Stories

NUNLUI NGAIH NALUA E - II

 

 

"Uu, nang hon muanglou lua maw?" ci in hon dongthak hi.
Numei i cih bel 'vasa lenglai' toh kibang ahihman un muanglua hi zenpi bangleng muanngam taktak haksa ahi mai, a siangsiang in genleng maw...
Kenleng Nenem kiang-ah,

"Nem, hon muangmoh honci kei-in, nang ka hon muankei leh kua ka muangtuan dia e....!" ci in ka dawng hi.

"Uu, acihleh bangziak eita le na mittui a luan mawk? Ka itna huansung a na omkhak haksa salua maw leh?"

"Nanau ei, hucidan lampang zaw hikei veh aw... Itna huangsung zaw a nuam gige keihial ding cih chu theihsa hi a maw...hehe"

"Cihchu bangcidan in la Uu....?" ci in kamka heuhou zen in hon en a, ka thugen pen theisiam hetlou ahihdan a langciang mahmah mai hi. Keileng awl in ka kisa thak a, ka gawl bang khuah thak zawzen in ka itna thu ka gencim theihlouh pen mah gen ding in ka kisa a,

"Nanau ei, ahitak gen ding cileng, na itna ka tankhak zenzen pen kei aa ding a ka phulouh hamphatna tawpkhawk ahi. Leitung ah tangpal zatam a hei a, phungcing tak in singdang englou in laitual a leng uh hi. Amau eng zaw ka hi zenzen kei, himahleh ka itpen nang aa ding a puakgik ka hihkhak ding ka laulua a ahi Nanau aw...." ci in ka gen a, ka aw hong liing gawp in a ban ka genzom theikei hi.

Ka thugen theisiam lou ahi ngei ding a, Nenem in lamdangsa tak in hon en heuhou phet hi. Ka thugen zomzok theilou a ka om man in tui noukhat a va la a honpia hi. Kenleng 'kipak' ci in a nou kala a, ka dawn-gai pah hi. A nou ka gei a koih kawm in Nenem ka ang-ah ka pomlut a,


"Nau, kon ngailua..." ci in ka kawi chenchen hi. Nenem inleng hon kawithuk kawm in hici'n hon gen hi....

"Uu, bangcidan e tuni? Na omdan leh na thugente hundang a bangkei lua....! Mangpha honkhak sawm na bang a...."

"Nanau ei, ka damsung in ka hon mangngilh kei ding... Ahi a, maban a i itna lampi tot ding ka ngaihtuah khak ciang a nehnou kha pahpah ka hi zaw..... Ngaihdam aw Nau...." cihteng lel in ka dawng a, a theihnop dawngkha ka hihleh hihlouh bel ka theikei hi.

Tomcik zoh in Ka-ang apan Nenem a paikhia a, ka tui dawnna nou a vakoih a, a room lam ah a lutsuak hi. Tomcik nung in hong pawtkhia a, a khut ah limlak bangzah hiam hontawi hi. Ka-ang ah hong tu nawn a, a limlak tawite hon lak hi. Ka enkhawm ua,a kal paisa a 'student tour' a paina uh limlak te ahi. Keibel sum thoh ding a cihzah uh neilou ka hihman in buaina nei ding ka hihman a tel manlou ding ci in ka kilepkhia hi. Nenem kiang-ah bel hucidan te utlou banah lunglut lou ka hihdan ka gensa ahi. Ahitak in bel ka ut petmah a, himahleh sum-leh-pai ka neihlouh ziak a utlua zenpi utlou lem kineih ka hi lel hi. Ka khonung theihthak leh Nenem in kei' sum thoh ding leng ana pekhawm ahi a, a hon 'surprise' ut ziak a hon hilhlou ahi. Ken utlou ka hihdan ka gentak a hon cial teitei ngamlou in, a sum leng lakik tuan selou a hucia om dan ahi. Nenem te leng khosakna lam-ah neizou mahmah thou uh hi. Apa 'bank PO' ahi a, a nu 'anganwadi worker' ahi. Sanggam numei 1 leh pasal 1 a nei hi. Amah a upa pen ahi a, inkuan khosathei tak ahihban uah kituak mahmah mai uh hi. Huaiziak tak in ahi, a itna ka tankhak 'ka phulouh hamphatna' ka cih.

