Stories

LUNGKHAMNA MEIPI KHEN AH - VII

LUNGKHAMNA MEIPI KHEN AH

By:- Kattie Mawite | www.thaikawitongluan.com

BUNG VII

 

Nitaklam dak 3:30 bang hon gin hial chiang in ka nasep a lemkei zozen hi. Huchia hi hehu sim a kana om laitak in hong kisam a, kei leng kilawp leh lit thuah in kava lut daandaan zozen hi.

Heiha! Kei gintak ana banglou. Amau inkuan chauh mah ana om lailai. Kei ana om masa zaw ding tuh ka himai ve.

Huchia TV khawng en a kana tut depdap lai un mikhat kinoh hehu in a hong dianglut hi.

"Oi, PaGin. Hiangtam Lamka a ka pu in hon beisan, keile hong hoh dia kisakhin man hinga, tua huailam aka hoh uh ngai. Tua ka nute'n kong a honna ngak uh"

Naknoh hehu in gen hi.

"Ahihleh, bang I genta dia. Poi mahmah e. Na pu a damlou sa maw?"

"Damlou sa hilou inchin huaiziak hive aw. BP buai gige hiven, huaiziak mah ahi"

"Aw...aw.... ei bawltheih hilou hiven, kisuanlahna di a omkei. Na manna uh poi kon sakpih lua Mawi"

"Eivoi maw.. a chih leh kava hohtou di uh awleh PaGin. Neklim un aw"

"Awle... lungnop kipia un aw"

Amah' pawt zoh phet in PaGin in annek hon sawmpah hi.

"Va gaal sam hoih ding ahi. An le manta ahihchiang in ne ngal mai ni uh aw. Poi mahmah e, Thang, kihoukha manlou na hi ve ua"

"I gentheih omlou hiven, PaGin. Amau poi saksak huai zaw uh e. Sihna in vai hawm mawk ahihchiang a"

"Eimah ve. I dam dia, kimuh hun hong omzel na ding ahi. An kon thuk ngal ding"

NuNuam in a hong kum sam hi.

Annek bel a nuam nawn chiah kei.

Meh a lim, an a lim. Himahleh annek a limkei.

An limtak leh taitak a nektheihna ding a lungsima kipahna poimoh mahmah ahihdan ka hon theikhia hi.

Annek khit in PaGin sigal ding in kuan ngal a, kei leng sawtlua om nawn tuanlou in ka pai hi.

Huai nitak ka lup in ka lungsim a vak panta hi.

Ka lem gelhtu ka mungei mah ve. Tuma in a hong dak zual. Himahleh kana limsak luat louh ziak in a mel di kana theibun nawnkei chihthu lel ahi.

Himahleh, annek dek a naknoh hehu a a hong omdan zaw ka mangngilh ngeikei ding.

PaGin in a gendik. Melhoih mah ngut e. A kampau le a fellua. A gente a diklou khat leng a omkei.

Nervous na di omlou geih a a hong dak tuh kizen kasa mahmah. Himahleh a khonung in houh ka zum khonung chemcham a.

Jacket tual sim silh a, ngawng-oh vut rong ok, khekol lum mul thipthep, a hungeih a gak teng a kongbul a hong dak tuh mitkha a luaiden ding in a om ta mai hi.

A samte lah a kawngzang chiang pha in a nung leh malam ah akaikhe tuak ua. Numei ahihna a lang diak a, a etlawm mahmah. A melpuak ka hon hilh lai vanglak ding. A gawngse kei a, sai-ip tunkhelh bang meihmoihte leng a hikei. A din sandan tuh feet 5.4 a pha ding. A vun a mam in a nou hinhian a, a mel a vak singseng hi.

Ngaihtuah kha den sim kahihman in ka ihmu zok theikei a, ka zun bang hong suak man hial hi. Zunsuakpi toh ihmut theih kigingta lou kahihman in zun nawn ding in kava thou a, sanapi kitak ka et leh zan dak 12 ana ging phial hi.

A tawp in ka kikhimkhim a, ka ihmu khong sam hi.

Zingkal bel ka khangma tuankei. Ka thoh hun ngei mah in ka thou veve hi.

Ka ihmut hak ziak a hi ngei ding, ka mitnai bang ana om sim neinai zomah hi.

Niteng in ngeina bang in ka sepna ah ka kuanzom zel hi. Nasep ding a tam ziak hinte, bangmah ngaihtuahna ding hun a om vakkei. Himahleh nitak a hong hih chiang in lungsim gamlek nuam mahmah hi.

Khatvei sun a ka khawl tawldam zual lai in PaGin a hong lut a, ladal khat a hong pe chet hi.
Ken leng kana la pah a, ka etleh receipt ana hi a, mak ka sasim heihuai hi.

Bangmah ka genma in a hong pau a, "Thang, hiai va la in aw. Sum ka piaksa ahi"

A laidal ka etleh Agape Art House chih ana kigelh a, a omna mun thei kahihman in bangmah dawngsau nawn tuanlou in ka aw suk mai hi.

"Tu'n maw kava kuan ding?"

