Stories

LUNGKHAMNA MEIPI KHEN AH - XI

LUNGKHAMNA MEIPI KHEN AH

www.thaikawitongluan.com

 

Nuailam nga ina kunsuk dide a, ken leng a kiang naih phei in, a liang ah kava khoih a, awl in ka zawtsak thiamthiam hi. Awl ina hong daktou a, zummel tak kawm in a hon en a,a biang bang a san ziak a san chiucheu in, a mittui pak likliak toh hon entou a. A mel bang hoih deuhdeuh hileh a kilawm hial. Pomsuk chot bang uthuai hial hi. Himahleh kilawmlou lua leh a lungsim lou lam a ka omkhak ding ka lauh man in ka khut aw a lakhe kawm in, awl in ka min in ka sam hialhial hi.

Aman leng kei vei bang a hon na vei sam ahi chih ka haih kei. Ka dawilok luat ziak hia, ahihkeileh ka kisit ziak hizaw hia. Ka theisiam kei. Ka kam apan itna thu genngamna ding in hangsanna ka neizou naikei.

Hiai kan a hunlem omlou ding zaw hiven, ka chi lungsim hi. Ahi alah, midang in amah a itna thu ka sim ziak a kei itna kava gen khum ding pen dik sakhin lou deuh ka hi ngei ding a, ka ki-ip teitei hi.

Gen di thei om tuanlou ka hi ding ua, daitak in ka tu uhi. Sawtlou ka tutnung un, phawkkhe guih a hi ding a, Mawite in baang a sanapi kitak en kawm in dingkhe tou vat a, pai ding in kisa hi. Nasem khawlsung a hong diangkhe zual ahihman in ken leng ka khou tuan sese kei. Huchi in hoihtak in ka kikhakhia ua, ka nasep ka sunzom nawn hi.

Hunte paitou zel in, Tedim Road zul a dawr bawl ding ka hon gel uhi. Vangphathuai tak in SA Road sak, lamsaklam ah mun awng khat ka mu ua, huai luah ding in ka kisingsa uhi.

Huai tuh CD,DVD leh audio cassette khawng leng zuak kawm dingdan in ka ngimdan uh ahi a,ken ka etkol ding chih ahi.

Bang tupna nei a Pagin in hiaibang hon sawm hi hiam chih ka theikei. Kei zat ding adiak in ka ngaihnat mahmah keyboard leng dawr ah hon koihsak a, lawm in ka nei hi. Aman studio ana enkai nawn hi.

Hon muang ahi ngei ding a, keikia in ka enkai hi. Chikmah a hichi dan a sumsinna hihkha ngeilou kahihman in a chang in ka hi heihuai sek hi. Buaina ka neih chiang in ka buainate intekte kiang ka tun pahpah a, ka theihsiamlouhte hon hilh in, sum zeek dingdan, dawr etkai dingdan leh anepnawi bangteng a hithei tan in a hon hilh ua, keileng ka zei hak kei.

Ka omna masa sang in nuam kasa zaw a, kholai zaw ahih zawkmah toh ka chim mankei hi.

Huaiteng ban ah, Mawite toh leng ka kigamla kei ua, ka kigalmuh phial uhi. Huai in ka lung hon muangsak mahmah hi. Himahleh kei mohpuakna liuliau a kinga ahihman in pawtkhiakna ding hun ka nei ngeikei.

Pagin in mobile phone a hon nei thak a, kana eng mahmah hi. Himahleh kei tawi ding vual in ka koih kei.

Hunte paizel in, ka kholam ua leng melmuhlouh tongsaan zattheih ding ka kho hausate un ana neita uhi.

A gige hikei mahleh a vangkim bek in ka inkuante toh ka kithuzak thei ua, a chang in ka khua uh ka ngai vungvung a, nu leh pa leh sanggamte toh om ding ka lunggulh thei petmah hi.

Himahleh singtang kawtawng a khankhiatna ding baihsam liai lou ahihman in, haksa sim mahleh maban etna ziak in ka om teitei zaw hi. Ka vangphatna ahihleh, kei in a om hikei mah leng, ka omnate hi in ka sepnate hitaleh, a siamthei ua, ka inkuan pianpih leh sungkhat mah bang in a hon deihsak ua, Pathian' hon ompihna ahi chi in ka kipak mahmah hi.

