Exclusives

MOBY DICK

MOBY DICK

www.thaikawitongluan.com

BUNG I

Kei' min ahihleh Ishmael ahi a, Manhattan, New York ah ka piang hi. Skulpu na sem in nekzonna in ka zang hi. A khen chiang in ka kingaise sek a, ka hinkhua ah lungkimlouhna ka hau thei mahmah hi. Huchi in ka nasepna ka khawlsan a, tuipi tung ah sawtpi tak kava zin hi. Tuipi ka ngaina a, tuipi tung a khualzinna in hon kipaksak mahmah hi. Ka lungkimlouhna leh kininna teng tuipi tung a ka om chiang in bei vek zel hi.

Pupa tawndan ngeinate dan a khualzin ka hikei a, longpu dan a zin ka tel zaw hi. Ka zinman leng piak ka sawmkei a, a hitak in, kei hon leh piak le uh chih ka utdan ahi. Huaiziak in ka zinna long ah ka sem kawm hi. Ka zin masak pen apan ka chindan ahi. Ka pianna khua Manhattan, New York a kipan ka paikhiak chu kum masa a hipan hi. Khualzinmi kithalawp tak kana hi gige. Gam gamlapi muh ding kana lunggulh gige hi.

Tuma zek in nakpitak a kingaihsiatna in a hon tuam a, ka nasep khawlsan a tuitung a khualzin ding in ka lungsim ka khentat hi.

Sumdawngte zat longpite a pai sang in ngapi(whale) benna dinga a zat uh long te a pai ka sawm hi. Tua ngabetna long tuh a ngabetna munpi Nantucket apan kipankhe ding ahi. Nantucket ahihleh Massachusets pel lam a om tuikulh gam khat ahi. Nantucket ka tunna ding in Bedford ka tun masak ngai a, huai apan puum in Nantucket kitung thei hi.

Kiginni zing khat, Bedford zuan in ka zinkhia hi. Huai tuh December kha ahi. Bedford zanlai in ka tung a, khua a vot petmah hi. Longkhawlna ka tun in, Nantucket a pai ding puum nanung pen dakkal kimkhat paisa a ana paikheta ahihdan a hon hilh uhi. A zingchiang lah pathianni ahihman in puum pai aomkei dia, a baih pen a thohtanni ka ngak a ngai hi. Huaiziak in khualbuk a zan nih ka tam louh theihlouh a hong suak a, ka sumsenna leng kibehlap ding suak hi.

Khualbuk thupi taktakte naih zoulou kahihman in lamdung khawng a khualbuk a man niamte ka vialzon hi. Khua a vot petmah. Ka paizel a, khualbuk leng bangzahhiam ka peipel hi. Himahleh a man tou ngen ahihman un ka zuan kei hi. A tawp in khualbuk lui leh semahmah khat, Spouter Inn Peter Coffin chih kitak, a kitak leng ke phial leh sawi deidoi ka mu hi.

A mel et in nopchi kei mahleh ka vaklut hi. A sung tuh muh mai in leng a lungnop huai het kei. A bang khat ah long tum lim leh ngapi lianpi lim a kitak hi. A bang langkhat ah galvan/vanzat tuamtuam thal, teipi, hei leh nga kapna leh a tuamtuam a kikhai lemlum hi. A zu zuakna mun lam lutna lampi tuh ngapi ha bang in a kibawl hi. Zuzuakna mun tuh pasal upa tak khat in a ngak hi. A dinna mun tuh tua ngapi ha lauhuai tak sung a ding a bang hi.

Khualbuk ngaktu kiang kava naih a, "Mikhat luptheihna pindan, zannih giahtheiha ding deih ka hi" chi in kava gen hi. "Khualbuk awng nawnlou ahi. Himahleh mi toh lupna kikop na ut aleh bel, ngapi kap zel khat toh lupna nih pindante a omthei ding" chi in khualbuk ngaktu'n hon dawng hi. Huai hunlai in bel mikhual toh pindan kikop chih thang mahmah hi.

Himahleh ken huai ngakaptu toh pindan kikop ding ka utkei. Huai thal kaptu toh pindan kikop ding tuh lauhuai lua in ka ngaihtuah hi. Himahleh a didan dang om tuanlou ahihman in a tawp in pindan kikop ding lem ka sa mai hi.

Ka pindan kimkhat zatman ding ka piak khit in nitak an ne ding in ka tu suk hi. Ka nekkhit in thalkaptu kana ngak a, ka ngaihtuahna ah tua thalkaptu theihngeilouh toh pindan kikop ding ka lungsim a nuam  theikei  hi. "Huham mel mahmah khat hi ding ahi" chi in ka ngaihtuah hi. Dakkal nih mahmah ka ngak nung in leng a thawm zak ding a om naikei. Ka dohzohna in a ban nawnkei a, khualbuk ngaktu kiang a va pai in, " amah bangchik chianga hong tung ding ahia? Vot ka sa a, ka om leng a nuam kholkei.  Ka hong paina gamlat ziak in gim leng gim lua kahi. Ngakzou nawnlou kahi" chi in kava gen hi. "Heutupa, amah atangpi a hong tungbaih ahi. Bangziak a tuni hong zekai hi hiam  chih ka thei kei. A lu te khawng gai nailou himaithei ahi" chi in hon hilh hi.

