Stories

NUNLUI NGAIH NALUA E!

NUNLUI NGAIH NALUA E!

 

"Uu,zingpha, kon ngailua.. Thouta ou, kon miss gawp..." cih pen tangval khat aa ding a sunni leng a kipahna tuntu ahi.

Hicibang message ka simkhak louhna a hong sawtsim ziak ahi diam, khat veivei keileh kei kingaihtuah in ka zanhak theizel hi. Itluat man a omkhawm lou, itluat man a kikhen mai, itluat man a houpih lou mai..cihbang pasal hitawk lehang leng a nuam hetlou leh a haksa mahmah khat ahi.

Nunlui ngailou omkhang, cizel sam mahleng mihing hihna ziak a i hunlui ngaihpen kibang kimlou ahihman in i ngaihdan leng kibang kimlou hi. Khenkhat in khitui luang zungzung kawm a zatkhosawt khuallou a nunlui hun a sial lai un, khenkhat in bel kipaktak in leh nuihmai tak in nunlui a sial uh hi.

Class-8 ka sinlai ahi. Ka classmate te numei khat hoih kasa petmah hi. Huai minu ziak inleng ka school kai a nuam mahmah mai hi. Ka kailouh khak ding bang ka lau mahmah mai a, damlouhna ka tuah hunciang nasan inleng ka absent utkei himhim hi. Alehlam ah ka inkuan te'n bel hon pakta mahmah mai ua, himahleh kei bel huai minu' ziak liauliau a school kai thanuam ka hi lel hi.

Itna zaw lamdang tak ahi. Khenkhat in-'itna in a haza kei a, a muangmoh kei' ci uh a, kei itna zaw hiai tegel kigawm khawm ahi. A diklou ahi zaw hia leh? ka cihdek ciang inlah a diklouhna ding ka thei tuankei. Aziak bel, itna ah bel i thikthu a sia mahmah mai hi. Kuahiam toh a kihou uh i muhlel lehleng ki hehsan a, kuahiam toh a kiton khawm uh i muhciang lel in ahi a haksat.

"Nem, tuni bang hih di e?"

"Theilou, ann nekzoh ciang a chu ka pute' inn a ka nau toh hoh dek hi ung a. Bang cisim e Uu?"

"Aw... Bang cisim khang, inn a omdek hi lecin chu hong hohdek hi ing a."
"K... Ka nau in ka pute kiang pha di ci a, tomcik di chu hi. Dk11 khawng in ka tungkik di uh."

"Awke.. Huaiciang a chu pawt nawnlou di maw?"

"Hmm... Hong hoh in aw Uu..."

"Awle...."

Ci in zingkal dak 6 lak in ka kihou zou-uh hi. Zingkal ann nek ding bang ka ngaklah mahmah mai a, ken huanthei lou ka hihman in ka nu' huanmin ding a ngak thoh theilel ka hi. Ka lungsim a kipak petmah a, 'tuni chu sawtpi ka va om di, zingciang lah Pathianni hi a' ci in ka ki thalawp mahmah hi. Ka kihouna te bang uh ka simsim mai a, ka byheart zawzen hi.

Huaini zingkal ka pa kholai pawt hongpai ngeikei mawk hi. Dak9 bang hong gintouh ciang in ka nu leng a hong lung himoh sim a, a phone ding in honsawl hi. Kenleng ka pa ka phone a, himahleh a lakei hi. Thumvei bang ka call thuah zoh inleng a la tuankei a, keileng ka lung himoh simta hi. Ka nu'n "bangci a bawi, na pa'n a phone lalou hia?" hongci a, kenleng, "la hetkei veh aw, bangci a diam ah.!" ka ci hi. Ka nu'n bel ka pa muangmoh hetlou ahihman in, "poikei, a buailua a ahi di, ama' hong phone kik di ngak leng a manciah hon phone mahmah inteh hucih sukmai oh.." ci hi.

Kenbel ka pawtna ding ngaklah lua ka hihman in ka pa bang ka hehsan sim hi. Minute tamlou nung in ka pa'n hong phone a

"hello pa! Bangci la? Den in na pick up hetkei a...."