A limlak te a banban in ka-en ua, a hohna munte uh nopci kasa thei mahmah mai hi. Ka lungsim in 'keileng va hohkha maimai leng zaw aw'  ci in ka kisiamtan kei simthak hi.. A limlak ka ette uh lak-ah Muamuan toh a kilak khawm na uh mun nih hiam ah a om hi. Huaite ka muhtak in ka lungsim a nuamkei sim a, a limlak dangte ka etnop tha leng a suak nawn mangkei hi. Himahleh lungtom lua hon sak ding ka lauhman in ka etgaih pih teitei hi.

Limlak ka etzoh un Nenem in

"Uu, nang huailai a hong tellou cin a Umuan ka va bulbawl mai eivoi. Midang lah muanhuai uh salou ing a, banah nang le non muanmoh louh pen di, ci ing a huaiziak a Umuan toh va kizui kha den ka hi uh.." ci in hon gen a, ka lungsim nop ciahkei mahleh "Aw, huaidan maw... Ahoih vele....."  cihteng in ka dawng hi.

Nenem in a thugen hon sunzom zel a

"Tuzing a i kihouzoh a Umuan in hon call incin 'limlakte zan a kava lakkhiak vek ahi, nang telkhakna teng ann nekzoh ciah konpe tou di' ci incin ka nau toh ka pawtna di uh le pawtlou a Umuan ka na ngak leh hongtung pah vanglak a, paipah di kasak leh mawk tuttut incin room lam a ka omsan leh ihmu sim kha zawmah ka hi. Huaiziak a kong nong kiuh lam le ana phawkpah khalou mah ka hi... Non muanmoh dan hi zenzen lou ahi aw Uu.. Ka va tour paina ua le kizui cileng hucidan a nang kiang a ka om dan a va om zenzen lou ka hi. Uu, hon muangmoh hetken aw......please" ci in hon mitsat gaih kawm in hon gen tiautiau hi.

Aw...! Nuam hinatel e.... Ka lunggimna tengteng a beizou hial hi. Nenem ka ngaihluat man in ka muangmoh a, ka itluat man in a phatuam lou pi in kei-leh-kei ka kikhasiat theizel hi. Hicibang a hon gen tiautiau theih ciang in ka itna leh ngaihna a pungbeh zou hial hi in ka thei. Ka lungtang tawng a it theihna zahzah a it ka kisak lai in leng 'hiai sang a thukzaw leh lianzaw  in ka it theilai de aw' cici theilai ka hi. Aw..... Itna icih a lamdang tel.... Laisiangthou ah "bangteng aa ding in hunbi a om......" acihpen bang ka lungsim ah hong kilang dundun mai hi. Thikthusiatna i cihbang leng a huntan i theihkei leh mahni kigawtna lel ahi maimah, cih hiaini a kipan ka theician thakthak hi.

Sawtlou ka tuzek lai a, thu tuamtuam gen in ka houlim kawm uh hi. Nitaklam dak2 lak hong gintak in a nu leh a naute gel kholak pawt hongpai ua, kongkhak a hong lut phet un a naupa Thangbawi in "Usiam, nang bangcik a ana hoh la? Ka pawtdek un lah ka Unem leh ka Umuan chouh a om ua....." ci in kei kianglam a hongpai kawm in lamdang satak in hon dong a, ka kiang ah hongtu hi. Keileng ciamnuih hatsim pi ka hihman in, "Thangbawi, na Unem kha, ka class ua luck a luck eivoi... Pasal tuamtuam hong hohleh leng lamdang nana sak louh ding ahi aw tuban.....haha" ci in ka dawng hi. Huai ka cihkhiak phut leh Nenem zumlua ahi ngei ding a, sawtlou a room ah a va om mang hi.

