Stories

MEL MUHLOUH TONGSAAN

MEL MUHLOUH TONGSAAN

www.thaikawitongluan.com

Zougam huihkhisiang silsel, vot dekdek zozen kimutsak heuhheuh di chih omlou ahihman in Delhi huihniin, lum hehu kimutsak sesu di'n ka inn luahna tung uah ka kaltou hi. Inn tung ah ka va tu a, huih nung hiauhiau sim mahleh Zougam' huih banglou in lum hehu a, ahon mutkhakna te bang muhtheih in vom hial leh kilawm in sa vevu hi. Zougam ah bel khualum i chih hang in huihkhi laang hiauhiaute vot dikdek ahihman in ahon mutkhak chiang in kidam huaihuai bangzou hial a, nuam mahmah hi.

Inntung ah tu eu-au kawm in thuthak bangbang om peuhmah hiam chi'n facebook ka lut hi. Mahni punna di himhim omlou, awlmohna leh kipiakzohna ziak liuliau a ahunhun a thuthak tuamtuam muhtheihna dia group kibawl simsenglouh phial om mahleh tulel dinmun a 'Huihkhi' kingakna taakpen chi'n Huihkhi facebook group ah ka lut hi. Thuthak bangpi lua omlou ahi ngei diing a, ni bangzah hiam paita a ZYA a kipan YPA a ki-awngsutna mah gen pipen ahi lai. Khenkhat in YPA gum a, khenkhat te'n ZYA gum in nasatak in kikangtuah nilouh ua, tua a kiselnate uh ka va sim nilouh hi.

ZYA gumte leng ka mohsa kei a, tua mah bang in YPA gumte leng ka mohsa tuanbok kei. Mihing i tuam dungzui a ngaihdan kibanglou om thei mah ahi chih ka pom. Himahleh, YPA hi'n ZYA hitaleh agum te'n le amau min leh hihna diktak toh gum a, pau ngam om tuanlou ahihman un thuhoih sim pipi gen mahle uh a thugente uh vailak zunthak toh kibanglel hi. Thudik deih a, diktatna toh kalsuan lunggulh i hihleh mahni hihna diktak mah toh pangni, huchilou a mi tattuah nuam lel i hih ale bel thutuam!

Facebook ka lutkhit in whatsapp lam ah ka lutnawn leuleu hi. Huihkhi whatsapp group bel Admin-te'n enkai zou mahmah ahihman un thuthang tuamtuam banah thu poimoh tenten chihlouh ngal post phallou bikbek uhi. Thu mumal omlou a kihou vengvung chihte omlou ahihman in group siangthou in nuam mahmah a, hiai bang group bawltu Admin-te pahtak huai mahmah uhi.

Thuthang tuamtuamte ka sim zohnung sawtlou in mikhat in aadhar card a min khek didan leh koi a kheksak diing banah bangbang poimoh hiam chihte group ah hon kan hi. Ke'n leng ka theih dandan in ka hilhsuk mialmial a, ka kihouna uh beipahlou diing a bat ziak in Admin-te zahtakna leh group paidan zui in inbox lam ah ka kihou daih uhi. A aadhar card a a min khek didan leh a poimoh bangkim banah a kheksakna di mun kei theihna tan in chiangdeuh fikfek di'n ka hilh hi.  Ahon houpih nuamman a kitheilou sak a diam ah khatvei gen theisiam pahpah lou in, akip-akawi a hilh detdet ngai hi.

A theihsiam pahpah louh ziak in sawtpi tak ka kihou kha ua, theih ngeilouh himahleh ka kinelsim maimah uhi. Ahi a, amin nasan leng theilou banah a profile picture/display picture (DP) leng dawklou ahihman in numei hia pasal chihleng ka theikei, himahleh ka kihou dan ua pan in numei di'n ka gingta mawk hi. Kimaingal sim maimah ka hihman un amin beek kan himhim hoih chi'n ka kan a, amin Chingte ahihdan ahon hilh ziak in ka gintak leh lam-et bangngei in numei ana hi taktak hi. Huchi'n ka theih ngeilouh himahleh amin theita ka hihman in a contact number ka save chat a, Khuga Dam geilak a a ki-selfie na DP dia a zat ngeileng chiangtak in ahong kilangpah lehlah hi. A melsiat tuak kholkei veh aw! Ngou hehhah in mitla pianpah mawk ve'n chin!