Khatvei Pagin in a melmuhlouh tongsaan apan ka inkuante a hon houpih sak hi. Ka zat patna ahih ban ah, ka kingeina seh nailouh ziak leh ka zum ziak mah a hi ding a, ka aw bang ngaih in a ngaih kha loiloi a, ka khua bang lum zozen in, kho-ul neel in hon buak a, ka sa hemhum hial hi.

Ka khonung ngaihtuah chiang in ka nuih bang a za sim thak thei lai hi.

Nikhat Pagin in inn a azat zel uh landline pen dawr ah a hon koihtouh sak a, a poimohna a om chiang a kithuzakna baihsam ding chi in a khoih dingdan bang a hon hilh hi. Ka khoih patna ana hi get zel ahihman in, ka nervous na toh ling poppop in ka khoih a, a chihdan lou deuh in ka hih khanak hi. Hon theisiam mahmah in a hon nuihsan hiau lel a, keileng a tawp in ka nuih hong za law khong in ngaihtak in ka nuikhe kha zozen hi. Ahitak in ka kisuanlah man leng a hipen in ka thei. Bang e, pasal chi in nasatak in ka pan thak a, ana haksa hetlou ahihdan ka thei khonung phing hi. Thil himhim i theihna ding a ngamthoh deuh leng ngai ahi chih ka zilkhia hi.

Dawr a vanlei leh van en a omlouh kal in leng la bang ka ngai zel a, a khenchiang in ka keyboard toh kei chauh leng ka kithuah thei a, ka chim man ngeikei hi. Ka nasep ah ka lungkim in nuam kasa huntawk mahmah hi. Ka loh leng ahun bang zel in ka lathei zel a, tamkei mahleh ka lungkim veve hi.

Ka papi'n bank ah account ka hon hoih hon sakpih a, tamkei mahleh khateng a tamloulou a khol thei ding chi in United Bank of India (UBI) ah account hon hongpih a, ka zang phatuam mahmah hi. A chang in ka nute ka khak zel a, ka omnate ka papite bangleng tamkei mahleh ka hihtheih dandan in ka panpih zel hi. Tep-le-muam a siangthou mahmah kahihman in kei a ding in sumsenna a tamkei a, sum neilou inleng ka khosa thei mahmah hi. Nek-le-dawn a pilvan leh siangthou hiai khawng ale ana phatuam law khin ahihdan ka musuah nawn hi.

Nikhat mi lah om vaklou ahihman in ka keyboard toh 'Nang tektek hong deih' chih la lunglut deuh leh a thu ngaihtuah kawm in awl in kana sa hiauhiau hi.

Huchih lai in phone a hong ging a, ka lasak lunglut sim kahihman in lak ding ka thaduai sim hi.

"Hello"

"Hello Uthang. Bang hih e?"

"Mi omvak lou inchin, la khawng sa maimai kahi. Nangla?"

"Kei dena pawt inga tua dawr a omta. Ken phone thak neita"

"Aw, hia? Nak kipahhuai e. Kon kipahpih lua. Bangzah a man a leh?"

"Den chiah gen ni aw"

A phone a mekmit chat hi. Mawite in phone thak nei a hi ngei ding a, kipak leh kithalawp tak in a hon hilh pah a, ken leng ka kipahpih mahmah hi.

A sawtlou nung in a hong tungtou pah a, mi le omlouh toh phone thak kipahpih in nuamsatak in ka om uhi. A mek didan a siam omlou tuak kahihman un ka kituh bawl zozen ua, naupang bang mai in maitai leh kipak tak in nuih toh thuah in ka om ua, phone bang kituh pian sim zozen in, a siam zaw hih bang ka ut tuak uhi.

Lungsim siangthou tak a, kipak a nui silsel mel ka muh chiang in ka itna leh ngaihna pung deuhdeuh hi in ka thei a, a phone lamlam sang in leng amah bang ka munuam zaw maimah hi.

"Uthang, nang lah phone toh om ta, ken lah neita kahihchiang a, ut hunhun a kihou thei ta ding ivoi maw? A nuamta mah ding" chi in kipak tak in Mawite in ahon gen tiautiau a, keileng kipak selua hinapi, kei leltak toh kihou ding a hichi kilawp chih ka ngaihtuah chiang in hampha kisa lua in ka mittui bang hong dai hial hi. Dawng khazok lou ka hingei ding a, ka maitang a hoihtak a hon en kilkel kawm in, "Bang chi e Uthang? Nang kipak lou maw? Ahihkeileh buaina nei maw?" Chi in a hon dong thak zozen a, a mel nuihmai hiauhiau bang a hong mual zozen hi.