Thangbawi bel naupang fel mahmah ahi. Kum9 lel a upa ahi a, pauthei mahmah, banah kimawl lunglut petmah khat ahi. Ka va hohkhak ciang a Thangbawi ana om leh bel kimawl dia hoh ka bangmai hi. A lunglut pen 'chess' kimawl ahi zawmah a, naupang cik himahleh siam mahmah ahihman in ka kimawlpih ciang in ka zoukei dekdek hi(hun tamzaw ah amah ka kizou sak a, a kipak thei mahmah mai hi). A naunu Lulun ahihleh bel mi pautam lou ahi a, a mizia leh gamtat-khohei et in a pa toh kisuun mahmah hi. Khat veivei ka ciamnuih zel a, "Lun, nang zaw pasal a piang di lai numei a piangkha hi di hi ve cin aw maw?" ka cihciang in a zumluat man in hon leikhat zat in a room ah hon lutsan zel hi. A nu'n ahihleh mizia theihhak pi nei hi. Kamsiam mahmah mi ahihban ah, paunuam mahmah hi. Ahihziak in Nenem toh ka kalthu uah kam khat lelleng pau nailou ahihman in hon deihsak leh deihsaklouh ka theikhe zoukei hi. Huaiziak ahi, a mizia theihhak ka cihna. A pa ahihleh bel mi frank mahmah ahi a, pautawm mahmah a, himahleh mi a houpih ciang in kamdam tak in mi kuapeuh houpih thei hi. Kei toh Nenem leng hon deihsaklou hikei mahleh naupang honsa lua lai ahihdan khatvei hon genkha khinta hi. Huaiziak in huainung siah a pa' omciang in ka va hohngam ngelkei hi(a hohlou bikbek bel hisam lou....hehe).

A nute' hongtun nung in bel Nenem in hon tangkha ban nawnlou hi. A naupa Thangbawi in a 'chessboard' va lakhe pah a, ka kimawl pah tingteng uh hi. Kei kia ka pang a, Thangbawi bel a Ulun toh a pangkhawm uh hi. Nenem in a nu' nasep huh in anhuan kipan ngal uh hi. A chang in a mehmal kawm in hon houpih kawmzel sam mahleh keileng a naute toh om ka hihman in ka cim mankei hi.

Hicibang a a nau teng kithuahpih thei ka hihman in a lehlam tak ah bel a nu'n leng ngaihnatna ciang hong nei hi in ka thei. A diak in a nasep na vai a a buaidek ciang bang in ka va hohkhak kizen sa thei mahmah mai hi. Aziak bel, Thangbawi in zui-ut in kap zel a, kei ka va hohkhak ciang in bel 'chess' kimawl utzaw ahihman in a nu pawt lehleng poisalou hi.

Round 2 ka kimawl zoh nung un nitaklam dak4 bang hong gingdek mawk ahihman in paiding in ka kisa hi. Nenem in cikmah in ka paidek ciah hon khou ngeikei himhim a, huai naksang in "Awle Uu, painuam inla hong hoh pahpah in aw....." ci in hon kha zel zaw hi. Paiding in ka dingkhia a, konglam zuan a ka pai kawm in "Nungai, Lun, Thangbawi, na vek un neklim......." ci in Nenem ka genkha kei citciat hi. A nu leh a naute'n leng "Awle Nangle neklim" hongci kikpah uh a, Nenem bel a kitchen uapan hong paikhia in nui heuhau kawm in, "Uu kei neklim nonci khakei..." ci in ka khut veilam ah honglen a, konglam zuan i ka kizui phei uh hi. Kongkhak ka tuntak un, kenleng

"Nau, neklim aw......." ka ci a, Nenem in

"Awle Uu, nangle neklim...."ci in ka kikhen phot uh hi.

Nitak annek hun hita ahihman in inlam zuan in ka pai mengmeng a, inn ka tungphet in ka kisil siang a, ann ne di'n ka kisa pah tingteng hi. Ann ka ne ua, ka nekzoh un ka khawl tawldam theipan hi.. Tomchik bench tung a khekhuang zenzan a ka kizam leh ka phone hong ging lengleng hi. Kenleng ka ip apan ka lakhia a, a lakna pen mek in bangmah hon genma in,


"Hello Nau, ann nezou maw? Ken ka nezou ta....."

"Hmm... Nezou, kuangle silzou hita... Ka fel maw Uu? hehe"

"Hmm.... Fellua... Nang bang hih di tunitak?"

"Naute laihilh di, nunu toh papa kikhawm dek uncin...."

"Oh hou...! Keile hon hilhve Nau? Keile lehkha ka siamkei lua voi....hihi"

"Ok... Hongkuan pah oleh...hehe… Eh! Zingcia sunday school kai di maw Uu?"

"Hmm... Damleh kai di himah lou di hia, nangla? "

"Kei chu kailou dek...hihi..."

"Bangziak?"

"Pawt dek, Ngakik ah... Papa toh nunu toh ka vek ua…"

"Aw...."

"Uu nangle hong hoh ve...?"

