Stories

NUNLUI NGAIH ANA E - V

Lampi a ka paitouh kawm in ka lungsim ah nopsak louhna khat ka nei mawk hi. Bangpen tak hi hiam chih bel kenleng ka genthei kei, himahleh ka lungsim ah a nop hetlou khat a om hi.

'Nenem a hoihlam sang a a selam ana hizaw ahi de aw!' peuh ka chi lungsim a, a lehlam ah lah 'Gintak khel a hoihzaw ahi di' peuh ka chi thepthup zel hi. Bangmah gen masa sese lou a va hohsawm nawn ka hihman in a inn uh ka tungdek tak in ka kisuanlah tha hong suak petmah a, va hohlouh mai bang ka utsim thak hi. Himahleh a inn uh tungdek ka hihtak man in va hoh teitei bel ka ut mahmah zel hi.

Huchi a, va hoh ding leh hohlouh ding kal ka ngaihtuahtuah sung in a inngei uh ka tung man hi. A gate uh kihong sa in ana om a, a innkong uah car hoih mahmah khat leh gari neu bangzah hiam ana khawl a, innsung lam ah mi tamsim kihou ging kaza hi. A thugen te uapan 'mou-hel' uh ahi, chih ka theipah hi. A gatebul ua dinkhawl zek in tua innsung a kihoulim te' kihouna ka na guuk ngaih hi. Ka lungsim a nuam nawn hetkei! Aziak bel, Nenem pen a unau lak ua upa pen ahihman in mouthu gen ding a hoh om ahihleh bel amah toh kisai hi ngeingei ding chih theihsa ahihman ahi.

Ka lungsim ah thupukna ka bawl a, hohlouh mai hoih ka sa a, ka innlam uh zuan a paikik di'n ka kisa hi. Ka kinung hei leh ka mazawn tak ah Nenem leh Muamuan dawr a hoh hongpai kiklam ka galmuh hi. Keileng a hon muhlouh ding un a mialna mun khat ah ka na kibu hi. A hong paikheng nung un ka innlam uh zuan in ka pai vengveng a, ka paikawm bang in ka mittui ka nulkawm hi. Ka kingaihtuahtuah na lam in ka inn uh ka tunlam leng ka phawkkei a, 'PT Sports Complex' ka va tungsuk kha thepthup hi. Huaimun ka tuntak in ka inn ua paikha lou ka hihlam ka theikhe phut a, kileh hei in ka innlam uah ka paitou thak leuleu hi.

Inn ka tuntak in ka kihahsiang a, ka room ah ka lutpah a, ka lupna ah thazoi takmai in ka lumsuk hi. Ka biang ah ka mittui te hong luankhe zungzung a, ka lungsim ah leng bangmah ka ngaihtuah theikei hi. Ka mittui te a luan dandan in ka luangsak nilouh a, ka lukham bang a kawtzou hial hi. Ka room a light pen mek mitsa a ka koih a hihman in ka inkuante'n bel bangmah hon theihpih kei uh hi. Hiai nitak zaw a hai ka bang maimah hi. Ka lup chiang in lah a nuamkei a, ka tut chiang inleng a nuam tuanbek kei! Ka room sung ah khat veivei ka dinthoh zawzen zel hi. Ka lungsim a beidot luatman in khat veivei limlang mai peuh ah ka phone de vak keukau sa in ka ding kha thethup hi. Ka chimoh gawp a, ka omdan teng nasan a nopna mawngmawng a omkei a, kei-leh-kei nasan ka kihehsan hial hi.

