Stories

KA TU'N LUANKHI

KA TU’N LUANKHI

Siam Tonsing | www.thaikawitongluan.com

 

Naupang chik bangmah theilou kakisak kal in piching ka hong hi a, ngaihtuahna; asia a pha khenthei in ka hong khanglian a, hinkhua haksa leh anuam ka hon tawntou a, aching in khovel paizia theihhak kasak hun a tam mahmah hi. Unau numei nih ka pha ua, ka nu hon itna a thupi mahmah hi. Gentheihna leh haksatna chiteng pal mah leh, ka nu hon khotuahna thupi lua hi. A tanu te a ding a ahinkhua zang a neih leh neihlouh genlou a, ka kipahna ding uh hunteng a ngaihtuah in mi eng vungvung ding in ahon koih ngeikei hi. Govt. sepna ziak in ka pa mundang a a om ngai ahihman in, hun tamzaw kithuah khalou kahi mai uhi. Himahleh, ka pa’n ka unau ua a hon itna leh a hon ngaihna haihvual hilou hi.

Innsung Pa pen hihna len ka pa ahihziak in, ka pa omlouh hun a ka nu’n mohpuakna sangtak nei hi. Innsung vai leh tanau laina vai ah, ka pa dinmun len in ka nu kipei sek hi. Naupang chik akihihman in, thilteng a kip a kawi in ki theilou hi. Ka pa sepna ziak a mundang a om chihmahtak, a chang in ka nu lungzuan hun tam mahmah ding in gintak huai hi. Innsung vai a a khasiatni hun ah, a hehnem tu ding ka pa omlou, kou a taten lah huai hun a hehnem leh ki kumpih ding dan thei nai lou hial ka hihman un, ka nu dinmun bangchi bang a nuam a bangchi bang a haksa ahia chih ka ngaihtuah ban kei hi.

Unau numei nih, ki tuak leh ki ittak a ka omlai un, ka nu leh ka pa te lunggel ka theiban kei uh. Ka innsung mite ngaihtuahna ka phawkban kei uh. Innsung Pa khat khang bawlna ding ta pasal tuh a deihhuai leh lunggulh huai mahmah khat ahi. Ka nu thu hiam a ta pasal neihtheih hileh, nei ding in ka gingta. Huaiziak lel a ka nu, ka innsung mite muhsit leh nelhsiah a a om mai leng amah a ding a, ki ngaihsiat huai tham ching thei dinmun ahi. Himahleh, a khitui luang te luang paisuak lou in, a tate leh a pasal a ding a a ginom na suah in, a haksa a nuam thuak in hon makaih tou den hi.

Annkhing tuibuk, gilvah a ka neklouh hun bang uh leng a om sam hi. Aziak asan ding huai ahi chih thei chitchiat kei le ung leng, ka nu’n siamtak in hon hehnem in a hon khemzel a, theisiam kisa in ka nu thugen ahihnak leh ka lungkim suk theizel uhi. Hichibang hinkhua Pathian in kou tan ding a anaseh zaw theihsiam huai saklouh hun tam mahmah hi. Himahleh, tunitan hingdam a hon koih a nek ngawlzen lou a a hehpihna ka tanziak in ka kipak a, lungsim guk a bah leh ngui te taisan lou Pathian om ahi chih ka chian ziak in ka hihtheih khomkhom in hon siamtu Pathian ka phat zel hi.

Tapa neilou chihphet hilou in, ka nu namdang zaatdang ahihziak mah inleng, innsung mite nelsiah a kai sawnsawn lai hi. Ka nu’n a siam suah kisa in kamsiam leh nasep ah hahpan mahmah napi in, phatlawh vang mahmah hi. Ka pa toh omkhawm a takhawm hile ung, ka nu gentheihna ahichi zezen diam chi in ka khonung ngaihtuah sek a, himahleh, hun paisa lah lakkiktheih mailouh ahi zel. Ka pa sum muh te innsung a tekpu tek pi khut khut ah piak in om a, huaite ka nu’n a pasal loh zekpha banlou suak hi. Silh leh ten nek leh tak mahni a di tamlou bek muhtheihnang chi in, ka nu’n dukan neuchik a hong a, himahleh, huai a a muhkhiakte natawm, etlahsak in a om zel hi. Demna ding leh mohsakna ding kia thei hile uh kilawm in ka nu tung ah kamsia zang in ka innsung mite’n ka nu a kou hun uh ka zak zel hi. Naupangchik ka hihman in huai hun in ka nu anglum mah ka bel ua, ka hihtheih uh adang a om tuankei.

