Stories

LUNGKHAMNA MEIPI KHEN AH - IX

LUNGKHAMNA MEIPI KHEN AH

By:- Kattie Mawite | www.thaikawitongluan.com

BUNG IX

Chiamnuih khawng gen a nuamsa tak a ka pai uleh a in uh bang ka naihsuk pah mawk uhi. Nuam sa zaw ka hingei ding, a lampi bang tom kasa zozen hi.

Hiaitan pha ngal a, a in uh va tunlouh ding ka utkei. Himahleh a in uh ka muhkhak ngei nailouh ziak in ka linsim a, lah muhna ding hunlem hi dinga ngaihtuah in hiai hunlem ka mansuah ut tuankei hi.

Bangteng hileh, a intan uh phak himhim ding chi in ka lungsim in ka saitan ta hi.

"UThang, ka intan uh hong phasuk ngalngal ve aw. Na muhna leng hikawm di'n ah"

'Zaknuam e' ka chigu sim a, "awle Mawi. Poilou eive. Khatvei bang kuamah heh kei na'nte maw? Hehe"

"Nangpa sese le chuh"

"Kon chiamnuih ut himhim a hi e, Mawi. Hongphak ka ut himah ei. Na in uh leng a muh uthuai thou a"

Ken theilou kahihman in amah ka nungzuihbawl deuhta hi. Ka sepna mun bang ka pelhsuk hial tak un khua bang leng a mial thei simta hi. Inlama te ka ngaihtuah sim a, himahleh ka mailam a om pen in hon hiipzou zaw phot ahihman in huailam ka kitheihmohbawl phot hi.

Ngamkhat in Mawite a hong khawl guih a, kenleng lamdang sakawm sim tak in a gei ah ka ding hi.

"UThang, ka in uh koipen hi ding in na gingta?"

Chi in hon dong phut a, a in uh tung dia kigingta nailou lua kahihman in ka kiguih zozen hi.

Ka dak kimvel a, ka vei leh tak, nunglam leh malam ka etkimvel chiang in amau in dia kilawm ding ka theisiam theikei hi.

Buan a kibawl in leng a om a, a baang maupek kigan leh, pucca building leng a om. Banah, insawng hoihtak bangleng om hi.

A hoihpen va gen lenglah, amau in ana hikei leh nuamlou pi hithei. A hoihlou deuhte gen lenglah, niammuh lua hon sakkhak ding ka utkei zel.

Mei pai nitak hikha ahihman in, tua kimlak a in om teng muhtheih din om phingpheng vanglak hi.

Dawnglouh ding lah ka utkei a, dawng ding lah ka gen ding pen ka thei tuankei. A tawp in ka mitte si in, ka kipei a, ka khut likkang in, mitdel khuangkhet kimawlte bang in ka kivei doidoi hi.

Huchia lamdang satak a hon et lai in, kenleng ka mitte hak in, ka khuttal in ka kawk veuvau hi. Ka etleh, buan a kizut in pen ka kawkkha, "hiai pen ahi nou in"  chi in nuih toh ka thuah hi.

Amah leng a hong nui sam a, lamdang a sak toh, hong haklian kuau zozen hi.

Huchia haihuai tak a kana om laitak un ka in kawk pen kongkhak hong kihong in, nupi khat a hong pawt a, koulam a hon masuan hi.

Hai ka kisa sim thak a, lah a kikhelta. A dai ding ua dailing niamsim leh kilual dipdep a kitante tung apan koulam hon manawh ahi chih ka muthei gialgial hi.

A kelkong uh, langva a kibawl, sesimta pen a hon hong ging zuapzuap a, kouleng huailam kana nga tuak uhi. A hong dawk hoih tak in Mawite' nu ahi chih ka thei a, ka kisuanglah mahmah mai.

Himahleh aman bel kamsiamtak in a hon houpih a, ka thawm uh za ahihdan leh kou hong en ding mawngmawng a hong pawt ahihdan a hon gen pah hi. Lut ding in a hon sam a, kouleng ka kizuilut uhi.