Zan dak12 a hong gintak in ka room apan ka pawtkhia a, ka common room ua ka Ulian in a lawmpa' guitar a khelh pen tawi kawm in innkong lam zuan in ka paikhia hi. Ka innkong ua munkhat ah kei kia ka tu a, huai ka guitar tawipawt pen tum kawm in ka zawlla theih sunsun khenkhat ka sa mawkmawk hi. Laa khat ka sak pat chiang in chang khat leh a thunun ka sa man hamham a, ka mittui in hong tumzel ahihman in ka sa suak zoukei hi. Laa khat peuhpeuh(lungzuan laa deuhte) ka sak chiang in kei aa ding biik in ka kipia a, ka khase mahmah mai hi. A tawp in ka guitar angpom in ka kap hithit mai hi.. Huchi a ka omleh ka nu zuntha dia thou in hong theikhe laizang hi.. Innkong ah hong pawtkhia a, ka omdan bangkim hong mu ahihman in hong hehpih mahmah ahi ngei ding a, a mittui pak likliak kawm in ka gei ah hong tu hi. Kenleng ka nu' kiang ah, "Nu, ana lum ve!?" ka chihleh ka nu'n, "Bawi, ka tapa' mittui lupsan/ihmut san lou hial ding ka hi..." chi in hon dawng hi.

Kenleng ka nu' kiang a ka lungsim a ka puakgik te genkhe ding in ka kisa a, ka nu' liang a kingai phei kawm in hichi'n ka dong a, "Nu, a himhim a 'itna huangsung' a lut dia naupang lua ka hi hia?"

"Bawi, itna in kuamah khentuam lou ahi. Huaiziak in itna huang a na lutkhak pen a lamdang ahikei....!"

"Achihleh nu kei tua bangchi di la??" chi in ka nu' ang a ka lu phumlut in ka kap keuhkeuh mai hi.. Ka nu'n leng awl a ka lu hong phongtou in ka mittui te hon nulsak tiautiau a, a gawl bang hong khuah masa zawzen in a gennop thute gen di'n hong kisa a, "Bawi, keileng ana nungak kha ngei ka hi a, tuamah bang in na pa leng tangval chihphet louh nang bangbang a ana teirol kha ngei mah ahi, chih na theih masak ka deih. Huaiziak in, tuni tak in bel ka lungsim a om zahzah thu ka hon gensawm ding a, malkhat lel leng ngaihsak lou in ana omkei in aw Bawi?" honchi masa hi. Huaikhit in hiai a nuai a thute hon gen a,

"Bawi,kenleng tua na tuah bangbang hinkhua ana tuak a ana pal galkai ka hi”.

Hon saugen zek leng, ka-it masak(first love) leng na pa ahi zenzen kei. Ka khua ua tangval fel leh suanhuai mahmah khat ahi…

Sawtlou ka kingaih nung un a nu-leh-pate'n kei pen inkuan khosakna toh kisai a khosung midangte toh teh a tuantual zaw ka hihman in a hon deihkei phing uh hi. Ka it mahmah ka tangvalpa'n leng a nu-leh-pa' thu nial ngamlou ahihman in a hon khen hi.

Hichibang dinmun haksa tak mai ka na tuah hun in kenleng kithah mai bang ka na sawm man hi. Ka pona petmah a, zan thum ka zanhak dimdem hi. Huai hunsung in ka annkam a limkei a, tui nasan ka dawn theikei hi. Na pi-leh-pu (ka nu-leh-pa) bel a inkuante' uh gawm ahihziak in hichibang dinmun ana tawnkha lou uh ahihman in hon theisiam mahmah kei uh a, a kingeksak/a kibawltawm bang hon hisak ua, haksa ka sa petmah hi. Nang bel, ken nithum sung ann ka na ngolhpih pen tua nitak khat sunglel a theisiam dia na om man in kei toh the in na hampha mahmah hi.

Itna i chih pen khenkhat in hun-awl zatna maimai in a ngai mawk ua, khenkhat in lah taksap awng hukna di'n leh kimawlna(as a game) dan in a nei uh hi. Nang bel, kei hon suun na hihman in tuabang te ding in kon gingta kei a, tuaziak in itna thuguk tamlou kon hilh ut hi.

Itna gah pen i kiheel sung a kilang lel ahi kei a,i kiten hun kia a kilang leng ahi kei lai a, damsung daih ding ahi. Huaiziak in itna taktak in ngiat tampi nei a, tuate i damsung a I sepsuah(lahkhiak) ding ahi. Na thilhih sa te kia a na itna kinga ahikei a, na thilhih zel ding te ah leng a kinga lai hi. Tuaziak in, itna lampi zaw a nuam liaikei a, i va tawmlut khak a kipan i damsung daih ahi.

