Exclusives

MOBY DICK - II

MOBY DICK

www.thaikawitongluan.com

BUNG II

A pathian lim a puanakpi sakhau a aguan lut zoh in lupna lam zuan in hong kithawi phei hi. Ana houpih a, kimeltheihtuahna bawl ding kana sawm hi. Himahleh ka paukhiak ma in sing a kibawl buuk hi awmtak khat a hon la a, a kam a koih in nawtkuang in a hon hal hi. A zoh in dum hon la in a buuk sung ah hon guang a, a hon tep panta hi.  Huchih hun in lupna hon neh mahmah ta a, himahleh kei om kahihlam a hon thei naikei. Amah houpih hoih zaw hi a ka theih ziak in ka houpih hi. Ka houpih tak in lamdang sa lua in hong tawm dek zozen hi.

A buuk bang keilam ah a hon vaiphei a, a huchih nalam in a am te lupna  tung ah hong kithehthang zomah a, a kat di kana lau mahmah a, lupna tung apan ka tawmkhe tou hial hi. Amah leng a heh mel mahmah a, hon kikou khum toh phun numnum hi.  Kei hon khoih sawm sa in konglam ah ka taipawt a, inneipa sap toh ka thuah hi.

Vangphathuai tak in inneipa pindan ah a hong tailut a,"na lauh ngailou ahi tangvalpa aw. Bangmah hon loh lou ding ahi" chi in hon gen hi. Huchi in thalkaptu sam in, "Queequeg, hiai tangvalpa'n na pindan zan nih hon kikoppih sawm ahi. Na ut hia?" Chi in a dong a, aman leng theihsiam chi mahmah a, kei toh pindan kikop ding ah buaina neih chilou hi. Huchi in a buktep hon sunzom in, lupna a lum ding in  a hon hilhbawl hi.

Thalkaptu ka en a, mikhel hilou ahi chih ka mukhia hi. Mi siamtak ahi chih ka thei a, lupna a hon muh phut mawk pen in kiguihsak lua ahihman a huchi kha ana hizaw hi. Himahleh lupna a buuk a tep pen, denchiang a meikang omthei ahihman in hoih kana sa kei hi.

Inneipa kiang ah, "amah toh pindan kikop poi kasa kei. Himahleh lupna tung a a buuk tep pen koihkhe ding in sawl in. Denchiang a a ek lengkhia khawng apan meikang a om ding lauhuai sa kahi" chi in ka gen a, aman leng ka lauhna te mipa' kiang ah gensawn hi. Huchi in mipa'n leng sawtpi a huup kuaikuai khit in a buuk koihkhia a, nuisim heuhau kawm in lupna a lum ding in hon mitsai hi. Amah leng a hong lum a, kei a ding in mun lianpi a hon awn a, ka thoveng deuhta hi. Huchi in inneipa mangpha ka khak a, pindan nawse ding in ka hilh hi. Mipa'n leng ka poi hon khoih lou ding ahihdan latsakna in a hon nuihsan cheuh nawn hi.

A zingnawn in kei thohma in Queequeg ana thou a, kei ka khanloh tak in kei kia a pindan a thovengtak a ka om theihna ding a amah pawtkhe masa ding ahihdan a gamtat in hon langsak hi. Kei amah tung a ka siamna zah sang a amah kei tunga siam zaw ahi chih ka mukhia hi. A kisak kawm in hoihtak in a gamtat dan kana enzui hi.

A amasa pen in a lukhu hon khu a, a khedap bun ding in a kawm deuh naih ngai ahihman in lupna nuai ah bun in, a puanak silh in a khekol hon teng in. Huaiteng zoh in a mukmul hon kiat a, a mukmul kiat dan tuam deuh hi in ka thei hi. A mai teng sahbon in hon nuhphuan a, a thalka' tang pen lakhia in, a boot ah tathiam chihdan in a hon tat a, huchi in a mukmul metna ding in hon zang hi.

A thalka tang/blade pen mukmul metna ding a azat theih pen lamdang kana sa mahmah hi. A khonung in tua thalka pen hiam tak a kikoih, a poimohna munmun a zat theih dinga a bawl ahi chih ka theikhia hi.

A hong mansiang tak in pindan a nawsia a, kei kisak hun a hita hi. Awl in ka thoukhe hiauhiau a, annekna pindan ka tun in zingan ding ana kithuk manta hi. Kei ngaihtuah dan in ngabengten a thiltuah tekhawng uh gen a houlim ding uh ka sa a, himahleh dai khipkhep in an a ne uhi. Queequeg in a bawngsa tang te nekna ding in a thalka a zang a, gilkial chi tak in a nelut zungzung hi. kenleng ka tutna ding la in zing an ne ding in ka tusuk ta hi.

Annek khit in miteng in pindan a nawsia ua, kei toh Queequeg chauh ka omkha uhi. Laibu khat a la a, himahleh sim lou in a pek a sim tuan zihzeh hi.