Ka nu’n a haksatna te ka pa kiang a tun zial diam aw? Ka pa’n bangchi’n ka nu a hehnem zel diam aw? Ka lungsim a sau paithei tel! Kum bangzah hiam nung in, Ka pa’n ka nuta un a kiang a omding in ahon sam a, inkuan kim helhel a a ka hong khosak uh tuh, nak nop hinatel e, nui khawm, ta khawm, kapkhawm in ka hong om ua, kim leh kiang te kouna te hon siamtu Pathian in bangmahlou a honsuahsak hi. Kum tamlou inkuan kim a nuamsatak a ka om lai un, lamet louh pi in ka nu’n damlouhna a hontuak hi. Ki khoi theih dandan in ka ki enkol hi. Himahleh, ka nu’n a natna a thuaklah dan hon gen ngeikei himhim hi. A pasal leh a tate khualna in amahmah in haksatna a kipuak a, kou a dangte ka kipah theihna ding kia uh a ngaihtuah zaw maimah hi.

Tu hun a ka nu hinkhua ka ngaihtuah kik ching in, ka nu’n a pasal leh a tate a ding a haksatna a thuak mualsuah te khawng nu tampi te’n a zou di uam chih bang ka ngaihtuah mawkmawk a, mi a ding in simmoh huai leh neihsiah tak a bawl a om hina pi in, ka nu bang nu omding in ka gingta kei phial hi. A ta ka hihnatak ziak in ka nu mah thupi kasa pen hi. Ka nu damlouhna in ma hon sawnzel a, hun tamzaw kou theihding deihlou in a natna ana thuak charchar mai hi. Sum leh pai ki ningching tuansam lou ahihna ah. Innpi khat hihna toh, innsung mi leh tanau laina hong khutdoh bang oma hihman in, neih leh neihlouh genlou a mi panpih ka nu utlam ahihziak in, mi lametna tan pe zou hikei mahleh, a neih a a kuahna leh kuamah it ngeilou hi.

Ka nu a hong hat kei deuhdeuh a, himahleh, ki etsak ding khawng a gen kei hi. Ka genchiang bang in, ki etsak ngailou ahi chi peuh in hon dawng a, awl a hong pha main a di ahi chi in hon leh hehnep zawsop hi. Mahni a hun sehtheih hilou ahihman in, ka nu’n a khovel hinkhua zou ding ahong hita hi. A natna puangkhia nasa in a honsam a, kenleng hihtheih bawltheih neilou ka hihman in, damdoi in ka naih pih sawm hi. Himahleh, hun in hon ngaklou hial ahihman in ka nu’n a kha a khah ta mai hi! Ka nu laitah hun in hon siamtu Pathian in kou innkuan a ding a bang gel a hi mahmah hiam?! Khutvuak lel ka hihdan hon langsak na maichia maw chi in Pathian ka buan mai hi!

Haksatna leh lunggimna namchiteng thuak a ka nu luankhi nul ding ka ngaihtuah kikchiang in ka khasiatna in hon tuam a, ka khitui ka nul sek hi. Himahleh, ka nu luankhi nul bangzahta in a tam dia chih ka ngaihtuah ban kei. Ka pa’n bang lunggel a nei diam aw… Ka nu luankhi nul hunsa lou a hon siam pa’n kei tung a ka nu luankhi nul hon sunzawmsak ding bang hial in ka ngaihtuah a, ka lei hinkhua ka nu omlou in ka thuakzou diam aw! Ka nu luankhi luang te ziak a hiaitan tung ka hi chih ka leh ngaihtuah kikchiang in ka kipak a, ka nu ngaihna a uang sem sem hi.

 

Ka tu’n luankhi ziak in maw;

Sian simthu paibang ka pom.

Ka tu’n luankhi ziak in maw;

Vabang pil a laitual ka lengtheih.

Ka tu’n luankhi ziak in maw;

Lunta ka eng tuanlou.

Ka tu’n luankhi luanglou hileh;

Sian itna ngilh kha ning.

Tun aw na luankhi hul ta ding;

Sian anglai ah dawnbang tuak din

Haibang na ngak in aw ka nu it aw.

Add comment


Security code
Refresh

© 2017. Thaikawitongluan.

We have 18 guests and no members online