"Poilou, na nasep alakloh kei nakleh"

"Lakloh kei. Kava kuan ngalngal ding"

Rengkai Road zuitou in, Teddim Road ah ka pial tou a, JP Selection mai lak a lampi kantou in Central Road bul mahmah a ka hohna ding mun ah kava lutpah ngal hi.

Ka theih kuamah omkei mahleh  a mun thei kahihman in kimaingalsak deuhmai in ka lut vat hi.

Ka gintak sang in apindan uh ana neu mahmah a, lemlak bangzahhiam bang a kitak in, a pindan nawl khat ah dohkan leh tutna a kikoih a, huai ah nupi thausim meihmaih ana tu hi.

Keileng lut galgal in ka lai tawi pau hetlou in ka pepah hi. A hon en thakthak a, hon theihbawl mah a bang hi.

Huchia hon et-et chiang in keileng ka zumsim a, kul ngellou himahleh ka paukhe khong hi.

"Bang chi a, a diklou om hia, Nu?"

"E...e... mawkmawk. Hilou hial. Dikmah e"

Kintak in hon dawngkik somsom hi. Huaizoh in hon kiheikhiat san a, "Te, na PaGinte' lem di na gelhpen hon tawipawt dih e. A hong ladek uh" chi in kikoukhe lailai hi.

"Awle. Ka hongpai ngal"

A sunglam apan dawnna a hong suak ngal hi.

Ka etthak leh, kongkhak dang a pindan nunglam ah ana om ngut a, pindan dang leng omlai ahi chih ka thei ngal hi.

Huchih laitak in kong ah mikhat, singpi leh puri tawi in a hong lut a, a singpi sap uh hong tung ahihdan ka thei ngal hi.

Mi thil nek lai a va om nuam salou kahihman in paikhiak zok ka ut petmah. Himahleh a hong pawtkhe ngeikei. Huai kal in tua nupi nu'n singpi khat leh puri khat a sapbeh zomah hi.

Nuam salou sim kahihman in ka hi hehu sim a, ka nak a lem nawnkei hi.

"Kinlua na hi hia Thang?"

Ka min thei mawk. Ka enkha lawklawk zozen a, ka min ana theih lamdang ka sa mahmah hi.

"I, kinlua hituankei"

Ka min a theihkhak dan dong ut mah leng ka dong ngam nawnkei.

Huchia ka om heihuai lai in tua pindan dang khat apan nungak khat ahong pawtkhe phei a, lemlak a hon tawikhia hi. Tua nungak bel kua dang hilou in ka muhnop leh hounop gige, ka lemlak gelhtu leh ka lungsim hon luah huauhuau Mawite a hi hi.

Hon pezok leh ka chi mahmah a, himahleh ka gen ngamkei.

A guk zahtak zaw ka hi ve. Zahtak chilou din lah, ka mit hem in tua nungak lam ka en gu giaugiau zel ngal a.

PaGin in a lungsim a zatdan sang kasa. Ka kimuhtheihna ding uh vai hawm ana hilel tak. Ken ana phawkban mahmah lou.

Ka om lemlou in ka nak bang a kinoh zozen hi. Himahleh pasal khat hihna toh kilatsaklouh ka sawm teitei.

Dakkhe nawn vaklou in hon piak ding uh ka ngak mai hi. Sawt kasa mahmah a, ka etguk leh tua nungaknu'n lemlak pen puan a nulsiang in, polythene ah a guang chet hi.

Ka lungsim guk a kipak mahmah a, pai ding chi in kigingsa in ka om hi.

Ka nervous toh, mi thil neklai a om ka utlouh ziak toh ka kingu mahmah hi.
A tawp hi, "Hi" chihteng nupinu'n hon gen a, ka van di hon pe dek hingei inte chi in ka daktou pah a, lak a paipah ding bang ka ngaihtuah man hial hi.

"Singpi dawn phot aw, UThang"

Nungaknu'n singpi leh puri ka kiang ah a hong koih daih a!

Heiha! Ka utlouh penpente lak a khat a hi ve.

"Aa, ngailou eive. Hon dawn khin kahi"

Ka chi khempeuh a. A dawn khin ka hi zenzen kei. Himahleh gen di theihlouh ziak a hipen mai.

"Hiai neng lel pasal toupi' gil ah talah ken chiai, dawn ou"

Chi in nupi nu'n ana behlap a, a tawp in ken leng ka la suk mai hi.

A hitak in bel ka lungsim tawng ana kipak gu khinkhian. Kipaksim, lah zumsim a kana buai nilouh kal in a singpi sap uh a hong tung man hi.

"Hiai Zion Hotel te kha, fel lotel uh ahi. A nektheih, dawntheih bawlte ulah limthei. Kenchu eimi a ahihziak mah ale va dawrh di thanophuai sa kahi. Vaite khawng I vuk hauhsaksak sang ua. Ei leh ei mah kizuan le, kidomkang tuah hipah mai ika hia"

Chi in hon gen zauzau a, dik kana sa mahmah. Zumsim pi kichi lou din ka lu bang kana su ngaungau hial hi.

