Stories

DIKTATNA MAH AWLE...!

Diktatna Mah Awle…!

ZM Tonsing | thaikawitongluan.com

 

Naupang chik ka hih lai in ka pa'n hiai leitung haksatnate thuak nawnlou di'n a tangtawn mun diing hon zotsan hi. Huailai in ka nau Chingte ka nu'n a gilsung ah kha 6 khawnglel paipan a, a tanu melhoihtak Chingte tuh ka pa'n a mukha mankei. Ka pa’n ahon omlouhsan lai a naupang chik hilai ka hihman in poisalou chihna hikei mahleh ka posiam vanglak hi. Ka pa ka itziak in ka kap kei a himahleh ka nu banah ka pa hon itpih tanau-lainate' kah ziak in ka kap zaw. Ka pa itlou ka hikei, nauching chik, theihsiamna kitasam ka hi zaw hi.

Ka pa hon itna ka theihsiamma a ka pa'n hon omlouhsan banah ka pa toh hiai leitung a hun tomchik sung zangkhawm kha himahle ung pa omlou a hinkho zat kingeinaseh chih a om theikei a, ka khanlet dungzui in pa' itna leh innsung a pa poimawhna ka theisuah veve hi. Mite innkuan kimtak a tengkhawm a, pa' vaihawmna innkuan sung a khosa khawm liailiai khawng ka muh chiang in hampha leh en-huai uh ka sa a, amel nasan leng hoihtak a ka theihchiang nawnlouh ka pa ngaihna in ahon tuamsek hi. Himahleh, lehlamtak ah, innsung pa khat hingal a mohpuakna theilou, innkuan enkol a kem di hizennapi innkuan sung leh zi-le-tate a dia lungkham-mangbatna tunte lel pa khenkhat ka muh chiang in hichibang hinkhua palkhak di lauhuai ka sa a, tagah himahle'ng hampha bang ka kisak hunton a om zel sam hi.

Nitaklam khat school kaitawp di kuan in vuah ahongzu hi. Ka lawmte anute uh hiam ahihkeileh apate un school ah hongpi nainai uhi. Gari a kipokhe loute leng vuahnuai ah niliap khukawm in ahongpite toh kiton helhel in ahon paisan siausiau uhi. Kou unau bel ka pa om nawnlou, ka nu lah nnasem a buai ahihman in kei leh ka nau tuh pitu di neilou in school hulliap (verandah) ah votsa a liing keuhkeuh kawm in ka ding dildel uhi. Lawmte lah muhphak a om nawnlou, kihoupih di omlou in ka nau toh ka ki-entuah gualgual maimah uhi.

Vuahzu in lah theu sawm mawklou, tam deuhdeuh hileh kilawm zawmah ahihman in a tawp in ka nau toh vuahnuai ah innlam zuan in ka pai mai uhi. Mi ahonmu khenkhatte a di'n haihuai ahih lailai in khenkhatte'n nopsaktuak bang ahon sa diing ua, tua kawmkal ah khenkhat leuleu in ut-le-dah a gamtang, donlouh leh ngaihsaklouh' ta khawngpeuh a honna ngaihtuah d'un ka gingta. Naupang chik himahle'ng ka ngaihtuahna in kilkawmteng a dapsuak a, ahon paisansa ka pa ngai in ka khitui ahongluang khia hi. Ka nau lah neulai ahihman in bangmah kikuppih theih tataklouh; pau zaw sam omlou a bangtan hiam ka painung un inn ka tung khongsam uhi.

Inn tung, gate ka kan uh toh kiton a ka nu'n honna galmuh pah ahi ngei ding a, vuahnuai a hondelh phei in ka nau innsung ah hongpom lut hi. A dang a inn ka tun chiang ua kipak leh maitai tak a honna houpih gige ka nu'n tuh hiai ni'n bangmah ahon gen hetkei. Sun a school a ka thilhih tuamtuamte uh leh ka homework-te nasan uh leng hon kanlou hi. Pau hetlou in ka uniform kawt demdumte uh ahon suahsak a, a kallak in a kham zohlouh a mit a kipan khitui hong lungkhete nulzel hi. Ka nau bel bangmah theisiam nailou chih mahtak vuahthuak nuam asak dankhawng peuh gen in kipaktak in nui selsal gige hi. Ka nau dandan a lungsim siangthou tak a om a, bangmah ngaihtuahlou leh kuamah englou a kipaktak a hinkhua ka zatlai nite ka ngaingei mai!