Insung ka tun un, a insung uh tuh a pawlam latdan toh a kilehbulh chet hi in ka thei. Hoihtak a zep in a om a, siangthou in tawldamhuai mahmah hi. Banah, Mawite gelh mahmah hi ding in ka gingta, a inbang uah lemlak bangzahhiam tak kitak deudou hi.

Kei bang kava hi heihuai zozen hi.

Bang chidan a kimaikha thei kahi uhiam chihte a hon dong pah ua, Mawite' ziaka  lunghimoh sim uh ahihdan leng hon gen uhi. Kenleng thil omdan ka gentheih dandan in ka gen a, Mawite in leng a honna panpih sam hi. Nuikawm vevu sim in inkong a ka omdan uh, a ziak a hon gen a, intekte leng nui nainai uhi.

Huchia a hong nuih tak un keileng nengchik ka tawldam zaw deuh a, huu lak bang a nuamtuan hial hi.

A kamsiam thei mahmah ua, kava khaksuk ziak bang in kipahthu a hon gen zihzeh mai uhi.  Kei lah, kamsiam lou chih mahtak in a dawn dingdan nasan leng ka thei mumal kei a, "khemkhem huai neng bang" khawng ka chi numnum thei leltak hi.

Khua lah mialkhe petmah ta ahihman  in, utlai mah leng pai vai ka sawm phot a, amau leng a hon khou ngam tuankei uhi.

Huchi in keileng pai dia kisa in ka kithawi pawt a, Mawite leh anu'n a hong khapawt uhi. Huchia ka kizuihpawt lai un kintak in Mawite va lutkik mawk a, 'lungkimlouhna nei a hi de aw?' Chi a ngaihtuah in kana lungbuai gu manzel hi.

Nuamsalou sim a ka pai leh, Mawite, a khut a tuisiang kelkel nou a hon tawi in a hon delhzui nawn hi.

Ka lungsim bel a nuigu sim hinawn. 

"Hi, UThang. Hiai bek dawn phot aw"

"Fel na chiale, Mawi. Nang suahsa zaw a lim diak di"

A nu omlam mangngilh kha. Kamsiam tawp a gen zaw ka kichih sam hi a. Ka phawk phet in anu ka enpah a, hon entuah in ana nui heuhau zomahlai hi.

Nuamsim, lah zumhuai sim. Aban paungam ding hinawnlou.

A tawp in mangpha kikhak in ka kikhen ua, inlam zuan in ka paikik vengveng nawn hi. Midang kuahiam kha ding hileng zaw, ut hetlou di hi'ng a!

Nui hauhau in ka paitou a, keikia pai kahihlam bang ka mangngilh zozen hi. Ngaihtuahna saupai zaw a hingei ding, in ka tun in leng, tung kahihlam nasan ka phawkkei phial hi.

Ka halhkhe guih a, insung kalut in ka om kha heuhuai zozen hi. Insung a kisuanglah zoulou zen a Mawite va kha ka kichih zaw hi a, insung ka tun hial tak in ka kisuanglah law phing hi.

Ka nupi'n ka hohna honna dong a, ken leng a hi bangbang in ka gen hi. Ka gen zohtak in ka papi'n a lu ana su ngaungau a, bang genna hi hiam chih kana man chiah kei.

Ka nupi'n an nedin hon sawl a, amau nekhin ta uh ahihdan leng a hon hilh hi. Ka gil kiallou hikei mahleh, kisuanglah kahihman in ka gil kial nailou leh awl a nemai ding kahihdan ka gen hi.

Amau leng bangmah a gen nawn tuankei uh.

Keileng awl a kihahkhia in, an ka kinek a, ka nekzoh in ka pindan a lut in, lupna tung ah ka tukha dedu hi. Huchih laitak in UChiinnu honglut in, ka paima a ka sungte'n ka hohna gintak ana nei uh ahihdan leh, ka kizuih uh kanaute un honna mu uh ahihdan a hong gen siausiau a, nui hauhau in bangmah ka dotma in hon pawtkhiaksan hi.

Keileng ka kingaihtuah a, 'tuni ka omdante bang chidan a le, a om hiauhuau khat a om ka chi' chi in ka kingaihtuah hi.