"aw.... Bangci kei, ka phone silent a omkha incin phawklou ka hi. Ann nek honna ngakdah un aw bawi, kong paihak maithei... Kongpai di hun kigen theilou ahi.." cihtoh a phone hon koihsan hi.

Ka nu' kiang a ka gen leh ka nu'n, "bawi, na uu te toh ne un aw, ken zaw na pa ka ngak di." ci in ka uu te toh ann ne ding in hon sawldaih hi. Ka ngaihtuah a, ka nu leh ka pa ann kinek san ngeilou himhim uh ahihman in lamdang leh thupi kasa a, ka nu leh ka pa ka zahtakna a lian mahmah hi.

Ka uu te toh ann ka ne ua, ann ka nekzoh phet in kei ka ngaihnou kiang a hoh ding in ka kisa pah hi. Khosakna a mi phazou ka hihlouh man un ka kisak sung a sawt hetkei a, ka manpah hi. Ka nu' kiang ah kholai pawtdek ka hihdan ka hilhzoh in ka pawtkhe ta hi.

Lampi ah keikia khe in ka pai tou a, nisat luat ziak in khua lum mahmah ahihman in ka kho-ul ka biang ah hong takkhe keuhkeuh mai hi. Himahleh ngaihnou' kiang a hohding chu bangcibang in khohun haksa lehleng a hon dalzou tuankei. Sawtlou ka paitouh nung in a minthang 'teddim road' ka tungtou hi. Veilam a kihei in sawtlou ka paiphei a, huaizoh tomcik sukpai zek in ka ngaihnou te' inkong ka tung hi.

Kongkhak ka kiu kauhkauh a, himahleh kuaman hon dawngkei hi. Dai dide in a inkong uah ka ding nilouh a, ka kithalawpna teng bangleng a beiman dek hial hi. Sawt simtak ka ngak a,thawmging bangmah ka zaklouh tak in paikik di'n ka kisa hi. Himahleh mundang hohna ding nei tuanlou ka hihman in khatvei a tawpna di'n ka kiuthak hi. Huaitak in a insung lam apan kongkhak lam zuan a mi hong paiging ka za hi. Tomcik ka ngaklai a, kongkhak kisungkilhna hong kikhoihging ruap a, huaizoh kongkhak hong kihong a,

"Eh! Hong hoh maw Siam?"

"Hmm... Kei hizel mah ing e...! Nang bangcik a ana hoh e Muan?"

"Kei maw zingkal ann nekzoh dak 9 lak apan om ka hi..."

"Aw...... Nenem la leh?"

"A room ah om...."

Ci in Muamuan in a common room ua bench te khat ah hong tutsan gaih hi.
'Paimai ding ka de aw, ahihke'h omlai ding' ci in ka lungsim ah ka ngaihtuah nilouh a, ka buaigu petmah hi.

Ahi a, tangval khat leh nungak khat inkong kikalh khum a daidide a om cih zaw muanmoh louh theihlouh leng ahi.

Keileng kisuanglah sim geuguau mah leng Nenem mu utlua ka hihman in bench khatpen ah ka va tu tei ringot hi. Ka kun dedu a, ka lungsim a nuam hetkei hi. Paimai ding in ka lungsim a kisa zel a, himahleh ka taksa pum in a zuizou kei zel hi. Ka taksa pum a kisak ciang inlah la lungsim a kisazou kei zel a, ka buai mahmah hi. Huci a sawtlou Muamuan toh kihou ngellou a ka tut zoh nung un Nenem kipahmel tak in a room apan hong pawtkhia a,

"Oh... Uu, nong fel ngei....!" ci in ka gei-ah hongtu pah hi,


"Fel hia, fellou hia cihle theikhang...."

"Ooii.... Bangziak la? Hong hoh dia konsap hehsim cih dandeuh maw leh....eeh hem....?"

"Huailam dan zaw hisam kei veh aw..."