Ke'n amin ka kan ziak chihna le hituan khollou maithei; ama'n leng keimin hon kan hi. Ke'n leng kilawptak in ka min ka hilhpah a. Ka contact number bel a theihsa ahihman in hilhtuan ngailou a, ka email ngeileng poimoh dia ka gintaklouh man in ka hilh sekei! Minte banah omna, vengmin leh sepna chihte khawng kikantuah in kimaingal simsa himahle ung kitheihthakna ka bawl khonung phiing uhi. Aadhar card lamlam le genkha nawnlou in thildang tuamtuam kikum in ka houlim tui mahmah ua, a thil theihlouh ziak a hiaitan tung ka hihman un poilemchang bang ka sa zozen hi.

Huchia thil tuamtuam gen a ka kihouhou sung un zinglam dak 1 bang ana gingman hi. Amah Lamka a om ahihman in amau a di'n zansawtta a, a guktak a khelah mahmah kawm in leh maban ale kihouzel dia thukimna hoihtak bawl in mangpha ka kikhak uhi. Ama ihmut kal in ka kihounate uh ka simthak zihzeh a, a DP khawng ka en tuantuan zozen hi. Kipaksim tuh ka hi peuhmah dia a guk in keikia ka nui heuhau zel hi. Chingte a taktak a ka muh ngei leh theih ngei ahikei, himahleh ka kihouna ua pat a lungsim piching tuak sa in, piltuak leng ka sa hi. A mel diktak om didan, anuih didan leh a khohei-gamtat didan peuh ka suangtuah nilouh khemkhem a, ka ihmu zok theikei.

Zingkal ka khanloh toh kiton in ka phone ka enpah gogok hi. Nidang a facebook lut masa sek himahle'ng huai zingkal in tuh Chingte in honna message dia ka lam-et ziak in whatsapp ka lut masa hi. Ka lam-et mah bang in "Good Morning Umang" chih honna khak ngeingut a, ka gintaksa himahleh lamdang bang ka sa hial hi. Ka mit nuaichiang masa zozen in ka simthak zel a, reply kiik didan bang ka buaisim maimah hi. "Umang" ahon chih ngiatngiat mahmah in ka lungtang hon dendan tuam ahihman in ka zingthoh bang anuamtuan a, vaak singseng hial a kithei in ka halh mahmah vilvel hi. Huanah, zingkal dak 5 lak a honna message ahihman in zingkal thoubaih, nungak felpi khat hi di'n ka koih a, huai in hon kipaksak diak hi.

Zanitak dak 1 tan mawngmawng kihou ung ua, dak 1 chet alah ihmu zuingal lou peuhmah dia, tua zingkal dak 5 a "morning message" hon khak chihkhawng ngaihtuah in a ihmut hun di dakkal khawng ka hisapsak khemkhem hi. Dakkal 4 le ihmu manlou di chihkhawng ngaihtuah in ka hehpihtha a suak a, keiziak a ihmut khamlou di eive chi'n ka kisuanglah gu petmah. Ka message ahon reply nawnchia ngaihdam ka ngen di chi'n ka lungsim ah ka kichiam ek-ek hi. Nikhat le kihou nailou kia hilou, a taktak a ka muhngei leh theihngei le hi samlou, 'Mel Muhlouh Tongsaan' bang dia hichitel a ka veikhak mawk ahia chihkhawng ka ngaihtuah chiang in lamdang ka sa a, hai bang kisa in ka kimohsa simsim hi. Himahleh, kei tup leh utmawng ahikei a, ka lungtang in ahon puaksuah ahihman in ka hihtheih bangpi omlou suak hi.

Zinglam dak 10 bang ging nuamta himahleh ka message deliver lou, a 'last seen' dak 6 lak in om den nilouh hi. Ka lungsim a nuam hetkei a, phone call bawlmai bang utsim mahle'ng kilawm lahdeuh ka sak ziak in ka kidek hamham hi. Amah dandan a zingkal thoubaih hile'ng kihou khazek sam di hi ung ua chihkhawng ka ngaihtuah chiang in ka zing thohhak bang ka kimohsa a, kei leh kei ka kihehsuah maimah hi. Ka lungsim a nuam theikei a, zingkal a ka mood fuh tengtuh bangmahlou a suakta. Theih ngeilouh nungak khat ngaihtuah in ka lungsim a si dedu maimah hi.

