Exclusives

JULIE, AW JULIE… (Complete Story)

JULIE, AW JULIE…

thaikawitongluan.com

 

 

 

 (I)

A ni leh hun chihte ka na chiamteh detdet kha vek kholkei. Poimoh khonung ding ahihlam leng ka na ngaihtuah kha ngei kei himhim. Himahleh huai ni omlou hileh hichitel a lunggimna ka damsung a tuakkha lou ding hi’ng a…

Lamka khopi pansan a phattuamngaihna nasem a hong omMedecins Sans Frontieres (MSF) kichite pawl in driver khat hi ding a hon lakna uh sawt nailou ahih toh kei leng hoh ding a hon sawlna peuh uah ka kilawp thei mahmah hi. Kei bang a laisiam lou leh sum neiloute a ding in Manipur ah sorkal nna muh ding kinepna om manglou hi.Sepaih khawng bangle chizen peuhsetna hang a zaw sum mah ngaisak ua, i mi neih louh toh kinepna tawm lua e. Hiai driver nna ka muh zenzen bang leng kei a ding in bel van apan athawn a hong kesuk van-manna hi in ka ngai mai hi.

“Imphal International Airport kichi na theina maw?,” ka heutu khat un hon chi a, “Huai Imphal khopi i lutchil ahi,” chih toh hon thuah hi.

“Huai khatvei a mi i va pina kha hilou maw, Sir?,” ka chihleh, “Yes,” hon chi chat hi.

Dr. John bel ka Sir-te uh lak a hou nuam ka sakpen hi a, ka khosakna niamdan hon theih luat ziak in hon deihsak kholdiak hi in leng ka thei hi.

“Nang chauh a na va pi ngai ding ahi aw. Tuni a hong tung thak ding pen US apan ahi a, amin Julie ahi. A hong zin patna ahihman in hoihtak leh pilvangtak in na muak ding aw.”

“Awle, Sir.”

Zingkal dak kua lap ding in Imphal zuan in MSF-te gari Bolero thak liklek in ka taisuk hi. Hattai sim ka diam ah dak kua ginna’ng minutes sawm-le-nga in a sap in ka tung khinta hi. Awl a gari koihna munawng khat ah ka koih a, ka mi dawn ding muak ding in Airport tung a Arrival chih kigelhna lam ka zuan pah hi.

Akong ka tun in “Dr. Julie” chih kigelhna lehkha hon tawisak pen uh zalhkhia in, a mi mukha ngei nailou ka hihman in lametna toh hong pawtkhe teng ka na lak daudau ban ah a melte uh ka na enzui dandan sek hi.

Mi tamkhop hong pawt zoh nung un leng amah hong dawk ngei mawngmawng kei a, houh hong zin lou thak hialeh chi peuh in ka ngaihtuah mawkmawk hi. Lungke simtak in ka om a himahleh kiksan mawkdan om lou ahihman in ka ngak lailai a, mi hong pawtkhe ding bang leng kamsim man hial hi. Mingak a ding sam midangte bang a midawnte uh toh kipak in paikhe siausiau ua himahleh kei ngak pen, abangchi tuamse adiam ah hong dawk lou nilouh mawk hi.

Dak bangzah gingta ahia chih leng ka thei kei, ka lungke dimdem simta hi. Ka phone bawlsak pen a zoh man nailouh ziak un inn lamte’n lah hon call thei lou, ke’nlah amau call thei samlou in ka om hi. Ka Sir-pa’n zekai hon sa lua a hon hehsan khak ding bang ka laugu mahmah hi.

Ka dinna mun ah ka lai tawi toh kei kia ka omta a, midang ka kiim a a om nawn louh man un zumhuai bang a bangsim hial hi. Mi va dot ding chih mawklah Meitei pau malkhat lel leng a theilou bangtukka hihman in kipaukhe ngam vuallou hi.

Atawptawp in, mingoute nungak upat chisim mahmahta khat kongkhak ah hong pawtkhe khong a, ke’n leng ka lai tawi pen ka liksang tou pah hi. Agal ah ama’n leng ka lai liktouh ana mu pah ahingei ding a nuihmaitak in om hi. Ke’n leng hong tung khongkhongta eive chi in amah lam ka va zuan pah hi.

“Dr. Julie maw?,” chi in nuihmaitak in ka na houpih pah hi.

“Hilou. Christine ka hi,” hon chi daih a, mak ka sa mahmah hi.

Kei lamlam leng hon phawk chi nawn lou in, maingaltak in om a, ka lungsim ah ‘hiai minu chu Imphal hong zin mun mahmahta hi deive kuamah dawn leng ngailou’ ka chi hi.

“Huihah! Khatvei kisa thak nawn awle,” chi namnam kawm in kongkhak lam ka en nawn hi.

Puanngou khat a a lu khuh a, mit hah nemnoungingei, dum kikiai nungaknou, taksa ngou-san siang hinhen a kikhai nalh huntawk mahmah, kei sang a leng naupangzaw di’a ka gintak khat hong pawtkhia hi. Denchiah houpih khial kha zel ning chih lauhna toh ka na et thoh mai a, himahleh amah ana hihkhak zenzenleh a muh pah theih ding chi in huai min kigelhna lai ka tawi pen chu ka liksang tou zawdeuh hi.

Kei lam hon zuan a, nuihmai leh nunnem melputak in, “Hello, Pau. It’s me, Julie,” hon chi hi.

Eh, khai! Maimah! Ka min bang hon thei a chi in, a mel bang a siat khol louh toh ka zumsim mahmah mai a, Sir John chihdan a ka na muak ginat khak louh man in ka kisuanglah mahmah hi. Kei kia a va dawn ding ka hihman a Sir John in ka min leh limlak ana khak khin vek hi dingdan eive ka chi lungsim hi.

“Hi,” chih teng lel ka gen thei a, ka dangtawng bang binggawp hileh kilawm in ka paukhe thei kei lelaw maimah hi.

Hmnn. Gen ding pentak bangle theih louh toh, amah mu nuamlua hinapi en ngam zezen lou in ka om hi.

Ka khut a a van tamlou puakte la in trolley ah ka koih a, huaizoh in pau lou himahleh nuihmai leh zumkawmtak in ka khut taklam in ka gari omna lam manoh ding in ka kawkmuh hi.

Airport sung a mi om tengteng in kou hon en ahi de-aw chih theih hial ding khop in kou paina lamlam ah a lu uh hon hei sauhsauh maimah uhi. Nuam zezen. Haha…

Gari a vante ka guan zoh in ka taipawt ua, Malom khua tawn in Lamka lam k’on zuan chenchen pah uhi. A hong pawt phet a ka kihoutuah uh chih louhngal hiai hun tan in bangmah ka kihou nawn tuankei uhi.

Mi melhoih i sakleh kizahtak a chih uh thudik mah ahi chih hiai ni chiah inchu ka theichian thakthak.

Ka omdan maksa ahingei ding a hon dong a himahleh ke’nlah ka nuihsan thoh zel hi.Lampi lah selua ahihman in kising nungnung a, gari ka hathekngam kei uhi.

Bishnupur ka hong tuntak unchu, sawtsim tukhawmta ka hih ziak uhle adiam ah ka neel sim panpanta hi.

“Huai a kizuakte hiai khomite’n soibum a chi ua, gawtuai apan kibawlkhia ahi,” chih toh nuih vemvum ka thuah guih kha mawk hi. Ama’n leng zachiang chiah lou ahingei ding a hon dong thak a, gen ut nawn kei sim mahleng hon dong thakthak ahihman in ka gen thak a, ama’n thei ngeilou ahihman in ka hilhchet nilouh bang hong ngai hial hi. Huchia ka houlimlimna lam uah ka hong kinel gawp khong ua, kei leng hangsan gawp in ka houpih zatzat ngamta hi. Ahitak in amah ka neel theihtheih ding a om ahi chizaw leng a dikzaw lai maithei.

Gamdangmi Imphal International Airport a ka va pikhak tengteng lak ah Dr. Julie lamdang ka sapen lai hi.Midangte bangloutak in, nidang a kitheisa hile ung kilawmtak in hon houpih ziahziah mawk hi. Lungsim neu chepchup nei mi leh mi simmoh a muhsitna lungtang neimi ahi kei ding ka chi ngam topmai hi.

Moirang ka tun un, nidang a leng huchi a kikhawlsek ahihman in gari ka khawlsak gaih a, kisuanglah selua in, “Bang nektheih ka va lei di’a?,” ka chi kha lai zang hi. Ama’n leng lamdangsa hileh kilawmtak in hon en heuhou hial a, ke’n leng theikhe thak in, tuikenuih vemvam kawm in gari ka hingsak thak a huchi in Lamka lam manoh in ka tai sunzom nawn uhi.

Lamka ka tuntak un Red Cross Road a ka Office uah ka pai phot ua, huai ah Dr. John in Dr. Julie kipaktak mai in ana muak hi. MSF a sem dangte leng hong pai in Julie hong chibai sauhsauh ua, amah min in hun saulou zatna ka neih ua huai ah ama’n leng report banghiam om ziak a Airport sung a sawtkhop a hentang thu uh khawng gen hi. Huaite zoh in Dr. John in amah gari a amah dendeuh chiang a hong pai ding a chih ziak in kei chauh in Dr. Julie chu a tunna ding a kikhaamsa New Lamka a om Venus Hotel ah ka va kha hi.

Hotel ka tun un a vante leh sai dingte ka saipih theihtheih ka saipih a, a pindan ding tan kha di’a hon chial man in ka va kha hi. Himahleh ke’n bel amah leng hilh masa sese lou in ka kiksan pah mai hi.

Hotel apan ka pisa lam uh ka zuansuk a, New Bazar ah ka nu hon thukhah zawngtah leh ankampak ka lei malam a huaizoh in ka phone bawlsak ka va la hi.

A zingchiang in a tunna Hotel apan Dr. Julie ka va pi a, ka pisa uah ka paipih hi. Mata khua leh Lingsiphai khua a hun kibang a Free Medical Camp neih ding chih ahihman in seh nih a ka kikhen uh ngai hi. Khua ka tankhakna va kan ding a Dr. John pindan ka lut dekleh Dr. Julie toh ana kihoulim hoihlel laitak uh ka tuakkha a, Dr. John kiang a Dr. Julie in banghiam nget nei ahi chih ka simtheih hi.

A kihou zohtak un ka lut a, Dr. Julie in kipahmeltak in, “Mr. Pau, kei team a nang omkha na hi aw,” hon na chi gaih a, ka liang hon betsak khakhauh hi. Ke’n leng poisa ngel lou in ‘kipahhuai e’ ka chisuk pah a, himahleh Dr. John mel ka etleh a nuihdan chu lungkim zou chiah lou bang ka sasim hi.

Sir John pindan apan pawtkhia in ka gari tui khawng thundim in, vante khawng guang in ka kisa hi. Julei in ka gamtatdan hon na enzui guden ahi chih ka Sir-pa pindan lam ka etkhak phet in ka thei pan hi.

Lingsiphai Team pen Dr. John leh Dr. George in makaih ua, Mata Team ahihleh Dr. Julie chauh in makaih hi.Dr. Julie in gari dang la tuanlou in kei gari heek pen ah hong tuang hi.

MSF pisa apan New Lamka lam ah ka taitou ua, hiai hun in ke’n houlim ka pan hi.

“Dr. Julie,” chi a ka sap patleh ama’n kintak in, “Julie. Julie chih kia in hon sam in,” hon chi gaih a, nui seisai hi. Ka nung a tuang eimi nungak nurse nihte bang hong nuikulh hial ua, kei leng ka kisuanglah thak zezen hi.

“Mr. Pau, nang a hoihna leh thilhihtheihna om a hon mu ka hi,” hon chi phut a, kuamah hon chih ngeilouh kampha ahihman in lamdangsakna toh ka kiguih hial hi.

“Chihchuh?,” kigukpah sim leh nuihkawm heuhau thuah in ka chi hi.

“Hmnn. Na kiveidan leh kampau dante fel a, na lungsim leh khuak kin dingdan i houlim chiang a mankhe mai ka hi.”

“Kipahhuai hina e. Hilehleng hon theikhial na hi, Dr. Julie aw. Kei kha siamna leh pilna bangmah neilou mimawl ka hi.”

“Siamna-pilna na chih bang ahia?”

“Medical lam toh kisai ah zilna ka nei kei a, gari heek leh bawl khawng maimai hihthei nimnem ka hi. Siamna-pilna zil sawm himta lengle lai theilou ka hi.”

Hiai thute va genkhiat phut mawk zumhuai bang ka sakik thak sim a hilehleng ka hihna diktak mah hilelven chi in ka kihehnem thak hi.

“Ke’n medical lam ka thei a himahleh gari heek nang tuk in ka siam kei a, gari leng kiseleh ka bawl thei kei ding.”

Hon dawngbing bang ka sa a, gen ding tuan ka thei kei zezen hi. Ka nung a tu nurse tegel leng thuduh kisa in amau houlimna bang khawl hial in kou houlimna ngai deda uhi.

Julie hong pau zom nawn a.

Siamna leh pilna kichite khuak a om ahizaw. School leh college a siamsinnate a hoih in a phatuam mahmah himahleh huai a va kai a va zil chih kia siamsinna hilou ahi. Enve, laisiam tampi khuakbul na thei voi maw?”

Huai thute a gen zoh in nui lualua a, ka veilam liang hon betsak khauhkhauh kawm in, “Ka nasep leh nekzonna in mi phalou hiam niamlua chi hetke’n. Driver om lou hileh na Prime Minister-pa uh amah gari a kiheek ngai ding ahi. A garihekpa lel leng a simmoh thei tuan hetkei ahi.”

A thugente ka zaknop lam hikha houh adiam ah, nuam bang ka sa a, driver hih bang ka na zumsek himahleh huai ni sun nitum ka nasepna zumpih hetlou in ka om thei hi.

Mata khua a damlou chi tuamtuamte hon ban et ua, kei bel anawl khat a ana tu in i Toupa Jesu Khrist damlai a natna chiteng a hihdam lai hun a om dingdante ngaihtuah in ka na buaizen hi.

Ninem lam in ka kik ua, lamkal ah Julie in hon houlimpih nawn hi.

“Tunitak ka tunna Hotel a n’ong khak chiang in ka theih louh in hon na kiksan mawk ke’nla, kei ka hong kisa di’a ka man chiah nou inn a hong pawt ding ka hi.”

“Bang e?!”

“Tunitak nou inn a na sungkuante toh nitakann nekhawm ding i hi uh.”

Nuihmai mahleh chihtaktak melpu kawm in hon chi a, a dawn kik dingdan bang ka thei zok kei zezen hi.

“Mihai na maw! Dr. John in hon theileh ka sepna apan kei hon tawpsak ding ahi aw.”

“Ka thei. Hilehleng ka hong pawt ding a ann ka hong ne thouthou ding. Na sungkuante tunle phone zokve.”

Ama’n lah poisak chi mahmah lou. Seelseel mahlengle phatuam lou ding abang hi. Atawp in ka sungkuante phone ding in ka Nokia black and white ka lakhia a, ka call hi. Julie in hon na enzui den hi.

“Ka sungkuante kiang ah na hong hoh zual ding thu ka genkhinta a, ann bel na hong ne thei kei ding.”

“Bangziak? Ann hailaw ding hon sa na mawleh?”

“Eh, hilou hial!”

“Chihleh bangziak?”

“Koute ann nekdan leh meh-le-buhte na theikei. Alianzaw a gen in, ka inn uhle…”

Om dingdan bang ka thei kei a, ka gari heek bang leng ka hihkhial kha dekdek hial hi. Julie in ka inn uh hong pha taleh ahoih louhdante leh ka khosakna diktak uh hong mu di’a, hon simmoh zaw ding hivaw chi in ka ngaihtuah hi.

Pisa ah vante va koih in, huaizoh nurse tegel a inn tuak uah ka va kha hi. Dr. Julie in hon call a, kei mahmah in a Hotel a ka va khak ding in hon gen hi. Dr. John ngaihdan ahi hetkei chih ka guk theih a nuam ka sa kei a, ka kisuanglah petmah hi. Mi piching ahihman in a pautam kei a, poisa lou abang chihmanthu hi a.

Venus Hotel vak phingpheng muh in Lamka khopi thupina sulang ka sa a himahleh denmah chiang a kou inn a kawlphemeivak leng omlou a putawn de a om ding chih ka ngaihtuah chiang in i tenna gam khantouhdan kilual lou ka sa lua hi.

Julie hong mantak in, linpipi in kou inn lam a pai ding in Gangpimual lam ka zuan uhi.

(II)

Thangdong Veng lutna bul ka tun uleh kawlphemeivak lah om gina nawn lou ahihman in Julie hong dai dide a, lausim hi ngei ding in ka gingta a ka nuih bang ana zasim hi. ‘Na theita maw, hong hoh ding na chi teitei a’ chih khum gaih bang ka utsim a himahleh huailah thil kilawm ahi kei. Amah patauh guukna pen a thei lou bang in ka omsan sukmai hi.

Gari tai theihna tan ka tai nung un Lanva Lui toh kinaihchik a om inn neu leh kawchiktak khat omna lam khe in ka zotpih hi. Amah gintak sangmah a leng ka inn uh kawmzaw leh kawchikzaw ahi chih a theih chiang in gen ding pentak leng a thei nawnkei hi. Innkong ka tuntak un ka nu ka sam a, khua mial lawsimta ahihban ah khua niim demdom a mial ngeingoi maimah ahihman in putawn hon tawipawt ding in ka ngen hi. Julie in leng amah mobile lakhia in hon vaksak keukau hi.

“Nu, hiai ka heutu thak uh zan a ka va pi ka chih pen ahi,” chi in ka hilh a, huaizoh in, “Julie, hiai ka nu ahi,” ka chi nawn hi. Ka sungkuante ka chih ding midang om tuanlou ahihman in anuam chiah kei a, ka pa bang ka ngaihna hong puan ban ah sanggam khat leh nih beek nei hileng ka chi mahmah mai hi.

Ka kongkhak uah kunsa in hong lut kul a, a mial mahmah innsung ah ka tutna neih sunsun uh singbek a kibawl tutna nih omte lak a khat ah Julie ka tusak uhi. Amah a di’a huai singtutna pen a niam luat man in a khuk sandan kilangchian diak in ka thei. Ka nu lah mimawl ahihman in houpih ut mahleh houpih thei lou in om a, kipum suanlah gai in a sep leh hih ding pen leng thei lou in om tengtung hi.

“Inn nuamtak na neive uale, hoih e,” nui kawm in Julie in hon chi hi.

“Kipahhuai lua,” chi in ka dawngkik a, nuamzaw sa kei hial niteh ka chi lungsim hi.

Mingoute nek ding bangmah bawlkha ngeilou ahihman in ka nu’n bangmah bawlsa a ana koih thei lou ding chih thei ka hihman in bazaar a ka lei apple leh nahtang ban ah Julie nek theih ding chii deuh chi a ka leite ka nu ka pia a, dendeuh chiang a Julie nek di’a hon luikhe di’n ka hilh ngal hi. Ka lungsim in Pasian kiang ah kipahthu ka gen a, “Aw, Pa Pasian, zanzek a ka Sir. John uh lungtang a ka thuman ziak a deihsakna hon pe di’a nna Na hon sepsak ziak a deihsakna sum hon piak man in tuni in ka zahlak kei. Pa aw, Na min siangthou phat in om gige henla, keibang a tagah lubawk hon taisan ngei ke’n. Ke’n leng ka hihtheih khamkham in Na nna ka sem ding,” ka chi hi.

Ka nu bel kum 45 ding lel mi ahihman in a taksa hat thoulai a, a duang leh a mel leng se lou ahihman in a kipuah zek chiang in etlawm pahpah hi. Himahleh niteng a kilohtawm a nekzongte a ding in, kilohna ding muh gige haksa ahihman in kicheina toh kidaih ding sum neihkhiat zoh bel thil namai ahi kei hi. Neklim ne a tha-awlsak zou hileng ka nu leng hichitel a upa suak nailou ding a, kei mahmah leng hichi gemgom tel lou ding hi ing a ka chi a, kei leh kei bang ka kihehpih hi. Ka pa damlai hilehzaw maw ka chi vungvung hi.