Sun singpi dawn di chihkhawng kinei selou ahihman in zingkal a ka ann val uh tamlou sun ann dan a ka nekzoh uh homework ka gelhpah uhi. Ka nu'n ann ahuan kawm in ka homework uh hon gelhpih hi. Homework gelhzou teacher-te'n byheart dia ahon piakte uh ka nu'n ahon simsak nawn hi. Meivak gina kineilou ahihman in nitak electric vaklouh chia lai kisim theilou a, huaiziak in school kaitawp chia ka nu'n lai ahon simsak pahpah hi. Lai ka simzoh in ka nu' nnasepte ka panpih theihtheih ka panpih lai hi. Ka nau lah neulai ahihman in sep-le-bawl ah ngansiah theih hinailou a, naupang chik a pan upen' dinmun leh pa' dinmun ka hon lenkop zaw nu-le-pa khazaknuai a khosa lawm-le-vualte a eng huaingei mai.

Nitaklam ann nekhin sawtlou tawldam zoh in laisim di'n ka kipan nawn uhi. Ka laisimna gei uah ka nu'n sunchia a siamgat diing khau zialkawm in hon tutpih hi. Ka nu'n siamsinna lam ah leng bangtan hiam ana zilkha sam ahihna ah, ka theihlouhte uh hon hilhtheilai ahihman in nuamtuan mahmah hi.

Hunte paizel in keile ka hong khanglian panpan ta hi. Siamsinna lam ah leng Higher Secondary tan bang zou samta ka hihna ah, kei-le-kei kichawm in leh inkuan vakthei di dinmun in ka dingsamta hi. Government a sepna zong di hial a ka siamna in daih nailou ahihman in summuh theihna di ahihnak leh chi'n sep theihtheih sem in, jugali khawngpeuh ah ka kuan hi.

Nitaklam khat nnasem ka pai di kuan in ka phone hongging hi. Cement toklai ka hih banah ka zul a inn neite leh mistry pa om ahihman in amaute ka zahtak ziak in ka la ngamkei. Sawtlou nung in hon call nawn a, ka nnasep laklohlai ahihman in kua ahia chihle enlou in ka gingsak nilouh hi. A hon call det ziak in kenle a tawp a la dia ka kisak leh ka nu ana hi a, nidang a hichibang hun a hon call ngeilou ahihziak in lamdang sakna'n ka pum dim hi.

Ka lak (received) toh kiton in "Thangpu na hi hia, na nu damdawi inn ah ka pua ua kintak in damdawi inn lam hon delh in" chihteng kia gen in ahon koihsan pah hi. Ka nu phone zang a hon houpih himahleh ahon houpihtu ka theikei a, bangziak a ka nu damdawi inn a kipua ahia chihleng ka kanman tuankei. Lamdang sakna ngen in ka pumdim a, seppihte kia gen masak di le theilou in ka chiteng a pumlin hi.

Ke'n leng ka seppihte kiang leh inn neite kiang a thu om dan hoihtak gen in ka nnasep van niin nemnom teng toh damdawi innlam zuan di'n ka kisa ngal hi. Taituahna di gari neilou ka hihman in auto ka ngak a, ka kinoh ziak ahi diam ah ka auto tuanna di bang hong taihak ka sa a, ka thagim banah ka lunggim toh ka hehtha peuh a suak velvul hial hi. A tawp in khat ahongtai khawng sam a, huai ah ka tuang ngal hi. Lampi siat ziak in auto hattai theilou a, mi diktat leh i gam adia poikhoihlou te khawng gawtna i piakpiak sang un gampuahna dia solkal a kipan ‘fund’ hongpaite nemang a, i gam nese tute gawttuak sazaw lou di d’uam maw chi’n ka pa tungtang bang ka va ngaihtuah kha hi. Gam it chichi hang a lah a puah di omlou zel hang a chihkhawng ka ngaihtuah neuhneuh sung in damdawi inn ka tung khongsam hi. Auto ka kumkhiat aleh sum teng khat lelleng kuahlou ka hihlam ka theikhia himahleh vangneih  huaitak in auto ah theih ngeite khat a tuangkhak zenzen ziak in ama a ka batsak a, poi lemchang bang ka sa zozen hi.

Damdawi inn ka lut aleh ka nu koi building leh bang ward a om ahia chih natan theilou ka hihlam ka phawkkhe nawn hi. Ka kinohtuk in bangmah ka sem hehu theikei a, ka khuak sou in ka mit bang mial dundun hial in ka thei. Den a ahong ki-phone na ka nu number call dia ka kisak leh balance teng khat le ka neikei zaw mah. Loan la zok in ka call nawnpah a himahleh kuaman hon dawngkei. Thumvei bang ka call nung ale kuaman ahon dawnlouh ziak in ka gumzon ek mai hi.

A tawp in lupna tung ah ka nu lum dildel ka va mu a, a zul ah ka nau Chingte leh nungaknou ngou henhan, thausik ik-ekh khat in ana tutpih hi. Ka nu ana tutpih tua nungak nou ka theih ngei ahi kei a, ka meltheih ngeileng ahi sam kei. Ka gen masak di le theilou in ka nu kiang ah ka va ding a, ka kisuanlah toh ka khasiat tha lamlam hongsuak in gen dia kilawm leng gentheilou in ka om belbul maimah hi.