Mi khenkhat in bel, it masak(first love) toh kiteng kha te a vangpha penpen te ahi uh, a chi ua, kenbel hiai dik ka sa kei.. Aziak bel, kei aa ding in bel na pa ka it masak hikei mahleh ka khovel ahi. Huaiziak in, it masak pen toh kiten khak a hamphat huai diakna ding leng om in ka theikei, a poimoh pen bel 'kiteng zohnung a kikhen kik louh' ahi lel hi. Hiai sang a hamphat huai zawlai khat a om hi. Huaibel thildang hilou in, kum tampi nupa a hinkhua zatkhawm ahi lel hi. Tua ahihman in na itna masa pen toh na kiten khak kei zenzen leh zong lungkiatna leh khasiat luatna ding omlou ahi aw Bawi....

Hongpai, i lut phot dia, i lum tawldam phot aw.....? A bul kipan dekpan na hi a, maban ah leng i houlim zelzel ding... Na haksatna non kupna di kei om gige ka hi nang aa dia....

Lungneu hetken!!" chi in hon gen hi.

Hiai bangteng hon genpih zoh in keileng ka lungsim a ka puaknatna pen a hong damdeuh a, ka mittui te bangleng hong hulthei ahihman in ka nu toh innsung ah ka lut ua, 'mangpha hoihtak' kichi tuah in ka room tuak uah ka lut ta uh hi.

Himahleh ka ihmu thei tuankei, ka mittui bel a hulta a, himahleh Nenem leh Muamuan ka mitkha ah hong kilang zihzeh uh hi. Ka lungsim ah Muana Ngaihte' lasak "vangkhua lai a ka lenchiang'n, gual in bang simthu lel ding hiam? 'Nang aa hilou maw?' hongchi ding, a guk in singdang' aa hi.... Koplai puanbang se nailou! Hizong lunggel kisia hiam? A guk in singdang' siang zuanta! Lailung dam e, zalmang pha......" chih honglut guih a, siamlou sasa in ka sa huauhuau nilouh hi.

Zingkhua hong vak ding a, ka ngaihnou apan bangmah thuzak nei nawnlou ding hi ing a, chi in kei-leh-kei peuh ka kikhasiat thethup a, ka lupna tung ah ka kidik hithit kha nawn hi.

Himahleh ka nu' hon thugen te' ka bilkha ah hong lutkik a, ka khitui luangte a hong daipah theizel hi. Huchi in, zingkal lam dak4 lak in ka ihmu theikhong hi.

Zingkal hong hi a, khua ka phawktak in ka thoukhe pah a, ka kihahsiang zoh in lai tomchik ka sim hi. Dak 7am geih in ka phone ah message honglut hi. Kenleng ka phone ka hongpah a, tua message honglut in kei aa ding in bang thu hong tun a, chi a theinuam mahmah kawm in ka simpah hi. Nenem apan hi a, hi chi'n a kigelh hi,

"Uu, zingpha! Zan nitak hong hoh dia konna gintak luat leh nong kilang hetkei a bangchi e?

Message beek hon khak di honsa ing a honna ngakngak kei ve...! Hilehle non thuzak louh tak a kenleng hon thuzak ngamlou ka hi. Tu zingkal ka thoh tan a le hon thuzak lou lai na hihchia kisuanglah pipi a kon text ahi. Kon sukbuai khakleh ngaihdam aw Uu?" chihteng a kigelh hi.

Ka lungsim a si dedu a, 'zan nitak ka mit ngei a ka muh hi a, hiaibang message ka muhpenbangchidan ahi de aw?! Nenem apan khenna thu lah bangmah zak neilou ing a!" chi in ka ngaihtuah nilouh a, ka buai mahmah mai hi. A omdan apan in bel Muamuan a leng lunglutna chiang nei hi in ka thei hi. Ahi a, mi kamsiam teng leng ana zulhzau hisam lou hi a, peuh ka chi zel a, tua message ka muhpen dawngkik ding leh dawngkik louh ding kal ka saikak nilouh sung in ka zing-ann nek uh hong hun man hi. Kenleng tua message pen ka dawngkik sese kei a, ann-ne ding in ka room apan ka pawtkhia a, ann ka ne mengmeng a, ngeina bang in school kai ding in ka kuan hi.