Huchia ka kingahtuah dedu lai in, ka theih louh kal in ka mittui ana pawt mawk a huai mah Julie in ana mu pah zawmah hi.

“Pau, kap na bang a. Bangziak a kap mawk na hia?,” chi in theih nopna lungsim toh hon dong pah hi.

“Ka kap kei. Ka nu leh nang mai ah ka kap kei ding.”

“Achihleh na mittui a pawt mawk a…”

“Kou leltak, daikilkal a mi kiang a na hong pawt nop kipak lua a ka mittui pawt ahizaw.”

“Bang gen a kineih na hia? Pasian in mihingte khat-le-khat ki-it a khawsa khawm ding a hon siam ahi. Aniam lua leh asang lua chih om lou ahi.”

“Himah e maw, doctor.”

“Bang di’a doctor chi a n’on sap veu ahia. Julie. Julie ahi ka min, doctor hilou. Theita in aw?”

“Hon ngaisiam in.”

Hichibang a kingainiam mihing tuhun a om thei lai ding hiam ka chi hial hi. Hon gente hon deihsak luat ziak ahi chih ka thei a, ka kipah ban ah keimah mimal ah kimuanngamna hon tun in ka thei hi.

“Poi na sak keileh, na pa tanchin k’on dong ding,” bangtan hiam nung in Julie in hon chi hi.

“Aw, poilou lua. Ka pa ahihleh tapa neihsun ana hi a, sanggam numei li a nei. Sepna nei lou himahleh ka pu’n gam ana neih let ziak in lou khawng bawl in ana khawsa thei thou uh chih ka nu hon hilhdan ahi. Ka nu’n kei a hon na pailai in ka pa’n hon omlouhsan a, ka hong pian in kei toh ka nu chauh ka om ua, tutan hichi in ka khawsatou den uh.”

“Ahihleh tua huai na gamte uh…”

“Gam ka nei nawn kei uh.”

“Oh! Bangchi’n maw? N’on hilh ut diam?”

“Hilh ut lou chih chuh omkeina a himahleh nidang chiah i kikum thak mai diam?”

“‘Tuni a na hihtheih dingte zingchiang a ding in siit ke’n’ chih paunak om ahi aw.”

“Huchi ahihleh k’on gen maikeleh.”

Ka innsung tanchin uh mite’n hon dongsek mahle uh chikmah a ka genkhiat ngeilouh hinapi bang pentak ziak adiam ah Julie kiang ah genkhiat ding ka phal mawk hi. Sum lamen ka diam? Mingoute ahih ziak a muang deuh ka diam? Ka heutu khat ahih ziak ahi diam? Ke’n leng ka thei zou kei. Ka innsung thu uh hilh vek ding in lem ka sa mawk hi.

“Ka pa ahihleh a unau lak ua aneupen, nautum ahi a, a ute numei ngen ahihman un amah bang leng a lungsim leh paidan ah thumang in dik a sakte leng hangsantak in gen ngam ngei lou hi. Ka pu leh pi inlah sumdawng a a zinna lam uah tuahsia in sihsan pah ua, ka nite etkolna nuai ah ka pa hong khangtou hi. Ka nite’n ka pa pen sanggam pasal a neihsun uh ahihman in duat in hawmthoh mahmah ua, akhenchiang in numei chei khawng peuh in chei zel uhi. China leh damlou ding bang a hong om chiang in awlmohna toh kidelhhuan in enkhawm khiukheu uhi. Ka pa hong tangvalnou tuung tan in ka nite lak a mi thumte’n pasal neita uhi. Anung sawtlou in ka nite lak a neupen, ka pa tung a geih pen in leng pasal neihsan a, ka pa amah kia in omkha hi. Nidang in bel zi nei pah ding in kunsek mahle uh, sanggam numei a hauh luat ziak leng adiam ah a ut kei a, ‘poimoh naikei’ peuh a chihsan sek hi. Alehlam ahlah ka nite’n a khumbawl simsim uh omsam mahleh ka pa’n huaite pen a lungsim pe thei taktak lou in ana it thei lou bilbel sek mawk hi. Ka nite’n pasal hon neih vek nung chiang un amah leng tangkhat kisa in nungak hon heel panta hi. Huchi in, ka khua ua pemthak, meithai tanu melhoihtak khat hon tuakkha in a itna tengteng amah ah hon peta hi. Ka nite’n pemthak ahihban a tagah ahihna ah huai minu pen deihsak hetlou bilbel zel ua, ka pa’n leng atawp in, itsam mahleh ka nite a zahna toh tawpsan tum  khong hi.

“A huchihlai in, meithainu pen in sihna hon tuak phut zawmah a, khosak haksatak a a keptouh a tanu neihsun nungaknou tuh kemtu ding hong bei hi. Tanau laina inlah kem nuamlou uh ahihman in ka pa lungtang sukha mahmah a, ka nite kiang ah amah ka kitenpih mai ding chi in a sanggamte lemsakpihna ngen hi. Ka nite’n ‘amah na kitenpih dingleh na sanggamte’n k’on ngaihsak nawn kei ding ua, i nu leh pate’n hon nawtsiat gou leh gam teng leng ka hon laksak ding uh. Nang maban ding ka hon khualna uh hizaw ahi’ chihsan uhi. Ka pa leng lungkham kisa in mangbang mahmah a, himahleh hihtheih dang bangmah nei tuanlou in om hi. Midang a tahte uh toh bang kizui zel sam mahleh lungkim thei taktak lou in omden a, a it mahmah meithainu tanu mah a lungtang ah tham den hi. Meithainu tanu in leng ka pa kiang ah ‘kei hon paisan mai inla na sanggamte hon thuhilhna zuizaw in. Nang a ding in leng a hoihzaw ding’ chihpih sek mahleh ka pa a ut kei. Ka pa lungkiat theihna ding ahihkhakleh chi in meithainu tanu in a lengla tangval dangte limbawl simsek mahleh amah leng hithei taktak lou a, ka pa’n lah hehsan sek ahihman in lungbuaitak in om tuaktuak uhi.

“Ni khat, ka pa’n huai meithainu tanu va pikhia in kitenpih a, tu’n amah ka nu ahita hi. Kum kimkhat ding lel hong pai pan himahleh ka nite hong kipan ua, kou ngeinadan a pasal in gouluah ding chih himahleh ka nite a seel noplouh man in ka pa’n ka gam teng uh pekhia a, ka inn ding uh tatna chialek lel gam ka tangkha uhi. Lou bawlna ding gina hong om lou in ka pa beidong kisa in zu leh sa hon ne a, thupukna lakhial in sawtlou nung in hong damlou hi. Sum lakna ding tuan neilou ahihman un ka innmun neih sunsun uh zuak ua, huai hun in kei kha nih vel lel ka nu gilsung ah ka om pan hi. Innmun a zuakna ua pan a sum neih sunsun teng uh kimkhat sang a tamzaw zek ding vel a zatbei nung un ka pa’n sihsan a, a sum neih laite kei hon neih hun chiang a zat ding chi in siit chenchen hi. Huai lai in ka nu’n kei hon paai mahleh kiloh zoh dandan in nektawm ding sum zong in kiloh a, a neihsa tamlou chikte kei hon khualna ziak in kemching teitei hi. Naupai hinapi in ka nite bang in pasal dang toh muangmoh in va enghou sek ua, huai thute theihpihtu ka khomite uh ahi. Ka pian hun in leng kuamah a en ding a om kei ua, inn neuchik, ka pa damlai a a luahkhiat uh sung ah inn neitute deihsakna leh panpihna toh damtak in kei hon neikhia hi. Midangte’n bangteng gengen mahle uh leng huai hunlai a ka nute innluahnate’n thudik thei ahihman un chikmah in hon gense kei uhi. Himahleh, ka nite thubawl ziak mah in inn luahna kisuankhiat a hong ngai nawn a, tu in kho Hausate deihsakna toh innmun lei ngailou in hiai luidung mialtak leh thoukang tamna mahmah mun ah inn tatna chialel a lian teen theihna mun piak in ka om uhi. Hiai ngei leng ka phu lou uh deihsakna hi in ka ngai uh.

“Ka nu’n ka neu apan laisim ding in hon chiil mahleh kum khat amah hong chinat luat ziak in, naupang simlai mahleng sum ka zon a ngaih man in laisim khawl in kiloh a nasep ka pan hi. Tunitan ka nu toh pangkhawm in nna ka sem ua, himahleh ka nu ginatak a enkol zou lou a ka om ziak in a damlouhna pen damsiang taktak theilou a, kei kilohna gentham louhte pansan a tutan hing zou hamham ka hi uh.”

Hiai thute ka gen sung in Julie mittui ana luang a, ka nu’n ka gen tengteng thei vek kei mahleh ka thugente innsung thu ahi chih thei ahihman in ka gente thei bangtuk in om a khase mahmah hi. Ka nu’n ka mittui a pawt ding a deih ngeikei a, huaiziak in ka mai ah amah leng kah a sawm ngei kei. Himahleh hiai nitak in zaw a ki-im zou kei, a mittui nul senglouh in a luangkhe zungzung maimah hi.

Gen ding tamzaw ka genkhit nung in Julie in, “Ahihleh lai bangtan sim man himhim na hialeh?,” hon chi a, ke’n leng, “Pawl giat chuh ka zou man. Huaiziak a driver ding a Dr. John in hon lakha ahi,” ka chih behlap hi.

Amah leng hong nui phempham a, huaizoh in, “Na sappau ahoih huntawk mawk a, bangchidan ahialeh?,” hon chi nawn hi.

“Ka siamkei chih n’on thei lawtel a himahleh na hon phat man in kipak lua ing. Ka sappau atamzaw television khawng leh English movies ka ette apan ka zilkhiat ahi. School kailai in ka sinsaktute un grammar hoihtak in hon na sinsak ua ka theiden. Himahleh a pronounciation lam hon pibawlpih kha kei ua huaiziak in hunawl a mi inn a ka pawt chiang a movies ka ette khawng apan ka kizil mai ahi. Inn ah mi theih louh in paudan ka kiguk sin ekek a, ka nu bang in ‘huai na kisin pau zatna ding mun a khosa lou na hi. Na haihuai bualbual’ a hon chisek. Himahleh, Pasian in ka thumna hon dawng hi in ka thei; tu in sapte taktak toh ka innsung ngei uah ka kisin ekek pau zang in ka kihoulim thei a.”

Julie in hon en thak hekhawk hial a, lamdangsa ahi chih haih vuallouh in ka thei hi. Ka nu khut kiptak a letsak kawm in, gen ding pen leng thei tuan nawn samlou adiam ah khasiat melputak in na nu kahnuih-melpu kawm in en hi. Meivak ginat louh toh lungngaihna giksem houh a bang hi.

Bangtan hiam a pau om lou a ka daih dide nung un Julie hong kipan hi.

“Pau, na dinmun n’on gente ka theisiam a himahleh kou gam lam ah kigensawn bang hileh mite’n gingta lou ding uh ahi. Kumzabi sawmnih-le-khat a ding a, khawvel ngei leng khota bangmai hita hun a omta i hihna ah gintak haksa sa ding uh ahi. Himahleh tu in ke’n ka mit mahmah in ka hong mu a, ka bil in ka za a, ka khe in k’ong siik a, gingtalou vual ka hi kei.

“Laisimna lam toh kisai ah chu sangpi na sin kei chih ka thei. Himahleh, tuni a mithupi Coca Cola pankhetu Charles Culpeper ban ah MC Donalds pankhetu Maurice leh Richard Mc Donald i chihte bang high school zoukhe lou himahle uh a kuhkalna ziak un tuni in khawvel a sangtaktak sinna neite’n amau nuai ah a sem maimah uh. Huchibangmah in, na gam uh India a ding a mihausa a kigen minthang leh Reliance India Ltd. pankhetu Dhirubhai Ambani bang ngei leng pawl sawm tan lel siamsinna neimi ahi. Lungkelou in kuhkalna, ginomna leh chihtakna toh pang toutou leteh nang leng tunung chiang in banglam hiam ah mi thupi hong suak thei veve na hi. Kei bang leng US a hong kipan na hon chi maithei uh, himahleh kei leng tagah-gentheite ka it ziak a tua gam nuamtak paisan a genthei thuakte lak a ka siamna amaute a ding a zangkhe ding a hong kisa ka hi.”

Julie thugen in tha hon pe mahmah a, khovel a mi thupite huchidan bang leng ana omsam uh ahi maw chihte ka ngaihtuah a, kei leng mihing khat hisam veng chi in kingaihsiatna lungsim neih nawn louh sawm teitei ding in thupukna ka lungsim ah ka lata hi.

Huchih hunsung a zan dak sawm bang hong ging man ahihman in Julie kha ding in ka pawtkhe kik a, ka nu’n, “Bawi aw, zan sawttak toh na va khak zoh phet chiah gari na va koih pah ding a koimah ah na hong baang kei ding aw,” hon chi hi. “Hitham e, nu,” chih toh inn kong lam zot ka thuah a, Julie in ka nu mangpha hoihtak a khak zoh in gari ka koihna tan uh khe in, kihou lou hial in ka pai tou uhi.

Hotel kong tan ka va kha a, ama’n leng hon chial tuan louh ziak in gari pen pisa a koih ding in ka taisuak hi.

Gari koih khin kei kia in khe in inn lam zuan in ka paitou keuhkeuh a, Julie hon deihsakna thugente leh ka hinkhua khawng ka ngaihtuah kik hi. Vangsia leh tagah ka kisak mahmah lai a ngawl lou a hon koih a, kei mimaltak bang damna hoihtak hon pia Pasian thupi ka sa a, hampha ka hi chih ka phawk thakthak hi. Mite lak a biakinn a kikhop ding zumhuai ka na sakte khawng hai ka kisa mahmah a, tuban huchih nawn louh ding in khensatna ka lungsim ah ka lata hi.

Anaizawk deuh khakleh chi in Pailian lam ka tawntou a, dak sawm-le-khat bang ging thamta ahihman in mi theng petmah manta a, midang ka muh louh ziak in lamlian zui a pai kei chauh hileng a kilawm hi. Huchia ka paitouh keuhkeuhleh Phailian bazaar a lamkathuam ka tunkuan in mi bangzahhiam paulou a tukhawm liliai ka galmuh hi. Ke’n leng nuamtuan sa in ka lungmuang tuan mahmah hi. Huchihlai a a kiang lam uh ka naih simtak in khat in hon naihphei phut a, “Bang di’a zansawt nungnung a vialvak e? Guk ding zong mo?,” hon chi gemgam hi. Dawng ding a ka kisak simleh adangte leng hong dingkhe souhsouh mawk ua, hon um kimvel dan deuh a a om man un ka kiven hong lehngaih maimah a ka dawng nawn tuankei hi.

Ka theih louh kal in ka nunglam apan khat in hon sawn phut a, ka mailam a ding pen bohphei dingdan in ka om hi. Ka huchih chiang in ka mailam a ding pen in ka tup mawng a ka bohphei dek sa adiam ah ana kisa in ka taklam biang ah naktak in hon na tuum a, ka leengduai hi. Huchi in hon kibohhuan mawk ua, kua pen in hon tuum a kua pen in hon beeng hiam chih leng theihbut louh in kipei vengvung ua, hon peek toh alanglang a hon khoih ziak un ka kipuksuk a, huchitan in leng a khete un hon chil zialzial lai uhi. Pang zou nawn lou hi a hon theihtak un khat in ka sakhaute hon ban sawksak a, tuni a ka zatval ka sum kuah sunsunte leh ka mobile black and white neihsun leng hon laksak lai hi.

Zan sawttak toh hon huh ding lah om lou. Hon mu bang ana omta himhim lehleng kuamah hong dawkkhe ngam lou ding un ka koih mai hi. Ka phone lah om nawn lou ahihman in ka heutute leng hon panpih ding in ka sam theita kei hi. Huchi in, zandaitui a kiakzek mantaak ziak in khua hong vot deuhta a, kei leng golh in naa sa mahleng azia hong om deuh a ka kitheih man in awl in ka thou tou hi. Ngap dandan a kikhin in inn lam ka zuan a, inn tungzou lou ding ka hi de-aw chi peuh in ka ngaihtuah hi. Ka nu houh ahun loutak a sihsan ding ka hi hialeh chi peuh in ka kingaihtuah mawkmawk a, ka nu hehpihhuai hina tel e maw ka chi vungvung hi. Inn tung zou himhim lengle bangzahta a ka nu patau ding hiam chihte ka lunggimna sawn a hong hilai hi.

Marian Street tawn in awlawl in ka kikhin, ka kikhin a huchi in Bethel Veng ka tung phei khong hi. Huai apan leng ka inn uh gamlapi hilai ahihman in ka maban saupi omlaite ka ngaihtuah chiang in ka tha in a ngap mahmah kei a, lamnawl khat ah tu in ka khawl phot hi. Ka tha hong om deuh a ka theihtak in ka kipankhe nawn a, Chimtung Veng leh Zoar Veng kikalvel a pai in, ka muk leh tal lak khawng a sikaite leng hong keu deuhta ahihman in a kehna maate hong taak chiaichiai panpan uhi.

Ka inn uh ka galmuh in meivak ana vak kiukiau lai a, ka nu’n ihmut suakpipi a hon na ngak ngitnget lailai hi ding hi a maw chi in ka ngaihtuah a, ka mittui bang hong paak niuniau hi. Inn kong zawn ka tun in ka puanak in ka mai khatvei ka hulsiang thak a, himahleh ka mittung leh ka muk ban ah ka biang a hon sukbawksaknate uh bel ka mekkiam thei kei hi.

Ka thawm hon za ahingei ding a ka nu’n kongkhak hong hon pah a, himahleh keilah thabei kisa in sangkil ah ka puksuk maimah hi.

“Bawi aw, bang hong chi na maimah a…!,”  chih ka nu patauhna aw ka za man hamham hi.

(III)

Ka pumpi in ka golh ekuk in ka thei a, ka taksa tengteng leng nagai vek hi in ka thei. Ka mit ka hahleh ka muchiang thei kei a, ka mit teng bing theithuai in om a bangmah ka en thei mangkei. Ka mit haklian ding chi a ka kaak chiang in leng hon dou lelaw om hileh kilawm in ka thei a, mit naa nei toh ka kibang hi.

“Nu,” chi in ka sam a, himahleh ka aw a suak zou taktak kei. Ka gawl teng a keu a, ka aw a suak zou mangkei hi. Ka dangtawng a hul ekuk a, ka chil om sunsunte leng a man tektok hi.

Thoukhe ding chi in ka dintouh sawm a, himahleh ka taksa pumpi in hon zui kei. Ka khe ka liktouh sawm hang in tha himhim ka nei kei a, nat in anat thoh maimah hi.

“Nu ei…,” ka chi nawn a, himahleh ka aw a suahzoh tuanlouh ziak adiam ah kuamah dawnna ka za kei. Abangchi ka hia chih leng ka theibun zou kei. Ka lu phongtou ding in ka kisa a himahleh a gik mahmah a, a naa bengbung hi. Ka khut tegel en ding in ka liktouh sawm nawn a himahleh tha ka nei kei a, ka zoi maimah hi.

Beidong simtak a ka om nung in kongkhak hong gin ka za a, ka nu hingei ding a ka gintak ziak in ka lung a nuamtuan mahmah hi.

Himahleh kuamah in hong houpih kei a, kuamah in leng hong en kei.

Ka kinepna tengteng bei. Keilah thou zou lou. Ka gil leh nakguh omna lakte nagai. Ka gilvun bang golh ehoh in ka thei hi.

Ngawng nasan leng taangsak theilou in ka lumtang zinzen maimah a, kuahiam in hong muleh chu ‘abangchi gegaw na hia oi?’ hon chi ut hial ding in ka gingta hi.