Ka gamtatna lam teng ah nuamlou sim, lah nuamlou lua chia gentham ngellouh ding a omvek sim a, lamdang kasa hi.

Himahleh, Mawite toh hunnuam ka zatkhawm khak ziak un bangteng bangmahlou in ka sim a, anuamlou lam sangin ka kipahna leh amah' ziaka nuam kasak guk hiauhiauna te'n ka ngaihtuahna azou zaw a, ka kipak thouthou hi.

Hichi bang a numei khat ziak a lungsim nuam leh kipak tak a omtheih hi dinga ka ngaihtuah ngei hetlouh hi a!

Ka hi heuhau. Ka hi helhul. Ngaihtuahna maimai leng nuihpih hauhau thei ding in ka om mawk. 

Ka inkuanten hon zetheih uh zaw a hingei ding a, hon nuihsan lel uhi. 

Huchia lungsim nuam a tawldam ding hileh, Mawite toh damsung hun zatkhawm ding nuam hina tel in chia. Ka ngaihtuahna in a ban kei. Kithalawpna in ka dim. Lah, a poimohpen a kongkhakpi leng a kihong nai samkei. Kihoukha panpan lah ka hingal ua.

Amah gimnam peuhmah ka ngaina. Amah omkei in mukha kei mahleng, adawr kong ua pai nasan ka nuamtuam. Pathianni vettak leng sawt kasa. Zing leh nitak a adawr mai ua pai lel leng keia din kipahna leh lungnopna hon petu a suak.

Bangteng tuak a, bang chi ka hiam chih bang a chang in ngaihtuah a, lamdang bang ka kisa hi. A mawlpen a gen in, itna a chihte uh zaw hingei ding eive, ka chithei lel hi.

Ka ngaihtuahna a hong lut khenkhat bel, mi khenkhat lah itna ziaka lungkham leh kingaise ngoihngoih ua, huchih kawmkal a khenkhat taget lah kipak leh thoveng tak a, lametna toh a itte uh toh hunnuam zang ua, khenkhat inlah itna ziaka a hinna nasan uh ana tanloh ua. Kei tan bang a hi dia? Bang lampi tawn ding ka hia?

Theihhak pi ahi. Tu-le-tu ngaihtuahna ah bel, hiai bang itna ziak in haksatna a omtheih leh a om ngei ka gingta kei.

A khenchiang in lah, tu a bangmah a omma a kitheihmohbawl a, tua bang a itna khuk a puklutlouh hoih zaw ding in ka gingta. Denchianga ka haksatpih ding ahihkhak ding bang ka lau zel sam. Ka khosak haksat toh, mi a din etlah tham ka hikei chih leng ka haih hetkei. Mi' kamsiam leltak a kitawtah kahihkhak ding leng ka lau moh kei. 

Hiaite tengteng ziak in ka lungtang tawng a ngaihtuahna pen thuzoh sawm in nakpitak in ka pang hi. Mawite mah ngei leng, kava khak nung ka muhkhaklouh kal nih bang pailiam manta ahihman in kitheihmohbawl a ka lungtang apan khinkhiat ka sawm a, muhtam leng ahihlouh toh haksa ding in leng ka gingta kei hi.

Ka nasepna mah a lunglut tak a sep a, ka dinmun hon theihsiampih leh ka dinmun kikimpih, mizawng' tanu keia dinga kilawm huntawk hong om na ding chi in, muhngeilouh leh ngaihtuahna a leng piangthei nailou nu tuh ngak hoih kasa zaw mai ta hi.

Hinkhua a mawl thei tawp leh, tantawk a lungkim dingdan kisin in ka niteng hun ka zangbei zel hi. 

Himahleh lungtang tawng a belhsa zaw, a mawk in a khohkhiak theihkei. Lungtang tawng kipaksaktu kitheihmohbawl a, thildang a kipahna zon thil namai ana hikei. Himahleh ka dinmun leh khosakna a kisitna in a hon bawm zou zawta mawk hi.