"Acihleh bangziak e Uu? Na lungkhamna om maw?"

"Hehe.... Omkei e.... Kon ciamnuih maimai hi......."

"Huh...... Bangmah le hon gennuam ngeilou, non muangkei...."

"Hey mawkmawk! Hucidan hilou e...."

"Ii, kei nuakta....."

"Ehhem..... Ka Nanau kha, bang kaci de aw tuni in....umm.....melhoih penpen mah cimai ni...hihi"

"Ii, ken Uu hehsan ta... Aman mi le pom utlou khawng....." ci in hon lehngat bauh hi. Kenleng a liang tuak ah awl in keilam nga in ka heiphei a, nidang a ka omsek dan bang un ka-angpom a, amah leng lungkim leh khamuang kisa mahmah in a mitsi diaudiau hi.

Minute tamlou nung in ka pam ua bench a tu Muamuan in
"Siam, ka na paiphot ding aw, hohna di ka neilai a..... Kihel nuam unla, aban zaw gendah ni.....hehe" ci in dingtou a, konglam zuan in paiphei hi... Kenleng ka tutna mun apan in

"Haha..... Na cihleh ahimai keidia leh Muan, pawtnuam......" kaci hi.

Muamuan paikhin mahleh ka lut tunga thil omdan ka ngaihtuah kikzel a, ka lungsim a nuam hetkei hi. Nenem va dong lenglah a muangmoh suakzel ding ka hih kia leng hilou a, hon hehsat ziak a a engtat khak ding ka lauzel a, ka dong ngamkei hi. Nenem angpom kawm in ka kingaihtuahtuah mai a, daidide in ka om nilouh hi.

Muamuan bel ka classmate uh ahi a, melhoih leh duangcing mahmah ahi. Inkuan khosakna ah lah kei toh teh in tong-leh-lam in ka kikhia uh hi. A hausa mahmah mai ua, a duh leh deihte a nu-leh-pa'n hihsak zou ahihman un nuamsa mahmah hi in ka thei hi. Banah, gensau laileng class-5 ka hihlai a ka kiang a tu ahi a, a homework ka gelhsak zel a, huai ka gelhsak man in nikhat in cheng5 ka lohzel hi. Hucia class-5 ka hihlai khawng a a khatehneng hamphatpih maimai ka hi. Huaiziak in a lehlam tak ah ka zahtak sim hi. Mi polhnuam mahmah leng ahi a, mipil ahihziak mah ahi diam a lungsim taktak ding theihzoh ngellouh mihing ahi. A kizuihpih numei khempeuh a ngaihzawng ding in muanmoh theih vek hi. Himahleh amah bel ki-im/kisel siamlua ahihman in a nungak(ngaihzawng diktak) ding pen bel a classmate te kuaman ka theizou kei uh hi.

Nenem bel a ihmut suak hileh kilawm in mitsi den a, lungmuang mahmah leh lungkim mahmah ahi cih a omdan apan  theihtheih hi. Ka lungsim ah thil tampi a hong lut a, ka ngaihtuahna a paisau mahmah mai hi. Ka theihlouh kal in ka mit a kipan ka mittui hong luangkhe kha a, Nenem' biang ngek ngiingei dengsuk ahihman in a mit hong hakkhia in lamdang satak mai in hong en a, himahleh bangmah genlou hi. Keibel ka lungsim paisau lua ahihman in ka mittui pawtlam ka phawkzok kei a, ka-ang a Nenem om ahihlam bel ka haihkei hi. Ka phawkphet in ka khut langkhat in ka nulpah popop hi.

Nenem leng hong tutang tou a, ka gei-ah kihei khephei in ka khut langkham a khut tegel in buptuah thinthen hi. Tomcik zoh in kei kianglam ah hong kihei a...........
"Uu......." ci in kamnem tak in honsam a, a gawl bang hong khuah thak zawzen a,

By: M Liankhansiam | www.thaikawitongluan.com

PART 2

Add comment


Security code
Refresh

© 2017. Thaikawitongluan.

We have 21 guests and no members online