A mai geih a tu kahihman in a gamtatdan lamdang kasa mahmah hi. "Bangziak a ngakaptu dangte toh kithuah lou a hi dia? Bangziak a huntam zaw amah kia a zang a hi dia?" Thil tampi ka lungsim ah a hong suak a, a tawp in a dawnna ka thei ta hi. "Bangchin aman hiai mikhual dangte lak ah lungmuang tak in a om thei dia? Amah gamdang mi, a inmun aman mel 20,000 val a gamla a om hi a. Leitung apan Jupiter a gamlat bang a a omna leng a tenna gam apan gamla hiven" chi in ka ngaihtuah khia hi.

Amah ka et lailai in amah kia a om nuamsa ahihdan ka mukhia a, amah kia a om nuamsa leh kipah mel hi in ka muthei hi. Amah ngaihnatna ka hon nei panta a, amah toh kilawmtakna hoihtak bawlkhiak theih ding ahi chih ka hon theikhia hi. Huchi in amah ban geih ah kava tu a, amah toh houlimna pat ka sawm hi. Amah leng kei lam a hong kihei in, "tunitak pindan hon kikoppih ding nahi hia?" Chi in hon dong hi.

Kikoppih nawn ding kahih dan ka hilh tak in amah leng kipahmel mahmah hi. A laibu et a thu leh milim omte bang genna hi hiam chih khawng ka hilh a, huchi in aman leng kei toh om nuamsa ahihdan ka theithei hi. "Na buuk tep ni" chi in ka ngen a, aman leng hon lakhe pah in, dum khawng hon guang a, ka kitepkhel uhi.

Huchi in lawmta hi ding in thuchiam a hon bawlpih a, ka kawng a hon len in, kei tal leh amah tal kisutuah phial in a hon neh hi. "Kiteng ta ihi" chi in ka bilbuk ah hon huau siausiau hi. Huai tuh amau gam dan a lawmta hoihtak hita ihi chih latsakna ahi hi. Huaibanah, a poimoh leh kei hon hotkhiatna ding a sih leng poisalou leh si ngam ding ahihdan hon chiam nawn hi.

Hiai bang a baihlam tak a kichiamna a bawl pen kei a din thil thak ahi a, lamdang kasa mahmah hi. Bangziak hiam i chihleh, America lam ah tua bang in kihih ngeilou hi. Queequeg ahihleh lungsim siangthou leh mawltak a gamtang leh ngabeng mi ahi. Dakkal bangzahhiam nung in ka pindan sung uah ka tu ua, a buuk khawng ka tep uhi. Huchia ka omlai un thilpiak khat a hon pia hi. Huai tuh bang hiam i chih leh, zan a  a khot zohlouh lu pen ahi hi. Kenleng a hon thilpiak ka pomsak pah a, lauh leng ka lau nawn kei a, maingal tak in ka tawi ngam hi.

Huai zoh in sumsik 30 vel hon lakhia in a hon pe nawn a, huai pen bel ka sang utkei. Himahleh ka sakhau sung ah hon guan sak teitei hi.

Sawtlou ka kihou khit nung in a milim pathian hon lakhia in be din hong kisa nawn a, kei leng hon zawn hi. A bultung in ka utkei. Khristian kahi a, bangziak a hiai milim pathian be ding kahia? Ka sakhua sinsakna toh leng kikalh ahi" Chi in ka ngaihtuah hi. Himahleh nihvei a hon zotna in bel, va biakpih ding lem ka sata hi. "Pathian Tungnung pen in tuh hiai milem neuchik a thik kei hial ding. Banah, hiai milem be lengle a heh kei ding. Pathian in, mi'n ei tung a a hih ding uh i deih bang a en mitung a hih ding a deihdan hi a. I mihinpihte lungsim leh ngaihtuahnate leng i zahtaksak ding hon deih ahi" chi in ka ngaihtuah hi.

Huchi in a kiang ah ka va pai a amah gei ah ka va tu hi. Aman a kithoihna mei ana hal khinta a, huchi in ken leng tua mei hal in, sangthem tuh kithoihna ding in ka hal sam ta hi. Milim mai ah ka kun nawn a, huchi in biakna ka zoh un lupna lam ka zuan ua, ka lum uhi. Ka nih un ka tawl tuak ka hi ding ua, ka ihmu suk pah uhi. A zingnawn in ka thoupah ua, Queequeg in leng amah tanchin a hon hilh hi.

"Kokovoko ah ka piang a" chi in a hon gen pan a. "South Pacific a tuikulh gam lianlou khat ahi. Huai tuikulh gam ah ka pa kumpi ahi a, ka paneu tuh siampu lian ahi. Ka pa a sih chiang a kei a thakheng a kumpi a tu ding kahi hi. Himahleh huai ma in Khristiante tenna gam ka mu nuam hi. Ka nam ua ka tawndan luite uh leng khenkhiat ka ut hi.  Huaiziak a hiai a om kha kahi.

Lettu: Kattie Mawite © thaikawitongluan.com

Add comment


Security code
Refresh

© 2017. Thaikawitongluan.

We have 4 guests and no members online