A khenchiang in ka kingaihtuah a, 'Hiai Mawite, na nungaknu leng hilou, na tanau nai leng hilou. Na theihkhakte lak a khat leltak ziak in maw na ngaihtuahna na sukbuai a na lungsim na natsak ding?' Chi a hong kidong bang in ka ngaihtuah kha thei zel hi. Awm kasa law sim a, kei leh kei bang ka kinuihsan khazel hi.

Himah e. Ka kuamah leh bangmah hikei. Ka meltheih khak leltak hi. Amah kiang ah hiaitan ngaihtuahna din ka lungsim ka kum kha ngeita a maw? Kum kha lou hial.

Aman hon kum maw? Kum lou hial.

Ahihleh, bangziaka hiaiteng ngaihtuah a kibuaisak e? Thei tuanlou.

MLA election nai mahmahta, a huzap ngaih laitak ahihman in kei buaina leh mi buaina tuam mahmah taget hi. Chikmah a election politics a lunglut leng hilou, vote nei leng hilou khat, ka ngaihtuahna a om pen heikhiat ka utziak in niteng tanchinbu, Lamka a dia alianpen a kigen The Lamka Post sim bang ka hahpan ngial hi.

Letter to editor bang a tamthei zawzen a, a bouruak toh kituak in bang chileh election siangthou tak a kineithei ding hiam, chih bang, ahihkeileh, I minam hon ai-oh dinga kua hoih a, bangchi'n teel leng I gam I nam in khanpih a masawnpih ding hiam chih khawng a thukup uh ahi tangpi hi. A khenkhat te'n lah, mahni gilpi chauh puah ding, mipi palai telkhak ding a lauhhuai dan bang leng gelh tham uh hi.

Hiaite'n ka lungsim hon zou mahmah diak in ka thei. A kua' phawklouh khat, hihtheih neilou khat in, I gam in makai hoih a poimohdan bang kana ngaihtuah sam sek hi.

Nidang a I heutu masate, gam-le-nam ittak a ana makaihte khekhap zuih din a hoih mahmah a, amau policy leh, tulai a zattheih tham lai ding, a tul theilou leh galvan hoihpen leh mi lungtang lazoupen, mi-le-sate itna mahmah candidate te'n hon nei le uh chih a deihdan uh pa tamtakte houlimna ahihdan leng kihaihlou hi.

"Meithai-tagahte' tan ding laksak ding palai kuaman a deih nawnkei. Meithai'tagahte kuaman vote zonna in nei nawnkei uhen. I lampi siate vote zonna chauh in hon nei nawnkei uhen" chi in papi khenkhat ngial houh, zingkal hotel ah singpi dawnkawm in khutvai zen in gen hoihoi maimah uhi.

Hiaite ka muh a, ka zak chiang in dik kasa mahmah a, a huchih kawmkawm in, mipite leng kigensiat chih bang kidam deuh thei in, heutute hoihlouhna amau maitang bang a gen ngam in, heutu in leng tuate mah kibawlna in hon nei leh I gam a nop dingdan bang kana suangtuah theisam hi.

Ka tup mah bang in, hiaite hu in a hon hoih zapkhak sim a, nungak lam ka mangngilh bawl hang in gam-le-nam vai nasatak in ka hon vei a, ka puak a gik veve hi. Himahleh, hiai bel poi kasa kei. Kei mimal hamphatna ding a hikei a,  ka mihinpihte leh ka tu-le-ta, khang hong paisawn dite tan a agah, a hoih leh hoihlouh thutuam hitaleh, I lohtouh ding ahihziak in kana vei mahmah laitei hi.

Himahleh milaka gen a, ngaihdan sung thei ka hituankei a, ka deihpen vote ning chileng leng vote nei leng ka hituan sam kei. Puakgik kiguan lel zaw ka suak mai ve.

Sutzop ding............

© thaikawitongluan.com

Part Masa te: PART - 1  | PART - 2 | PART - 3 | PART - 4 | PART - 5 | PART - 6 | PART - 7 |PART - 8 |

LUNGKHAMNA MEIPI KHEN AH-9

 

                         

Chiamnuih khawng gen a nuamsa tak a ka pai uleh a in uh bang ka naihsuk pah mawk uhi. Nuam sa zaw ka hingei ding, a lampi bang tom kasa zozen hi.

