Stories

ZAAN KHAT SUNG "RELATION-LONGPI" AH

ZAAN KHAT SUNG 'RELATION-LONGPI' AH!

K Lianthansang | www.thaikawitongluan.com

 

 

Pian apan khatvei hihkhak patna ahih ziak leng a hidiam ah - kizum sim mawk veh aw. A lehlam va etsan veivai di lah hilou; a guanlut lai tak va et kelkul di lah nuamlou zel. Enlou in doh deidai lelah, lemlou chik a dohkhak di bang lauhuai zel. Alut hoihlouh chiang banga ana guanlut hoih ngaizel ahihna ah zumsim pipi in ka en cheuh zel hi.

Huchia, anunglam apan mailam man-oh a, awl a 'thohlawm' ka don suksuk leh, amailam a nupite tutna lak ah nungak samsau zihziah khat ana tu mawk hi. Mikhual thugentu nei ka hihziak un, huaipa' tanaute hingei di'n ka ngaihtuah ngal. Ama' tutna zawn lak ka don in, en leng hon enhoih ngamlou hi'n ka thei. A thohlawm neuchik leng dawksaklou in a vangsung ah ana guanglut ngal mai. A gei ah nupi thausim, nuihmai pu mahmah ngen 3(thum) tu uh abang(eile kizum lua in, kitheibun nawnlou).

Ka nungak muh pen bel, ka khatvei muhna a hikei. Naupang chik hidi'n leng ka gingta. Puan-ak ngawng lianlou a silh a, puan teng in a pheipi tung ah 'Bible' phensa a koih hi'n ka thei. Ami ka muhkhaksa ahih ziakin, bilbah kikhai gehguah peuh leng bat di'n ka gingta kei. Ni 3 paisa a ka na muhkhaksa banah, ka muh apan ka lungsim teng hon luahdim a 'ka lungtang kumpinu' hihna luahngal amah ahi. Huai kia leng a hikei, " Jersey na nei hia? Na Min leh Number deihhuai na ee " chi a, lawmte toh ka na chiamnuihkhaksa uh leng ahi. Hon thei lai diam ah, kei bel kizephawk in ka zum gu mahmah.

Gendawk tavet, ka muhkhak masakdan k'on gen vet ding. Rayburn College apan B.A ka zohkhiat nungin, cement tok a sum loh in alang-alang ah ka kuan zel hi. New Lamka a inn bawl a ka kiloh ah, nasem  a ka omlai un, a upa toh hong hohkha uhi. College uniform silh ahih man un leh suun tanglai a hong hoh uh ahihman in, College a exam neidek uh hidi'n ka koihpah. Huai banah, inn bawl a ka va kilohnate uh toh kitanau uh hingei di'n leng ka gingta. Hiai hun ah ahi, den a k'on gen - ka lawmte toh, "Jersey na nei hia? Na Min leh Number deihhuai na ee " chi'a ka na chiamnuih uh.

Cement tok kawma ka etphei zual ahi a, ka muh apan hoih ka sa pah. Ka lawmte kiang ah gen leng ama' omlai mah a, " Ka lawmpa'n hoih hon sa eive, ka lawmpan hon star " peuh chi'a, genkhe pah kengkong di ua; maizumtak a hon koihthei zel uh. Hoih ka sakdan sathu um in ka um mai a, koimah ah ka genkhe kei. Inteekte toh a kihouna uapan in bel, College a exam dek, Imphal lam a ILP Demand-te ziaka Lamka lam tanpha leng buaikha in, exam ahun asuan ziak ua thawnkik ua(Manipur University nuai a teng' question kibang ahihna ah, Imphal lam ate exam theilou a, Lamka ate ana exam chihdan omlou mah ahi), tuidawn kawma hong baang uh ahihdan ka thei hi.