Kongkhak hong gin ka za nawn a, hiai hun in chu a gin leng ngaihzaw deuh a ka theih ziak in ka nu hi taktakta ding in ka lamen tinten hi.

“Nu, nu… Nu ei…,” aw suak zou lou sasa in ka chi thiauthiau a, ka ngawng hei in et sawm mahleng a nat luat ziak in ka hei ngam kei hi.

“Eh, bawi! Khua phawkta na hi maw? Nu, ka kipak lua, bawi…”

Ka nu aw ka za pah hi. Ka aw ngaih hetlou hinapi ka nu’n za zou pah ka chih chiang in tunnu itna lian a chihchih uh dik ahihdan leh, nu leh pate’ lungtang a tate zaw ana om gige taktak mah ahi chih ka chian semsem hi. Ka nu aw ka zaktak in kei leng ka lung a nuamtuan mahmah hi.

Ka maizawn ah ka nu hong daksuk a, a kahnuih mai leh men phemphom ka muh chiang in ka nu kipak lua ahi chih ka thei mai hi. A mittui hong takkhia khat in ka kamsung hon dengkha ahihman in al piappuap a, adang khat hong ke nawn pen in ka mittang mahmah hon dengkha hi. Ka ngawng taangsak thei lou ka hihman in a nuam chiah kei a himahleh ka nu kipahna ka ngaihtuah chiang in ka hehsan ngam mahmah kei hi.

Awl in ka tal hon zutsak a, ka samte hon zutmamsak kawm in, “Bawi aw, hiai khovel a nang chauh k’on neih na hita a ka hon khahsuah ding lau lawpetmah ka hi. Nang thuakte kei thuak hileh china zouzen ing e maw, bawi…,” hon chi hialhial a, mittui-naptui toh ka tal hon tawpsak cheuh hi.

Ka muk keutak a muh chiang in tuilum va la in a hon tulh hi. Tui ka kidawn theih ma hun, ka neu mahmah lai hun a hiaibang a hon tulh ding hi a maw chi in ka ngaihtuah a, lah ka pau peih louh ziak in bangmah ka gen kei hi. Tui tamlou a hon dawnsak zoh in ka muk hultak mai patzam kawt in hon suknomsak a, huaizoh in tui tawi a kuankhe ding ahihdan gen in hon pawtkhiat san hi.

Tuitawi hong tung a kisankhiat khit phet in, “Bawi, bang na nachita aleh?,” chi in kei lam mah hon zuan pah hi.

“Nu, bangchi ka hia? Tua dak bangzah gingta a, nu? Office ka va phak ngai ding hilou maw,” ka chihleh amah bang khasia kisa in hong kapkhe hithit hi.

“Bawi aw, na tung a thiltung bangmah thei lou na hi maw? Zan nitak a Dr. Julie kha a na va hoh nung a zanlai a liamgawpsa a inn hong tung neivoi… Khawphawklou a zankhawvak a omden chin a, tua, denlam deuh a hong halhkhia hipan na hi,” hon chi hi.

Ka ngaihtuah thak a, bangmah mumaltak in ka ngaihtuah thei kei hi. Ka lungsim khawng om meimuai in manglam khawng bangden in ka thei hi.

“Nu, hon phongve. Ka kisak hunta lou amaw?”

“Bawi, na kuan hun kikhel thamthamta ahi. Tua nitaklam dak nga ging nuam ding hita ahi.”

Ka nu’n huai thu a hon gentak a lamdangsakna toh en hekhawk kha ka hi ngei ding a, ihmu a tawldam phot ding in hon sawl hi. Damdawi khaa nek kichi thil haksa ka sakpente lak a khat himahleh tang khat hon pe teitei a, tui toh valhtheih-valhmoh in ka valh suk thei khong hi.

Minutes sawmthum ding vel a pai nung hi ding in ka gingta, ka kiguih zot a huchi in ka khanglou hi. Ka patauh tha suak in ka dak leklawk a, ka lu sangpi phongtou thei naikei mahleng neuchik ka hei theita hi. Ka nu’n singkang kuang thei ngellou zang in mei toh in mut susu hi. A huchih laitak in ka khuh hong suak in ka khuh khauh a, himahleh ka khuh chiang a ka lutang a nat luat ziak in ka khuh zom ding lau in ka kidek chenchen maimah hi.

Ka khuhging za in ka nu’n hong delh phei hi.

“Bawi, thouta mo? Sawtpi ihmut ding hi a…”

“Nu, bang huan sawm e?”

“Bawi, na anchim ding ka huansa pen ui khat in ana negai hi di’a tamlou chik kinebang a ana om inchin huan thak dek ka hi.”

Ka nu’n huai a genleh denlam a kongkhak hong gin masak lai a ui hong lut hizaw deive ka chisim thak hi. Kei bangmah taang thei lou a lumdap mai pen hong nap hiam ahihkeileh a hong keih phut khak louh leng hampha hinatel ing e ka chi hial hi.

“Zan in i antang ding k’on leibeh kha kei a, tunitak huan ding a omlaina maw, nu?”

“Bawi, om mah ei. Tusun in Dr. Julie leh nurse eimi khat hong hoh ua, nang hoihtak a a hon et zoh ua paikik unchin, huai nung sawtlou a na driver seppih Siampi leh huai nurse hon tonpih pen in anntang leh damdawi bangzahhiam hong pia ahi. Hiai damdawite leng huai nurse pen in hon khai ahi.”

“Julie, aw Julie,” ka lungsim in ka chi a, “US apan Pasian in kei deihsakna hong puak ding a hon belseh na hi hiam aw!,” chi in ka ngaihtuah hi. ‘Ka damkhiat hunhun amah a ding in banghiam thupi kei lehleng ka hihsak ngeingei ding’ chi in ka lungtang ah ka vom hi.

Akhenchiang bang in ‘Pasian in koppih ding bang leng sehkholhsa a koihsek chi hi ua, Julie houh kei a ding a siam ana hi maimah hiale’ chi peuh in ka kipehoih deuhvel zel hi. Bangteng hileh, adik leh diklouh chuh thutuam hitaleh, chikmah a hon theih ngeilouh Julie in kei hon hichi neel a hon hichi deihsak mawk bangziak ahi ding?

Aziak ding ka thei zou kei. Thil tengteng aziak omvek ding zaw hi a, hilehleng aziak om vek sese a ngai tuan a hia?

Ke’n chu ka thei tuankei.

Ka nu hon hilhdan in, Julie in Office kai lou ka hi chih a theihtak in tamveitak ka mobile number ah hon call sawm a himahleh switch off kichiden chi hi. Huaitak in patauhna toh hunawl kal ah nurse khat zawn in, driver khat sam leng samzok in hong pha zual a himahleh a gintak louh dantak un kei pen si lou chauh in hong mu uhi. Hiai thute ka nu’n hon hilh kawmkawm in ka nek ding hon pia hi.

“Bawi, hiai singtang aktui na dawn ding a ka va batlak ahi,” ka nu’n hon chi a, nuihmaitak in ka kamsung ah sung ding in hong kisa hi. Ka nu pen china hi a ke’n amah hichia enkol hizawleng ka ut mahmah a, amah ka hehpihtha a suak thakthak hi. Ka kam in genkhe kei mahleng ka lungsim in ‘nu aw, ka nite hon bawlgentheih nung a ka pa’n hon omlouhsan leng hun lua hi a tua kei na kinepna omsun na tapa na khoi zel a ngaihtel… Vangsel hinatel chia maw, nu ei… Ka hon hehpih lua… Kei ziak a na lungngaih ding deih lou a ka pan theih tawp suah a pangzaw hisam veng maw… Nu aw, hon ngaidam in aw…,’ ka chi hi. Ka theih louh kal a ka mittui ana pawt ahi ngei ding a, ka nu’n men kawm a a nuihmai suah teitei sawm in ka mittuite a khut ham bitbiat in hon nulsiangsak tiautiau hi.

(IV)

Huchitel a hon vaw lou uh ka sakleh ka na lel mahmah mai a, kal khat zen ka inn om a ngai maimah hi. Ka nu’n hawmthohtak in hon enkol tou zel a, damlou etkol dingdan kisinkha ngeilou sapsap ding in ka nu fel in kizen ka sa mahmah hi. A hon etkol hoih zoh peuhleh kei ah kisuanlahna leh khasiatna a pung deuhdeuh zel hi.

Sun khat Julie leh nurse nih hong pawt ua, kei hon vawtute Police a FIR bawl ding in hon kun uhi. Himahleh kei bel ka na ut dekkei a, a mite theikhia in mankhe takpi lengle amau lungtang a kikhekna taktak a om tuankei aleh bel phatuam tuan ding in ka koih kei hi. Manipur ah bel diktatna leh dan in vaihawm ginalou ahi chih Julie in thei nailou ahihman a hon kun hi deuh ding in ka koih mai hi.

Julie in a om sung un ka nu kiang ah a hon etkol dingdan sinsak a, first aid piak dingdante tel in thil tamtak sinsak hi. Ka nu a sinsak lai khawng ka na enzui a, a lungsim pichindan ka musuah thakthak a, kuamah khentuam nei lou a itna mit toh mi tengteng en ahihdan bang leng ka theikhia hi. Zing-le-nitak a ka nek ding uh anntang bang amah sum in hon leisak a, amau gamlam a om a nute kiang a leng ka liamdan leh haksatdante genkha ahingei ding a sum hon khak uhi. Kipahhuai lua hinapi in, mi i tung a asiam zoh khop uleh kisuanlahna lian chih bang in kei bel ka kisuanglah mahmah mai hi.

Kei sangmah in leng ka nu ana kisuanglah zawlai hi in ka thei.

“Dr. Julie aw, bang ding a hichi mi hoih tel na hia?”

Ka nu’n ni khat ana dong hi.

“Nuneu, kei ah hoihna bangmah om lou ahi. Ka Hondampa hoihna neuchik beek koppih ka sawm sek ahi a himahleh Amah hon deihna tan ka tung zoh chi kei a, poi ka sa.”

“Na mihing hinpihte na itna thupi ka sa lua. Pasian in aleh tampi in a hon vualzawl ngeingei ding.”

“Kipahhuai lua ei, nuneu. Tampi ka sep beh theihna ding in hon na thumpih zelzel in aw?”

“Hi tham e. Ka tapa in na tanchin a hon hilh apan na mel mu naikei mahleng ka hon na thumpih pah ahi.”

“Ka kipak lua, nuneu.”

“Kei ka kipakzaw.”

Ka nu’n Julie kiang ah gennop a hau mahmah mai a himahleh ke’n ka lehsak nilouh a ngaihman in, damkol ka hihna toh ka gim ding a lauh ziak in a utzah leng gen lou hi.

“Dr. Julie, ahimhim a nang kum bangzah a upa e?”

Eilamte paidan a kum kidot chih khawng kithang hiven, ke’n leng eilam paidan ka paih theih louh man in Julie ka dong kha phut mawk hi.

“Kum 22 ka hita.”

“Oh! Kei sang a kum nih a naupangzaw nei vele. Haha…”

“Hia?”

“Hi.”

Ka taksa khawng tung a liamna omzekte a hon silsiangsak zel a, a khut noutakte bang in ka taksa hon sukkhak chiang in poi ka sa lawkei hi. A mittang dum kilkel toh hon enzel a, a nuihmai hiuhiaute’n ka natna tamtak athuak hon nuamtuansak in ka thei hial hi. A ha siangtak mai kilepdan dik mahmah leh a sam sansim, tang zitzet, huih in a mutleng chiang a pak sialsialte a etlawm mahmah mai hi. Mi thau lua lah hilou, a gawng lua lah hilou in kitaksa phut hun litlet in om a, a et a hahdam mahmah hi. A taksa lah India-te a bang lou in sisan suak in san singseng a, a thaguite bang a dum kikiai ziak in dawk hilhial in muh theih hi.

Kei kia in Julie etlawm leh hoih sa hi ding a ka kigintak lai in, khosung mipi’n leng hoih ana sa uh ahingei ding a, lim khawng hong kilakpih ding hunkhop omsek hi. Nidang a kuamah hong hoh utle om khollou a ka theihleh, tua Julie in a hong veh gige nungsang mi hong pawt ding ka nei zeuhzeuh uhi.

Alehlam ah, thuduh pawlkhat om uh hi in ka thei. Ka nu kiang peuh a, “Na mounu ding uh a hoih lua,” ana chi pawl om ua, ka nu lah zumna leh kisitna in pumdim hi. “Bang na piak ziak ua hichitel a hong hoh mun ahia?,” chi pawllah bei lou. “Denchiah na tapa toh hong kingai in hong kiteng mawkle uh US lam ah hon paisan ding ua, nang mimawl lah huailam a hoh thei vuallou ding na hih chiang a buai lawphing ding na hi,” khawng ana chi thethup uhi. Hiaibang deuh a mi enghouna kampau za munsim adiam ah ka nu’n khatvei ka kiang ah, “Bawi, Julie khawng zaw ei tagah lubawk khawng a ding vual hilou ahi aw. Na dinmun kithei inla hong pilvang mahmah in aw,” hon chi hiathiat hi.

Hichibang thute ka zak chiang in keileng ka lehbuai daih hi. Julie in hon ngai mah hia? Ahihkeileh, ka zawn luat ziak a hon hehpih hizaw hia? Ahihke’h midang theih a neih nailouh ziak a kei hon lawmbawl hialeh?

Hiai dotnate dawnna diktak ka zonsuah poimohleh kilawm hi.

Ka hong dam deuhtak in kei leng ka pisa lam uah ka va kuan nawn hi. Sir John in ka seppihte uh a omkha thei liaiteng hon samkhawm in vaidawnna dan in sunann hon nekpih a, ka kipak mahmah mai hi. Himahleh sunann ka va nekna Hotel uah kei leh Julie ka tukhawm khakei ua, Sir John in a veilam ah tusak hi. Ka et khawm chiang in a kituak mahmah mai ua, Sir John bang a let toh a dinkhawm chiang bang un leng kituak mahmah uhi. Alehlam ah, Julie kineihsakna lungsim ana nei manta ka diam ah, ka lungsim ah nuamsak louhna simsim om in ka thei mawk hi.

Julie in, “I lak a kal khat bang damlou a lupna ngak a hon omsan, a lungtang phat ziak a si lou a tua i lak a hong tel thei Mr. Pau min in ne in dawn chiat ni ei,” hon chi a, kei hon melh cheuh in nui hiuhiau hi. A huchih chiang in kei bel kipahna in ka dimkik zel mai hi.

Ka sepna a ka kuan nung ni thum ni in Gelzang leh Lamzang lam ah damlou etna neih ka sawm uhi. Kei leng Julie toh mah kuankhawm nawn ding chi in ka kilawp petmah a, gari sung a ka tuankhawm chiang ua ka houlim dingdan khawng bang uh ka ngaihtuah khawl hi. Ka dotnop leh kupnop bang tampi ka phasak a, gari a vante ka guan kawm bang in ka nuihmai heuhau den hi.

Ka kisak zoh vek khittak un ka heutu lianpen uh Sir John in khua nihte a kuankha dingte abanban in hon simkhia hi. Ke’n Lamzang ka tangkha a himahleh Julie in Gelzang tangkha hi. Mak ka sasim mawk a, lah kei toh Julie kuankhawm kha teitei ding chihna omlah hi tuanlou a chi peuh in ka kihehnep sawm hi.

Ka kilawpna tengteng hong bei zou phial a, himahleh ka kuankhiat teitei uh bel a ngaita hi. Kei gari ah nurse nih hong tuang ua, lamtawn tung in a kihou den zou uhi. Gen ding bang thei uh ka sa a, ‘kei leng Julie toh tuangkhawm kha hi ngeingeile ungzaw tua nurse tegel sangmah a leng pautam zaw maithei hi ing a’ chi khawng in ka ngaihtuah hi.

“U Pau, Sir John leh Dr. Julie thu na zakhata hia?”

Nurse-te lak a khat pen in hon chikhe phut mawk a, ka kiguih hial hi.

“Bang e? Bangthu om a?”

“Zakha lou taktak mo?”

“Za mawk lou e, zanzek a hong kai zou nawn pan ka hih chia maw.”

Amau tegel awlchik in hong kihou susuih thak uhi. Ka gari sung a om limlang neu a ka mitsik a ka etgukleh a khat pen in a lawmnu bilbuk a banghiam a gen laitak ka mukha geih hi.

“Eh! Bang hi kei thak,” hon chi kik hi.

Ka lungsim a nuam chiah kei a, banghiam thu om ahi chih bel ka zetheihta hi. Sunann nekkhawm ni a a tutkhawmdante uh leh a kineldante uh khawng ka ngaihtuah a, Julie bantha ngou ngikngiak leh nem mahmah in Sir John liang a hetkhak a a nuihkhawm dante khawng uh ka mitkha ah a hong dawk thakthak hi.

“Banghiam thu om hitawk mah inte, hon hilh dih uh e,” nui kawm in ka chi hi.

“Dr. Julie toh hichituk a kithuah uh chin a bangmah hon hilh lou a telmaw?,” chih toh nuih lahlah thuah uhi.

“Bangmah hon hilh lou taktak ahi.”

“Amak ngei eleh.”

“Bang eita mak na chih mawk uh?”

Hong kihou susuih nawn zek ua, huaizoh in…

“Sir John toh Dr. Julie kingai eive uai. Amau kikhamna zungbuh leng kal nawn chiang a kipeta ding uh ahi.”

“Bang eh? Taktak mo?”

Mimawl chih mahtak, ka patauhdan selguk leng ka siam kei hi. Ka hi lolok kha zezen a, ka gari heklai bang a brake ka mankha zawzen hi.

“Eiii…”

Ka brake mat hat lawkha in amau bang kikou khe kha hial uhi.

“Oh! Ngaihsiam,” ka chi a, ka taihatsak nawn pah hi.

“Bangchi e, u Pau? Pawna lua mo?,” nuikawm in khat in hon chi hi.

“Pawna chihchuh?,” bangmah thei lou bangbang in ka dong heihai hi.

“Kiselsel letehle na omdan a kithei thou ahi aw.”

“Bang maw na theih uh?”

“Thei tuanlou. Hahaha…”

Kihou susuih nawn uhi.

Huai ni sun nitum in ka nguai zou top hi. Alehlam ah ‘Julie toh kei a kingai lah himawk lou ung a bang di’a hichi guk puaknat mawk ding ka hia’ chi in keileh kei bang ka kihehnem thei zel hi.

Damlou etna a hon zoh baih ziak un nitaklam in ka kik hak kei ua, khomial ma in ka pisa uh ka tungkik nawn man uhi. Sir John leh Julie leng hong tung hak kei ua, amau bel kipahmeltak in gari apan hong kumkhia uhi. Kou a tung masate toh pindan lianlou sung khat ah hunzatna hon neipih ua, nidang teng sang in leng Julie bang kipakzaw hileh kilawm in ka mu hi. Sir John in hun saulou zang a, amah zoh in kou kuanna lam thu leng ngaihkhiatna om nawn hi. Thu kigente a ging ka za vek a himahleh bang thuthu gen uhiam chih bel ka thei kei. Ka ngaihtuahna a paizang petmah hi.

Hunzat khawmna ka neih zoh un innkong ah Julie in hong chibai a, “Mr. Pau, nou kuanna lam nuam khollou hia na ngui mel lua a?,” hong chi hi. “Nuam mah ei,” chi teng a ka dawn zoh in ka paikhiatsan sawm a, himahleh ka liang a hon len in, “Khawvel a ei sang a haksazawte panpih thei a i om pen thil kipahhuai lua ahi chih na hon theihsiam hun a om ngei ding. Tuma a na thuakna thute mangngilh teitei sawm in aw?,” hon chi hi.

Bangmah gen tuanlou in ka paikhiatsan hi.

Ni bangzah hiam amah kha in ka pangkha kei a, amah hon muh louh theihna ding munte ah ka om sawmzawta hi. Adiktak a gen in, aguk in amah ka en zel a himahleh a hon theih ding bel ka lau mahmah zel hi. A kiang a om a houlim tiptip bang ka ut a himahleh ka kidek ban ah amah phawk lou dandan a om ka telzaw phot hi. Ka damlouh nung ka omdan tuam a sak ziak in Julie in kei toh huntuam zat sawm in panla sek a, amah va khatu ding bang in Sir John kiang ah gensek mahleh kei ka ut louh chiang in Sir John in hon sawl teitei lou hi.