 

 

Hiaitan pha ngal a, a in uh va tunlouh ding ka utkei. Himahleh a in uh ka muhkhak ngei nailouh ziak in ka linsim a, lah muhna ding hunlem hi dinga ngaihtuah in hiai hunlem ka mansuah ut tuankei hi.

Bangteng hileh, a intan uh phak himhim ding chi in ka lungsim in ka saitan ta hi.

 

 

"UThang, ka intan uh hong phasuk ngalngal ve aw. Na muhna leng hikawm di'n ah"

 

'Zaknuam e' ka chigu sim a, "awle Mawi. Poilou eive. Khatvei bang kuamah heh kei na'nte maw? Hehe"

 

 

"Nangpa sese le chuh"

 

 

"Kon chiamnuih ut himhim a hi e, Mawi. Hongphak ka ut himah ei. Na in uh leng a muh uthuai thou a"

 

 

Ken theilou kahihman in amah ka nungzuihbawl deuhta hi. Ka sepna mun bang ka pelhsuk hial tak un khua bang leng a mial thei simta hi. Inlama te ka ngaihtuah sim a, himahleh ka mailam a om pen in hon hiipzou zaw phot ahihman in huailam ka kitheihmohbawl phot hi.

 

 

Ngamkhat in Mawite a hong khawl guih a, kenleng lamdang sakawm sim tak in a gei ah ka ding hi.

 

"UThang, ka in uh koipen hi ding in na gingta?"

Chi in hon dong phut a, a in uh tung dia kigingta nailou lua kahihman in ka kiguih zozen hi.

 

Ka dak kimvel a, ka vei leh tak, nunglam leh malam ka etkimvel chiang in amau in dia kilawm ding ka theisiam theikei hi.

 

 

Buan a kibawl in leng a om a, a baang maupek kigan leh, pucca building leng a om. Banah, insawng hoihtak bangleng om hi.

 

A hoihpen va gen lenglah, amau in ana hikei leh nuamlou pi hithei. A hoihlou deuhte gen lenglah, niammuh lua hon sakkhak ding ka utkei zel.

 

 

Mei pai nitak hikha ahihman in, tua kimlak a in om teng muhtheih din om phingpheng vanglak hi.

Dawnglouh ding lah ka utkei a, dawng ding lah ka gen ding pen ka thei tuankei. A tawp in ka mitte si in, ka kipei a, ka khut likkang in, mitdel khuangkhet kimawlte bang in ka kivei doidoi hi.

 

 

Huchia lamdang satak a hon et lai in, kenleng ka mitte hak in, ka khuttal in ka kawk veuvau hi. Ka etleh, buan a kizut in pen ka kawkkha, "hiai pen ahi nou in"  chi in nuih toh ka thuah hi.

 

Amah leng a hong nui sam a, lamdang a sak toh, hong haklian kuau zozen hi.

 

 

Huchia haihuai tak a kana om laitak un ka in kawk pen kongkhak hong kihong in, nupi khat a hong pawt a, koulam a hon masuan hi.

 

 

Hai ka kisa sim thak a, lah a kikhelta. A dai ding ua dailing niamsim leh kilual dipdep a kitante tung apan koulam hon manawh ahi chih ka muthei gialgial hi.

A kelkong uh, langva a kibawl, sesimta pen a hon hong ging zuapzuap a, kouleng huailam kana nga tuak uhi. A hong dawk hoih tak in Mawite' nu ahi chih ka thei a, ka kisuanglah mahmah mai.

 

 

Himahleh aman bel kamsiamtak in a hon houpih a, ka thawm uh za ahihdan leh kou hong en ding mawngmawng a hong pawt ahihdan a hon gen pah hi. Lut ding in a hon sam a, kouleng ka kizuilut uhi.

 

 

Insung ka tun un, a insung uh tuh a pawlam latdan toh a kilehbulh chet hi in ka thei. Hoihtak a zep in a om a, siangthou in tawldamhuai mahmah hi. Banah, Mawite gelh mahmah hi ding in ka gingta, a inbang uah lemlak bangzahhiam tak kitak deudou hi.