A paizoh nung un, Inteekte tanau nai mahmah khat kiang ah, " Den a hong hohte na theikha ngei hia? " ka chihleh, " Theikha ngei chiahlou, Inteeknu - Nu Lun' aa lam deuhte chu a hidi " chi'n hon dawng a. Bangmah ka genbeh tuan nawn kei. Ka genbehlouh hang in ka lungsim ah, anuihmai leh mithah neem diidiai-te a mang ngei kei ding. Inteekte tanaute ahihleh, zonkhiat a haksa kei ding chih ka theih ziakin ka lung anuamtuan mahmah.

Ka nasepna mun ua ka muhkhak zoh nung, Biakinn a hong kikhop ua, ka na muhkhak nawn zenzen pen a nihveina ahi. Nasepna mun a ka thoh bawl lai un lukhu(CT Lian' lukhu dandan) khu ka hihman in hon theitum di'n ka gingta khol kei. Hilehleng, thohlawm ka va don laitak in bel ka kizephawk mahmah. Kuama'n hon thei kei leh le, ei kizephawk geuguau a om hun neikha vek di i hihman un, gentamlouh in ka  om didan na man mai d'uh. Thugenpa' adia abang ahi dia aw, a tanu adia aw chih tanpha ka na ngaihtuah man thepthup. Thugentu bel amin ka zakngei himahleh, atak a ka muhpatna leng ahi. Kikhawm tawptan in leng a houpih khak didan lampi a omkei. Khahsuah chu ka hiphot nawn. Houpihkhakna di chance teng beivek bel a hikei.

Hunte hong paizel in, kei leng ka nasepna mun ah ka kuan zomzel hi. Kha bangzah hiam nungin ka zousiang khongkhong ua, a latna chihdan programme neuchik khat, inteekte'n hon bawl uh a; huai hun ah, a tanau-lainate uh leh kou a nnasemte teng leng hon chial ua, ann nekkhawmna leng om ngal hi. Program kipat nung in lawmpa toh ka tung ua, lutlouh di lah hilou chi'n, zumsim kawmin, 'Tom & Jerry '  banga kidelh hile ung kilawm hial in, kongkhak kaihong zat in, ka lut zalh uhi.

Tutna teng ana dim sim, mun khenkhat bel awngsim lah bang, va kihenna dia lah mi zahtakhuai sim pipi ngen hi uh. Kou leng lawmpa toh, Common room paikan phei in kitchen lam ah tutna neu ka va la uhi. Kuakua ana om uh a chih leng ka enhoih man kei(i zumhat pi toh). Munkhat a ka tutsuk mawk leh, ka mai zawn ah, 'muhchiil pan lunglai kuai lia zouzam' ka chih hial pen ana om chiitchiat hi. Va tuankhiat thak di lah hilou, mailam va et di lah, amah ka maizawn tak a om. Tunglam va et vengvang di lah hilou zel. Phone mek a va kuun dedu di lah milak a kilawmlou zel. Huchi'n lemlou takin ka omkha a, progamme bang sawt ka sa hial.

Huchia hun zangzou in, anne ka nengal uhi. Ann nekkawm in, 'tuni chuh, khatvei bek houpih teitei di' chi'n ka ngaihtuah den a, ann abeilam bang ka phawkkei zozen. Ann kuanga omteng huisiang sipsip in, kuangsilna ah ka va koih a, khut silsiang zou ka nuulhul laitak in, maimit suanchimlouh lia duangkuai leng hong paiphei  hi. Ke'n leng, " Na vah hia?" ka chisuk mawk leh, amah houpih lou dia hon gingta ahi dia, akiim-apaam a midang ka houpih om hiam chih enkual masa in, midang omlouh takin, " Hi, vahlua. Nang la? " chi'n hon dong kik pah hi. Kamtei ka sa mahmah. A 'aw' ka zakkhak patna ahi a, neem ngiingei in, sigui teng hon zuisuak hileh kilawm hial hi.