Nitaklam tan in le Chingte a kipan in bangmah thuzak ka neikei. A 'last seen' bang ka va en thithe a, message honglut peuh bang Chingte di ngen a gingta in kilawptak in ensek mahle'ng ka kinepna athawn ahi zel. Bang buaina nei a dia aw? Ihmut a khamlouh ziak a bahse gawp, lung-am khawng a puk in damlou gawp khat hia? Pausiatlouh a koihiam a accident khawng a si hia le peuh chi in kei Zeldim' thubawl in ka lunggim mahmah hi. Facebook khawng ah 'suunna' kichi khawng ahong ki-post khak chiang in ka va en thithe a, amin tawpna te uah 'Ching' kichi min a om kha hiam chihkhawng ka va zon bawl hi. Group khat a accident ziak a misi om chih thusuah ka va mukha a, misi pen min tawpna ah 'Ching' chih  a om khakziak in Chingte di'n ka koihpah mawk hi. Haksa sa in ka lungtang teipi a dawtmah abang hial hi. Ka dip hawm in ka chi a liing a, ka mittui peuh ahong pawt nemnum hi.

Chingte si di'n ka gingta kei! Chingte hilou di ahi chi'n kihehnem sim mahle'ng Chingte apat bangmah thu-le-la zak neilou ka hihman in a guktak in ka muangmoh veve hi. Ka kitheih nung uh nikhat le pha nailou, alawm-le-vualte leng theih neilou ka hihman in bangmah thuchian kikan theilou hi. Ka awm a bing ep-op a, ka lungtang gik in ka ngaihtuahna a genthei petmah.

Chingte a si kei di, ka gingta kei, si di'n ka phalkei. Chingte si mahmah kei! Silou bang dia tutan hon houpihlou? A whatsapp last seen lah zinglam dak 6 a om den, tua nitak khua mial diing hita! Chingte si mah hi! Ching, Chingte, nikhat le pha nailou kihoupan hang a, tua nang hon paisan pahtel mai maw...deihkhop baihna tel chia! Ke'n deihkhop nailou keive, ka gennop tamlo-lai. Ka gennop taktakte gen nailou keive, huaibeek honna ngak theilou maw? Hong paikiik ve, nang toh kihou ka utlai, ka chimkei. I kipah sung tom hina tel e maw! Huihkhua tungtawn a kihou kia hilou, a taktak a mel i kimuh beek honna ngakve Ching...Mel muhlouh tongsaan lel maw ka tan di?!

Chingte in hon sihsan chih ka ngaihtuah chiang in kipahna di himhim ka neikei. A kingai a itna thu genkhawm le hilou hichitel a ka puaknat mawk lamdang ka sa. Dawi-ai siam khat hia? Bang dia tua hon omlouhsan pah di khawng kihoukha sese ka hi ua? Tomchik i sulnung lelleng kei a di'n thuak hak hina tel e! Chingte si! Ka gingta utkei. Ka gingta thei mahmah kei himahleh amah a kipan bangmah zak nei nawnlou ka hihman in utlou pipi a ka gintak mai ngai hi.

Gingta nuamlou lua ka hihman in sun a accident tungtang ka va simthak hi. Chingte' mintawn theilou ka hihman in tua accident pen mintawpna a 'Ching' a tel khak ziak a Chingte dia koihmah ka hi. Huan ah, a veng uh le kibang, amin tawpna a 'Ching' chihtel ahih zawkmah ziak in gintaklouh theihlouh suak hi. Chingte si mah hi! Chingte si! Pasal himahle'ng ka mittui khamvual ahi kei. Theih ngeilouh numei khattung a pasal toupi khat kap huphup chihkhawng ka ngaihtuah chiang in lamdang ka kisa zozen hi. Himahleh ka mittuite nanvual ahi kei. Chingte bel aguktak a ana ngailua, ka lungtang in ana vei petmah chih haihvual ahikei.

Nihvei-thumvei bang ka simsuak nung in tua misi pen kum 46 chih ka mukhe phing a, ka halhhuai zozen hi. Chingte kum 46 a pha naikei di, Chingte hi ke'nte, chihleh bangziak a tutan Chingte in hon thuzaklou? Chingte mah hi'nte, akum a gelhsual uh ahi di! Kum 46! Chingte kum 46 pha taktak di hia chi'n a DP ka save sa ka va en-kiik zozen hi. Chingte kum 46 pha nailou hial di! 'Teenage' khawng hilai di ahi, Chingte zaw si lou mah hi, ka gingta kei. Ahihkeileh, misi nu kum pen a gelhsual khak uh hi zaw taktak di hia?? Misi pen zaw Chingte mah hi di ahi, a veng uh le kibang ahihman in, akum a gelhsual khak uh hi'n te, silou hileh hon thuzak beekta di ahi chi'n ka lungbuai petmah.