Keileng hoihtak a kisa thak in, ka gawl bang ka khuah zozen a, nuihmai latsak teitei ka hon sawm hi.

"Mawi, ka kipak lotel. Ka hon kipahpih a, kei a ding in leng kipahna liantak ahi. Nang toh hunteng zangkhawm a, nang toh kihou a nuamsa tak a omkhawm kan a ka kipahna om ding in ka gingta kei. Kei leltak toh kihou ding kilawp mahmah nahihdan ka theih in ka phulouh hi a ngaihtuah in, kipahna ziak a ana nehnou kha ka hizaw. Ngaihsiam aw Mawi"

Hiai ka gen sung in amah leng mittui ana pak likliak zozen a, himahleh kipahna ziak ahi chih ken leng ka haih kei. A mittui a chin pilhpelh hang in a ha ngou sitset hon dawksak in, a hong nui chiichiai a, a etlawmna nasatak in behlap hi.

Huaini bel kei a ding a ka mangngilh ngei nawnlouh ding ni ahi. Kum beikuan October 25, Sintawpni ahi a, nitaklam dak 2 lakvel a hi hi.

Huai hun apan kei a ding in ka totkhak ngeilouh lampi leh hinkhua ka zat ngeilouh, banah hunbi thak a ka lutni leng ahi hi.

Ka genzom nawn a, "Mawi, na kiang a itna thu gen ding in kei a chinna, pilna leh siamna, neih-le-lam leh insung khosa ah suan ding ka neikei. Sawtpi apan in ka honna it a, gendek sek mah leng kei leltak a ding in na itna phalkei lechin zahlak ding kahihman in ka hon gen ngamkei hi. Himahleh ka im-im hang in ka hon itna a pung deuhdeuh in ka thei. Tu in bel, zum-le-zah khuallou in ka hon genkhia. Ka itna na hon sansak ngam diam Mawi?"

Hiaiteng ka gen lai in taise hetlou in Mawite ka en a, thugen a muanhuai kahihdan leh ka lungsim tawngnung pen apan, chitaktak kahihdan ka langsak hi.

Aman leng a hon en ngei a, gennop nei lua hileh kilawm ina muk bang a hong taang a, himahleh a aw a suakkhe kei.

Naupang pauthei dekpan, i paudan en a amuk uh ana phun bang deuh un ana om hi. Tutna a leng tu khollou, ka mai ua dohkan tung a tongkawi nga kawm a, kimaituah piansim a ding tuak kahihna uah ka kimuchian mahmah uhi.

Huchia a hon dawnna ding ngaklah tak a ka omlai un mi van en dinga hong lut ua, huat theih lah hilou,lah huathuai sim khat in a hong om ua, ka houlimna uh sunzom thei zoklou in ka om uhi.

Ka lungsim lah genkhe ta kahihman in neuchik kalungnuam deuh a, himahleh amah apan bang dawnna ngahding kahia chih theilou kahihman in huai in hon lungnuamlou sak hi.

Tuma a laithon hon simsak pa toh ana kingai bang ana hi zenhouh le uh chih bang ka laugu sim hi. A khenchiang in lah aman leng hon ngaih tuak thou ahihman in ka kinem sim zel hi.

Huai ka ngaihtuah kawmkawm in van en tenleng en zel ua, atawp in lasiam minthang Muanlal in a bawl 'Muhchil Pan' cassette lei in pai uhi.

A paizoh nung un houlimna nawngkai khazek ahihman in nengchik zuul thak zek poimoh sa in Mawite kiang a va pai in, "Mawi, bang ana ngaihdan? Tu a na gentheih lelah ka kipak dia, na gentheih lemchang kei leh leng ka hon ngak ding" chi in ka genthak nawn hi.

A hong mitsi khiikhiai zozen a, pau haksa sa hileh kilawm tak in a hong om a, a mai bang hong san chiichiai mai hi.

Sutzop ding.......

By: Kattie Mawite © thaikawitongluan.com

Add comment


Security code
Refresh

© 2017. Thaikawitongluan.

We have 20 guests and no members online