Huai ni bel, gilpi leng kipak, mit leng kipak in ka bil tanpha kipak hi. Common room ah pasal kei vual di khat ana om a, huai toh ka houlim uhi. Ka houlimpihpa bel, ka nnasepna mun ua form toh hong hohkha mah ahi. Meltheihsa ahih man a ka houpih suk mawk leng ahi bok. Ken leng awl in ka dong a, " Amah(enphei cheuh kawm) na nau hia? " ka chihleh, "Hi ka nau ahi, ki-classmate zomah ka hi uh " chi'n nui kawmin hon dawng hi. Ke'n leng, " Ka gintak sim mah, na kibang sim uh. Amin le thei seselou inga. Ka minbei houpih mai ahi den ale " ka chih nawnleh, " Amin maw, Chingboi ahi " chi'n, hon hilh hi.

Ka ngaihtuah kikthak  chiangin; kithei ngeilou pi ka hihchiang ua, a gilvah leh vahlouh ka dot lai a, amah houpih hidia ana kikoih lou di eimah ve ka chi khawnung. Tu'n ka theisiamta (Chingboi in hon dawn pahlouh ziak).

Huai nitak, khawmial nunga inn pai in, 'facebook' ah "Ching" kichi ka search ngal leh, amel uh kibang di khat lel leng ka mu kei. Huchia sa vengvung a ka om sungin, limlak khat hong ki-upload chet a, ka etleh 'Chingboi' toh ana kibang uhi. Himahleh, a facebook username a 'Ching' a kichihlouh ziakin ka lung amuang tuan kei. A limlakte ka ban et vek a, limlak kuakua 'tag' deuh a chih khawng tel in ka ensuk nilouh hi. Huchibang kawmkal ah, ann nekzoh a ka kihoupih - a upa' lim khawng leng ka mukha a, ka zonzon musuah chu ka hipeuhmah phot. A kipahhuai sawnsawn ahihleh, friend request khak ngai selou in ki-friend sa in ka om uhi. A limlak khawng ka va comment leh, aman leng honna theipah ahi ngei dia, "Usang....kipahhuai na e " hon chipah hi. Comment maimai a, " Usang.." hon chih lel leng kei adi'n thupilua. Himahleh, amah a awng nawn kei - sanmun muangsa a hita!

Hun-le-kumte hong pailiam zel in, limlak a upload chiangin ka va comment cheuh zel a, aman leng honna dawng khial ngei kei. Himahleh, saupi ka va comment nuam tuan kei. Kei' lungtang kumpinu himahleh, aman leng ama' lungtang a kumpipa aneih ziakin, comment tanpha ka kideek hamham sek. Message leng ka message ngam tuan sam kei. Ei le, suun a nasem a tawltak a om a kihih ziakin,  thagim banah, lunggimna di phet in(amah midang a ahih chia) ka houpih nuam sese kei. Ka message louh hang in, a limlak teng ka etkhaklouh a om kei a; mi' comment a dawndan teng leng ka simsuak vek. Ka lunglai hon kuai deuhdeuh a, a didan dang om tuan lou ahihman in, facebook ka 'log out' zel hi.

Nitak khat, 'Rose paak' amah-mah in agelh (a draw) hon upload a, ke'n leng siam salua in, comment ah " Kei lim le honna gelhsak ve " ka chihleh, "Awle, ka man chiangin ka na gelh sawm di" hon chi hi. Ken leng huai ban bangmah ka va gen nawn tuan kei. Va pautam law lehang, mi huat velvul bang ale omtheih chih ziaka kidek teitei mai ka hizaw. Tangval dangte dan a, pate' leisa gari  a utut a kitholhna di nei leng a kihihlouh manin, a chinglousa, muhsit beh a omkhak theih chihziak a dai khinkhian leng ka hibok.

Ni bangzah hiam zoh in, facebook ah message khat ana om a, " Usang, na number hon pe mah dih. WhatsApp na khoih leh, huai ah na lim k'on khak di " chih ana om a, ke'n leng ka number ka pepah hi. WhatsApp ah ka limlak hon khak a, ken leng kipahthu khawng gelhtheih dandan a khutpi tegel toh pangkhawm a gelhsuk noknok in, siam ka sakdan khawng ka ban siatkhiat suk zungzung hi. A genthoh di hileh ka gen di le theilou di himah leng, ka khutpi tegel' hahpanna ziakin kipahthugenna bang saukha dek zozen.