 

 

Kei bang kava hi heihuai zozen hi.

Bang chidan a kimaikha thei kahi uhiam chihte a hon dong pah ua, Mawite' ziaka  lunghimoh sim uh ahihdan leng hon gen uhi. Kenleng thil omdan ka gentheih dandan in ka gen a, Mawite in leng a honna panpih sam hi. Nuikawm vevu sim in inkong a ka omdan uh, a ziak a hon gen a, intekte leng nui nainai uhi.

Huchia a hong nuih tak un keileng nengchik ka tawldam zaw deuh a, huu lak bang a nuamtuan hial hi.

 

 

A kamsiam thei mahmah ua, kava khaksuk ziak bang in kipahthu a hon gen zihzeh mai uhi.  Kei lah, kamsiam lou chih mahtak in a dawn dingdan nasan leng ka thei mumal kei a, "khemkhem huai neng bang" khawng ka chi numnum thei leltak hi.

 

 

Khua lah mialkhe petmah ta ahihman  in, utlai mah leng pai vai ka sawm phot a, amau leng a hon khou ngam tuankei uhi.

 

 

Huchi in keileng pai dia kisa in ka kithawi pawt a, Mawite leh anu'n a hong khapawt uhi. Huchia ka kizuihpawt lai un kintak in Mawite va lutkik mawk a, 'lungkimlouhna nei a hi de aw?' Chi a ngaihtuah in kana lungbuai gu manzel hi.

 

 

Nuamsalou sim a ka pai leh, Mawite, a khut a tuisiang kelkel nou a hon tawi in a hon delhzui nawn hi.

 

Ka lungsim bel a nuigu sim hinawn. 

 

 

"Hi, UThang. Hiai bek dawn phot aw"

 

"Fel na chiale, Mawi. Nang suahsa zaw a lim diak di"

 

A nu omlam mangngilh kha. Kamsiam tawp a gen zaw ka kichih sam hi a. Ka phawk phet in anu ka enpah a, hon entuah in ana nui heuhau zomahlai hi.

 

 

Nuamsim, lah zumhuai sim. Aban paungam ding hinawnlou.

 

 

A tawp in mangpha kikhak in ka kikhen ua, inlam zuan in ka paikik vengveng nawn hi. Midang kuahiam kha ding hileng zaw, ut hetlou di hi'ng a!

Nui hauhau in ka paitou a, keikia pai kahihlam bang ka mangngilh zozen hi. Ngaihtuahna saupai zaw a hingei ding, in ka tun in leng, tung kahihlam nasan ka phawkkei phial hi.

 

 

Ka halhkhe guih a, insung kalut in ka om kha heuhuai zozen hi. Insung a kisuanglah zoulou zen a Mawite va kha ka kichih zaw hi a, insung ka tun hial tak in ka kisuanglah law phing hi.

 

 

Ka nupi'n ka hohna honna dong a, ken leng a hi bangbang in ka gen hi. Ka gen zohtak in ka papi'n a lu ana su ngaungau a, bang genna hi hiam chih kana man chiah kei.

 

 

Ka nupi'n an nedin hon sawl a, amau nekhin ta uh ahihdan leng a hon hilh hi. Ka gil kiallou hikei mahleh, kisuanglah kahihman in ka gil kial nailou leh awl a nemai ding kahihdan ka gen hi.

Amau leng bangmah a gen nawn tuankei uh.

 

 

Keileng awl a kihahkhia in, an ka kinek a, ka nekzoh in ka pindan a lut in, lupna tung ah ka tukha dedu hi. Huchih laitak in UChiinnu honglut in, ka paima a ka sungte'n ka hohna gintak ana nei uh ahihdan leh, ka kizuih uh kanaute un honna mu uh ahihdan a hong gen siausiau a, nui hauhau in bangmah ka dotma in hon pawtkhiaksan hi.

 

 

Keileng ka kingaihtuah a, 'tuni ka omdante bang chidan a le, a om hiauhuau khat a om ka chi' chi in ka kingaihtuah hi.

