Stories

LUNGKHAMNA MEIPI KHEN AH - VIII

LUNGKHAMNA MEIPI KHEN AH

By:- Kattie Mawite | www.thaikawitongluan.com

BUNG VIII

Huaini apan ka omdan leh lungsim kikheng om hi in ka thei. Ka om thepthop a, ka om hiauhuau. Ka om helhul.

Ka lemlak ka muhtung a PaGin in 'a lemgelh le hoih, a gelhtu le hoih' chi a hon gen zauh bang ka phawkkhe hulhul a, ka nuisim hauhau hi.

'Hmmm. Hiai chuh......' ka chisim a, bang loh ding kahia chih pentak leng ka thei tuankei.

Ka lungsim leh ngahtuahna bel a kikheng sim mahmah mai hi.

Ka nasep kawm in ka ngaihtuahna bang a paisau thei pianta hi.

Nidang in bel na ka sepleh ka nasep ah ka lungsim a om petmah a, ka lungtang tengtoh ka sem hi.

Himahleh, tu chiang in bel ka lungsim kimkhat toh ka semta chileng ka khial kei ding.

Khua a omlai a nungak ka thohvel dante uh ka ngaihtuah a, thoh theih tah maw chi a thoh leltak kahihdante uh bang ka phawkkhe thak a, ka nuih a za sim hauhau hi.

Himahleh, a hi tak ka hon tuahkhak tak in zaw, huailai bang a hih huauhuau ngam ding dinmun ah ka om nawnkei. A kibangkei khop mai.

Houpihtam kei mahleng, a thu ka zak leh kei mahmah in kava tuah teng ziak in, pukna khop a pha veve chih ka haihkei.

Bangchi leh amah toh kithuahtheihna hunlem ka mu nawn de aw chi in ka ngaihtuahna in ka suangtuah denta hi.

A tomlam in gen leng, kei nungak buai kal in election bang ana kizou man hial hi.

Mi buaina leh kei buaina a kigamla ngei mai.

Chiamnuihgen maimai ta le, mi kum nga sung di buaipih a sin sou zen a apan lai un, ken ahihleh damsung hun zatpih ding buaipih in kana sa vitvit mai hi.

Ka nasepna a ka buaitheih luat man in hun-awng ka muvang mahmah a, tua bang ngei in Mawite leng hun awng nei manlou a hisam ding, muhkhak in a om ngei nawnkei hi.

PaGin leng ka hehsan gusim hi. Kimuhna ding hun hon pe nawnlou ding in bangziaka hichituk a ka kihoutheih ua, ka kimuhtheihna ding uh hun hon bawlsak se a hi de aw ka chi a, ka hehsan tha bang a suak hial hi.

Himahleh, hun I chih I damleh hong om zel ding hiven, khatvei tei kimuhna hunlem hoihtak om nawn na ding chi in kinepna toh tua hun ding ka ngak hi.

A dawr ua kava hoh a, kakimuh nung uh kha nih val vengveng kimulou leh kihou lou in ka om hilhial uhi. Kei a din hiai hunsung a sawt mahmah a, niteng tuh lametna leh a mel muh leh, a aw nem zakna ding ngaklahna in a bei mai hi.

Aman bang a ngaihtuah diam maw? 'Kou nang thu kikum pahpah sek kahi uh' chi a, anu' hon gen a tak mah a hi diam? Atak bang ahihleh tuh, honna ngaihtuah mahmah sam ding in ka lamen a, ka lungsim a nuam deuh zel hi.

Ka ngaihtuah sau chiang in lah, mi kamsiam leltak a kitawtah kahihkhak ding ka lau zel hi.

Ka kuanna ah ngeina bang in ka kuanzel a, himahleh hun dang sang in ka buaithei zaw hi.

Phalbi leng bei a hita phial a,  nitak in bel votsim hauhau thei lai hi.

Kiginni zing ahi a, lupna apan thoukhe dia ka kisak leh ka gawl bang ana taak seksuk a, ka lu nasim bengbung in ka chi ana gik mahmah hi.

Thoh ding linsim pipi in ka thoukhe luailuai a, 'kiginni natawm a kuan le, a chang in lithuai tuntun a bang ka chi' chi in kei zakkhop in ka phun namnam hi.

Zannitaklam ka pai a lamnuai lam ka tot a, tangvalnou bangzahhiam gari neu a hong kikhoh vutvutna nung ua, leivuikhu ka hahdiik khak luat ziak a hitang sim kahi chih ka ngaihtuahkhe thak a, hehhuai kasa sim hi. Huaiziak mah leng ahi, nidang a litna kampau himhim zang ngeilou napi'n tuzing a ka hichi phur louh!

Huaini kei a ding a thu kipahhuai ka theihna ni ding bang ana hita leh tuh, tua bang kampau ka zang kholkei maithei. Ni in bang hon suahpih a, hun in bang hon puak ding hiam chih lah ka thei ngalkei a.

Linsim punpun in, gawl taaksim seksuk toh ka pawtkhia a, kuan chu ka hizel mai.

Ni a hong lum in bel gawltak leng a dan hong om deuh sam a, buaina omlou in ka sem thei sam hi.

Nitaklam a hong hih in, ka paibaih deuh a, lamlian neute khu thei lua chi in lamlianpi Teddim Road lam manoh in ka paitou hi. Paibaih kahihziak in dawr kikhak leng a om naikei a, mi leng kholak ah tampi mahmah omlai hi.

Dawr tampi om lak ah, koilai hiam a kuahiamte a in lungsim mah lapen hiven, ka melhtou zauh hi. Vangsiathuai tak in ana kikhak zenhouh hi.