Inn lam a ka nu muh a leng ka omdan tuam zou ahi ngei ding a, ka nu bang a patau hial hi.

Ni khat, pisa apan Julie pawtkhe deklai ka tuak a himahleh hon nuihsan cheuh in hon houpih lou hi. Ke’n leng bangmah gen tuanlou in ka suai kaihna ding ah ka suai kai in, Tuithapi lam a hohna ding lam ah Dr. John toh ka va hoh uhi.

Nitak inn ka tun in ka nu’n. “Pau, tusun in Julie a hong hoh a hiai lai a hong koih zoh in a kik nawn pah,” chi kawm in laithon khat hon pia hi.

Ka nu ka en a, ka dawng kei. Ka puansilhte suah in ka kihahsiang a, huaizoh in, “Nu, ann hon thuk inla ka ne ding aw?,” ka chi hi.

Ann ka nek zoh in lum ding in ka kisa a, huaitak in, “Bawi, bangchi e? Julie toh kisuheh kha na hi uh maw? A laithon beek sim lou ding na maw?,” ka nu’n awl in hon chi hi.

“Nu, ka gim lua a zingkal khawng chiah ka sim mai diam?”

“Bawi, thukin leh poimoh khawng hi khaleh tuh kikhel chih bangle om thei hi a maw?”

Ka nu hon awlmohna ka ngaihtuah chiang in nuam ka sa kei a, himahleh huai etlawmtak a kibawl laithon bawm sung a kithun pen a kitenna ding ua chialna lai ana hi mawkleh bang ka suak di’a chih bang ka ngaihtuah hi. Honkhiat a sim ding ka lin mahmah a himahleh ka nu ka zahna etsakna ding in sim mai ka telzaw hi.

Huchi in, putawn vak milmial khat detbeh thak in laithon bawm omna lam ka zuan hi.

(V)

Laithon kikoihna lam zuan in awl in ka paiphei a, ka dip kisai hong kin in ka chii bang liing supsup in ka thei hi. ‘Va hong taktak ding ka maw? Sim taktak ding ka hia?’ Hiai dotna nihte ka lungsim sung ah kisual den hi. Thu kipahhuai ana hileh bel azia khat om di’a himahleh a dahhuai lam hitaleh ka nu khem ding ka diam, a lungkham ding lah deih hetlou ka hih chiang a?

Ka omna toh kinaichik a huai laithon om hinapi in ka tungphei haksim hi. Ka khosa-ul neel bang hong pawt in, ka lu khuat luailuai kawm in huai laithon ka en gegu hi. Amun ka tuntak in ka la a, ka khut ana liing zaw hi ding hiven, ka nu’n, “Abangchi supsup na hia oi, bawi? Na khut khawng a liing abang a… Damlouhna nei na hialeh?,” hon chi hi.

Ka dawng kei a, huai laithon chu ka taklam khut a la in, bangmah a kibelh lou ahihman in asung a om pen ka lakhe pah thei hi. Tutna niam leh neuchik khat ah ka tusuk a, ka nu leng thuduh deuh a diam ah hong naihphei in, huai laithon sim siam ngelkei mahleh hong en tei hi.

Huai laithon bawm sung a laipek om pen a nalh leh a let tuk in asung a thu kigelh ana tawm mahmah hi. Ka nu’n putawn khat keilam ah hon detphei a, thu kigelhte ka muhchiang louh ding lau ahi chih ka thei hi. Ka nu ka en a, ka nu omdante leh kei omdante ka ngaihtuah chiang in ka nuih hong lehzak a, huai laithon a kigelh thute ka sim ma in ka nuihkhe kha heuhau hi.

“Hmnn… Thu kipahhuai eive maw?,” ka nu’n hon chi pah a, amah leng a thu thei nailoupi in hong nui heuhau mawk hi.

Bangmah gen tuanlou in ka nuih ka sunsom a, ka ang a ka nu kainai kawm a angpom in, “Nu ei, na hon nak it ngei e maw telngal… Ke’n lah na kinepna leh kisaktheihpih tham ding bangmah ka hon hihsak zou ngei kei a, hon ngaidam in aw?,” ka chi hi.

Ka mittui hong pak niuniau in ka nap bang tolh ding in hong kisa in ka thei hi. Ka nu leng ka anglum apan hong kikhinkhe zek in ka maitang ah hon en a, ka mittui pak niuniau hon nulhulsak kawm in, “Bawi, ka hinna tengteng a hon it ka hi. Na hoihpen ni leh na siatpen ni a leng hon it den ding ka hi. Nang hinna ding ahih peuhleh ka hinna leng pammaih leh khiatlahhuai in ka koih kei,” hon chi a, a nuihmai hon lak hi.

Ka nu’n huai thute a hon gentak in ka kidek zou nawn kei a, amah angsung ah ka belhlut a, khasetak in ka kidik keuhkeuhta mai hi.

“Nu ei, khawvel pumpi kiheilamdang in, mite’n bangchi zong teng in hon sugenthei in hon gense mahle uh ke’n zaw nang ka hon gensiat a ka hon simmohna ding neuchik leng ka mu kei. Nang na huansa ann leh nangmah tawisa tuite ne a dawn det ut den ka hi aw… I khosakna haksa himahleh sawtpi mahmah hon dampih in aw, nu…”

Ka nu’n ka lu a ka samte hon zutsak hianhian kawm in ka mit leh ka biang a khitui kai niuniaute a khut hamsim bitbiat in hon nulhulsak hi. A maivun vuaisim nimnem, a samvom lak a samkang kihelh muh theih zeuhzeuh omtate ka en a, ‘kei hon it ziak vek a ahun nailou himahleh tua hichi pah hi ding hi a maw’ chi in ka ngaihtuah hi.

Huchia ka ngaihtuah sung in ka nu’n, “Bawi, sawtpi hon dampih thamtham ding ka hi. Lunglau hetkei in aw. Na zi neih ni chiang in na kiang ah ka ding diing. Naumin phuah ni chiang bang a kipahthu gen a pang lai zawmah ding ka hi,” hon chi hi.

‘Maizen! Keilah ka tualniam luat ziak a kuama’n hon en lou ding ua maw’ chi in ka ngaihtuah zom nawn a, ‘hon it a hon ngai bang ana om zenzen lehleng mite theihpihna toh kitenna sai thei vual ding hilou lai tel hi ing a’ chihte bang ka ngaihtuah hi. Ka nu’n zaw ka maban ua kinepna limchitak om bang in a ngaihtuah a, himahleh a kinepna thawnsaktu lel mai ka hih ding ka lau petmah hi.

Hiai thute tengteng ka ngaihtuah laitak in, ka nu mah in hon genzom a, “Bawi, Dr. Julie in hon deih kei lehleng ke’n bel hon it veve ding ka hi aw. Lungkhamna ding bangmah om lou ahi aw?,” chi in hon khamuan hi.

Ka nu’n zaw bangmah hon hihsak zou kei mah inte hilehleng hiaibang a a hon dampih lai pen kei a ding in sana manpha sangmah in leng a manphazaw ka chi hi.

“Nu, Dr. Julie chihte khawng eikhawng nimnemte a ding hiloupi. Lungsim a leng koih louh ding ahi. Ka sepna lam a ka heutu khat ahi a, hon deihsakleh huaikha a hun himai ahi.”

“Ka tapa aw, pil hina maizen chia maw… K’on it deuhdeuh mai ka chi…”

Ka nu’n hon kawi thak tuntun zezen a, huchi in ka khut a laithon om pen en kawm in, “Ahihleh huai a bang thu gelh himhim ahiale? Hon hilh sawm lou na hialeh?,” chi in hon nuihsan heuhau hi.

Ke’n leng ka khut a huai laithon tawiden lai ka hi chih ka phawkkhe thak a, kintak a latou zat in ka en hoih thak hi. Huai laithon ah hiaibang in kigelh hi:

Meet me tomorrow at Saulim Restaurant, New Lamka. 11:00 a.m. sharp.”

“Zingchiang a hon kimuhpih ut chidan ahive,” ka chi a, ka nui heuhau hi.

“Tulai a dating na chihte dandan uh hialeh?,” hon chi kheuh a, hon mitfuih gaih hi.

‘Eih! Ka nu leng tunitak hong nungak pau na e’ ka chisim a, “Dating hi thahah ke’nte,” ka chi gaih hi. Kei leng adiktak in ka gukbuai a, Lamka a ding a restaurant minthang khat a kimuh ding hon gen mawk in bang tum ahia ka chi thak phing hi. Kicheina ding vanhoih lah kinei lou. Tua ka sepna a uniform a hon piak uh kha ka kizepna hoihpen himai a.

Ka buai lawphing hi.

“Bangteng hileh, zingkal i thoh baih ngai nawn ding ahih chiang in lum phot ni aw, bawi?”

“Awle, ihmut kham louh ding a lauhuai ngutve.”

Lum ding in thousilen hoih ngellou leh luisim gimgemta, ka neihsunsun ka zaksuk a, thumna ka neih zoh in ka thallup suk hi. Ka puansilh ding in puanza dal khat ka awmtan ah ka kaitou a, ka mitsi hi. Himahleh ka lungsim a hak kelkul a, ka mitsi mahleng ka lungsim a halh mahmah hi.Ngaihtuahna tuamtuamte’n hon bom a, kei leh kei bang leng ka ngaihtuahna ah ka kituak kei hi. Julie hon chialna a va hoh ka ut a himahleh trop deuhmai a va hoh ding pen amah suzahlaktu lel ka hih khak ding ka lau zel hi. Julie in kei a ding in thilhoih hiaizah zouzai hon sepsakta a, tua ke’n amah chialna ngaihnepsak kha ka hihkhak ding leh alehlam a amah suzahlaktu ka hihkhak ding leng ka lau zel hi.

Sawtkhop ka ngaihtuahna a kisual nilouh ziak in ka ihmu thei kei a, ka mit bang hong kham gawp a, atawp in ka mit ka hakkhe khong hi. Vanlam ka etleh inn tung a bi kigante kikal vangte kal ah neuchikchik vak hong kikhoh lut a, inn baang lam ka etpheileh gawten luigawptate kikalhna kikal vang ana lian lawsimta ahihlam a kimu thei hi. Huaite akipan in innkong lam a kha vaak in a tatvak hilhialna a kimu thei hi. Huchi in, ka nu phawng lou a thoh sawm in awl chikchik in ka thou khialkhial a, pangkhang tau ah ka va dingkhia hi.

Khavak in kei hon mu nuam ahi diam ah, hon ensuk bang hial in vaak pempom a, aksite bang in kei hon en in a mit uh phe leplep uhi. Ke’n leng a thuk dingdan tuan ka theih louh man in ka nuihmai toh entou in ka mit ka phesak leplep sam hi. Avangkim in zou huihkhisiang hong leeng hiauhiau a, ka ihmut suahna tengteng a lamang hi. Ngaihzawng nei ngei nailou hinapi in thawmhauna khat ka nei mawk a, lungleng hi in ka kithei mawk hi. ‘Solkha ah maimit gawmni’ chih pih theih ding khat beek nei leng ka chisim mawk hi.

Pangkhang tau a ka dinlai mah in ka lungsim a hong kisel nawn a, thutanna bangmah la thei lou in ka om nilouh kha hi. Atawp in, ak bang hong khuan hial man in innsung ah lut in ka lupna ngei mah ah ka lumsuk a, hiai hun in bel ka ihmu thei pah vanglak hi.

Zingkhua hong vaktak in ka thoukhe pah a, Lanva Lui dung a suangte kaikhawm in, sun chiang a ka nu seek sekna mun ah ka sekhawm hi. Ka nu’n ann huan leh tuitawi chihte a sep zoh vek nung in zingann ka ne ua, kei leng ka sepna pisa lam zuan ding in ka khe in ka paisuk keuhkeuh hi.

Ka nu’n ka kuan ma deuh in, “Julie toh na kimuh ding uh na mangngilh khade aw?,” nuikawm in hon chi kheuh a, kei bang ka lehzum dek hial hi.

“Ash! Nu, huai ah zaw ka kimuhpih dah mai ding aw?”

“Nang thil khat sawm inla na nuai ate’n bangmah gen lou in hon zui keile uh bang na chi ngaih di’a?”

“Bangpi gen ding leng nei ke’nte ka chi a eivoi. Bangteng hileh, ka sepna mun ka va tung peuhmah phot di’a huai apan kingaihtuah ding hi’nte.”

Hiai thute nuikawm a gen in ka kuankhiat san hi.

Pisa ka tun in midang tam ana tung naikei ua, ka guk et velleh Dr. Julie leng ana tung nailou ahih tuak hi. Dr. John, Sir John ka chihsek pen uh bel ana tung khin thamta a, tuni ka hunzat dingdante uh leng gelfelsa in koih khin vekta hi. Kei mohpuakna ding bang hi hiam chih ka va etleh sunnung dak 2 pek in om pan a, lamdang ka sasim hi.

Sir John kiang ah ka va pai a, “Sir, kei a kha kibawlkhial hia? Sunnung dak 2 pek ka tangkha mawk a,” ka va chi hi.

“Oh! Nang kha sunma man lou ding chi a Dr. Julie in hon gen inchin huaiziak ahi. Bangchidan a nang tua hong kuan thei thak mawk na ngut a?,” hon na lehchih daihta mai hi.

‘Eih!’ ka lungsim in ka chi a, ‘lawmnu’n bang gen ut ahi peuhmah diam maw huchia hon na gensak mawk’ chi in ka lungbuai geet hi. Nasepna puante silh ka hihman in va hoh taleng mi hon mute’n hon thei lawtel ding ua, zumhuai ding hivaw chi in ka ngaihtuah hi. Ka kingaihtuah nilouh a, lah ka nasep ding dak nih lam a kipan pan ding ahihman in pisa mun a om nilouh pen kei a ding in lem tuanlou hi. Huchi in, New Bazar lam ah hih ding mel leng thei lou in ka pawtkhe suk mawk hi.

Adiktak in Julie muh bel ka nak ut lua a himahleh amau kitenna ding thu hon kum dek hi ding a ka koih tinten ziak in huai thu ka va zak hial ding ka ngaingam kei hi.

Hoh louh mai ding ka chih chiang in ka tung a Julie hoihnate ka ngaihtuah chiang in ka zahtak mahmah a, athukzaw a gen in ka na guk ngaih luat man ziak in kei ziak a lungnuam loupi a a om ding ka ngaingam kei hi. Huaiziak in, ka kisa thak a, Julie toh kimu ding in ka thupuk thak hi.

Tedim Road ah New Lamka lam zuan in khe in ka paitou keuhkeuh thak hi. Lamnawl a sana bawlna a sanapi kikhaite ka gal-etleh zinglam dak sawm leh akim bang ana ging manta mawk hi. Huchi in Lailam Lui Leipi ka peltou a, Hmuia Veng peltou in, sawtlou in Damkam Bazar ka tungtou hi. Huai mun ka tun chiang in bel ka dip bang a kawhial a, ka nervous mahmah mai hi. Ka gimsim toh ka lungphu bang kinoh diak a, agal apan ka et touh chiang in Saulim Restaurant chih kigelh bang ka sikmuh thei zawmah hi. Huchi kawmpi in ka paitou zel hi.

Amun ka tungta a, kahtouh ka sawm huntak bang in chu ka chii a liing supsup maimah a, ka dip kisai toh ka lungphu kinoh mahmah in ka kho-ul bang hong pawt zungzung maimah hi. Ka kingaihtuah thak a, ka hichi om mawkleh hoih lou ding ahi chi in kei leh kei thathak kipia in, hu bang diklut hianhian zen in ka kisakhawl hi. Ka kho-ulte ka puanak a hulkeu tawm in, hu bang la thakthak hial in ka kisa a, huchi in kongkhak lam zuan in ka kaltouta hi.

Ka lut phet in nungak felmel mahmah khat in, “Sir, kimuhpih ding sehkholhsa na nei a, dohkan giatna ah na lawm ding in hon na ngak khinta ahi,” hon chi zawmah hi.

Ka damsung a ding a ‘Sir’ chih kei tung a ka zak patna ahih toh hon nervous sak zou mahmah a, dohkan giatna a hon na ngak omsa bang om ahihdan hon gen laiteileh ka kiphuzot hial hi.

“Aw, kipahhuai e,” chi a maisan zen a nuikawm seisai in ka lut a, dohkan giatna ding etbawl in ka pai heihoi hi. Ka lut patna ahih toh asung bang thupi ka sa a, huai mun a ana tu ka muhte bang leng gimnamtui hattaktak kinuh a puanhoihtak a kizemte ngen ahi uhi. Keilah chu MSF a ka sepnate hon piak puante in ka kithuam maimah hi. Akhenchiang bang in, Dr. Julie in amah ka huat theihna ding a houh hon sukzahlak sawmgu khat houh ahi de-aw peuh ka chi hi.

Dohkante ka et chiang in a giatna dingdan ka mu kei a, dot phut dinglah kuamah ka theih om louh man in alai ah ka ding deldol khaden hi. Ka huchih chiang in huai mun a sem nungak khat in hong naih pah in, “Pu, dohkan bangzahna ahia na zon?,” hong chi a, hon thei ngei lua hileh kilawmtak in nui heuhau hi. Kei leng a fel hih utsam ka hihman in, “Dohkan giatna,” chi gaih in, ka om eu-au sam a, amah leng nuihmai hiven chi in ke’n leng ka nuihmai ka suah teisam hi.

Huchih laitak in agal ah sap nungaknou khat hong ding ka mu geih a, ke’n leng zum selua in, “Julie!,” chih toh amah omna lam naih phei ka thuah kha phut hi. Huai kei hon awlmoh a ka dohkan zonna hon hilh sawm nungaknu bang ka ngaihsak man nawn kei zezen hi.

Julie a piching mahmah a, nui heuhau kawm a hon en in a tutna ah tusuk nawn hi. Ka kim-le-kiang ua omte’n kei hon en ua mak hon sa uh ahi chih ka thei mai hi. Ka va lut phutdan, tutna ding ka va muh pah louhdan, ka va paukhiat kuaukuau khak phutdante tengteng sangmah in leng ka kicheina in huai mun a tute mit a lazaw in ka thei. Midangte kicheinate sang a aniamzawk luat ziak a a mit uh la ana hilim hi.

Julie kiang ka tun in ka hi tottot kha zezen a, tutna bang huai mun a semte’n a hon kawkmuh ma un ka kaiging doldol kha a, midangte dai sipsip a tu a, a houlim om sunsunte leng awlchikchik a houlim ahihman un ka tutna kaihging khak pen ngaih baih mahmah hi. Mite’n hon en duam nawn ua, ka mai hong san pompom mahleh bangmah chilou chih bawl in ka om tattat hi.

Awl in ka tusukta hi.

Huchi in, nek ding ka duhduh uh ka gen ua, hong piak ding uh ngak in ka om hi. Hiai mun pen meivak vak kiukiau ahihman in nungak leh tangvalte houlimna mun ding in hoih mahmah mai a, laa ngei leng a ging hiauhiaute ngen a khah ziak un lungsim damhuai in ka thei hi. Midangte ka envel a, nui kawm a houlim toh, khut kilen a houlim toh, kihawmthoh chi thei mahmah un ka mu hi. Himahleh kei lah Julie in bang thu hon kikuppih ding ahia chih leng thei nailou in ka om hi.

“U Pau,” Julie in awl in hon sam a, eipau a hon zatleh ka ngaina diak hi. Bangchidan a eipau a ‘u’ chi a hon sap dingdan thei ahi de-aw ka chisim a, himahleh va dot mawk pah lawklawkdan om lou ahihman in ka dai hi.