 

 

Ka gamtatna lam teng ah nuamlou sim, lah nuamlou lua chia gentham ngellouh ding a omvek sim a, lamdang kasa hi.

 

 

Himahleh, Mawite toh hunnuam ka zatkhawm khak ziak un bangteng bangmahlou in ka sim a, anuamlou lam sangin ka kipahna leh amah' ziaka nuam kasak guk hiauhiauna te'n ka ngaihtuahna azou zaw a, ka kipak thouthou hi.

Hichi bang a numei khat ziak a lungsim nuam leh kipak tak a omtheih hi dinga ka ngaihtuah ngei hetlouh hi a!

 

 Ka hi heuhau. Ka hi helhul. Ngaihtuahna maimai leng nuihpih hauhau thei ding in ka om mawk. 

 

Ka inkuanten hon zetheih uh zaw a hingei ding a, hon nuihsan lel uhi. 

 

 

Huchia lungsim nuam a tawldam ding hileh, Mawite toh damsung hun zatkhawm ding nuam hina tel in chia. Ka ngaihtuahna in a ban kei. Kithalawpna in ka dim. Lah, a poimohpen a kongkhakpi leng a kihong nai samkei. Kihoukha panpan lah ka hingal ua.

 

 

Amah gimnam peuhmah ka ngaina. Amah omkei in mukha kei mahleng, adawr kong ua pai nasan ka nuamtuam. Pathianni vettak leng sawt kasa. Zing leh nitak a adawr mai ua pai lel leng keia din kipahna leh lungnopna hon petu a suak.

 

 

Bangteng tuak a, bang chi ka hiam chih bang a chang in ngaihtuah a, lamdang bang ka kisa hi. A mawlpen a gen in, itna a chihte uh zaw hingei ding eive, ka chithei lel hi.

 

 

Ka ngaihtuahna a hong lut khenkhat bel, mi khenkhat lah itna ziaka lungkham leh kingaise ngoihngoih ua, huchih kawmkal a khenkhat taget lah kipak leh thoveng tak a, lametna toh a itte uh toh hunnuam zang ua, khenkhat inlah itna ziaka a hinna nasan uh ana tanloh ua. Kei tan bang a hi dia? Bang lampi tawn ding ka hia?

 

Theihhak pi ahi. Tu-le-tu ngaihtuahna ah bel, hiai bang itna ziak in haksatna a omtheih leh a om ngei ka gingta kei.

A khenchiang in lah, tu a bangmah a omma a kitheihmohbawl a, tua bang a itna khuk a puklutlouh hoih zaw ding in ka gingta. Denchianga ka haksatpih ding ahihkhak ding bang ka lau zel sam. Ka khosak haksat toh, mi a din etlah tham ka hikei chih leng ka haih hetkei. Mi' kamsiam leltak a kitawtah kahihkhak ding leng ka lau moh kei. 

 

 

Hiaite tengteng ziak in ka lungtang tawng a ngaihtuahna pen thuzoh sawm in nakpitak in ka pang hi. Mawite mah ngei leng, kava khak nung ka muhkhaklouh kal nih bang pailiam manta ahihman in kitheihmohbawl a ka lungtang apan khinkhiat ka sawm a, muhtam leng ahihlouh toh haksa ding in leng ka gingta kei hi.

 

 

Ka nasepna mah a lunglut tak a sep a, ka dinmun hon theihsiampih leh ka dinmun kikimpih, mizawng' tanu keia dinga kilawm huntawk hong om na ding chi in, muhngeilouh leh ngaihtuahna a leng piangthei nailou nu tuh ngak hoih kasa zaw mai ta hi.

 

 

Hinkhua a mawl thei tawp leh, tantawk a lungkim dingdan kisin in ka niteng hun ka zangbei zel hi. 

 

 

Himahleh lungtang tawng a belhsa zaw, a mawk in a khohkhiak theihkei. Lungtang tawng kipaksaktu kitheihmohbawl a, thildang a kipahna zon thil namai ana hikei. Himahleh ka dinmun leh khosakna a kisitna in a hon bawm zou zawta mawk hi.