Lamdang ka sasim. Nidang a huailam tawn ngeilou kahihman in huchisek mah uhia chih leng ka theikei. Khak baih zel uhia, ahihkeileh tuni khakbaih deuh? Ahihkei leh buaina nei a honglou uhia? Ka theibun kei.

Bang chi dan a de aw chisim in lungliap sim dedu in ka paitou a, muh ding ka kinepsim tuh kinepna thawn a suakta hi.

Dawr khak hun lah hinailou ahihziak in keileng ka khodak tou kawmkawm hi. Bang en a, bang zong kahia chih pentak leng ka thei tuankei. Himahleh, ka mit in lunggulh nei ahi chih ka kitheihmohbawl zoukei.

New Bazar ka tungtou a, lampai kawmkawm in vaksuk-vaktoute en in ka dakvelvel a, kei din dakhat ka kisa mahmah hi.

Lamlianpi zuitoutou kahihman in Hotel Venus ka phatouphial ta a, keileng dak nawnlou in ka pai kinkenta hi.

Awlmohlou tak a pai kahihman in, paibaih ka kichih hang in ni ana niam man hial hi.

Ka in petna uh ka phak di kuan in kuahiam ka gal a hongpai in ka mit hon la mahmah a, ka mit ka heikhe zou nawnkei. Agal apan kua hihiam chih theipah lou napi in leng ka mitsuan kha nilouh hi.

Kinohtak in a kal hon suanphei a, a kin chi mahmah hi.

Hiai hichi et mawk chi a kisuanglah sim in ka kiheisan a, ka petsan hi.

Sau ka tun ma in ka nunglam apan ka min hong kisam ka za a, ka kiheikik leh dena ka etnu ana hi a, hoihtak a ka etchian thak leh Mawite ana hi zenhouh. Ka mitkha hia, ka ngaihtuahna hia ka theizoukei. Lamdang kasa mahmah a, ka en thakthak zozen. Ka mit nuaizel mah leng, amah mah ana hi zel.

Lamdang kasa chih a hon theih chiang in aman leng lamdang hon lehsak a, hon en heihuai hi.

"Mawi"

"Hawi. Bang chi e UThang. Lamdang na sak chi ngei?"

"Kare, nang hiailam pekpek a bang hih e?"

Ka dongkha pah leklawk zozen hi.

"Kanu toh hi unga, kisumang kha.. haha... tua pai mai dihia chisim kahi.

Paibaih chituak na chiale...."

"Tuni paibaih mah ing e. Nang kia paidek na hi hia?"

"Hi, keikia himai didan keive. Kisumang kahihchiang ua. Haha"

A mel ah lungkim mel a kimuthei.

"Na khomial gawp kei dia. Na paina di nuam dihia? A himhim a banghih a pawt neita ua? Na nu'n nang hon lehzon maimah diam maw?"

Ka dong kha zungzung a, amah leng hon dawnna di pen thei zoulou in hong nui cheuh masa zozen hi.

"Ka nu'n in tungkhin khawng hon sata maithei ahi UThang. Lunghimoh na di omlou ahi. Pai di inga, tungsuk mai di kaka hia"

"Khovel le a thoven louh toh, numei chauh a dia lauhuai di ahi. Ka hong khasuk ding"

Amah toh kiton a, omkhawm ka ut gukna sawtpi a hita. Himahleh hiaibang kampau a mai a zang ngam ngei din ka kigingta kei. Tu'n lah ka genkhe kha phut mawk a. Ka kisuanglah thak sim hi.

"Hong kha veleh UThang. Khatvei khawng nang toh kiton bang I ut sam voi"

Zummel sim cheuchau in a hon chi a, keileng ka lungsim guk in ka nui hauhau hi.

Ka paina sa teng ah ka lehkik suk thak maimah a, ka sungte'n bang ana ngaihtuah di uh ahia chih nasan ka phawk ban kei. 'Khatvei bek Mawite toh....' chi a ka lunggel tangtung chu a hipeuhmah phot ve. Ka kipak kei di chih kua a gen ngam ding?

"Ka in tan uh hong kha vanglak ve aw UThang?"

"Bang ziak in e Mawi?"

"I hon ngai a eivoi"

Zaknuam hi na vial e. Hemlam doh ai a hikha diam?

Kipak ding ka diam? Ahihkeh pilvang tak a houpih ding?

Bangteng hileh, kei sang a kal sang tawi zaw chu a hipeuhmah. Ken ka gen ngamlouh hon gen tuh a himai a.

'En le I hon ngai thou vele' chih suk guap din a hoih. Ka kidek phot.

"Khaih! Hong kamsiam na chia. Koi a na zil e? Haha"

"Kamsiam hon chi zomah lai. Mi'n zum pipi a kigen a..."

 Zum a hi ngut ding, a omdan ah alang pah hi.

"Ka hon chiamnuih hi e Mawi. Tuni dawr hong lou uh maw?"

Houlimna ka heikhe geih hi. Denchianga kamsiam a ka kitotah khak ding ka laugu sim sam hi.

"Hong mah ung e. Ka nu'n hon khakpih pah a, hon pawtpih eivoi. Ka pawtna ule sawt dek zozen ta eive"

"Aw, ka pai a kon ettouh leh ana kikhak mawk uchin a, ana buaizak dek man kei vele"

"Haha. Nang pa. Uang dah aw"

"Uang lou. Na theihnop leh na dawr sak ua vaipa, eipau siam pa va dong aw"

"Hahaha"

 

Sutzop ding.......

© thaikawitongluan.com

Part Masa te: PART - 1  | PART - 2 | PART - 3 | PART - 4 | PART - 5 | PART - 6 | PART - 7 |

Add comment


Security code
Refresh

© 2017. Thaikawitongluan.

We have 4 guests and no members online