lungsim a om a hihdan a hon hilh chiang in ka lung a muang suk zel hi.

Lungsim munkhat a om petmah ka hihman un, ki message lel ka deihkhop taktak nawn kei ua, a chang in pawtkhawm in kholai khawng ah lawmte toh hunk a zang zel uhi. Ka nanau laisim lai a hihman in hun deihbang in ka zangkhawm thei taktak kei ua, A kailouh hun Kiginni leh Pathianni bang ka am thei mahmah uhi. Ka omdan uh ka ki deihsak dan uh ka lawmte un hon muh chiang un, ka omdan te uh tuamsakna nei in a ki ngai ka hi uhia chih peuh in hon chiamnuih hun uh omsek hi. Himahleh bangmah ka gen kei u aka o mom un ka om uhi.

Hun hong paizel in ka lawmte uh a ngaih uh phalou a hi ngei dia, ki thuahdan lemchang zawkna ding leh ka nanau toh ka ki thuahdan uh le a nuamzaw ding ngimna in a ki ngai ka hihdan uh ka hilhta mai uhi. Ka lamet khel un, ka lawmte’n leng hon kipahpih ua, ka lung uh a nuam mahmah hi. Numei hon lak a pasal nih leh thum leh kei ki pawlkhawm neinoi in ka hunawl uh neih a nuamtheipen ding in ka zat sawm gige uhi. A chang in nitak chiang in ka pawt khawm noinoi ua, huchihlouh chang in Dam lam aihkeh, Ngakik lam khawng ah kava ki sulim nainai zel uhi.

Numei tuak ka hihna uah, hamphatna hia vangsiatna hizaw hia theikhang, ka kou gel ki ngai ka hih uh chih ka lawmte kia lou in a theikei uhi. Kou a ki ngai tegel a dia tuh a hoihna chiang a om thepthup hi. A khenchiang in ka nanau te inn khawng ah kava giaksek a amahle kou inn ah a hong giak sek hi. Ka innkuanpih te un lawmta kipawl khawm maimai dan a hon ngai uh a hihman in kou a ding in buaina bangmah a omkei.

Sun khat ka nanau kou inn ah hong hoh a, sun nitum in ka ki thuah uhi. A chang in ka ki engbawl ua, a khenchialah, ki sunuak khadek phialphial in hunk a zang uhi. Numei leh numei kingai himah le ung nuam kasa ua, numei leh pasal ki ngai te bang ka hi veve thou uhi. Mihing khat ka hihna uah, midang te bang a ngaihtuahna nei leh a na a sa thei ka hihsam man un, ka lamdanna di tuan uh ka theikei uhi.

Lupna tung a tu ka hi ua, ka nanau in ka khut hon kaiphei a a awm ah koih in, “Uu nah on ngai taktak maw?”a hon chi a, kenleng, ka naihphei a, “Nau, hon ngailua ka hi, nangsang a hon ngaizaw ka hi.” Chi kawm in a biang ka zutsak hialhial hi. Ka nanau a kunsuk a, “Uu, ei neih kibang hihang a, I mailam hun di ka ngaihtuah khak chiang a ka lungnuam lou ahi.” Ahonchih leh, ka kiguih zezen hi. Ka nanau keisang a ana lungngaizaw hi eive maw chih ka phawkkhia a ka ki suanglah mahmah hi. Ka dawng nawn a, “Nau, nang bangteng ana ngaihtuah e, a hun bangzel a thil I solve zel di ahi, thil ana mawk ngaihtuahtuah kei in aw” ka chi a ka hehnep sawm hi.

Ka nanau ka ang a hong belhphei kawm in, “Uu, a ngaihtuah lua le zaw hilou kahi, hilele a chang a ka lungsim ah hong dawk khasek a hi.” Hon chi a, kenle, “bang a na lungnplouhna ?” chi’n ka dongpah nawn a. “Uu, I maw numei pasal ki ngaite a innkuan te’n phal kei le uh leh mi et a numei leh pasal ua ki gu ua ki taipih ua, ta khawng nei ua, a chang a en huai sa kahi.” Chi in aw ngaihhetlou in hon gen hi. Ka dawngthei zok kei a ka angkawi kawm in a nung ka zutsak hialhial hi. “Nau, lungkham kei ve, nau I deih leh tulai a ahitheilou omlou pi, naungek adopt di tam di ahi. Huailam zaw lungkham huai loupe.” Ka chihleh, a hong daktou thut a, “Eimahvoi maw, ka tanaute uh nau adopt om eimah ve uai, eimahve ash!!! Nau adopt di ka utlua”, chi in hong nui seusau hi. Ka naihphei a “Nau” ka chihkawm in     aman le hon naihphei kawm in ka mit uh ka ki entuah kilkel ua, sikhip ki hiptuah bang in ka ki naih deuhdeuh ua a tawp in ka muk uh hong ki sutuah geih in ka ki tawp uhi.