Pau dia ka kisak chiang in ka awm bing a, ka aw pawtkhe zoulou hi. Ka nu ka etlouh chia ka nau leh a zul a tu nungaknou ka enzel a, a vangkim in ka nnasep van niin nemnom en kawm in nuailam ka kun dedu hi. Damdawi inn sung a mi lamdangpi khat lut banghial in mi’n ahon en kheukhou zozen uhi. A tawp in “I nu bang chi dan a, doctor te’n bang hon chi uh a nau?” chi’n ka nau kiang ah ka kan hi. “Tu nitaklam a lung-am a puk ahi di, ke’n le school kaitawp inn ka tun a ka theihpat ahi… Bangziak tak a chih ke’n le ka theikei, doctor in lah tutan hong en nailou a…” chihteng in ahon dawng hi.

Khophawklou, sihsual, damna lunggulh a damdawi inn kipolut hang a, doctor in tutan hon ngaihsaklou chihkhawng ka ngaihtuah chiang in ka hehtha a suak a, ka nu sun a damlou a kipattung a amah kia panpihtu neilou, buaitak leh lungkhamtak a a om didan khawng ka ngaihtuah khop chiang in pasal zou nawnlou in ka mittuite takkhe di’n ahong kisa a, pautam selou in innkonglam zuan in ka pawt ngal hi. Innkong a maiphiat in leh a lopi ka kihahsiang zoh in damdawi inn sung ah ka lutnawn hi. Doctor in ka nu hong en mualmual zual a, huchi’n bangmah genlou in hon paisanpah hi.

Sawtlou nung in doctor in a room ah honsam in Phai lam ah k’on refer dia huailam ah na paimai d’um ahon chita ek mawk hi. Den a auto bahara di nasan le neilou pa’n tua Phai a ki-ensak dia pai di chihtuh lungkham louh vual ahi kei. “Phai ah le Pathian hilou, mihing, nou dandan a doctor mah in honna en veve thou di hi a maw?” chi’n ka hehna aw toh ka dong gemgum kha mawk hi. “Hiai mun ah test tuamtuam neihna di vanzat (facility) omlou ahih ale bel ka theisiam, huchi ahihtuan kei a leh hehpihtak in hiai ah na hihtheih dandan in pan honlaksak mai ve maw… A diklel a gen in Phai lam tungna di hial a bangmah neilou ka hi….Hehpihtak in na hihtheihtawp hon suah mai inla, huaitan a le i lohsap lai ale bel ahi bangbang ka puaksiam a ngai diing..” chi’n kisuanglah simpi’n ka genzom hi.

Doctor pa’n leng bangmah dang genlou in awl in alu susuk ngaungau hi. Ke’n leng doctor pa room pawtsan in ka nu kianglam ka zuannawn a. Ka nu’n bel neuchik khua phawkzek mahleh houpih theih hituanlou a, ka nau in a khutte mek in a zul ah tutpih ngiungeu hi. Den a ka nu ana ompih nungaknou pen a om nawnlouh ziak in ka nau kiang a ka kan leh apa damlou, tua apa zunthakpih a pawt uh ahihdan hon hilh hi.

Sawtlou nung in tua nungaknou leh apa zuntha zou ahong kizuilut tattat uhi. Ka theih thakthak leh kou om zul chin ua amau leng om uh ahihdan ka theikhia hi. A pa uh damlou himahleh a gimselua bel ahihmel kei a, a khe taklampang a tuam lenglung ziak in koihiam khat a, a accident-na hi peuhmah di’n ka gingta hi. Sawtlou in tua nungaknou leng koukiang mah a hongpai phei in ka nau Chingte kiang ah “Na U innlam ah va kihahsak inla, ke’n k’on ompih diing” chi’n kamsiamtak in honggen hi. Theih ngeilouh khat in hichitel a hon awlmohpen kipah huailua himahleh lehlamtak ah bangmahlou ka hihna uh hon sulangtu abang a, kisuanlah huai petmah hi.

Hichibang a thu kipahhuai zak pen kipahhuailua, thumangtak a va kihahsiang pah somsom dia hoihlua hinapi’n ka kisuanlah man in ka nial hi. Himahleh, nnasem inn pailou, ka nnasepna van niin nemnom tengtoh omlai ka hihman in ka om a lemtheihlou kia hilou ka tawl mahmah leng a damtheikei a, banah nitak ann leng huan nailou ka hih lai zawkmah uh toh huaiteng paulam in inn phathak di’n ka kingen khonung hi.

Ka kiiknawn chia ka tawi di van poimawh tuamtuamte ka nau in ahon ban gen zoh in pai di’n ka kisa a, ‘bangmah lung himoh di omlou ahi, na nau toh ke’n na nu ana enkai zou mahmah di ka hi uh, lungmuang tak in va pai inla, hongkiik pah in aw’ chi’n ka theih ngeihlouh nungak in kamsiamtak in ahon khakhia hi.