Julie kha kichei leng ana siam mahmah ahihdan hiai ni in ka theikhe thakthak hi. A puanak silh toh bang kilawm mahmah a, a pansim silhselh toh a taksa kilangsim hilhial zou a, himahleh puanak nuaisilh a neih ziak in a pumpi bel kilang lawtel lou hi. A lipstick nuhdan leh eyebrow nuhdante amah toh kituak uh ka sa mahmah mai a, a sam tang leh siang sitset a khahkhiat in etlawmsak sem hi. A khekol leng kigak hun litlet a, a bag neu kuah toh kituak mahmah hi. Sapte khenkhat bel a chi uh ham in kilip toh kibang sim mahleh amah bel nousuak in mam hinhen maimah hi. A khutchin nasan leng poudik chih theih ding hial khop in etlawm in siang hi.

“Nang a ding a ka hih theih omsun,” chi toh shopping bag hoih deuhmai khat, asung a van omte toh hon pia hi. Ka etleh puanak leh khekol ban ah khedap leng om hi in ka thei hi.

“Eh! Bang van ahia?,” ka chi himhim hi.

“En leteh na thei mai ding,” nui kawm in hon chi a, “Inn na tun ma chu na hon louh ding eikha aw,” hon chih behlap hi.

“Dr. Julie, hichibang khawng na hon piak louh ding hi a…,” ka chihleh ama’n kintak in, “Julie. Julie chauh chi in hon sam in ka chisek hilou maw?,” chi in hon melh cheuh a, hon nuihsan heuhau hi.

“Eimahve. Nungak Julie,” chi in ke’n leng ka chiamnuih zeih hi.

“Ka kipak petmah. Ka nu’n a muh chiang in chu a kipak law di’a a kap zezen ding e.”

Huchia ka kihoulim sung un ka nek dingte uh hong tung man hi. Thu tuamtuam, ka sepna nuam ka sa hiam chihte khawng hon dong in hon houlimpih a, nuam ka sa mahmah hi. Bangtan hiam ka nek nung ua ka gaih siang ma deuh un chitak leh thutak mel deuh in hichi’n hon gen hi.

“Sir John in nidang pek apan in hon na deih gige a, tua hiai lam a ka hong pai theih bang leng amah toh semkhawm ding a hon deih man a hon sai felsak pah ahi.”

Tu chiah a a thugen pen a zak a nuam hetkei a, himahleh ka omdan a kilatsak louh teitei ka sawm hi. Ka thil nek bang ka gawl ah taang in ka valh zok thei kei a, lah siatkhiat mawkdann om lou ahihman in ka om lelaw kha hi. Atawp in awl in ka valhlut thei khong hi. Bangmah ka gen louh ziak in ama’n genzom nawn hi.

“Amah ahihleh kou lam a di’a mi hausa mahmah khat tapa neihsun ahi a, migentheite a it ziak a hichibang a nna sem ding a hong kipekhia ahi.”

“Aw, ahi maw. Mi hoih mahmah leng ahi chih a hon deihsaknate leh a nasepdante apan in ke’n leng ka thei kheve.”

A thugen ka na behlapsak a, ama’n leng a lu su ngaungau in ka thugen diksa ahihdan hon lak hi. Huaizoh in…

“Tu kal sung Sintawpni a kikhamna a zungbuh kipiakna neih ding ka sawm uh ahi a, na hong tel teitei ding ahi aw?”

Ka thil neklai ka thalh phuh a, ka kiim ua omte bang in hon en duam hial uhi. Julie in tuisiang hon pe pah in ka nungzang hon zutsak hi. Ka gawl bing hileh kilawm in om a, ka thuzak in ka lungtang a sukkhak toh ka thil nek in ka gawl a sukkhak toh ka buai sim hi.

Sawtlou chik nung in ka gawl adan hong om thei a, ka tu hoih nawn hi. Himahleh ka thil nekte bel ka duh tha a suak nawn kei hi.

“U Pau, hehpihtak a na hong tel a na hong theihpih ding deih a hon chial ka hi,” hon chi thak a, ke’n leng nuamsa lou in, “Awle, hi thamtham e,” chi in, awling zen in ka dawng a, ka muk bang a liing pepelh hial hi.

“Ka kipak lua, Dr. Julie. Kei ka na pai masa phot ding aw,” chih toh awl a dinkhiat ka thuah hi.

“Khawldih, u Pau. Ka gennop tampi omlai ahi. Hehpihtak in dingkhe naikei maive maw?,” hon chih teng ka za a, himahleh ka lungsim ah bangmah a om nawn kei. Hon van piakte leng ka phawk nawn kei a, inn kong lam ka zuan hi. Julie zahlak ding ka lauh man in kuamah hon theih louh teitei sawm in pilvan ka suah hi.

Julie in ka nekmante uh alom a pia in hon delhpawt zui pah hi. Inn lam zuan in Dorcas Hall kong lam ah khe mah in ka pai a, Julie in a gari in hon delh tou hi. A hon phaktak in tuang ding in hon chial a, hon van piak pen hon piak nilouh ziak in ka la khong hi. Huaizoh in, “Ka hong khatou ding,” hon chi hi.

Ka khawl a, amah en kawm in a gari tohlet ah ka va daklut a, “Dr. Julie, ka tung a na siamnate thupi lawkhin a, kei mizawng leh tagah in hon din zou lou ding ka hi. Ka kipak lua a, ka omdante ka ngaihtuah chiang in ka zum lua hi. Tu’n leng ka hon muh tam chiang in kei ka buaise deuhdeuh zaw a huaiziak in ka hon muh tam louh hoihzaw ding ahi. Nou tegel ding mah a Pasian in hon siam ahi ding, na kituak lua uh. I kiim-le-kiang a omte hon theih sese sang in awl in nang leng ana kiksuk mai inla, kei leng kei chauh in ka paitou zaw mai ding,” chi in ka paikhiatsan hi.

Hon van piakte tawi in inn ah ka pai a, ka nu ka muh chiang a ka hilh dingdan khawng ka buai mahmah nawn geet hi. Zuau lah ka nu ka hilh ut kei a, thudik hilh lenglah den chiang in ka lungkham ding lau in hon lungkhampih lawzel kha diam chih ka lauzel hi.

Bangziak a hichi puaknat tel ka diam aw chihte bang ka ngaihtuah thakthak a, ‘a kingai leng hiloupi a ka hichi kineihsak mawk adik thei di’a hia’ chi khawng in ka lungsim ah ka kidong sek hi. ‘Tagah lubawk ka hihlam bang kimangngilh ka hi maw, ka hai ngeimai’ chi in ka lu peuh ka beng zel a, himahleh ka theih louh kal a Julie ana it lawman ka hihdan ka thei thakthak hi.

Inn ka tun in ka nu’n ka van tawite hon na saang pah in, en a, mobile handset thak khat leng ana omlai zawmah hi.

Ka nu’n, “Kua hon piak ahia hiaite, bawi?,” hon chi hi.

“Julie.”

“Oi! Na hampha ngeimai, bawi. Julie zaw Pasian in ei tagah gentheite huhtu ding a hon sawl hi taktak ahi chih ka theita. K’on kipahpih lua!”

“Eh! Nguttak. Tuni a na kimuhna uh bangchi ahia, hon hilh ngut dih. Ka za nuam lawzok.”

Ka nu kilawpdante ka muh chiang in ka hehpih zezen hi. Ka lungsim in ‘nu aw, kei na tapa ahawmpi hi keive. Na hon suan mahmah hang a bangmah hilou ka hi. Hon ngaidam in aw’ ka chi nuam hi. Kipahmel kipusak kichimah lengle hithei khin lou ahi ngei ding a, ka nu’n hon theikhia hi.

“Bawi, bangchi e? Na om dedu a, na om nuam lou hialeh?”

“Nuam mah ei, nu. Bangmah ka chisam a.”

“Julie toh na kimuh ua ban hon gen ahialeh, hon gentave.”

Gen ding bang haksa ka sa a, ka nu khem lah ka ut ngal kei a. Ka dawng zok kei a, huaitak in amah leng hong patau sim thak a, ka van puakte bang va koih hoih masa in, huaizoh in tutna lam ah hon kaiphei in hon tusak hi. Kei apan zaknop nei ahi chih haih vual ahi kei.

Ke’n leng hilh ding chi in ka kam awl in ka kaa hi.

(VI)

“Nu, ka Sir John uh toh Dr. Julie kiteng dek ahi uh.”

“Bang e? Chik chiah eita?”

“Tua chu a hun ding gen nailou uh. Sintawpni chiang a kikhaamna a zungbuh kipiakna neih sawm ua huai a tel ding a Dr. Julie in hon chial ahi.”

Ka aw liing dingdan in hong kisa mawk a, ke’n leng ka aw la thak in ka gawl ka hihsiang a, ka thugen ka sunzom hi.

“Ke’n zaw amau tegel mahle kituak uh ka sa a, ka kipahpih mahmah,” chih toh nuih nalhnalh ka thuah hi.

Ka nu’n ka omdante hoihtak a hon na en gige ahihman in ka lungsim sung tawng khat a a naa mahmah chiucheu khat om ahi chih a thei hi.

“Bawi, i damsung tomchik a zaw i it leh ngaih mah toh kiten a hun zatkhawm ding ahi. Anuam-ahaksa teng leng i itpente toh i thuakkhop theihleh a thuak bang nuamtuan zou ahi.”

“Nu… Dr. Julie ka it in ka ngai ka chikha ngei a eita?”

Nuisim heuhau leh zumsim kawm in ka chi a, ka nu’nlah hon gintak tuak hetlou hi. Hon thusim lou deuhmai hileh kilawmtak in hon mukpik kawm in hon nuihsan maimah zawmah lai hi.

“Kei leng nang bangbang a tuailai ana hingei sam ing a, nungak khat ka na hih ngeina ah tangval bang leng ka ngaih ana omsam ahi. Na lungtang a om tengteng kei kiang ah hon genkhe vek sipsip kei mahlechin ka theihsiamsa tampi om ahi.”

“Nu…,” chi in ka kawiphei a, “Nang na om peuhleh a hun hilou maw? Ngaihzawng leh zi chih khawng leng bang a ngaituan sam a maw?,” ka chi a, ka mittui a pawt nilnel hi.

Sunnung lam a ka sepna a va kuan ding chihdan himahleh ka va kuan peih kei a, lupna tung ah ka lumdap hi. Ka huchih a hon muh chiang in ka nu’n thuak haksa ana sa lua ahi ngei ding a van lam entou a mitsi kawm in a muk phun siausiau hi. Ka nu omdante ka en a, kei ka kihatsak poimoh ahi chih ka thei khethak a huchi in, tha thak la in ka inn pamzek ua ka nu suangsekna mun lam ah ka va pai hi. Sek khat la in ka sekpih a, Julie tanchin ka mangngilh theihna ahih khakleh chi in suang khop leh sek peuh ka tha-it bawl hi.

Nitak in kisuhalh ding chihbawl in ka kuankhia a, himahleh nidang a ka T.V. etseknate ana om louh man un pawtna ding dang tuan thei lou in inn ka tungkik pah leklak hi. Ka nu’n bang mak hon na sasim ahi chih a omdan apan in ka man pah a, himahleh bangmah a hon gen tuanlouh ziak in ka lupna tung ah ka va khawl tawldam hi. Sun a Julie hon van piakte ka nu’n hon tawi a, ka lupna tung a hon koih chat in hon houpih hi.

“Bawi, Julie in Sintawpni chiang a na silh ding a hiai puante a hon piak hikha ding eive. Silh himhim mah, na kihun hiam ah…”

Ka dawng kei a, hoihtak a kikhep thripthrep huai puante tuh ka phelkhia hi. A puanak leh khekol ban ah khedap leng a kihun vek a, Julie in lei siam ka sa mahmah mai hi. Ka nu’n hon en a, “Nang bangbang a melhoih leh duangching tapa ka neih khak kei a ding in a thupi lua! Nang hon neikha loute bel lenlai taan ahimai uh,” chi in hon chiamnuih a, kei leng kipak in ka nui pah thremthram hi. Putawn khawng lel de a ki-et ahihman in ka deihkhop chiah kei a, zingkal chiang hiam a nisa vaak nuai a kiteh a ki-etvel hoih thak nawn ding in ka koih phot hi.

Hon mobile piak pen ka en a, ‘aman tawm lou hial deive maw’ ka chi lungsim a, ka pakta mahmah hi. A hon van piakte ka ngaihtuah thak a, zumhuai bang ka sa hi. ‘Khut leh khe bei leng hi hial lou ing a bangziak a hiaibang a thilthawnpiak amawk a saang ka hi mahmah de-aw’ chi in ka kisiamtan kei thak hi. Huchi in ka nu kiang ah, “Hiaite ka pe kik mai diam?,” ka chi a, himahleh ama’n bel, “Bawi, pe kik hial leteh Julie lungsim a naa lawkha diam maw?,” chi in hon lehdot hi. Ke’n leng ka ngaihtuah a, ‘huchih belbul hialzaw a heh lua mah kibang di’a amah a di’a leng nuam lou ding eimahve’ ka chi thei thak hi.

Zing ninou lenmual dawn ah hong sankhe singseng nawn a, ka suang kaihkhawmte nawn in a sekna mun ding ah ka koihkhawm hi. Dak giat a hong gin in ka nu’n ann ne ding in hon galsap a, huchi in keileng ka pai hi. Ann ne mengmeng in, ka khamtak in sepna lam a kuan ding in kintak in ka kisa nawn a, khe a pai ding ka hih ziak leh azekaipen a dak 9:30 a pisa tun a ngaih ziak in ka kinoh deuh gige a ngai hi.

Sun nitum in mun tuamtuam ah sawlvial in ka om a, Julie toh khatvei ka kigal muh uh chih louh sun hun in ka kimukha kei uhi. Amah leng damlou en leh veh in mun tuamtuam ah vakkhia a, Sir John in a makaih ziak in gari ka va heksak a ngai kei hi. Nitak a inn ka pai ding kuan in kongpi bul ah Julie amah chauh in ana ding a, ka muh phut ziak in ka kiguih hial hi.

“Eh! Na kiguih hial a. Sikha mu kisa na maw?,” chi in hon chiamnuih hi.

“Nang paikhin k’on sa a…”

“Hiai a omlai hiveng ka paikhin kei chihna himai aka. Tuni chuh nang toh ka tunna Hotel tan khe in kizui touni aw?”

“Mawkmawk eive! Mi’n a hon gen ut naklai un kiton kei ni.”

“Kua’n bang a gen a eita?”

“I seppihte bang in hon nunggen siausiau sek uh hilou maw?”

“Gensuk-gentou tave uh, poi mahmah kei. Hong oh, kiton ni.”

“Chimawk!”

“Chimawk chih! Hon zumpih mawleh?”

“Eh! Hi zenzen lou e… Nang houh mite’n a hon muhsit loh ding uam maw?”

“Musit e?! Bangziak in maw?”

“Kei leltak…”

“Bang e ‘kei leltak’ na chihsek? Nang ganhing kisa na maw? Mihing chiatchiat kua kisimmoh ding om tuan ahia? Bible in ‘Pasian in kisatheite a dou a, himahleh kingainiamte hehpihna a pe naknak’ a chih na theika maw?”

“Himah zel e maw…”

Huai thute a ka kidawn tuah sung un Julie in ka veilam ban ah hon len chot in hon paitouh pih latlat hi.

Bangtan hiam ka paitouh nung un, “Zanlam in na ngaihdan loupi thu ka hon gen phut kha a, hon ngaidam in aw, u Pau?,” hon chi hi.

“Bang eita? Kei khawng nimnem kiang a ngaihdam na hon nget phut mawk?”

“Mite’n kei pen mihausa khat tanu leh US apan ka hih ziak ban a sum leh pai kei apan na lamet man a nang ah kei hon deihta a hon sa uh. Himahleh nang bel hauhsaknate leh taksa etlawmnate ziak a hon deih na hi kei chih ka hon thei. Mite’n a ut teng uh gen mahle uh na hon deihtakna pen a siangthou deihtakna ahi chih ka theichian law mahmah a, ka kipak mahmah.”

“Ka hon deih ka chi ngei himhim a eita?”

“Eh! Hon deih lou mawleh?”

Julie in hon chiamnuih dawn thak a, keilah zum kisa in ka mai bang a san tualtual hial hi. Hichibang khawng a hon houlimpih chiang in kei a ding in anung lam chiah thuakkhoptek a phasek zel hi. Kei bel ana kipe hoih thei law pahpah ka hihna ah Julie kamsiam lelmai ahih leh hih louh bang khenkak haksa ka sa maimah sek hi.

A tunna Hotel Venus k’ong ka tun un Julie in, “U Pau, thil khat ka hon hilh sawm pen tu’n ka hon hilh theita diam?,” hon chi hi. Ke’nlah amau kikhaam hiam ahihkeileh a kitenna ding uh toh kisai mah hikha zel ding hi a chih ngaihsutna ka neih man in ka dawng kei hi.

“Ahihlelah k’on gen naikei mai ding. Mangpha hoihtak man inla, nunu leng na kipaksak gige ding aw?,” chi kawm in ka taklam biang hon tawpsak cheuh hi.

Huaitak in hon phuzot khat om bang in ka thei a, ka taksa pum teng hon zen zungzung zou hial hi. Dawi dide in ka ding dinden a, va tawp thuktei mawkdan lah om lou ahih chiang in ka mit bang ka hak lian kelkul kha zezen hi.

Ka lu sungaungau kawm in, “Mangpha, nangle,” chih toh kintak a paitouh pah ka thuah hi. Ahitak a gen in, paisan lou a a kiang a omdet a, a khut tegel lenkawm a a mittang dum kilkel leh siang sitset en kawm a amah ka itdan chiltui kaizen a gen ka ut gu mahmah zaw hi. Ka zum siatluatna lam a paisan kha pah ka hizaw lim hi.

Lampai bang ka zaang tuan hial in ka thei. Inn tun phet chiang a limlang a ka taklam biang et bang ka ut a, ka lampai bang ka kinoh kholoh zezen hi. Inn tung phet in ka kihahsiang zokzok a, huaizoh in ann ka ne somsom nawn hi. Mi nih kia om ka hihman un ka nu’n ka tun baih hiam ka tun hak hiam in leng ann nek ding hon na ngak ngitnget gige hi. Tu’nle a hon na ngak hi. Nidang tengteng sang in hiai nitak zet in chu annkam limzaw hileh kilawm in ann ka ne hokhok hi.

Huchih lai in ann hon thuk kawm in ka nu’n hon dong hi. “Bawi, nidang inlah houlim kawm hiauhiau in ann i nesek a, hilehleng tunitak chu nui heuhau kawm a pau lou hial in ann na ne mengmeng mawk a. Bang thu om ahiale? Pawtkhiat kinna ding nei na maw?”

Huai thu a hon dottak in ka kiphawkkhe guih a, ka ann nekdan ana kin lawkha ahih ka theih thak man in ka awl nek deuh hi. Huaizoh in, “Nu, na ann huan a lim lua. Meh leng lim himai,” chi in, nuikawm sim heuhau in, amah lam leng en zezen lou a ka annkuang en kawm in ka nu ka phat hi.

“Peuhset mahmah eive! Tunitak na omdan tuam lua ahi aw. Nidang in na hong tun chiah na kipumsilsek a himahleh tuni in na khut leh khete chauh sil in, na mai bel na phiat hetkei.”

‘Kareh! Nute’n tate hichia hon na sim etet mahzaw hi ding eive ua maw’ ka chi lungsim a, huaizoh in…

“Tuni chu nin khollou hilou ka maw, nu?”

“Nidang inle na huchi nit ngei tuan khol sam a… Hilehleng na kipumsil gige voi.”

“Hahaha… Nu, na hou khemkhem k’onsa… Haha…”

“Hilh taak hon sa nawn lou neive maw, nungak melhoih na muhleh?”

“Hahaha… Mawkmawk eive, nu. Huaidan hi zenzen lou e…”

Ka nu’n hiai thute nuikawm a a gen ahihman in hon chiamnuihna ahi chih ka haih kei. Ke’nlah thil omdan tengteng ka nu va hilh vek tel hial ding zumhuai ka sa gusim zel hi. Huchi in, houlim nawn lou in ann ka ne ua, ka ne zou hak kei uhi.