A gen zakhial hi ding a ka kigintak ziak in, "bang e na gen? Aman bang e a zuak?" Chi in ka dong thak hi. "Lungmuang in. Hiai thalkaptu New Zealand gal lam a Simlam Tuipi lam a hoh ahi. Huai apan in lu keu sa tampi hon paw zel hi. Lamdang tak ahi, himahleh huai lu te zuakbei vek zel ahi. Khat chauh khotlouh a nei a, huai hon zuak sawm hi ding ahi. Tuzing in, mi pathianni a kikhawm ding ua, zuak hak ding ahi chih ka hilh sa ahi. Hilele tuni a zuakbei teitei a sawm a" chi in hon dawng hi. Hiai thu ka zak tak in ka lau petmah a, chizau huai kasa hi. "Bangchi dan a hiai mihing lu zuakpa toh pindan kikop thei ding? Amah mi lauhuai pi hi ding ahi" ka chikhia hi.

"Aman khualbuk zat man a hunhun in a pia a, huaiziak in amah toh kisai ah buaina ka neikei" chi in inneipa'n hon gen hi. Mombati khat a hon de a, "hon zui in. na pindan ding ka hon hilh ding" chi in hon sam hi. In sawngtung lam ah ka zui a, pindan neu leh vot dekduk ah hon pilut hi. Tua pindan laizang tak ah minih luptheihna ding lupna lianpi aom a, mi li bang nuamtak in kilum thei ding hi. Banah, van bawm leng a om a, singtutna ban nei leh van koihna ding dohdan leng a om hi. Pindan ka envel a, thalka khat lupna kiang ah a om a, ban ah thalkaptu' sakhau leng a gei ah a om hi.

Lupna lam zuan a ka pai in inneipa'n pindan a pawtsan hi. Hun bangtan hiam nuam salou tak in ka om a, kei kia a om ding bang ka lau hi. Sawtlou in nung lupna ah ka lum a, sawtlou nung in ka ihmu suk ngal hi.

Dakkal khat ding vel zoh in kalsuan ging ka za a, a ging bukbuk hi. Tua kalsuan ging in a hon naineh deuhdeuh a, ka pindan sung ah vakzung hong lut leng ka muthei hi. "Thalkaptu hi ding eive" chi in kana ngaihtuah hi.

Dai dide in kana lum a, thalkaptu leng a hong lut hi. A khut ah mihing lu a tawi hi. Chizauhuai tak ahi. Ka naksam phial. Thalkaptu tuh a sakhau koihna lam ah a paiphei a, a lu tawi tua sakhau ah khesuk hi.  Tupi tung a a silh puanakpi suahkhia in tutna tung ah dengphei hi.

Huai hun tan in a mai ka mu naikei. Kei lam a a hong kihei tak in ka laulua a, a mel chizauhuai petmah hi. A vun a vom dup a, a mai teng a gial lepluap hi. Huai zoh in a lukhu a hon lakhia a, kei lauh nakkal in, a luzang ah sam tamlou, saupitak a hawi a, a lu mundang ah bel sam a pou kei. A sam omlouhna te ah a luguh kia dawk a bang hi. Ka lau petmah a, taimang bang ka ut hial hi. Himahleh thalkaptu kei leh kongkhak kikal a ding ahihman in ka taikhe theikei hi.

A dai thei tawp in kana lum a, a hithei tan in amah ka en a, theihchet sem ka sawm hi. Ka mit leng amah a pan a taikhe kei. A chi pumpi ah leng pawn lian pipi a dim in a om hi. A khe ah lim a kigelh a, tua limte tuh ukeng, tum sing bul a tawm lim ahi hi.

Tua mikhualpa tuh tutna lam ah a paiphei nawn a, a puankapi sakhau apan in milim neuchik khat hon lakhia hi.

Huai tuh pathiannu ahi. Huaizoh in mombati hon lakhia in, sang them neuchik leh sing them khutdim ding hon lakhe nawn hi.

Tua singthemte hon hal a, kithoihna mei hon de in, tua pathiannu lim pen a mei gei ah koih hi. Huai a hih kawmkawm in phui sam kawm hi. A phuisam pen theisiam kei mah leng, tua pathiannu bia ahi chih ka theithei hi.

Ka thil muh in lamdang sakna in ka pumdim. A khen chiang in ka mit phiat ding bang ka mangngilh hial sek hi. Huchibang in minute sawm ding khawng a pathiannu hon bia a, huai zoh in lakhia in a puanakpi sakhau ah guangkik nawn hi.

Lettu: Kattie Mawite © thaikawitongluan.com

PART 2

Add comment


Security code
Refresh

© 2017. Thaikawitongluan.

We have 19 guests and no members online