Panpihtu di neilou, lungkham leh thawmhautak a om dia ka kigintaklai a hichibang a hon awlmoh leh hehpihtu di ana om khak zenzen kipahhuai ka sa. Tua nungaknou in ka tawl leh ka lungkham nate ahon hehnem zou petmah.

Keileng lungmuang leh kipak tak in innlam pha di’n ka pai hi. Inn ka tun phet a kihahsiangpah somsom in nitak ann ka huan ngal a, inn a a poimawh bangbang ka sepzoh in damdawi inn lam zuan di’n ka kipan khenawn hi. Damdawi inn ka tung a, nungaknou leng ana om in ka nau toh bangbang hiam gen in ana houlimtui mahmah uhi. Huanah, ka nu ngeileng khua phawk in houpih theih di’n ana omta a, damdawi inn a omlai himahle ung a dam bang in ka kingaihtuah hial hi. Ka nu’n khua phawk mahleh a pau peihluat louh man in ka houpih tamkei.

Buaitak leh lungkhamtak a ka om lai ua hon panpih a, hon hehnemtu nungaknou kiang a kipahthu beek gen dia kilawmlua hinapi’n ka kamsiamlouh man in gen di le ka theikei. Kipahthu gen a pau dia ka kisak chiang in gen masak di ka theikei a; ka kipahna nasan leng genkhe theilou zatna beipi khat ka hihdan ka theisuah deuhdeuh hi. Hichituk a kipanpih a, kipahthu gen nachang le theilou, haina maizen e khawng ahon chi sim di e peuh chi in ama’ lungsim di bang ngaihtuahsak khemkhem in ka buaigu petmah.

A tawp a houpih dia kisa ‘Lawm’ ka chih patleh “Lawm hon chi ke’n la Niangbawi hon chi aw” chi’n ahon pautuh zat hi. Amah leng a maingallua hikei mahleh kei zahkai leh kisuanlah thei a, kimaingal leh thovengtak a ka kihou d’uh a deihman a zum leh kisuanglah pipi a hon maingal bawl ahi chih ka theihziak in pil ka sa a, kei a di mahmah in leng nuamtuam mahmah hi.

“A chihleh Niang, na hon panpihnate tung ah ka kipak petmah. Nang nana om a, nang fel ziak a kou chitlouhna leh fellouhnate liahkhuh a om ahihman in na tung ah ka kipak lawtel uh aw…” chi’n ka kamsiam theihtawp suah in kipahthu ka gen momolh hi.

“Kamsiam na daldal tel chia.. pasal-sal huchi kamsiam lawmlawm tel” chi’n ahon dawnna di a ngaihtuahsa bangphial in ahon dawng zuingal hi. “Keileng ka kipak. A fel bel ka hi zenzen kei himahleh ka hihtheih dandan a hon panpih dia ka na om khak ke’n leng hamphat huai ka sa. Vangneih huai va chih zozen na danlah om kei ve’n chin, zanlam a ka pa hong kisukliam khak zenzen ziak a hiaimun a ana om a, ka hihtheih bangbang a nou honna panpih kha ka hi zaw hi. Bangpi hikei mahleh nna hoihsem bang a kingai ka hihman in nousang mah in le ka kipak zaw” chi’n ahon dawng zom hi.

“Kamsiam hileng bel na tung a ka kipahna uh gengen a, genchim di vual ka hikei. Kamsiam louhluat man in na tung a ka kipahna nasan leng gen theilou a om ka hihman in n’on theihsiam petmah k’on ngen. Kipak lawtel, na tung a kipahthu gen di tampi hon ba ka hi uh” ka chi nawn hi. “Hichibang a hon panpih thei a ka om keileng ka kipak. Maban ah leng ka hihtheih dandan in ka hon panpih sawm diing. Ahi a, kou bel hiaimun a kalkhat val bang ana omta ka hi ua, ka pa’n leng hoihlam nawt mahmahta ahihman in sawt ka om uh ka gingta nawnkei. Nouleng mipil-misiamte’ tungtawn in Pathian in A thupina leh A thilhihtheihna ahon musak diing a, na nu leng hong dampah diing ahi” chi’n ahon hehnem a, midang tengteng hon hehnem sang in leng Niangbawi hon hehnem in ka lungtang a nemzou zaw.

Niangbawi in hon hehnem a, thu tuamtuam a gen sung in lunglut tak in a maitang ka en kilkel a. A a taksa pianzia nalh leh etlawm takmai kia hilou, a mit-hah kilawmtak leh siangtak, amel tanvak thei di lel a a sam san sim hiuhiau leh tang zitzet banah a muk san tiutiau leh a biangsum nalhtak maite hoihtak leh chiangtak in ka mu hi. A taksa siangthou leh maam pikpek, a sa nou hinhian leh a ha siang sitset banah kituaktak a pou mitmet-te leng muhmaih vual ahi kei.