Nitak pawtkhe lou in inn ah ka om a, tap kiang a tu kawm in ka nu sekbul kisia ka bawlhoihsak hi.

Lum ding a ka kisak laitak un ka phone hong ging kauh a, ka lukhung a ka koih a hihlam ka phawkkhe thak hi. ‘Kua hi peuhmah ding hiam zankhangkhang a’ chi in et sawm in ka phone ka la hi. Ka honkhiatleh “1 Timothy 6:6- Lungkimna toh kithuah Pasian limsakna tuh punna thupitak ahi” chih teng ana kigelh a, a hon khaktu ka etleh Julie ana hi a, ka nui heuhau hi. Phone a hon piaklai a amah number gelhlut khitsa a hon pia ahi chih ka theikhia hi. Ke’n leng kintak a gelh in, a hon Bible tang khak toh kizom tang 7na a –“Khovel ah bangmah i lutpih kei a, bangmah i pawtpih thei sam kei ding hi” chih kigelh teng ka khak kik a, ama’n hon thuk nawn tuanlouh ziak in ke’n leng ka phone koih in ka lumta hi.

Hun leh nite hong paizel a, Sir John leh Dr. Julie kikhaam ni ding hong tung petmahta a, va hoh ding ka lin mahmah mai hi. Himahleh Julie in ka va hoh teitei hon ngiat hi. Huai ni a mipi paikhawmte mai a ama’n thugenna tomchik neih sawm ahihman a huai a thugen pen ke’n va za leng chih a deih ziak a naktak a hon chial ahi hi. Ke’n leng hoh mai ding in ka thupuk thei khong a, ka nu toh leng va hohkhawm ding a hon hahgen luat zawkmah ziak in ka nu toh ka va hoh sawm uhi.

Sir John deihna bang in ka pisa uah hunzatna neih dingdan in vai geel in om hi. Kei leng ka nu toh analh theipen a kichei in ka kuansuk sawm uhi. Lamet louhpi in Julie in car khat kei leh ka nu pi ding in hon sawl a, a hong gentak bang un ‘theikhial na hi ding uh’ ka na chih khum kha hial hi. Amau leng theikhial lou ahihdan uh kam a a gen ban uah lai khat Dr. Julie in hon tawisak pen a hon lah ziak un adik mah ahihdan ka thei a, huchi in kipak, lah kisuanlahna toh kidim in huai car ah ka tuang ua, ka kuankheta uhi.

Mipi paikhawmte mai ah Sir John hong dingkhia a, a mel ahoih kia hilou in a duang chin mahmah ziak in mi lak ah dawk baih in tallang tuam mahmah hi. Paikhawmte muakna a hon neihzoh in Dr. Julie hon samkhia a, huchi in a nih un dingkhawm ua, kituak in etlawm petmah uhi. Limla toh khutbeng toh mipi buaizen ua, ka nu’n ahihleh kei hon sim-et zel in ka khut hon letsak kinken hi. Ka chii kiliing ahihman in ka tha bang a zoi depdup a, akhenchiang in ka khuisa hithit zel hi. MFS driver khat lel ka hihna toh a malam ah leng ka tu ngam kei ua, atawpna vual ah ka tuzaw uhi.

Sir John in microphone hon la nawn in, nuihmai kawmtak in Dr. Julie lam a kihei in, a sakhau apan zungbuh bawm mantam leh etlawmtak mai hon lakhia hi. Hon hongkhia a, diamond a bawl huai zungbuh tuh a etlawm in a deihhuai petmah mai a, mipite leng kamka heuhou hial uh hi in ka mu hi. Kei leng muchian ut in ka ngawng bang ka saangsak ponpon zezen a, ‘Dr. Julie in huai zungbuh bangchidan in a saang de-aw’ chi a ngaihtuah kawm in, kamka zen in ka en hi. Ka huchih laitak in Dr. Julie in leng Sir John lam nuihmai kawmtak toh hon zuanphei hi. Ka chii hong liing dedeuh a, mu ut in deihsak mahleng ka en ngam nawn kei a, kongkhak lam zuan ding in ka dingtou hi. Ka nu’n ka khut a hon len in a kahmel toh tu lai ding in a lu in hon kawkmuh a, himahleh ka mittui paak niuniau toh ke’n bel thuak haklua ahi chih bawl in ka paikhiat sawm thouthou hi. Huchihlaitak in Julie aw in, “Hehpihtak a kuamah in inn kong lam ana zuan lou ding in ka hon ngen ahi,” a chih aw nemtak mai ka za hi.

Kei lah ding khinta. Tut nawn phut mawk dinglah hilou, paikhiat teitei dinglah hilou chihdan khat in, laklohtak in ka omkha leiluai hi. Huchi in, khatvei beek Julie mel enlai ding chi in Julie omna lam ka entou hi. Amah leng a mittui paak a, amuk bang kiliing ahi chih ka galmuh thei a, hon muhtak in a nuihmai suah teitei sawm hileh kilawm in hong nui peipuai hi. Ka nu’n ahihleh ka khut a a hon letna khah lou in hon len den a, tusuk ding in awl in hon kaihsuk bawl hi.

Ke’n leng ka nu mel ka en thak a, mittui toh kidim ahi chih ka mu a, ka hehpih mahmah mai hi. Ka nu’n ka pawtsan teitei ding hon awilou ahingei ding a, a lu awl in hon peikhum hi. Haksa ka sa mahmah a, lah zungbuh a kipiak hial uh ka mit a ka muh ding ka ngaingam kei zel hi.

Microphone hong ging kuau ziak in lamdang sakna toh ka entou thak a, Julie in a thugen sutzop sawm a a betging ahi chih ka thei hi.

Huchi in, ka it mahmah lah amah kiang a ka genkhiat ngam ngeilou leh kei a ding vual a ka koih ngam louh; ahihhang a ka taan khak ding ka lauh mahmah Dr. Julie in a gawl hon khuahsiang thak in a thugen sunzom ding in a kam hon kata hi.

“Ni bangzahhiam paita in mi khat kiang ah gennop nei ka hihdan ka hilh a himahleh a hon gensak louh man in, tu in, hiai hunlem a la in ka hon genkhe ding,” hon chi hi.

Kei hon chi hi ngei ding a ka koih man in ka kiguk zephawk a, mite hon theih ding bang ka lau hial hi. Ka lungsim ah ‘bangziak a va hohkha sese ka diam maw’ chi in kei leh kei ka kidong thakthak hi.

Dr. Julie in a thugen hon sunzom nawn a…

(VII)

“Khovel ah mihingte’n eimah nopsakna ding en in, eimah angmasialtak in i khosa khasek uh. Himahleh Pasian in huai ding in eite hon deih kei a, himahleh midangte a ding a miphatuam leh vualzawlna tuntu hi ding in hon deih zaw hi. Thupina leh minthannate i zongsek ua, hauhsakna leh lalnate i delhkha nakkhem uh. Himahleh hon Siamtu Pa Pasian in i tantawk a lungkim a, Amah thupina leh pahtawinate pe ding in hon deihzaw hi.

“Tuni in, kou gam lam a ding a innsung hausa leh kisaktheihpih tham min liantak nei sungkuan apan hong khangkhia Dr. John toh ka neu ua kipan in lawm hoihtak ka na hi ua, amah bang lawm hoihtak ka neihkhak man in hampha ka kisa hi.”

Hiai thute Julie in a hon gen chiang in kei a ding in bel dakkhiat ngam vual ahi nawn kei hi. Kuamah theihpih ngellouh in ka zumtha lamlam a suak a, tagah-meithai’ tapa leltak in ka mangmat ding a leng phulou kinepna ka na neihkhak mawkmawk khawng hai ka kisa deuhdeuh hi. Dakkhe ngam nawn vual ding ka hi kei. Ka kunsuk dide a, ka tutna nuai leilak a miksi vialvakte tuh kei a ding a zakdah ding leh kei a di’a poikhoih loupente a hong hi maimah uhi.

Midangte’n bel kei zum leh dah lamlam theipha lou in, Julie thugente bang thupi sa mahmah in khutbet toh kipahpihna langsak zaizai uhi. Ka kiim leh kiang a tute ngei in leng thugen siam a sakdan uh leh pil a sakdante uh kikum tiptip ua, za ut kholkei mahleng kinaichikchik a tu ka hihman un a kiguk houlimna thute uh ka za pha mialmial thei vek hi. Khat nu ngial in houh Julie pen melhoih a sakdan leh Dr. John toh kituak a sakdan gen mangmoh hial hi. Kei mimaltak in leng Julie tuh melhoih kia hilou in pil leng ka sa a, fell eng ka sa hi. A thugente leng dik in hoih ka sa vek hi. Himahleh, thudik leh thuhoih i chihte bangle ei hon kaapkha hiam ahihkeileh ei hon hetkha ding a bat chiang in a zak nuamlaw tuan khollou thei hi.

Ka nu’n leng dakkhiat ding nuamsak louhna nei ahi diam ah amah leng leilam ensuk in kun dedu a, a mittui a nul lamtak ka mitsik in ka mu hi. Ka khut taklampang a veilam khut in hon letsak a, kihatsak ding a hon hasuan ahi chih ka theisiam pahmai hi. A om nawn lou ka pa bang in tutan hon na dampih lai hileh mipi mai ah ka tagahna om lou ding a, ka zumna bang leng hon liahkhuh kha theisam ding hi a chihte bang ka ngaihtuah hi. Ka pa mel mu man kei mahleng ka nu’n a gendante apan in theihsiamna hau mahmah leh lungpiching mahmah nei mi ahi chih ka thei hi. ‘Bang ding a hiaibang thute teng za ding a hiai mun a ka nu tonpih khasese ka diam aw’ chi khawng in ka ngaihtuah thak vungvung a, ka nu’ mittui ka luansak man in kei leh kei bang ka kimohsa thakthak hi.

Huchih lai in microphone hong ging chit a, huaizoh in Sir. John aw ka za hi.

“Tuni a i paikhawmna san uh zoh pah theih ahi a,” hon chihleh ka dip bang a kisai dup hial hi. Huaizoh in, “Himahleh, hun nanung lam a zoh ding a koih ka ut ziak in Julie tanchin tomchik ka hon gen zual lai phot ding,” hon chi nawn a, huaitak in bel ka puak azaang tuan in ka thei hi. Sir John in Julie tanchin toh kisai bang thu hon genkhe peuhmah hiam chih theih utna toh amah lam ka entou hi.

“Julie ahihleh a neulai apan mi thumang mahmah hinapi in a chih louh chi hetlou mi khat ahi a,” chi in nuikawm in hon genbeh a, huai a gen toh kiton in Dr. Julie melhphei gaih hi. “Himahleh kei sangmah in leng migentheite itna a hauzaw in ka thei,” chih behlap hi. Huai thute a genlaitak in Dr. Julie leng ana nui heuhau a, Sir John thugente dik hina ahi chih bawl hileh kilawm in a lu ana su ngaungau hi. Dr. John thugen tuh ke’n leng dik ka na sa mahmah mai hi.

Mipite’n leng a khut uh khawng beeng ua, thu kigen pen kipahpih mahmah uhi.

A kilkhat lam ka etpheileh ka seppih lawm khenkhatte houlim chitchit kawm a kei lam hon en zel khawng ka mu a, ka ki-uiveihphawk sim hi. Mite’n ‘hiai mipa leng tagah-daipammi ahih kithei lou a sap nungak khat deih mawk’ hon chi ding uh hi a chihte bang ka ngaihtuah chiang in ka zum tuntun a, khenkhatte gendan lazualle, khutchin kawm a tummang bang uthuai ka sa hial hi. Ahi a, ke’n Julie ka tan khak taktak ding ana guklauh om pawl leng om ahi chih ka haih tuankei. Ka hihna diktak hon thei a hon simmoh ding mi hunkhop om ahi chih leng ka haihkei a himahleh hon hehpih a ka hihna bangbang a hon pom nuam leng omsam ahi chih leng ka thei veve hi.

Huchi kawmkawm in ka lungsim in vanlam ka entou a, “Pa aw, ka hon mohsa ngam kei. Himahleh hiaibang lou deuh ka tan ding adang hon pia hizaw leteh athuak nuamzaw deuh maithei ding hi a maw…,” chi in ka khasiat thu Pasian kiang ka tuntou hi. Huchia ka lungsim a ka chih laitak in lamdangtak mai in innkong lam ah hong puakging phut khat ka za hi. Ke’n leng huailam ka en pah a, kei chauh hilou in hiai mun a om tengteng in tua thilging lam ka nga chiat uhi. Huaitoh kiton in ke’n leng dinkhiat ka thuah pah a, ka va etleh ka pisa kongmaitak ua gari pei li nei nih nasatak a kiphukha tuah ging ana hi maimah hi.

Gari kiphukhate lam mipi’n delhkhawm kheukhou pah ua, himahleh a lohngaihna thei tuanlou ahi ding uam ah a etthoh kheukhou maimah uhi. Kou hiaimun a hunzangte leng tamtak ka taipawt uhi. Kei bang a taipawt masa lam ka hi a, ka va mukha hoih mahmah hi. Huai gari tegel a kise dimdem a, a sung a tuang mi sagih ding velte leng khophawklou a om uh ahi chih ka thei hi. Kintak in ka va naih a, panpih theih dandan in ka va panpih hi. Kin-le-buang a doctor a poimoh man un ‘Dr. John leh Dr. Julie sam zok un’ chi a mi kikou aw ka za a, himahleh program neih laitak ahihman in ke’n bel sukbuai louh theihdan om hiam chi in amau tegel sap ka sawm nai tadih kei phot hi.

A driver tegel sangmah in a puakte uh liamnakzaw ua, a lu ua si pawt toh, a bil leh a nakvang ua si pawt chih khawng toh a kidim uhi. Ke’n leng ka gari koihna buk a tailut zok in, ka heutute kiang a leng phalna la masa man tuanlou in ka gari heksek pen ka va lakhia a, huchi in mipite kiang ah damlou liamte kintak a hon guanlutpih ding in ka chial hi. Ka guanglut zokzok ua, huchih sung in Dr. John leh Dr. Julie leng hong tung man ua, ke’n leng kisuanlahna lianpi toh, “Sir, hiai a liamte ke’n sak a Lamka Damdawi Inn ah ka va koih pah ding a nou na program uh ana zangsuak maive ua maw?,” ka chi hi.

Sir John bel chimoh sim ahi chih ka thei pah a, himahleh Julie in bel, “Hithei mawk lou e. Kintak in damdawi inn ah paipih ni. Na gari hingsak meng in,” hon chi a, a kivatna puan siangthoutak leh etlawmtakte pammaih sa lou hial in sisan-naisan a kidim damloute lak ah hong kihentel tei hi. Ka kisuanglah lawsim a, Sir John ka etleh a lu khuat leh a sam zut khawng peuh thuah in a lu su ngaungau hi. Ke’n leng huaitak in hon phal ahi chi a lasuk in kintak in ka gari ka hingsak a, damdawi inn ah ka tailuttouh pih hi.

Ka gari a damlou liam hon zuite’n ‘nurse, nurse… doctor, doctor…’ chi khawng in sam loiloi ua, ‘hong kin uau, kinve ua…’ chi khawng in noh uhi. Julie in leng damdawi inn a doctor duty omte kiang ah, “Kei leng doctor ka hi,”  chi a a MSF I-Card lakkawm in sisan kai zungzung a liamte’ liamna mate humsak hi.

Kei hihtheih huai damdawi inn a liamte tut chihtan ahimai a, a liamte damdawi inn sung a a puaklut vek zohtak un ke’n leng ka gari a sisan neng baangte awl in ka siak tiautiau hi. Hoihtak a siang taktak thei lou ahihman in Lanva Lui hiam a awl a avek a va silsiang dingdan in ka koih thak hi.

Anung sawtlouchik in Sir John leng amah gari in hong tungtou a, kei a hon muh phet in, “Dr. Julie lah, koi a om a?,” hon chi pah hi. Ke’nlah ana enzui kha tuanlou ka hihman in koi pindan pentak a Dr. Julie lutkha hiam chih ka thei kei a, a hon dotna dawng pah thei lou in ka kamka heuhou kha nilouh hi.

“Dr. Julie lah ka chive!,” hon chi thak a, ke’n leng ka lu khuat luailuai kawm in, “Sir, thei lou ka hi. Den a kibuai lua a…,” ka chikhe numnum hi. Huaitak in Sir John leng patauh meltak toh damdawi inn sung ah lut a, ke’n bel amah ka enzui nawn tuankei hi.

Sir John hong tungta ahihman in Dr. Julie toh hong ton thei ding hive un chih bawl in ka gari toh pisa lam a pai ding in ka kisa hi. Ka gari a ka kahtouh laitak in Julie aw ka za hi.

“U Pau, ana pai naikei ou. Hiai damlou liam nihte private clinic khat a x-ray va lak ngai ding ahi,” hon chikhe kuau hi. Huai hun in Dr. John leng Julie veilam ah ding hi.

“Eh! Huchih ngai om ahi maw? Awle, poilou,” chih toh kum thak thuah in huai damlou hon zawnpawt dekte uh ka va zawnpawtpih hi.

Julie in huai x-ray kila dingte makaih ding in hong kisa a, a huchih chiang in Dr. John in awi chiah lou ahi ngei ding a, “Julie, tomchik k’on houpih thei zual diam?,” chi in ngen hi.

Ke’n leng huaitak in, “Dr. Julie, nang ana om mai in. Huai a lehkha na gelhte hon pe leteh ka va lasak thei mai ding,” ka chi pah hi.

Himahleh Julie ngaihdan a hihchi hetkei.

“Dr. John, ei chu a liam i hi kei a denlam chiang in leng awl in i houlim thei ding. Hiai a liamte a bel akikhel chih om thei ahi,” chi a gamtang futfut kawm in kei bang ka gari hek ding in hon kawkmuh hi.

Dr. John in gen ut neisim lai in a khut bang vaan kawm hial mahleh bangmah a genkhe kei thak hi.

Kou leng ka taikhia uh.

X-ray ka lakna ua pan in a liamte khat maiguh kitam in a liangbul lak leng khaang hi. A khat pen ahihleh a nakguk thum kitan a, a baan taklam khaangzek om hi. Huai result teng tawi in damdawi inn ah ka paikik nawn uhi.

Damdawi inn ka tunkik nawntak un Dr. John ana om nawnta kei a, ke’n leng nuamsa lou sim ka hihman in Julie kiang ah, “Tuachu azia om deuhta khat suak hiven, ei leng pisa lam ah kik photle adiam?,” ka chi hi.

“Ok. Nunu bangle ana patau lawkha thei hiven maw,” chi in Julie in hon dawng gaih hi. Huchi in, thil tuamtuam tamlou hon hihfel masa a, huaizoh in ka pisa mun lam uh zuan in ka kipawsuk uhi.

Julie in hichibang a buai hunsung a leng bangchidan a ka nu ana phawkpha lailai ahi ding chih ka lungbuai guukna a hong hi nawn taget hi. ‘Ke’n bawn ka nu lamlam leng ngaihtuah kha lou phot zezen hi’ng a, ama’n kei sangmah a leng ana phawkzaw zawsop’ chi in lamdang bang ka sa lehlam hi. Ahitak a gen in, lamdangsa lamlam leng ka hizaw kei a, a kigukpah lawlam ka hizaw hi.

Gintak sang a hun ana hekzaw ahihman in ni bang leng ana niam mahmah manta hi. Huaiziak mah leng ahi ngei ding a, Dr. John in mipi paikhawmte kiang ah hunlem dang khat a kimukhawm nawn ding in mipite ana kikhensak hi. A khonung a Dr. John in a gendan in bel, hiai ni a tuahsiatna hiaibang om lak a amau kikhaamna hunzat va zatsuak teitei ding pen vangphathuai sa lou ahih tuak hi.