Ka nek uleh dawnte ua lungkim lua kahi uhia, ahihkeileh gen di thei omlou kahi uhiam, a pau ka omkei uh. Ahihkei lelah, zumsim vek maimah kahi uhia leh?
Huaile kithei tuanlou.

Paulou phunlou a ka kimuknuai ziak un ka nektheihte uh leng a hong beiman hial hi.

Nek neilai pau hoih salou uh a de aw?

Kithei tuanlou.

Nou teng hem in nungaknu'n puan khat in a khut hon nul seihseih hi.

"Na khut nulsiang aw, UThang. Puri nek chia zaw khut zol pahpah inchin" chih toh a puan piak hon thuah hi.

"Kipak e"

Ken leng ka khut ka nul sam hi.

Fel mahmah vetvet eive. A melhoih toh, gamtat a fel toh, mit tai in lungsim a zangkhai mahmah.

"Thang, keyboard nanak siam ngei e lawmlawm. Music vanzat dangte le huchia siam nahi hia?"

Ka zumsim hauhau a,dawn di bang ka lin hial hi. A hitak in music van tuamtuam siamlouh ka neitawm mahmah ding.

"Hi, chileng, ka hihtheih dan a kibang vek sim. Hilele keyboard chu ken ka kipahpih pen a, ka ngaina pen"

"Aw. Na pahtak huai lua. Nang chu non thei kholkei na dia, kou chu ka inkuan ua ka houlim chiang ua nang thu bang houlim nuam sek unga, hehe.."

"Hehe, chimawk eive. Bangchi'n e? Ken lah nou le ka hon thei hetkei a"

"Kei NuKim hon chi lechin aw. Hiai ka tanu ahi, Mawite. A chang chiang in Te chi khawng in ka sam zel ua"

"Aw, amah pen eive maw tuma a...... eh, bangmah hikei thak"

Ka gen dek leh ka zum law guih a, pan napi in ka khawlsan maimah hi.

Ka lemlak gelhpen ahi chih thei mahleng, a theilua dan a om chot sanga, dotbawl sawm zaw hisam veng'n, ka zumthak a.

"Tuma a na lemlak, na PaGin' hon piak pen kha Mawite' gelh ahi. Huai mah hilou hia maw na gendek.. haha"

Chi in a hong nui laihlaih a, huai in hon maingal sak zawdeuh hi.

"Himah ei. Hehe.. Nak gelh siam lotel. Kipahpih lua kahi"

"Hiai tele ama gelh atamzaw ahi" chi kawm in bang lam kawk vengvang a, enkual dandan hi.

Kenleng ka etpih sam a, huai ka et kawmkawm in nungaknu ka melhkawm zel hi.
Ana nui heuhau den zomah lai. A huai mah ken muhnuam sa in, milem gelhte en a kineih in, amah melh kawm nilouh.

"Hmmm, nak hoihtheih mahmah e. Nak siamlua. Bangchik apan milem gelh ana panta ahia leh NuKim?"

"Ka pianpih le hisim e UThang, nang dan a"

Mawite in honna dawng a, anu toh ki-entuah cheuh uhi.

Huchih lai in ka lungsim khat hong halhguih om hi in ka thei hi. Nuam sasim ka hi ding, hun ana paisot mahmah ahihdan ka phawk ban kei.

"Kei hiai a  omsawt theilou ding kahi, NuKim. Kipahhuai lua, ka hong tuahpha lua. Kana paisuk phot ding aw" chih toh din ka thuah a, ka milem lak dek pen leng a hon pe ngal uhi.

Nektheih kia a tuahpha kisa ka hikei. Nungak melhoih, fel leh lungkuai tak toh kihou kha a, ka omkhawm khak tuahpha kisa ka hizaw daih hi.

"Himah e, Thang. Paisuk phot in. Damleh kimu nawn na ni aw"

"Awle, omnuam"

"Nangle"

Nuisim hauhau in lamgei zul ah ka paisuk a, hon mukha hoih ngial ten tuh a hai hon sa hial ding un ka gingta. Ei lah kihai teuhlou. Pah a kipak ana kihi maimah.

"Nuam vasa sim na hi tawk ve maw Minthang. Haha"

Ka tunsuk in PaGin in honna chiamnuih zomah hi.

'Kare, PaGin. Om-om uthuai mawk a kei maw?' Chih suk ek din hoih kasa mahmah. Himahleh ka chi hial kei.

"Singpi bang honna dawnsak ua, paipah nuamlou aka PaGin. Nana buai lua hia?"

"Buailou e Thang. Huchi omthei mah ahi. Poilou lotel. Tangval pawt bang chu a chang a zalen sak poimoh aka"

A thugen in omzia nei kasa mahmah. Mawite va chihbawl inla, va saibawl deuh in a chihna bang in kana koih a, ka kipak gusim hi.

Ah, huaizaw kei zeldim thubawl hi.

Sutzop ding.......

© thaikawitongluan.com

Part Masa te: PART - 1  | PART - 2 | PART - 3 | PART - 4 | PART - 5 | PART - 6 |

Add comment


Security code
Refresh

© 2017. Thaikawitongluan.

We have 58 guests and no members online