“Na pa bang chidan a kisukha e?” chi a ka dot leh zanlam a gari ki-accident kha a, a khukguh kipel in chin pai theilou a hong om aka hia chi a a ‘practical’ mahmah a ama khuk lak honlak dia a kisak laitak in a nu’n sam in k’ong paiphei nawnpha di aw chi’n a nu kianglam ah paiphei pah hi. Anu’n damdawi lei dia ana sawl ahi ngei ding a, ka nau hongzawn in konglam ah pawtkhe ngal uhi.

Niangbawi nidang a ka muhkhak leh theihkhak ngei hikei mahleh a paunop ziak in kihoupih nuam a, hun tomchik sunglel in leng sawtpi a kipan kitheisa mahbang phial in ka kinelpah uhi. A taksa pianzia a fuhkia mai hilou in kamsiam a, a aw suak siang sitset in ‘nuu’ suak mahmah hi. A nuih chiang in a biangsum nalhtak dawk tiiteih in nuikhe lala a, a nuihging leh a ‘aw’ ging tuh a ngaihchim huai hetkei. Huanah, a kichei dan et in mi neizou huntawk hihmel mahle uh a vallua a kichei bel ahi kei.

Damdawi leizou ahongtung un koukiang mah ah hongpai in nektheih tampi petmah ahon tawi neinoi hi. Ka pian apat hichituk a nektheih tam ka mai a a kilui lam theikha ngeilou ka hihman in vangse-hampha bang ka kisa a, amin nasan leng ka theih senglouh hiai nektheih tuamtuamte nekawm in kuamah subuai khalou in ka kihou tiptip uhi. Niangbawi om keileh kou unau gen di theilou a ki-entuah gualgual maimah di ka hihman un Niangbawi in hong sugamlum tuan mahmah a, a tung ah ka kipahna alian deuhdeuh hi. Ka nau leng kipak ahi ngei ding a, nui selsal gige hi.

Ka nu damlou, damdawi inn a lupna ngakmai himahleh sun chiang in nnasem di’n ka kuansan zel hi. Kei utthu hileh bel nnasem di’n ka kuansan kei hial ding himahleh sum muhna dang himhim neilou ka hihman un utlou pipi leh haksa-sa vungvung kawm in ka kuan zel hi. Sun, kei nnasep kal chiang in ka nau in ka nu ompih a, nitak chiang in ke’n ka va khelzel hi. Niangbawi in bel sun-le-zan chih omlou in aman dandan in hong ompih gige a, kou sangmah in le ka nu kem tamzaw phial ding hi.

Chihsa mahbang in Niangbawi-te bel a hausa lua a gen di hikei mahle uh mi-eng vungvung a khosa ahikei ua, amau khom in nuamsa mahmah uhi. Tanau-laina leh ittu leh hehpihtu di ahau ua, niteng in apa damlou hongveh di kiphamat den hi. Mimal a a hong vehlouh chiang un leng saptuam min leh pawl tuamtuam min a veh di om den ahihman in amau kia om kha ngeilou ua, lehlamtak ah noptuak abang zozen hial hi. Vehtu leh panpihtu di ahauh ziak un Niangbawi le buaitak in om kha ngeilou a koukiang lam hongtung thithe sek hi.

Niangbawi’ pa bel Zoudawn lam khua khat a government skul headmaster ahi. Headmaster ahih kawmkawm in Lamka a a veng ua saptuam Upa Ordain kia mai hilou a, term 2 a kizom a Local Secretary lenlel ahi zaw mah hi. Pathian lau leh khami mahmah banah Agam nnasep lunglut mahmah ahihziak in Zoudawn a a etkol skul naupangte’n a hamphatpih kha kei uh! Saptuam awlmoh tak a kemtu Local Secretary khat zet damlou ahihman in a kep saptuam sung a department tuamtuamte khawng in veh in a damna di’n Pathian kiang ah thumna hong neihsak sek uhi. Kou kia hilou, damlou, damna lunggulh tamtak om a kihih man in tuate a diing in leng thumna hon neihsak sam le uh chih bang ka na lunggulh thei mahmah sek hi. Ka lam-et bang a thil ahong pailouh chiang in i Pathian thu-awi dan un leng khentuam ana nei ahi maw chi’n ka lam-et sang theihluat ziak in kei hehna di khop bang ka na mu gige vanglak hi.

Hunte paizel in ka nu’n leng hoihlam ahon nawt zomzel hi. Damdawi inn nuse di hial a damna ngah hinaikei mahle ung hoihlam nawt ka hihziak un ka kipak petmah. Huanah, sunciang a leng lungnuam tak a nnasem dia ka nu kuansan theita banah ka nu ngei in leng kamdam a hon khakhe theita ahihman in huai in ka tawl a damsaktuan mahmah hi.