Whatsapp a ka kihoukhak ni uh ahihleh, ka kimuhkhak masak ni uapan sim a kum 2 leh ni 8 ni nitak ahi a, September 28 leng ahi. A ninawn pen, 'World Heart Day' a hizomah. Ke'n bel, lungtang kumpipa neidenlai di ka sak ziakin ka hoih houpih ngam kei. A khawnung in, khattang a sawlbang hei ahihdan hon gen a; ka gingta kei zomah. Huai apan ke'n leng aguuk a panmun khohthak in, khutpite leng hahpan sem di'n ka hasuan a, taklam khutpi diakdiak a inteekpan mahmah hi. Nikhat in dakkal 24 om a, huai lak ah dakkal 3 bek, Chingboi a di'n ka pekhe top mai(deihlua i hih chia).

Hunte hong pai zel in, kei leng suun a va kiloh in, nitak annek zoh chiangin lai ka simzel a, Imphal khawng ah exam theihtheih ka va exam zel hi. Achang in, Chingboi in hon zui zel a, nuamtuam mahmah. Itna thu bel genkhak in ka nei ngeikei uh. Theory masalou a, Practical lam a panpah ka hi uhia chih bel ka thei tuan kei. Ka deihlam ahihdan amah leng a kithei a, aman leng kei hon deihlou tuanlou ahihdan ka haih tuan kei. Haksatna aneih chiang in hon gen zel a, ken leng hehneptheih dandan in ka na hehnemzel hi.

Nitaklam khat hon message a, " Kei kia om inga, lengla neidek ka hi " hon chi hi. A mi ka dot chiangin hon gen nuam kei. Nitak hong hi a, ka call chiangin a pick-up ngei kei. Kei leng lung nuamlousa in a inn uah ka va hoh a, kongkhak kiuh masa selou in, awl in ka hong hi. Ann huanna mun lak ka tun in, Chingboi' aw di ka za ta.  Thuum huthut dan khawng in ka za a, achang in mi toh kihou zel abat hun a om. Kei leng awl a paiphei in, a room a ka va daak guuk leh, a lupna ah ana om a, khukdin in, a lu ahihleh a lukham kawm ah aphuallut(guanglut) hi. Akhut a khuktung ah akoih. A phone bel a geilak ah Chargingsa in koih hi. Ama theihlouh mah in, ka kihemkhe nawn. Ka lungsim a kipak mahmah mai a, message ah, " Ching, na thupi lua, na lengla k'on theihpih a, na buaina hon dawn zangkhai thei di ahihdan leng kon theihpih. Na thupilua..." ka chihleh, a kihoupihpa ka theihdan lamdang a sa zozen. Khenkhat hileh, mobile poimoh ngaihzaw di uh hi a, chih khawng ka ngaihtuah vungvung.

Chingboi bel ka muhdan in, mi chitak mahmah ahi. Kicheina lam ah leng a vaallua in a kichei ngei kei. Khedap tuulsang a buhlouh hang in, mi' kalkal nuai ah apai sam kei. Ama' sanga niam zaw di leng a bei tuan kei lai. Amuuk a sanlouh hang in, a khi bembom tuan kei. A mitsiin chiangin leng hak kelkul mah abang tuan kei a, a mitmul leng beidek zen in a bot ngei sam kei. Khekol kihunloupi teen peetpawt kichi nuam asaklam ahihlouh banah, puan-ak leng ama a dinga lianlua a silh ngei kei. A sam bel neuchik a nuhsan hilhial a, sau ngihngiah in, huih in a muut chiang bangin, 'vaphual lengkhe dek' mahbang hial in om sialsial zozen hi.