 

 

A khenchiang in ka kingaihtuah a, 'Hiai Mawite, na nungaknu leng hilou, na tanau nai leng hilou. Na theihkhakte lak a khat leltak ziak in maw na ngaihtuahna na sukbuai a na lungsim na natsak ding?' Chi a hong kidong bang in ka ngaihtuah kha thei zel hi. Awm kasa law sim a, kei leh kei bang ka kinuihsan khazel hi.

 

 

Himah e. Ka kuamah leh bangmah hikei. Ka meltheih khak leltak hi. Amah kiang ah hiaitan ngaihtuahna din ka lungsim ka kum kha ngeita a maw? Kum kha lou hial.

Aman hon kum maw? Kum lou hial.

Ahihleh, bangziaka hiaiteng ngaihtuah a kibuaisak e? Thei tuanlou.

MLA election nai mahmahta, a huzap ngaih laitak ahihman in kei buaina leh mi buaina tuam mahmah taget hi. Chikmah a election politics a lunglut leng hilou, vote nei leng hilou khat, ka ngaihtuahna a om pen heikhiat ka utziak in niteng tanchinbu, Lamka a dia alianpen a kigen The Lamka Post sim bang ka hahpan ngial hi.

 

Letter to editor bang a tamthei zawzen a, a bouruak toh kituak in bang chileh election siangthou tak a kineithei ding hiam, chih bang, ahihkeileh, I minam hon ai-oh dinga kua hoih a, bangchi'n teel leng I gam I nam in khanpih a masawnpih ding hiam chih khawng a thukup uh ahi tangpi hi. A khenkhat te'n lah, mahni gilpi chauh puah ding, mipi palai telkhak ding a lauhhuai dan bang leng gelh tham uh hi.

 

 

Hiaite'n ka lungsim hon zou mahmah diak in ka thei. A kua' phawklouh khat, hihtheih neilou khat in, I gam in makai hoih a poimohdan bang kana ngaihtuah sam sek hi.

Nidang a I heutu masate, gam-le-nam ittak a ana makaihte khekhap zuih din a hoih mahmah a, amau policy leh, tulai a zattheih tham lai ding, a tul theilou leh galvan hoihpen leh mi lungtang lazoupen, mi-le-sate itna mahmah candidate te'n hon nei le uh chih a deihdan uh pa tamtakte houlimna ahihdan leng kihaihlou hi.

 

 

"Meithai-tagahte' tan ding laksak ding palai kuaman a deih nawnkei. Meithai'tagahte kuaman vote zonna in nei nawnkei uhen. I lampi siate vote zonna chauh in hon nei nawnkei uhen" chi in papi khenkhat ngial houh, zingkal hotel ah singpi dawnkawm in khutvai zen in gen hoihoi maimah uhi.

 

 Hiaite ka muh a, ka zak chiang in dik kasa mahmah a, a huchih kawmkawm in, mipite leng kigensiat chih bang kidam deuh thei in, heutute hoihlouhna amau maitang bang a gen ngam in, heutu in leng tuate mah kibawlna in hon nei leh I gam a nop dingdan bang kana suangtuah theisam hi.

Ka tup mah bang in, hiaite hu in a hon hoih zapkhak sim a, nungak lam ka mangngilh bawl hang in gam-le-nam vai nasatak in ka hon vei a, ka puak a gik veve hi. Himahleh, hiai bel poi kasa kei. Kei mimal hamphatna ding a hikei a,  ka mihinpihte leh ka tu-le-ta, khang hong paisawn dite tan a agah, a hoih leh hoihlouh thutuam hitaleh, I lohtouh ding ahihziak in kana vei mahmah laitei hi.

 

 

Himahleh milaka gen a, ngaihdan sung thei ka hituankei a, ka deihpen vote ning chileng leng vote nei leng ka hituan sam kei. Puakgik kiguan lel zaw ka suak mai ve.

 

 

Sutzop ding............

 

Add comment


Security code
Refresh

Comments   

0 # Muamuan Hauzel 2017-02-14 15:28
Aban om dek nailou di hia
Reply | Reply with quote | Quote
© 2017. Thaikawitongluan.

We have 67 guests and no members online