Nikhat nnasem ka paihak ziak un damdawi inn lam phamanlou in inn ah ka giak hi. Zingkal a damdawi inn ka va phak leh Niangbawi-te ana om nawnlou in a lupna uh midang in ana luah maimah hi. A mun diklou a lutkha chih di lah kou omna mah hizel ahihman in ka om hiaihuai a, damdawi inn sung le hawm heuhou in ka thei hial a, a guktak in ka thawmhau mahmah hi.

Niangbawi-te bangchik a pawt uh a chi a ka nau kiang a ka kan leh zan a pawt uh ahihdan hon hilh in leh, Niangbawi in ka nu a vehna dan a 1000/- a piak ahon pia hi. Kipaklua hinapi’n Niangbawi-te hon pawtsan in hon thawmhau sak mahmah a, gen di le thei zozen lou a ka om lai in ‘Niangbawi in zaw na U hongpai lou dek hia?’ chi a hon kankan hive’n ka nau in ahon chi hi. Huchi bang na hon hilhpah kei dia chih di’n hoihsa mahle’ng ka nu sang a Niangbawi pibawl leh awlmohzaw ahon sakkhak d’uh ka lauhman in bangmah ka gen kei. Ahi a, ka lung bel anuam tatak theikei. Ka om nasan leng lemlou in ka nu hong damsiang a, damdawi inn ka nutsiat kal uh ka ngaklah petmah hi.

Kingaihtuah dedu a ka omlai in ka gei ah damdawi inn phiat (sweeper) te khat ahong hang zauzau hi. Niangbawi-te hon pawtsan nung a thawmhau leh ning kitel simtak a ka omlai a inn phiatnu hong hang zauzau zawkmah ziak in ka hehtha hongsuak law guih a, “Hiai khawng sem dia solkal in sum hon piak hilou maw? Na sep peihkei ua leh kitawp lel ve ua, noulou leng midang a semnuam tam lawtel di ahi” chi’n ka hap lulu hi.

“Damlou, amau-le-amau nasan leng kikem zoulou ngen omkhawm tuh a siangthou d’uh chihnase a om kei, huaimah tuh nou nekmuhna leng ahi. Nou na siangthou ua, gin-om leh chitak-tak a na mohpuakna uh na suk buchin nak ua leh siangthou di himai ahi. Nikhat a hiai zahvei mawng phiat a, zutsiang di chih a omkei – a nit hunhun in phunlou-paulou in hahsiang tawmtawm lel le uchin himai aka” ka chih behlai hi. Aban genzom lai dia ka kisak leh ka nau in ahon khouh ziak in ka daikiik hi.

Niangbawi-te’n ahon pawtsan tuh pawna lua ka hi ngei diing a, sunkhua a ngaihtuah in ka nnasep leng a lemthei taktak kei. Ka taksa omna mun leh ka lungsim omna mun a kigamla petmah. Niangbawi-te inn ka theihlouh banah a thuzakna di le theilou ka hihziak in huai in hon thazoi sak diak hi. Ka nu sangmah in leng Niangbawi ka ngaihtuahna ah a om zaw a, a kichei dan leh a khohei-gamtat dan bangkim kia mai hilou in, a ‘aw’ ging ngaihnop huaitak tuh ka bilkha ah a gingging mai hi. Bang chi leh Niangbawi ka mukiik thei dia, khatvei beek mukiik nuamlai hinatel ing e…

Niangbawi bel mel-et mai in hoih mahmah a, thausim it-eth in ngou lihliah hi. A mizia bangmah theisau kei mahle’ng kamsiam leh paunop thuah in kipolhpih nuam mahmah hi. A melhoih kia mai hilou a, buaina tawpkhawk ka tuahhun ua honna panpihtu omsun amah ahihman in ka damsung ka mangngilh ka gingta kei. A itna hial tang di’n bel kei a chitna himhim a omkei a, himahleh khatvei bek a mel ka munuam lai.

Nitak khat ka nu a ihmut pah ziak in houpih di neilou in keikia daitak in ka tu hi. Ka pa’n hon dampih laisam hileh hiai bang hinkhua pal khollou di hi ung ua, ka paltawp ua leleng neuchik apuak nuamtuam deuh di hiven chi’n thil tuamtuam ka ngaihtuah neneuh hi. Ka hinkhua ka ngaihtuah chiang in kipahna leh nopsakna di himhim ka mukei a, ka hinkhua paisa te ngeileng kipahna sang in mittui luanna ngen ahitel hi. Ka maban di ka ngaihtuah chiangin leng nopsak di himhim mulou in a mial bekbuk a, hiai leitung a bang dia mi eng di phet a piang ka hia peuh chi’n ka hinkhua tuh a ahoihlam sang in a selam ngen in ka ngaihtuah hi.