Dak 7:30 gingta, Chingte a kipan bangmah thuzak omlou, a last seen lah a ngeingei, kikhek naituan beeklou. Bangteng hileh ahoih hi'n ahoihlou lam hileh phone call bawl himhim di chi'n ka call hi. Switch off! Chingte si mah hi, a phone le ki-switch off! Gingta nuam kei mahle'ng thil om dan et-in in gintak teitei ngai hileh kilawm hi. Ka ngatna di lamleng theilou in ka etna lampeuh mial dundun hial hi.

Lungkham-mangbang tak a ka om lai in ka save khaklouh number a kipan in phone call hongpai hi. Chingte toh ka kihoukhak lam uh kuaman hon theikei mahleh Chingte sihthu hong kihilh di peuh a gingta in ka la ngamkei. Lak sawmlou in ka gingsak nilouh hi.

Nihvei bang hon call kiik hialta ahihman in kilawpna himhim omlou in ka 'pick-up' hi. Numei' aw siang kelkel khat in ahon houpih a, a aw ka zak ngei ahihlouh ziak in Chingte sihthu hon hilh dek hidi'n ka gingta deuhdeuh hi.

"Buaituakna chia na la pahkei a"

"Buaithou mah ing e"

"Bang hih a buai la?"

"Bang hih chihle om tuan kholkei, om maimai ka hi"

"Om maimai a buai cho? hehe Nuam nasa voi. Hon theilou maw?"

"Thei chiahlou, kua na le hehe"

"Kua kei dia aw maw haha Chingte kei vele"

"Chingte! Chingte maw nang?! Na taktak maw, taktak?"

"Hmm..Bang chi lamdang saktuakna chia?"

"Lamdangsa sim hehe Chihchuh nang bangmah hon thuzaklou na hihchia"

"Huaiziak a tua hon phone keivoi. Zanitak a huai aadhar card i gente bawlsak dia tu zingkal a ka va pawt leh ka phone va sumang kha, mukiik nawnlou ing a huaiziak hi. Poi petmah. Tua le ka nu phone k'on zatsak ahi, na number pen ka lawmte Huihkhi Whatsapp Group join kha om a huai a ka lak hitel eii lawmlawm mai...hon ki-call chenchen ahi aw...nang n'on phawk kholkei na dia"

"Phawk thammah hang ei, phawk lawtel" (ka chihkawm in ka lungsim in ka lunggimna zaw bangmah theilou neive maw ka chisim hi)

"Chihleh maw Umang hunsak phot maini aw... Ka veng ua tusun a accident ziak a misi khat om in chin huai a ka va zanhah ngai d...tua ka kuan hun a"

"Aw..na fellua lenkhop nuam un aw leh?"

"Aw le nang le om nuam. Eh! Kalnawn hiam a phone thak lei di ing a huaichia k'on hilhpah di aw"

"Hi thamtham e. Huai kal k'onna miss man mah di maw hehe"

"Na ekkk! Ke'n k'on miss zaw thamtham di aw... Chihleh om nuam taktak ni aw Umang... mangpha"

"Aw le nang le...lenkhop nuam"

Chingte in hon phone, Chingte silou chihkhawng ka ngaihtuah chiang in kipahna ngen in ka pum dim hi. Mi sisa hong thoukik bang hial in ka ngai a, om didan le ka theikei. Ahi a, lehlamtak ah Chingte' kha in hon houpih hizaw hia le chihpeuh ngaihtuah in ka lung anuam taktak tuankei, lunggimna di khop ka mu veve hi.

Bangteng hileh, tuzingkal a a phone sumang chi hive'n, dik mah inte. Chingte a si kei. Misinu le kum 46 tak hi, Chingte hikei, Chingte naupang chik hilai hi. Damleh kalnawn chia Chingte in phone thak lei di, huaichia kihou thei nawnta di chihkhawng ka ngaihtuah chiang in ka kipak a, kalnawn bang ka ngaklah petmah hi.

(Huihkhi facebook leh whatsapp group Admin-ten 'Huihkhi' chih mintel kha a tangthu gelh dia ahon sawlziak ua ka gelh ahi a, a sung a thute phuahtawm pumlum ahi)

©ZM Tonsing | www.thaikawitongluan.com | 17062017

Add comment


Security code
Refresh

© 2017. Thaikawitongluan.

We have 21 guests and no members online