Neih kibang, hihna kibang himahle ung, ka ki ense kei ua, ka itna ziak mah uh hi a ngai in ka lung uh a nuam hi. Ka nanau ka ang koi kawm in, “Nau na lungnop louhna di na ngaihtuah khak chiang in hon hilh pahpah in aw?” ka chi hi. Hichi bang hun nuam ka zatkhawm uh amasa pen ahihman in zum tuak ka hisam di ua, ka ki melh thoh gaugau sim uhi. Hun nuam zang ka hi ngei di uh, nitaklam a hihlam leng ka phawk kei uh. Ka nanau ann huan dia a pai hun nawn manzel!

Hichibang hun nuam ka zat nawn hun ding uh ka nih tuak un ka ngaklah ngei uh ka gingta. Himahleh, mailam hunding a mukhol kuamah omlou ka hihman un, hun in bang hon pokhe ding ahia chih a gan ngam ka omkei ua, ki khelah kawm pipi in ka nanau ka innkong tan uh kava kha hi.

Nitak ahong hi a ka nanau a lehkha simdi om a hihman in ka subuai nuam kei a, amah leng a hah pan ngai ahihman in, a laisim kipatma in tomchik ka ki message ua, laisim nuam chi in ka phone uh ka khoih khe tuak uhi. Ka innkuanpih te toh common room ah tv ka en zek a sawtlou nung in ka room ah ka lut hi. Lupna tung ah tallup euau kawm in ka ngaihtuahna ka hong khia hi. Ka nanau in a thilgen te khawng ka bilkha ah a hong ging chiai chiai hi. Huchibang thu khawng ana sau ngaihtuahna e ka chisim a lah, kou dinmun a ding a thil ngaihtuahtham ching eimahve ka chi a, ka lungsim a hon la mahmah hi.

Bangziak a pasal a ana piang khalou ka hia? Chih khawng peuh ka ngaihtuah kha mawk a, hilehle, Pathian hon siamdan ahihman in kuadang ka mohsa thei kei chih ka thei a ki ngaihsiatna hiam in bel ka ngai tuan kei hi.  Pasal bang hita mawng lengle, tua ka nanau toh ana ki theikha chitchiat khollou di hi ing a chih ka ngaihtuah leh lah ka hihna bangbang pen ka kipahna ahizaw hi.

Khotang lam et in bel mite ngaihdan lou lam ahi chih ka haihkei ua, huaiziak tak a lawmta dan a ki pawl ka hi ua, adiak in ka innkuanpih te uh theih ding ka lungsim guk un ka lau veve uhi. Nautang muh in bel ka ki ngaihma ua ka hindan ngeina te uh bang in ka kithuah uhi.

Nikhat nnasem a ka kuan na mun ah ka phone khoih laitak in ka seppihte uh pasal phe velvel om kinken theilou khat in ka phone hon laksak a ka limlak te hon etsak hi. Kamdam in ka phone hon pekik ding in ka ngen hi. Hon engbawl sawn in ka nanau toh lim ka kilak na uh ka lawmdang te lak sese hi. Huaitak in keileng numei chilou in ka naihphei a ka khuttum zial in ka suphei fok maimah hi. Heh akisa a lah midang muh a hon chou di a utkei deuh a, “I hon chiamnuihna eivele” chi kawm in ka phone hon pia hi. Heh kisa in hon thuk hial leh tuh thuak ek ngai mail eh kilawm. Hiai ziak a hi ngei dia, ka nanau toh ka ki ngaih lam uh a koi koi hiam ah ka za uhi. Himahleh, ka ngaihsak lokei uhi.

Ka nanau te ekzam di kuan a hita hi. Ngailua ka hihman in nitaklam ann nezou a kiang a genes lou in ka giah kuan hi. Baih lolai a hihman in mundang ka lawmte kiang pha kual masa hi. Dak 7:30pm khawng a gingta di chih in ka nanau te innlam zuan in ka pai hi. Ka tung a innkong ka kiuh leh a ute khat in kong hong hon a ka nanau ka kan ngal hi. Room lam ah laisim a om ahi ngei dia, a common room uah a u lawmte leh a pa ana om ua TV ana en uhi. Kenle kamsiam suah in a pa bang va houpih in a TV et uh kava et pih hi. Ka nanau pa’n leng hon nau et a, a innsung uah ka kisuanglah lovak kei hi. Sawtlou nung in ka nanau room ah kava lut hi.

Ka nanau in lai ana sim ngei a va sukbuai di ka utkei a a laisim sunzom di’n ka gen a kei a lupna tung ah Magazine khat sim in kana tu hi. Dak 9:30pm a hong gingtou a, ka nanau leng a lai sim hong khawl ta hi. Ka kiang ah hong tu a, ka ngaihluat dank a gen a tuzan a kiang a giak di ka hihdan ka gen a aman leng honna ngai lua a hihman in hon aw hi. Lupna tung a tu kawm in thu tuamtuam ka gen lai tak un, a pa hong lut guih a, “Bangchi na lawmnu pai nailou di maw?” hong chi gu mawk a ka ki guih hial zezen hi. Ka ki suanglah sim a hilehleng, ka nanau in, “Pa, ka U kiang ah kon kha peih nawn kei giak in ka chih ziak ahi” chi in a pa a pau tuh a huchi’n a pa a pai khia hi.

© thaikawitongluan.com

PART - I

Add comment


Security code
Refresh

© 2017. Thaikawitongluan.

We have 18 guests and no members online