"Bang kong hih di la? A zumhuai voi... Banah, papa'n hong zawn hileh zaw hongzui lengle poilou di hi a...hehe"

"Na taktak maw?"

"Eh...! Ka cih maimai hi... Nou va hoh mai uah aw Nau....."

"Ooii....... Nou, va kicih tel....! Bleh, mangpha ou...." ci in heh mahmah ahi ngei dia, ka dawnkik ma in a phone hon koihsan hi…

Minutes 5 ka ngak nung inleng hong ki phone kik kei hi. Keileng ka lung a himoh thak a, 'call balance' neilou ka hihman in message ka khak a, "Nanau ei i am sorry, please call me back" cihteng gelh in ka khak hi. A message pen lutzok theilou a, 'ka phone network hoihlou ahi geet de aw' peuh ci in ka hehtha a suaksim mahmah man hi. Minutes15 zoh in ka message khakpen lutpan hi. A lut ahi cih ka theihphet in ka phone hong gingnawn a,

"Hello Nau, bangci e? Hehlua maw? Ngaihdam aw......kei ka hailua a eikha...." ka cipah zungzung hi... Huaitak in Nenem inleng hehci mahmah kawm in
"Zingcia nong hoh di eikha Uu... Ka koihphot di, naute laihilh hunta... Mangpha phot oh, zingciah kimu ni..." ci in a phone hong koihsan nawn hi.

Ka lungsim ah ka kingaihtuah dedu a, va hoh ding lah ka-utlua a, lah a pa ka zahtak petmah zel a, ka lungbuai gu mahmah mai hi. Sawtlou ka kingaihtuah nung in ka lungsim ah thupukna ka bawl a, "sih-leh-sih, dam-leh-dam- zum leh saili a si omlou ci uh hiven" ci in Nenem te inkuan toh 'Ngakik(Ngalawi)' aa hoh ding in ka thupukta hi.

Nitak lai sawtlou ka sim a, ka simzoh in ka lumpah hi. Zingkal ahih ding bang ka ngaklah mahmah mai a, ka lupna tung ah kei kia in ka lungngai dedu a, khat veivei ka nui heuhau hi. Ka ihmut sawmciah ka halh deuhdeuh a, a tawp in ka ning kitel gawp ahihman in ka thoukhia a, Ngakik(Ngalawi) a Nenem te inkuan toh ka-omsung ua ka pauding dan leh ka omding dan ka kizil ek mawk hi. Siam kisa huntawk ka hihtan ka kizil a, zingkal lam dak1 lak in ka lumnawn hi. Huai in bel ka ihmut suak petmah ta ahi ngei ding a, bangmah ka lungsim a ngaihtuah manlou in ka ihmu hiau thei hi.

Zingkhua hongvak a,khua ka phawk phet a ka phone ka et leh zingkal dak6 chet ana ging hi. Ka phone screen ah "one new message" cih kigelh ka simkha pah a, a keypad hong in message honglut pen ka simpah a, ka lam-et bangtak in Nenem a kipan ana hi hi. Ngeina bang in "Gud morning Uu.... Ngailua ei, thouta ou..... Hiai message na muh ciah hon hilhpah ou kon gen ut om" cihteng lel ana kigelh hi. Kenleng "Good morning Nau, ka thouta. Bang cisim?" cihteng ka khakkik pah hi. Huaitak in Nenem in hong phone pah a

"Uu, tuni dak9 in inn hongtung teitei in aw.....?" honci hi. Kenleng
"Awle Nau....." ci in ihmut suahci petmah in ka dawng hi.
"Acihleh thouta inla, kihahsiang inla, nunu ann huan bang na huh dia, kei dandan in...hehe.... Ann na nepah dia, na nekzoh phet ciah nongpai pah di aw Uu.... Ka koih di, ann huanlai ka hi..." ci in ka dawnkik ngaklou in a phone cut hi.

Keileng ka thoukhe pah a, ka kihahsiang a, ka nu' ann huan ka va huh hi. Ka mit un ka nu' kiang ah Nenem te inkuan toh Ngakik(Ngalawi) a hoh ding ka hihdan ka gen hi. Ka nu'n, "Bawi, sunday school kai zaw lecin zaw maw" honci hi.

Aban sutzop ding...

By: M Liankhansiam | www.thaikawitongluan.com

Add comment


Security code
Refresh

© 2017. Thaikawitongluan.

We have 19 guests and no members online