“Nunu, nana patau lua hia? K’ong kik hak uh hia?,” chi in Julie in, ke’n ka nu ka houpih ma in, ka nu a muh phet in houpih pah hi. Ka nu’n leng, “Patau lou e. Nou khawng om hive uh chin. Nang kiang a ka tapa a om peuhleh kei a ding in patauhna ding bangmah om in ka thei kei,” chi in dawng gaih hi. Julie toh ka ki-entuah ua, ka nui heuhau tuak uhi.

“Dr. Julie aw, tuni thiltung phut pen poi k’on sakpih mahmah,” ka chi a, a hehnep dingdan tuan ka theih louh man in huai teng gen toh gari ah ka nu lutsak ka thuah hi.

“Pasian in a mite a ding a hoihna ding a thil tungsak sek ahi a, tuni a leng ahoihzawkna ding a thil hong om hikha thei ahi,” chi in Julie in kei hon lehhehnep daih hi.

Ke’n leng amah enkawm a ka gari a lut in, “Sir John kiang ah leng poi k’on sakpih thu ana gen in aw. Gari a sisan baangte Lanva Lui a ka va sawp keileh siang taktak zou lou ding a bat ziak in ka va sawpsiang zual ding aw?,” ka chi hi.

“Ana khawldih!,” chih toh pisa sung ah Julie in tailut thuah a, hun saulou a man nung in a kikhekna vante leh van khenkhat toh hong pawtkhia hi.

“Dr. John kiang ahle ka gen a, poilou a chi,” chi kawm in ka gari ah Julie hong tuanglut gaih hi. Ka nu bel upata chih bawl in a nung ah ka tusaksek a, huaiziak mah in Julie tutna ding ka veilampang a tutna ana awng geih ngut hi.

Gari ka hingsak a, huchih laitak in Sir John leng kongpi ah hong paikhe chet a, ka kiang a tuang Julie gal-et hi.

“Ash! Nang Sir John kiang a na hon zuih ding gen lou mo?,” chi in kisuanlahna lianpi toh Julie ka dong hi.

“Ka genleh lemsa lou sese a hilehleng kei hong pai thouthou ka hi.”

“Chimawk!”

“Taizok zenhouhve!”

“Zawmah lai!”

“Kin!”

“Ash!”

“Bang ‘ash!’ amawk a?!”

Huchi in ke’n leng alohngaihna thei tuanlou ka hihman in ka taikheta hi.

“Hat tai deuh ou, den chiang in Dr. John in hon nungdelh khaleh,” chi a chiamnui kawm in Julie nuikhe lualua a, ka veilam liang hon betsak toh gilvun naa zen in ka nui uhi. Ka nu leng ana phur lawsim adiam ah, amah leng ana nui kulhkulh a, Julie bang in, “Nunu, poikei maw?,” a chih chiang bang in, “Poilou lua, poilou lua!,” ana chi saisai zawmah hi.

“U Pau, tuni chu duty dang kinei nawn tuanlou hi a, gari pen Tuitha Lui ah i va silzaw ding uam? Nunu leng i vakhalhpih kawmna hi ngal mai ding ahi.”

“Poilou eive. Lanva Lui leng tulai tui kanglua inchin tui tawm a gari sil nuam khollou ahi.”

“Nunu, hoihtak in tuang ou. Tuitha Lui lampek a va sil ding hi hang ei…”

Nuam ka sa vek ua, kipahna ngen in ka dim uhi. Gari ka hek kawm in ka lungsim ah ngaihtuahna tuamtuam hong lut hi.

‘Vangtah mahmah ka kisak lai a kei sang a hausazawte bang leng a neihsa uh gari mah a sukliam leh hihbai a om maimah uh hi a maw’ chihte ka ngaihtuah chiang in ‘Pasian in a langtang a ka hamphatdan hon musak ana hi eizawve’ chih phawkthakna lungsim ka nei hi. Niteng nektawm zong sapsap di’ale kou bang nasep ding mulah a Pasian in hon koih louh ban a tagah sapsap di’ale ka nu’n hon  dampih lai chihte ka ngaihtuah thakthak a, ‘Pasian kiang a kipahthu gen ding tampi ba keizawve’ ka chi hi.

Tuitha Lui ah gari ka nih un ka silkhawm uhi. Ka nu’n agal ah hon na en a, tui khawng kougel bang kithehkawt tuah a naupanhuapipi a ka omdante uh khawng a hon muh chiang in a nuih ana za thei lua hi. Kipak lua ahingei ding a akhenchiang in hong nuikhe lualua a, huai chiang in kou tegel leng kilawp deuhdeuh in ka thai-it deuhdeuh zelsek uhi. Julie bang tui a ka nak thehkhak chiang in ka nu ana patau a, ka min a hon sam in dawmkawm deuh a kimawlpih ding in hon hilh zel hi. Gari ka sil zoh un ka nu kiang ah ka va khawl ua, gari sung a apple leh nahtang leisa ana om lai ziak in huaite ne kawm in ka khawl tawldam uhi.

Julie in, “Nunu, ka u Pau’ pa kha melhoih sim hi deive maw?,” hon chikhe phut a, kei leh ka nu bang nui kawm in ka ki-entuah thakthak hial uhi.

“Mel leng hoih, a lungsim leng hoih ahi,” ka nu’n chitak mel deuh leh lungzuan melpu deuhmai in dawng hi.

Ke’n bel ka thil nek tha-it in, pau lou in ka na ngaikhia hi.

“Ahimhim in maw, nu, ka u Pau bang ngai hileng na phal diam?”

Julie in hiai hon chih beh nawnleh ka apple neklai bang ka thalh hial hi. Ka nu’nlah poisak chi hetlou in, dawng ut lua hileh kilawm in a khut vaidek zen in a kam hon kaa hi. Huaitak in ke’n…

“Thil hithei lou ding pipi khawng gen a houlimlim louh ding ahi. Kisa uah paita ni uh,” ka chih khum hi.

Ka nu leng hong kidek thak a, bangmah gen lou in dai thak hi. Julie lah nui heuhau kawm in dingtou a, ka nekbangte uh polythene sung a guang nawn in a vante la a, gari lam zuan hi.

Ka ma deuh ua Julie pai hiven, gari lam zuan a ka pailaitak un ka nu’n hon phugaih a Julie delhsuk ding in hon sawl bawl hi. Keilah zum kisa in a hon gukhilh pen ka kitheihmoh bawl hi.

Ni bang leng tum petmah ding hita ahihman in inn lam zuan in Tuitha Lui apan ka taikhia uhi. Lamkal ah thu tuamtuam kihoulim in ka chiakzen ua, nuam ka sa mahmah mai uhi.

Sawtlou nung in Hotel Venus ka tung ua, huai ah Julie ka khakhia ua, kei leh ka nu’n pisa mun a gari ka va koih masak uh a ngaih ziak in huai lam ah ka taisuk uhi. Gari ka koih zoh un, ka nu hat nawn ngellou ahihman in awl-awl in ka nu toh khe in inn lam zuan in ka paitou uhi.

Ka nu’n ka lamet louhpi in, “Bawi, Julie in leng Dr. John sang a nang hon deihzaw hivaw maw?,” hon chi phut hi.

Kipahhuai lah bang hilehleng Julie i chih pen mi pil leh laisiamtak ahihman in a lungsim diktak theih haksa ka samai hi. Huaiziak in ka nu adawn dingdan bang ka thei kei zawzen hi. Anung sawtlou in…

“Nu, ahimhim a nang hon deihsak na maw?,” chi in ka nu ka lehdot a, ama’n leng hon dawn pah dingdan thei tuanlou ahingei ding a, pau lou in bangtanhiam ka kiton tou uhi.

“Ka tapa neihsun na hi a, na deihtak nungak toh hon khen ka sawm kei. Keizaw zingni-thaini mah a leng bei phut thei bang ka hita, huaiziak in nang hinkhua ding gel hoih poimohzaw ahi,” chi in ka nu’n hon dawng hi.

“Nungak ziak in nang toh kigamlat ka ut kei. Nang toh kigamlat sang in nungak nei lou a om ka telzaw ding, nu,” ka chi hi.

Ka thugen in aguktak a ka nu kipaksak mahmah ahi chih a omdan apan in ka thei hi. Ka nu kipahna ding lelmai a ka gen hilou a ka lungsim tawng apan ka gen ahizaw hi.

“Bawi, Julie kiang a na lungsim diktak na genkhiat hunta ahi. A hon pom leh pom louh chu thutuam hitaleh, hichia laklohtak a na om geigui det ding ngaingam lou ka hi.”

Ka nu thugen in ka lungsim hon khoihkha mahmah a, dik leng ka sa hi. Himahleh bangmah in ka dawng kei. Houlim kawmkawm a tontou ka hihman un gintak sang in tung baih ka kisa vanglak uhi.

Huai zan bel zankhovak phial in kei leng ka kingaihtuah a, Julie kiang a ka lungsim tengteng genkhiat ding leh genkhiat louh ding kikal ka saikak nilouh hi.

Akmasa hong khuan hialtak inzaw khatvei ka lungsim a om tengteng Julie kiang a genkhiat vek ding in ka thupuk thei khong hi. Ka nu lupna lam ka etleh, tusun ka pawtpihna uh gimsim houh adiam ah ana nakging hithit a, huchi in kei leng lungnuamtak in ka ihmu thei khongta hi.

Zingkhua hong vakphet in ka lungsim ah ‘bangchileh Julie toh hunlem ka mu thei ding ua’ chih kiakia hong omta hi.

(VIII)

Sun nitum in Julie toh kimuh tuah a houlim theihna ding hunlem ka zong nilouh a himahleh ka mu thei mahmah kei hi. Huchi in, kei kia khawng a ka omkhak chiang in ka lungsim ah suangtuahna tuamtuam ka nei zel hi. ‘Ka nu bang in Julie pen deih bangtak a houlimpih thei hileh bel hon gensak zek thei sam ding hi a. Tualah, zan a ka kithuahkhawmna hun sung teng ua leng a kihou ding chiang ua keimah in a gennopte uh ka lehsak vek ngai hi a,’ chihte bang ka ngaihtuah hi.

Huchia kei leh kei kingaihtuah leh lungsim suangtuahna hun a hunawl ka zat laitak in Sir John hong pai phut a, ka khemuk awl a hon suihsak kauh in, i pawtkhiatna ding om. Na man hia?,” hon chi hi. Kiguih ka hihman in, “Man e,” chih toh dintouh ka thuah chat a, amah bang a nuihmel khollouh toh bang thu om ade-aw chi in ka lungbuai sim hi.

Amah gari chabi hon vawkphei gaih in, “Nang tuni ka gari hek ou,” hon chi hi. Ke’n leng chikmah a amah gari heek di’a hon sawl ngei lou ahihman in lamdang ka sa mahmah a, himahleh amah gari pen hoih mahmah henhon ahihman in a heek ding bel ka kilawp gu veve hi.

“Hydeout Park lam ah aw,” chi in gari sung a ka luttak un hon chi a, ka lungsim in ‘huai lamlam a abang om a maizen de-aw’ ka chi hi.

Lampi ah ka houlim tam kei ua, ama’n a sungkuante mobile phone in houpih in lamtawn in buaiden hi. Ka na zakdan in, banghiam ama’n a deihdan a thil pai thei lou ding om hihmel hi. Himahleh bang thu om hiam chih ka kan ngam vualkei.

A mun ka tun un midang leng bangzahhiam ana om ua, ahihhang in ka theihngei dingdan mel muh kuamah ka nei kei hi. Suntanglai ahihman in nisa khauhsim mahmah a, kou leng bukta kibawl khat lam zuan a ka paiphei kawm un cold drinks ka lei malam uhi.

Bukta sung ka tun un, tutna ding kidoh om hiven, huai ah ka tu ua, ka thil leite uh khat tuak in ka dawn uhi. Kuamah hon kimuhpih louh toh mak ka sasim a, ‘hiai mun a bang hih ding om a hon pikhia amaizen de-aw’ chi in ka na gukbuai hi. Himahleh aziak om a hon hohpih hi ngei ding a ka koih ziak in ka pau ngamkei hi.

“Pau,” chi in Sir John in sawtlou kihou louhial a ka tut nung un hon sam gaih a, “Julie toh ka kituakna uh hialeh?,” chi in hon dong guih hi.

“Sir, kituak lawtel na hi uh.”

“Taktak maw?”

“K’on khem kei, Sir.”

“Kipahhuai eleh.”

“Hilehle maw, Sir, zanlam a program kha hong flop sim mawk inchin ana kisuanglah lua ka hi.”

“Flop-tak ahi.”

“Ahihleh bang ni a neih thak ding in na lunggel aleh, Sir?”

Hon dawng hetlou in, kun dedu a a thildawn valhging kulh in leilam ensuk hi.

“Sir?”

A thil dawn pen dawn nawn a, huchi in kei lam hon en a, gennop nei hileh kilawm ka sa hi. Aguktak in ka dip bang ana hawm a, ‘hon hehsanna khat nei ahi de-aw’ ka chi lungsim hi.

“Pau, Dr. Julie toh kikhaamna ni ka nei thak nawn kei maithei uh…”

Lamdang ka sa lua a, a hon thugen dawnkik zok dingdan bang ka thei kei zezen hi. Ka dotchet sawmsim hang in ka dangtawng bang hong bing in ka awk tawtot hi.

“Huai ni a hoihtak a thil a paizang suak theih louh chuh poi petmah eive,” hon chih behlap hi.

A omdan leh mellatdan apan in poi a sa taktak chih ka theithei mai hi.

“Sir,” aw niamchik in ka chi a, “Na thugen omdan ka theisiam keina e?,” ka chi hi.

“Tangthu tomchik khat na za ut hia? K’on hilh diam?,” hon chi hi. Ke’n leng ‘aw’ chihna dan in ka lu ka susuk ngaungau hi.

“Nidanglai a khua khat om inchin huai a Hausapa’n kha vaihawm hivaw. Ni khat kho pawlam a a vakkhiatleh khonawl ah naupang khat, gawng gitget, gilkial mahmah hileh kilawm khat tuakkha hi. Ama’n huai naupang a muh chiang in hehpih law petmah a, a nungzuite kiang ah, ‘Hiai naupang kho sung ah pilut unla, a nek ding ann pia un. Ka tapate lak a khat bangbang in ka enkol ding,’ chi hi. A nungzuite’n leng huai naupang kho sung a pilut in hoihtak in kem ua, Hausapa’n leng huai naupang pen thumang sa in deihthoh mahmah a, amah tapate toh piangkhawm unau bang in kithuahsak hi. A hong kipatna thei lawtel ahihman in hehpih in it mahmah hi.

“Himahleh, hunte hong paizel in, huai a naupang lak pen hong pichingta hi. Ni khat, Hausapa kiang ah huai naupang in, ‘Hiai tan na hon kem piching a, Pu aw, ka kipak lua. Na tapate lak a khat bang in na hon en den a huaiziak in leng ka kipak kholdiak hi. Huchi ahih toh kiton in, ngetnop khat ka hon nei hi. Huai ahihleh, na hauhsakna kimkhat kei hon pia in,’ chi hi.

“Hausapa in it mahmah ahihman in thildang ngenleh bel piak a ut lua hi. Himahleh ama’n tapa dang thum nei lai ahihman in a hauhsakna kimkhat piak ding pen thil hithei lou suak hi.”

Hiai thute chitak mel deuh in gen a, ke’n bel bang pentak ziak a hiai thu hon gen ahi de-aw chih ka manban kei hi. Huaiziak in…

“Pu, hiai thu na hon gen in bang gen nuam hiam?,” chi in ka dong hi.

“Pau, huai naupang pen nang na hi.”

Ka kiguih hial a, a gennop dan khat om ahi chih ka theisiam pan hi. Hiai mun a kei hon hohpih bang leng hiai thu ziak hi ding hita e maw chih ka theikhe pan phing hi.

“A neulai apan Julie ka na deih ahita a, kuamah ka kal ua hong lut louh deih ka hi.”

Kup dingdan bang ka thei kei a, lah kum lou lua a hon sak khak ding bang ka lehlauh zel hi. Ke’nlah Julie kiang a ka itna thu im nawn lou a genkhiat ding ka thupuksa ahita man zel hi. Sir John ka et chiang bang in kei sang in leng itna lam toh kisai in hehpihhuai zaw hi in ka thei a, himahleh ke’n leng ka lungtang tawng apan Julie ana it lawmanta ka hihman in aguktak in mi dang a ding in phal haksa ka sa lawzel hi.

Pau ngellou a ka om hon muh chiang in Sir John in hon muangmoh deuhdeuh hi.

“Thil khat na hon hihsak ding deih ka hi, Pau.”

“Bang a, Sir. Nang a ding a ka hih theih omleh kidamlou hial in ka hon hihsak ding.”

“Ahihleh Julie kiang ah kikhaamna ka neihkhit theih louh nilouh pen uh nei zok ding in hon genpihve.”

Ka heutupa lah ka zahtak a, lah Julie ka ngailaw zel a, buai petmah in ka lungbuai hi. Sir John maitang et bang leng haksa ka sa hial hi. Hun paisa a kei hon huaidan leh deihsakdante ka ngaihtuah chiang inlah ka zahtak zel a, amah hon thil nget sunsun ka pichinsak louh ding thil hithei in ka koih kei zel hi. A hon tangthu gen omzia ka mankhe thakthak a, MSF a ka sepna muh pen amah hon deihsakna liauliau ahihdante khawng ka mangngilh hetkei hi.

Huchi ahihna ah, ke’n leng amah a ding a ka hihsak theih omsun hihsak ding in ka thukimpihta hi.

“Sir, hunlem masapen ah ka na gen pah ding. Ana patau kei in. Hilehleng kei thu bel a hon la lawtel kholkei maithei a hiven.”

“Ka kipak e, Pau. Ke’n nang lou ngal hon gensak ding nei nawn lou ka hi. Inn lamte lah ama’n ana zou vek maimah a…”

Sir John hehpihhuai ka sagu mahmah mai hi. ‘Amah lah a pil leh a siam ban a mihausa hilai hi a bang ding a Julie kiakia chitel ahi de-aw. A deihdeih nungak feltaktak mu mai ding hi a’ chi in ka ngaihtuah a, ‘itna zaw lamdangtak ahi’ ka chi lungsim hi.

Huchi in, huai mun nawsia in ka kik ua, lamkal ah Sir John maitai mahmahta a, himahleh alanglam ah kei bel ka kimaitaisak teitei sawm ngai a, haksa gusim maimah hi. Ka pisa lam ua hon paipih pah ding ka sakleh hotel khat ah hon lutpih a, ka duhduh hon gensak sawm hi. Himahleh duh leh lunggulh ka nei zou mahmah kei a, inn a pai a lup mai bang ka utzaw hi. Himahleh, Sir John mai a ka puakgik latsak ka ut kei a, amah a ding a ka hih theih omsun chi in ka mel ah bangmah lunggimna latsak ka sawm kei hi.

Duh lou sasa a nek ding bangbang hiam ka nek zoh nung un pisa ah ka tailut tou ua, Dr. Julie leh lawm dangte leng ana om khiukheu uhi. Julie ka muh chiang in ka itna pung hulhul in ka thei a, lah Sir John kiang a ka thukimna omsa pen ka phawk geuguau zel hi. Hiai ni chiah in chu Dr. John a ding hi in kei a ding a gen sawm hita himhim lengle akua-akua a ding in leng hunlem ka mu kei hi.

Nite mual ah hong liamzel a, ni khat tuh pisa ah kei leh Julie chauh ka omkha uhi. Ke’n leng hiai hunlem khahsuah ka ut kei a, kihangsansak in amah omna lam ka va naih hi.

“Dr. Julie, na kiang a gennop nei ka hi. Hun n’on pe thei diam?”

“Pe thei e. Sep ding om louh laitak ahi chih nang leng na thei hilou mo? Hehe…”

“Himah e.”

“Bang thu ahiale na hon gen ut zenzen chu?”

“Bang thu chihle om kholkei a hilehle…”

“Gennop nei a gennop om khollou zel maw? Haha…”

Kei leng ka tuike nuih viaivuai hi. Huaizoh in…

“Sir John toh chik chiang a kikhaamna bawl thak ding uh e?”