Nikhat, nasem pai phet kisil in. Kisilzoh in laithon ka gelh hi. Ka laithon ah -

" Itpen Leh Ngaihpen: Chingboi,

Pathian venna toh dam  a na om ka lam-en a, na kiang ah hiai 'thaikawi' tungtawn in,  hun sawtpek apan a ka gennop tamlou kon taklang dia, hehpihtak in a tawptan honna simsuaksak hamham in aw?

Na kiang a kagen ut mahmah, lah College kailai na hihziak a k'on genngam ngeilouh tuh, nang k'on itna thu ahi. Tu’n ahihleh, zum-le-zah leng khualzou nawnlou in, hiai laidal chinglou tak pansan in k'on it in k'on ngailua chih kon theisak hi.

Muhchiil pan lunglai kuai ngaih aw, ka lungmuanna di nang kiang lou koi ah ka mu dia? Ka lungmuanna ding khuambang ka gelgel chiangin, nang lou singdang omlou. Singdang' anglai a sambang na zal ding lunglau in, sanggah khattang in lungzuan sial in huiva bang maumau ing.

Ka kinepna nang kia na hi. Lailung in non gelngei sam hiam? Ching, kon itna tul ngeilou ding a, phamna’n zong daibang thengsaklou ding hi. Ka iit Chingboi aw, nanglou a guabang hingzou lou di ka hi. Hon gel sam ve maw?

Na zakdah di genkhak omleh na ngaihdamna bawm ah honna khiatsak in aw Ching. Na hehpihna ziak a, na hon iit thuk sam ka kinem a; nang adia 'Phulou' himah leng hehpihna toh k'on laikhak honthuk ding in k'on ngen hi.

Laikhaktu,
Nang ngai a duangvul leh kinepna lianpi toh nang adia hing - na theihsa. " chi'a gelh in, daakbawm sungah ka thun a, ann neng a belh in, a inlam uh ka zuan hi. Gate bul ah naupang nih kimawl ana om ua, huaite sam in, ka va pesakta.

A nitak mah, ihmut ma a WhatsApp a houpih zual di chi a 'data' ka 'on' leh, " Usang, n'on laithon khak ka na mu a, ka kipaklua. Ka kinepphaklouh tantan n'on gen a, ka gen di pen le ka thei kei. Hilehle maw Usang......ka Classmate 'James' kichi in le tukum bul apan hon ngailua ahihdan hon genden inchin, ken ' B.A ka zoh tan hon ngak in' ana chikha inga, tu'n ken, nang hon dawng leng....." chih teng hon khak hi. Huai nung, kei' message te le a ki-deliver nawn kei mawk. Aban ngaklai di ka dia aw, call suk mai di ka dia aw, chi'a ka buai laitak in, number dang ah hon call a, " Ka battery bei ahi Usang, hiai prepaid electric a chihchih uh le thulak huai taktak kei..." hon chi masa a, ka nuih bang zasim, hon genzom a, " Zingchiang in kihou thak ni aw Usang, ihmutlim " chi'n, mangpha ka kihak uhi.

Vuah leh huihpi kithuah in Lamka hong nuai cheuh ziak a Electric sia chu a hipeuhmah dia, a ninawn in leng electric a vaak tuan kei. Kei leng nasem a kuan in. Nitak thazoi takin lupna ah ka lum a, a online hunhun a amuh di chi'n, " Sambang zalna laikhuntung ah damlou le hilou napi in zaitha patbang neem veng. Zan a thaikawi tungtawn a k'on tongdot te hon dawng teitei in aw Ching? " chih ka khak hi. Gimsim ka hidia, ka ihmupah kha.