A khenchiang in hiai khovel ah hinman leng om kei, nat-le-sat banah lungkham-mangbatte thuak nawnlou dia sihmai bang ut-huai ka sak hunton a om zel hi. Huchia kingaihtuah dedu a ka om lai in “Bang nana chi ua, na hoihtou zelna uh maw…?” chi’n gintaklouhpi’n Niangbawi ahonglut guih hi. Kipaklua hinapi’n lamdang bang ka sa a, honghoh dia ka gintak hetlouh ahihman in ka san tuaituai zozen hi. Ka paichia n’ong khak di man chi’n nektheih tampi petmah hon tawi honpia a, ka nu ihmu lai phawng in ka nekkawm un ka houlim uhi. Niangbawi apaunop ziak in ka hulum tuan mahmah ua, den a thawmhau leh lungngai vungvung a om a, ahilou lamlam bang ka ngaihtuahnate huih mutmang bangmai in ahong veng huai zozen hi. Niangbawi a om chia nuamtuanlua ahihman in ahon paisan di bang ka ngaingam kei zozen hi.

Niangbawi in apa leng hoihtou zel ahihdan ahon gen hi. Tua kia hilou in ama hahpan ziak leh a thumna gahte ziak a apa’n leng kimuhkhiakna thak nei in maban ah a sepna lam a paisawm, huailam a a innkuan ua paivek diing uh ahihdan hon gen hi. Huai ding ziak a apa leng tua Saptuam a ahihna, Local Secretary apan ki-awngsutta ahih banah nidang a semlou a loh a laklakte khawng uh kisiik a, Pathian kiang a ngaihdam ngen leh ngia belamvun silh bangmai a hinkhua ana zatte uh tawpsan a, hinkhothak – diktatna mah pibawl a, paipihta diing uh ahih dan ahon gen hi. Hichibang thu Niangbawi hon gen in hon kipaksak petmah. Ahi a, lehlamtak ah Niangbawi toh kimu kha gige thei nawnlou di ka hihman un poi ka sa gu sim mahmah a himahleh, diktatna mah paipih a kalsuan sawm ahihna uah ka kipahpih veve hi.

I gam in diktatna mah poimawh, diktatna loungal i khankhiatna d’uh omlou ahihdante ka gengen sung un zan ana sawtdek man hi. Huchi’n Niangbawi leng pai di’n kisa a, amah kia honghoh ahihman in saulou bek vakha di’n ke’n leng ka zuipawt hi. Lampi ka paikawm-kawm un Niangbawi in ka insung thu uh leh ka pa’ tungtang ahon kan ziak in ke’n leng ka theih dandan in ka hilh suk a….

“Neuchik ka hihlai in ka pa’n hon omlouhsan hi. Huailai in tua ka nau Chingte a piangnai kei. Ka pa mi hon thahsak himahleh kuate’ khutnung a, bangtupna nei a hon thahsak uhiam chih tunitan in le ka theikei a himahleh ka nu hon gendan a pan in ka pa mi diktat leh Pathian lau mahmah, diktatna toh vaihawm a kalsuan khat ahi. Nekgukna leh dikloutak a vaihawmna khawng pawna in i gam ah diktatna chii tuhsawm in panla mahleh innkuan khosakna in a chitlouh ziak in a awlmohna zah in bangmah semtheilou hi. Himahleh, ama hihtheihna tantan ah thudik gum in paipih a, tua ziak mah a mite huat leh muhdah a om in bangmah sem thei nawnlou di'n a hinna hilhial laksak in om hi. I gam ah diktatna himhim a om nawnkei a, thudik deih a diktatna toh vaihawm lunggulhte i gam in poimawhlou hi! Diktatna man a tam petmah!"

"Ka pa sihna suizui di'n ka neih-le-lam un a chinkei a, banah milian-milal hon gum leh makaihtu di neilou ka hihman un bangmah ka hih theikei uh. Pawl tuamtuam khawng in zaw 'Mohpaih' thu suahnual sam mah uh e himahleh a tawptan a di'n kuaman ahon panpih nuamtuan kei uhi. Huanah, va suisui le ungle kou hinna natan a dia le lauhuai thei ahihman in ka dinkhawl mai uhi. Ahi a, kou bel khutkhialte matkhiat a, maban a hichibang thil, zahngaihna himhim omlou a ganhing bangmai a hinna kilaksak chihte a om nawnlouhna dia khutkhialte' tung a a kituahpih bang gawtna piak hileh chih lunggulh mahle ung hihtheih bangmah ka neikei uh. Gam-le-nam it, heutu makai tuamtuamte' ngaihdan a midiktat leh gam it mahmah khat sih tuh supna hilou a i gam leh mimal a dia hamphatna leh khantouhna hizaw didan ahi" chi’n ka dawng hi.