Hunte hongpai zel a, Nenem toh leng ki class ka hihman un khat veivei a nop hetlouh hun bangleng a om hi. Kei pen mel-leh-puam leh neih-leh-lam a mi phalah lua ka hihman in pasal dang in a houpih khak chiang bang in ka thikthu a siat kawmkawm in ka kisuanlahna a hong puangzel a, awlawl in Nenem apan ka kidang koih hiaihiai hi. A inn ua lah hoh nawnlou, phone a lah thuzak nawnlou a ka-om tak in Nenem leng a ngaih phalou ahi ngei dia, nikhat school kai ka tawp un ka kiang a hongpai in, "Uu tunitak hong hoh ve?" hongchi hi. Kenleng, "Tuni zaw ka mankei di Nau, homework gelh ngai di inchin.." chihteng lel in ka dawng hi. Huaitak in Nenem in, "Uu, hehpihtak in tunitak hong hoh teitei mai ve aw? Please...." honchi thaklai hi.

Huaitak in kenleng, "Bang thu gen ding poimoh om ahia Nau?" chi in ka dong a, Nenem in,

"Nitak chiah hong hoh oh, huaichiah hong hoh dia konsap ziak na thei mai di...!"

chihteng hon genzoh in hong paisan hi. Ama paikhit nungzek in ka nung a pan kuahiam in ka liang hong betsak thauhthauh hi. Keileng ka kinung hei leh Muamuan ana hi a, kipahmel tak in, "Eh! Siam, damzel maw?" chi in hon dong hi. Kenleng, "Hmm... Dam mah ing ei Muan, nangle tuni school non kai zenzen ngei!hehe" chi in ka chiamnuih hi. Muamuan inleng hon dawngkik pah a,

"Eh! School kai, i chih khawng hun-awl zatna aka!" chi kawm in dak vauvau in hon paikheng hi.

Huai honchih tak in ka lungsim ah 'tulai mi khenkhat in leng hiai ngaihdan paipih uh hita ding eive maw! School kai kia hilou a, thil bangkim hun-awl zatna chivek mai uh hileh kilawm mawk a!' chih bang ka ngaihtuah kha thethup hi.

School kai tawp inn ah ka pai vengveng a, inn ka tungphet in kimawl(ballpek) ding in ka kisa pah fitfit a, 'PT Sports Complex' lam ka zuanpah vengveng hi. Ka va kimawl zoh in sawtlou field ah ka om zeklai a, ka tawl a damdeuh tak in inn ah ka pai hi. Inn ka tunphet in ka kisilsiang a, ann ka ne mengmeng a, Nenem' kiang a hoh ding in ka kisa hi. Ka nu'n hong na enzui den ahi ngei ding a, pawt dia kisa ka hihlam hongthei hi. Ka kisak zoh a konglam zuan a ka paiphei leh ka nu'n a tutna mun apan, "Pak sisa tui kibuak ngeilou ahi aw Bawi!" hon na chi gaih hi. Bangmah gen tuan sese lou in ka pawkhia a, himahleh ka nu' thugen bel ka chiamteh tinten hi. Ka lungsim ah thupukna khat bawlsa ka nei a, huaibel 'Nenem apan kihep khiak mai ding' chih ahi. Ken it in ngai mahmah lengzong, ama aa dia phulou ka kisakna in hon zouzaw ahihman in hichibang thupukna bawlsa a kimuhpih sawm ka hi lel hi. Khenkhat ngaihdan in bel a haihuai sim a bang a, himahleh kei ngaihdan ah bel ka thupukna bawl pen mah dik ka sa suk lel hi. Aziak bel, itna pen ka poimoh ngaih kei, chihna lam hi zenzen kei mahleh, khovel a i damsung hun ding kuaman theilou i hihchiang a, itna ziak a i kipahna ding khenkhat te mittui luanna a i kisuahsak khak ding pen kiven huai ka sa zaw hi.

 

By: M Liankhansiam | www.thaikawitongluan.com

Add comment


Security code
Refresh

© 2017. Thaikawitongluan.

We have 13 guests and no members online