Zingkal ka khanloh in, khua ana vaakta. Electric leng ana pai a, ken leng kinepna lianpi toh data on in, mai phiat a kihahsiang di'n bathroom lam ka zot san masa zozen. Ka kiknawn in, WhatsApp ah message bangzah hiam ana om a, Chingboi apan  ngen ahi. Hon message khak ka mangngilh theihlouh khat ahihleh, " Zaitha nem in patpuanbang ana neem ken aw Usang. Thaikawi a n'on dot hiai ah k'on dawng ding. Ka sisan a lum lai teng,  nang a dingin sinlai khuambang khauhsakta ning. Mizalai a nang kia na hi deih chiibang k'on teel. Thaikawi a tong non khak lai in, na sakmel leh na tongdam nemte ngaihtuah den ka hi. Himahleh, hon dawn pah ding ka zum a ahi. Kei adia phulou bang na kichi a Usang, Itna dik ah 'Phu leh Phulou' chih om tuanlou ahi. Hun leh kumte hong bei zel dia, houlungtuak in tuibang kigawm teitei ni  maw" chih ahi. Ka lungsim bang a hi heihuai zozen a, ka diip bang a kisai zozen. Huai hun a ka omdan, Class 10 ana zoukhinsa te'n na thei mai d'uh.

Hunte hong beizel a, khatvei bek Mata Dam(Khuga Dam) lam ah va hohkhawm ni chi'n, Pathianni kikhawm tawp in Auto ah ka kisingtou neknek uhi. Amun ka tung ua, anawl khat a tukawm in, tuilak a long a tuangte ka en kawm uhi. Chingboi in, " Usang, long ah na tuang nuam hia?" hon chi a, ke'n le " Tuang nuam inga, tua Relation-Longpi a tuangkhawm lel i hi " ka chihleh, dawng nalh hon salua, lah hon dotna tak ka dawnkhak louh ziak ahi ngei dia, aban a gen nawn tuan kei. Ken le, " Ching, huai gal a long ah kei leh nang banah, ka pianna nu tuang in, thakhat in i tuanna long uh hong kilep henla, ka nu toh kei tum dia kisa hile ung kua pen na hon hunkhe masa di?. Nang tuileuh siam a siam hididan in koih le" ka chihleh, " Na pianna nu ka hunkhe masa dia, huaizoh chiangin nang. Nang chu na tha hatlai inchin...." chi'n hon dawng a, ka lungsim dantak a hon dawngkha ahihman in, ka kawipheikha dek zozen.

Huai nungin, ka houlim tou zel ua. Akiang ah, " Bible a tapa taimang, kisiik a akiik in a vante siang sitset inchin, smart tak a kiik hialeh " ka chihleh, " Mihausate' vok-ann pia khawng a va kiloh hi a, siang di'n ka gingta kei. Niin a niin di'n ka gingta. A khekol khawng le kek nemnom inteh " chi'n nui cheuh a, a biang suum bang kilang hoih diak hi. Huai zoh in, " Niin a niin sa a paikik hi a, apa'n ana gaalmuh inchin, va delh a, amun a tun taka, ' na namselua, kikthak oh, insung ah le na lut theikei di' va chi kei maw?" ka chihleh, " A kawi a, atawp tonton kichi hizawmah lou maw, Usang " chi'n hon dawng nawn a, ken le " Huai dandan ahi k'on itna. Na hoihna kia hon deih ka hikei a, na hoihlouhna omkha teng toh na hoihna teng toh avek a hon iit ka hi " ka chih kawmin, a bilbuk ah hilou in, a muuk ah " I Love You " chih, a ginglou in ka gen a, aman leng hon genthuk sam hi.

Huchia ka omlai un, a sakhau a laithon hon sawkkhia a, " En ve, Usang, hiai James in hon khak eive, na sim dia k'on puak " chin, honsa in hon pia a, ka etleh hichi'n kigelhsuk deudau hi.

" Itluat: Lia Zouzam Chingboi,

Na kiang a ka gennop mahmah om a, hehpihtak a honna simsuaksak teitei ding in ka hon ngen hi.

Tuma in, na kiang a itna simthu ka hon lel lai in, “ B.A ka zoh hon ngak in “ na chi a, tu’n lah Sangpu toh na kingaizel ua, bang ziak a non khem eita? Ken ka hon ngaihluat ziak a, nitak chiang a nang kiakia hon ngaihtuah inga, lai leng ka simthei nawn kei. Thamlou in ihmu thei ngeilou ka hi. Midang himhim ka lungsim ah omthei lou, ka lungsim ah nang kia om na hi.