Chihleh tulai a misite sum tampipi a kigal ua, nou lah a galna dan in bangzah ahon pia ua? chi’n Niangbawi in ahon dong hi. "Ka pa'n i gam-le-nam khantouhna di dal ahih in tuh a sih mah le hoihzaw hikha inte, huaimah leng ka pa kipahna ahihman in ahi bangbang a pomsiam kisin ngai hi. Ahi a, sim senglouhphial sum honpe le uh leng a sisa ka pa hongthou kiik di ahi tuankei. Huanah, ka pa ngeileng sum deihziak a si hilou in diktatna lunggulh ziak a si hizaw hi. Huaiziakin, apaisa tuh paisa ahi mai a himahleh khutkhialte’n khialmah ka hi uh chi’n thupha hongtawi le uh sum tampi a kigal sang in leng ka puak uh zangkhai zaw lai ding hi. Sum in ka khitui uh a nulhul zoutuan kei diing…” chi’n ka gen nawn hi.

Niangbawi in ka thugente lunglut tak in ngaikhia a, ka thugen a lunglut ahi chih ka theih ziak in ka lungsim a om tuamtuamte gen na di hun lemchang chi’n ka gen behlai hi. “Niang, i gam dinmun uh ka ngaihtuah chiang a ka khasiattha khawng peuh suak ahi. Gam it kichi hang alah puahsawm omlou, puahna dia solkal a kipan a huhna hongpai sunsunte nemang tawmtawm hang a, huaikia hilou, mi kua hiam gam-le-nam khantouhna dia panla a nnasem om sunsunte bang nawlkhin zel hang a! Ei hamphatna di ahihnak leh midang’ sih leng poisalou; mihinpihte itna leh veina himhim neilou gam-le-nam it ngen ihi uhi. Nekgukna, diktatlouhna leh dikloutak a vaihawmna te’n i gam a tuamdim khinta. Tu khawng a dan om ahi lai, tuban kum bangzah hiam zoh, khangthakte’ hun chiang in tua ka gam ka gam i chihna mun uh leng midang leh namdangte’ luah leh vaihawmna hong hi maimah diing hi.”

“Sum-le-pai deihziak in tagah-meithai i bawl a, tua i bawl tagah-meithaite’ hamphatna di om sunsun leng i nekmangsak lai uhi. Sual gamtatna dou chi’n pan i la a, huai i panlakna tuh mizawng leh dai kilkal a mite’ tung kia ah ahi. I khotang uh tuh mihau leh neizoute’ tung ah dan (law) omlou hileh kilawm bangphial ahi. Sisan kisuahna kia mai hilou a, luang kikhamna natan ah leng dan tungtawn a vaihawm chih omlou in sum in vai i hawm ua, thudik a vaihawm chih omlou in sum neinei tuh a vualzou ahi mai! Huaiziak in, mi hausa te a di’n tuh i khotang uh a khiatlah huai mahmah diing. Mi hinna la di hial a kei bang chituk a mihoih ka hia chih ngaihtuah masa lou in a tawptan i tung pahpah uhi. Mihau leh neizoute’ ut-le-dah a vaihawmna nuai a khosa hilim hang.”

“Ahi a, ka pa hon omlouhsan nung aleng itna tak toh hon kem a, hon khoiliantu nu ka neihman in ka kipak a, hampha ka kisa petmah. Ka nu'n naupangchik a meithai hinkhua ana pal ahihziak in a dinmun di khawng ka ngaihtuah chiang in kei thuak di hileh ka thuakzoh ka gingta kei. Sep-le-bawl a pa poimawhna kia hilou, salam nopsaknate natan leng a lunggulh hun om tham diing hi. Huaite tengteng thuak leh taan ngam a, kou naupang chik, bangmah theilou ka hih ua pan a lam-etna liantak toh hon ngak a, tu ka pichin tan dong ua honkem ka nu thupi sa in zahna sangtak ka pia.”

“Ka neu ua pat ka nu'n siamgan in honna vak hi. A lunggim banah a thagim ziak in a damtheihna leng hoihnawnlou a, upa naikei mahleh mel et in upat tuak mahmah hi. Tua ziak mah a leng damdawi inn a hong kipaw lut ka hi uh. Ka piching chiang a ka nu hon lam-etna tan ka tun zohlouh tawp aleng nnagum semsak nawnlou a, lungmuang tak a ka nu om sak diing chih ka tup ahih gige ziak in ka nu’n hon dampihlai mahmah leh chih ka ut a, huai ding in nang le honna thumpih zel in aw Niang…” ka chi hi.

Huchia ka kihouhou sung un Niangbawite’ inn tan bang ka va tung kha zozen hi. Maban ale kithuzak zelzel a, omna leh sepna munmun  a nam-le-gam damna diing a hihtheihtawp a pang a, diktatna toh kibulphuh thak dia hamchiam in -  Diktatna  Mah Awle…chi’n khut kilen in mangpha ka kikhak uhi.

© thaikawitongluan.com | 06082017 | ZM Tonsing

Add comment


Security code
Refresh

© 2017. Thaikawitongluan.

We have 65 guests and no members online