Na hehpihna ziak liauliau a, hiai laidal tungtawn a ka hon itna thu kon gelhte hoihtak a sim a, naubang n'on sansak ka kinem lailai hi. Ka genval luat khak omleh hon ngaidam mahmah in aw Ching.

Laikhaktu,
Nang ngai a genthei leh lungzuang,

James "

Ka simkhit in, Chingboi ka liang ah hong kingai phei a, " Usang, bang ka chi dawn di " hon chi hi. Ke'n leng, " Dawn sese ngai tuanlou ahi. Na omdan leh gamtat ah na langsak lel dia himai. Hileh le, kamsia a kuamah na houpih ngeilouh di ahi " chi'n ka dawng lel. Aman leng hi sa mahmah ahi dia, a lu ana su ngaungau kawm hi.

Chingboi' liang tungah ka khut veilam koihphei kawmin, " Ching, when I am with you, I wish I could stop time, so that I could spend time forever with you “ chi kawm in, nitumna di lam ka enkawm hi. Chingboi in le, “ Don’t  worry  Usang, I Love You, ka sihtan dong in nang a ka hiden ding. And now, i'm in need of Love Sick Medicine - that is 'You' “ hon chisuk phuah zaw, azak nuam khopmai. Gen di pen le ka thei  kei zozen.

" Ni tumhak nawnlou di ahihman in, I Paiphot diam, Ching? " ka chihleh, " Nang chih dandan " hon chi a. Ken leng, " Kei chihdan vuak ahih di hilou, nang chihdan le ahih ngai aka " ka chihleh, " Paiphot ni leh, nitum nung a inn tun le nuamlou di hi a maw Usang, kikhopna di toh " hon chi hi. Ken akhut taklam a len in, anbang itna mualsuah ngei dia chiam kawmin ka kai dingtou a, Auto omna lam ka zuan uhi. A  taklam khutzung-te' kekal ah kei khut veilam khutzung-te ka guanglut a, sapte'n 'finger crossed' a chihte dan uh hingei di'n ka gingta. Huchia ka let kawmin, " Na khutzung kekal-te kei khutzung kia omna di ahi aw Ching " ka chihleh, " Hitham e Usang. Naupang chihlouh lensak ngeilou di ka hi " hon chi a, ka nuikhawm uhi.

Lampi paikawm mah in, " Nuam na sa hia, Ching? " chi a dong dek, "Nuam na sa hia" ka chihleh, Aman leng, " Nuam na sa hia" chih teng hon gen man chet a, mak ka sa zozen uhi. Ka ngaihtuahna uh ana kibang chu a hipeuhmah. Nui kawm in, " I ngaihtuah bang ana kituak chet zomah a, nupa di mah hi hang e…” ka chihleh, " Made for each other a chihte uh hiva maw Usang " chi'n nui seusau a, a sam bang huih in mutleng selh in, ka mai hon hetkha phei sialsial zozen hi.

Auto omna lam zuan a ka pai sung mah un, Chingboi' phone hong ging a, a etleh " James " chi a ki-save apan ahi. A ringtone bang ngaih law zozen ahih man in, hon phawng kha a, ka Alarm ging ana himaimah. Ken leng alarm off in, ka thoukhia a, kihahsiang ngal in; Zaan Khat Sung 'Relation-Longpi' a ka omdante  khawng ngaihtuah kik nilouh in,  'atak ana himaileh zaw' ka chi vungvung hi.

Laigelhtu' Lungsung Pan:

Hiai tangthu phuahtawm ahi a, min kizangkha toh nang min a kibatkhak zenzen leh, " Nang na hi zenzen kei " chih ana kithei in.

- Ka Kipak -

© thaikawitongluan.com

Add comment


Security code
Refresh

© 2017. Thaikawitongluan.

We have 68 guests and no members online