“Ka bawl hun ding uh ngaklah lua na hia?”

“Hi tuanlou e. Hilehleng Sir John bang in a ngaklah chilaw voi…”

“Kikhaamna bawl nawn lou ding bang hile ungla?”

Huai a hon chih chiang in kei bang ka na kigukpah sim maimah a, himahleh Sir John toh ka thukimna uh omsa pen ka lungsim ah dakging bang in hong kikhen ging zel hi.

“Bawl nawn lou chih chu bangchidan in maw?”

Hon dawng nawn lou in om a, a dohkan tung a laipek khat ah apoimoh loupi khawng thil mawk gelh tauhtauh hi. Sawtlou nung in…

“U Pau, gennop dang na nei hia?”

“Gennop chu hau ing a hilehle…”

“Hilehle bang?”

Ka itna thu gensuk ek mai bang ka ut a himahleh kei tagah liangvai khat in sap nungak try ding chih mawk khawng ka chi zel a, ka kizumpih lawzel hi. Huai pen thutuam hitaleh, ka Sir in hon sawlna a sangak palai a ka pan ding pen ka ki-awi thei mahmah kei zel a, Pasian in leng hon awi ding in ka gingta kei hi.

“Sir John toh k’on deihsak mahmah a,” ka chih pat kiangkiangleh ka aw bang hong liing abang hi. Genzom ut mahleng ka aw hong suak hetkei a, ka chii bang hong liing pian mawk hi.

Julie in, “N’on deihsak a ka kipak. Apoimohleh ama’n hon genna inte aw,” chi in a maigum hon suah a, ka kisuanglah lua hi.

“Hilou ahi, Julie…,” ka chihleh hon en gelgawl a, kei leng ka pau ngam nawn kei thak hi.

“Pasal na hihleh mi khutzat khawng a taitai a, mahni lungtang a om pen leng genkhe ngam lou a om detdut ding ahi a hia?”

Julie hong heh in hong khase mahmah mawk hi.

“U Pau,” chi in a aw hon kheniam thak a, “Bangtan nang apan itna thu hong pawt ding ngakngak lai ding ka hia? Gimhuai sa lou na hi maw? Keilah ka gim lawta a,” chi in Julie in hon gen a, a dohkan tung ah kunsuk in a mittui siak teuhteuh hi. Huaizoh in, “Na haksatdan ka hon thei vek a, himahleh ka hon musit tuankei. Na hinkhua a mi khat na hong suahna ding a kimuanngamna poimoh ahihdante bang leng ka hon zilsakta hi in ka kithei. Hinapi in, tutan in leng na kimuangngam nai hetkei. Kingaihsiatna leh tualniam kisakna lungtang na neihte na paikhe vek thei kei lailai chih ka muchian lua a, poi ka sa.

“Huchia kei hon it thei lou a Dr. John toh hon deihsak na hihleh na thu ka mang ding. Himahleh, ke’n amah ka itna taktak ana pe thei hileng sawtpek in kikhaamna kia hilou in kitenna leng ka na sai khinta ding uh. Tu in leng, Dr. John kiang ah tamveitak ka ngen a, mihausa khat toh kiten sang a mi hoih ahihpeuhleh miniam leh genthei khat toh kiten a, kei ziak a amah dopsang a amah leh a innkuante a hong khosuah theih teelzaw ka hihdan leng tamveitak ka hilh khinta hi.

“U Pau, nang chu maw, na zawn ziak kia hiam ahihkeileh ka hon hehpih ziak kia a ka hon it na hi kei. Himahleh ka hon muh ma akipan na tanchin ka zak a, ka hong zin ma pek a MSF, Lamka a semte tanchin teng Dr. John in hon hilh lai pek apan in ka lungsim na luah pah mawk hi. Ke’n leng a ziak ding ka thei tuankei. Pasian in ka lungtang a nna sem hi ding in ka na koih hi. Himahleh, tu in Pasian in nang leh kei kikal a itna khaugui a zam ding lemsa lou hi ding in ka gingtata.”

“Julie, aw Julie!,” chih toh pom a kawiphei bang ka ut mahmah a, himahleh heen a ka omkhak khittak man in ka om dingdan ka thei hetkei. Julie lah a mittui luang a, a mittuite ka khut a nulhulsak a, “Hon ngaidam in, Julie. Kei hihkhelh vek ahi,” chih mai bang ka ut hi.

Ke’n leng thuak zou samlou ka hi ngei ding a, inn kong lam ah ka diangpawt a, ka gari sung a lut in mun thoveng deuh khat lam ah ka taikhia hi. Huai mun lam a va khawl in gari sung ah ka mittui luangkhe zungzungte ka va nul hi. Van lam ka en a, “Pa aw, na kha beek in hong thuhilhve maw! Kei na tapa lungmawltak in, kei a ding a bang pentak hoih ding hiam chih leng ka thei zou kei. Julie ka itna lah a lian ngal a himahleh kei a ding vual a ka koih louh ban ah thukimna lah ka heutupa uh toh ka bawlkhinta ngal a. Sir John tung a ginomlouhna suah mawk ding ka diam? Julie kiang ah ka itna genkhia in ama’n leng hon na saang bang hitaleh, bangchi in ka khosakpih di’a? Pa aw, pa…,” chi in ka lungsim tengteng in ka thum a, ka kidik hithit mai hi.

Itna tangthu ka simkhak zeuhzeuhte ka ngaihtuah a, kei leh Julie tung a hong tangtung ahi de-aw chih bang ka ngaihtuah hi. Kei a ding a Julie in, zum leh zah khuallou a tamveitak pan ana la khinta hi a, himahleh keilah hichi mawk chi in ka kimohsa mahmah mai hi. Ka kingaihtuah nilouh a, sawtkhop ka kingaihtuah nung in, ka thupukna masa om pen mah sepsuah mai ding in ka gel nawn thak hi. Sapte’n “Itna leh galdouna ah adiklou chih om lou” ana chih uh pansan in kei leng thathak ka kipia a, ka mittuite hulsiang vilvel in, ka gari limlang ah nihvei-thumvei bang nuihmai dingdan kisin masa in Julie kiang lam ah lut ding in ka taikikta hi.

Ka lungsim leng hong zaang deuh in ka thei a, Julie kiang a ka itna thu ka pat dingdan bang ka tai sung in ka kizil gu hi. Lampi ah mi khat in baltin kot dandan a pua in pak nalh leh etlawm taktak ana zuak a, ke’n leng rose pak hoih ka sakpen khat ka lei a, Julie kiang a nuihmaitak a piak dingdan ngaihtuah kawm in ka pisa lam uh ka delh hi.

Kilawp mahmah in ka gari apan ka kumkhia a, Julie pindan lam ka zuan pah hi. Ka gawl bang khuahsiang thakthak hial in ka kisa a, ka chii liing sim mahleh ‘pasal kei vele, bang di’a gen ngam lou mawk ding’ chi in ka kihangsansak hi.

Julie pindan kiu masa loupi a a kongkhak ka hon phutleh Sir John ana tu mawk hi. Amau leng kiguih hial in lamdangsakna lianpi toh mittang lianpi a hak lelaw kha hial in, a kam bang uh kaa heuhou kawm in hon na en uhi. ‘Chik kal a Sir John ana tung man ahi de-aw’ chi in ka lungsim in ka ngaihtuah a, kei mah leng zumna toh pumdim in ka omkha leiluai hi.

Ka taklam khut a rose pak nalhtak mai ka tawi a muh zawkmah lai ziak un huai ka tawina ziak ding theih utna toh lamdangsakna in pumdim uhi.

“Eh!,” ka chikhe kha phut zawmah a, lut suak ding hia ahihkeileh pawtkhiat ding chih kaal ngaihtuahna lungsim buaitak toh kongbul ah ka ding kha den gelgawl a, ka mai bang hong san tualtual in ka thei hi.

(IX)

“Bang a, Mr. Pau? Hong lut aw,” chi in Sir John in nuihmaitak in hon na muak hi. Kei leng pawtkhiat phut kikdan om nawn lou ahihman in ka lut suak mai a, tutna awng khat ah kilawp ngellou in ka tusuk nap hi.

Julie bel a pau kei himahleh ka khut a ka tawi rose pak pen a en nilouh hi. Sir John ahihleh kipahmel mahmah hi.

“Na pak tawi nak hoihna maizen e. Kua a ding a na lei ahia?,” Sir John in hon chi a, ke’n leng ka dawn dingdan thei zok zezen lou in, kam kaa heuhou a amah leh Julie entuah kha nilouh in ka om hi.

“Kei a ding hia?,” Julie in nuisim kawm in hon chi hi.

“Himah ei,” ka chi khekha phut a, huaitak in Sir John in lamdang sakna mit toh hon et phut ziak in, “Eh, hilou! Hiai pak kha… i…i… hiai pak kha,” ka chi tuantuan kha popop nilouh hi.

Sir John in, “Bangchi na hia? Na pak tawi pen kua a ding a na lei ahia chih leng thei lou na hialeh?,” chi in hon nuihsan luahluah thak a, himahleh hon kipahpih a nui zaw a hihmel kei hial.

Julie ahihleh ana pau lou in dai dide in om hi.

“Lamlian a kong taitouhleh mi khat in pak nalhpipi tamtak ana zuak inchin ke’n leng hoih sa lua a hon lei mawk ka hi,” ka chikhe mualmual hi. Amau tegel ka zahtakna toh ka pau buaigai dek hi.

“Rose pak i chih khawng kimawk lei mengmeng lou eingalve. Kua a ding chi deuh a na lei himhim ahiale?”

Sir John dotna aw ka za nawn pah hi.

“Hiai maw…,” ka chih patleh Julie in, “Nute khawng bang leng pak leisak zelzel hoih mah ahi. Na hih hoih lua, Mr. Pau,” chih toh a dohkan a file khat lakhia in kei hon pia a, “Hiai file kha Cashier kiang ah na va pe zual man diam?,” hon chi hi.

Ke’n leng huaitak in, thumu kisa in, “Ka nu a ding ahi,” chih leh dintouh thuah in, “File va pe thei mah ning,” chih toh lak thuah in, maisan zen in ka pawtkhia hi.

Julie pildan ka theikhe thakthak hi.

Sep ding teng zou a nitak ka pai dekkuan in Sir John in mi khat kei hong samsak a, ka va pai hi.

“Mr. Pau, na loh kha thak apan hon khangsak ka hi. Aziak na thei hia?,” chi in Sir John in hon gen a, “I thukimna bangbang a kei a di’a pan na hon lakpih ziak ahi,” chi a kipaktak a hon pumkawi kawm in hon gen hi.

“Eh! Ahihleh maw, Sir. Julie toh nou kikhaamna nei theita ding chihna mo?,” ka chikhe kha pah lawlok hi.

“Julie in ni nih sung k’ong kingaihtuah lai ding a huaizoh chiang in k’on hilh ding chi ahi,” chi in kipak deuhmai in hon hilh hi.

Sir John maitang ah nuihmai suah mahleng ka lungsim guktak ah ka kap hi. “Pau, haina tel chia maw,” chi in kei leh kei ka lungsim in ka kihou a, “Na hai man a na ittak taan ding neitave. Na thei hia?,” chi peuh in ka lungsim ngaihtuahna ah ka kimohsak hi.

“Mr. Pau, huai na pak tawi kha na nu kiang a na piak chiang in hiai sum toh leng pekhawm in aw?,” chi in Rs. 2,000 hon pe mawk hi.

Nui leiluai kawm a amah en in, “Sir, nang a ding a ka hih theih omsun ka hih ahi. Nang ziak a hiaitan tung ka hi chih ka haih kei. Sum na hon piak pen ka kipak lua a himahleh ka la thei kei ding,” chih teng lel ka gen hi.

Sir John kipak lua ahingei ding a sum pen hon pe teitei a, ka sakhau ah hon guansak in, “Hiai chu na lak louh theihlouh ahi,” hon chi a, ka nial zou kei hi.

Pau nawn tuanlou in inn kong lam ka zuan a, kongkhak bul ah Julie ana ding mawk hi. Ka muhtak in ka kiguih hial a, gen ding thei tuanlou a kam kaa heuhou in ka om hi. Ama’n leng hon awi chi hetlou in hon en a, huchi in hon paikhiatsan hi. Sir John in bel Julie om lamlam thei lou hi ding in ka gingta hi.

Huai nitak in ka pak tawi pen ka nu ka pia a, mak hon sa lua hi. Chikmah a pak puak ngeilou khat tunitak a ka puak mawk ziak in kipak mahmah a, aziak om hi ding peuh in ngaihtuah a, hon dong nilouh hi. Ka nu ka kawi a, “Nu, nang bang a nu hoih ka hon neih ka kipak lua,” chi in ka kidik hithit a, huaitak in ama’n leng Julie toh ka kal uh banghiam om hi ding in hon muanmoh kholoh hi.

Sir John hon sum piak ka nu ka pia a, ka nu’n a gintak pah theih louh ziak in hon saang nuam lou nilouh hi. Koilai hiam a ka muh hiam ahihkeileh kua a hiam ka guklaksak khawng peuh hi ding in muangmoh a, hon kanchian tuautuau nilouh hi. Ke’n bel ahidantak ka gen a, atawp in theisiam khong hi.

Ka Sir John uh ka zahtak man a hiaitan thil tung ahihdan a theih in ka nu’n poi sa mahmah hi. Himahleh ka hinna ding ua thuman poimoh phot ahihman in ka nu’n ka thiltuah a puakdan siam ding in hon hasuan a, Julie ngei leng mangngilh dan kisin ding in hon kun hi.

“Bawi, khovel ah ei toh kiphuloupi lametna i neih khakleh ei a gim hilel kihi ding ahi. Huaiziak in, tua i dinmun toh et in Julie mangngilh theih pen nang leh kei a ding a chidamna hizaw maithei ahi,” hon chi hi.

“Nu, himah e maw. Ka na kinem saang lawkha a himah ei. Julie zaw chikmah chiang in ka mangngilh kei ding himahleh ka kimangngilhsak sawm ding aw. Hon theisiam maive maw, nu, nangle?”

Ka nu’n, “Bawi!,” chih toh hon pumkawi thuah a, ka nih tuak un ka khase mahmah mai uhi. Ka lungsim in, “Sanggah lai ah naa lua sa’ng,” ka chi vungvung a, lah ka hihtheih a om tuankei hi.

Mittui-naptui toh huai zan ka zang uhi.

A zing nitak in Julie in inn ka tun nung in hon call a, nitak khat kei toh pawtkhiat mawngmawng ut ahihdan hon hilh hi. Lamdang bang ka sa lawtel a, himahleh ka heutu khat ahihna ah ka nial ngam kei. Ka nu ka hilh a, huaizoh in Julie in hon na ngak in a chihna mun ah ka va pai hi. Bangtanhiam ka ngak nung in ka seppih lawmte driver khat in MSF gari khat in Julie hong kha a, ka thum ua pawtkhawm ding ka kisak uleh huai mun apan in Julie in driver pen kiksak hi. Amau kihoulem khinsa ahih tuak ua, ka lawmpa leng kik pah hi.

“Ahihleh koilam pha ding i hiale?,” chi in Julie ka dong a, a tunna Hotel a va khak chih khawng lou ngal nitak a pawtkhawm kha nailou ka hihman un ka nervous sim mawk hi.

“Mission Compound lam ah.”

Huai teng liuleuh in hon dawng a, et leng a hon en tuankei. Ke’n leng gari hingsak in BSF Road ah ka taitoupih vengveng a, Pearsonmun a taisuak tou in Mission Compound lam ka manohpih hi. Bang hih ding chi hi hiam chihlah ka dong ngam nawn tuankei a, koi a bangtan taitouh ding hiam chih leng ka thei tuankei. Ama’n a gen matan khawl lou a tai mai ding in ka lungsim in khensatna ka nei hi.

Bangtan hiam ka tuntouh nung un mun khat ah hon khawlpih a, hon khawdakpih hi.

“Endih, u Pau,” chi in mualtung a lamlian pucca road hoihtak pai hiven, huai lamlian nawl a ding kawm in hon houpih a, “Lamka khopi zaw nitak chiang in a etlawm diak maw?,” nui hiauhiau kawm in hon chi hi.

Kei leng Lamka zaang lam ensuk in ka kihei a, meivak vaak singseng leh khenkhat pheleplepte ka galmuh in lamdang ka sa a, etlawm in thupi leng ka sa hi. Ka lungsim in ‘aw Lamka, Zou suan namchih lenkhawmna khopi, thupi in etlawm hinatel chia maw!’ ka chi vungvung mai hi. Kho tung lam apan ka muh patna leng ahih ziak adiam ah thupi ka sa petmah a, ka en heihoi kha hial hi.

“Julie, hiai mun ah na hon hohpih a ka kipak lua. Ka muh patna leng ahi a, thupi ka sa lua!”

“En thak inla ngaihtuah mahdih, u Pau. Huai a i muh Lamka khopi thupidan pen khopi dangte sang a tungtuang zaw hi in na koih hia? Ke’n bel hiai sang a leng thupi zaw tamtak ka mukhata himahleh Lamka khopi etlawmna leh a ngaihhuaina pipen hi a ka theih chuh lungsimsia nei lou a mawltak a analhnatak ahi. Mi khenkhatte’n etlawmnate leh khovel thupinate khawng a enlah ua himahleh ke’n bel huaite ka enlah kei.”

Julie in hiai thute a gen sung in a mel ka enphei den a, zou huihkhisiang leeng hiauhiaute’n a besam mam, siangthou leh nalhtak maite hon mutleng sialsial ua, samzang khat-le-nihte a mit leh kam ah kibaang ua, ama’n huaite a khut in awl in huikhe hiauhiau zel hi. Khavak in a lutung zawn apan a salh chiang in vak hilhial in a mel muh theih hi. Khapi vaak ziak mah in ka kiim leh kiang khawng uh bang leng vaak hilhial a, romantic mahmah hi. “Tung solkha taang, singseng nuai a, singdang ngailou, nunnuam i kholh lai…” chih laa bang ka phawk thakthak hial hi.

Julie in awl in a ban tegel a khutpek in zut hianhian a, a puanak banton ahihman in votsa sim hi ngei ding in ka gingta hi. Mi bang a hausa a puansilh-nikten hoih nei zou bang hi a, coat nalh huntawk neizou mi khat hileng bel ka coat silh pen amah silhsak ka ut ding hi. Ama’n lah kei lam hon en lou in om a, a nuihmai hiauhiau leh a muk nalhtakte’n Julie etlawmsak diak hi in ka thei. A khekol lah kigak hun litlet in om a, a duang kikhai ngihngiah toh mit in enchim lou hi. Laa khat in ‘van sawlchak’ a chih houh amah ade-aw chih in om hial hi.

“Julie,” chi in awl in ka sam a, ama’n leng huih mutleng a samte hui kawm in a lu awl in hon heiphei a, nuihmai hiuhiau in hon en hi.

“U Pau,” chih toh hon naihphei thuah hi.

Ke’n leng bangmah gen tuanlou in amah lam ka naihphei a, ka ban tuak uh hong kihetkha hian hi. Puanak bantom tuak silh ka hihman un ka taksa uh kihetkha a, hiai pen ka kisukkhak patna uh ahihman in a lamdanna riau khat om in ka thei hi.

“Julie aw, Pasian in ka lamet lou dandan a ka tung a vaihawm bang ka sa a, poi ka sa lua,” ka chi khialkhial hi.

“Pasian khawng mawk ngoh ding ahi kei, u Pau,” chi in Julie in hon dawng pah a, “Ama’n a mite a ding a a hoihna ding ua pisek hizaw ahi,” hon chi hi.

Huai a gen kawm in ka liangzang ah a lu hon nga a, dinsa a hong kingai phei ngeingai kawm in Lamka khopi taang singseng tuh ka ensuk uhi.

“Ka lungtang tawngnungpen a om thu genkhe thei lou ding dinmun a ka omkhak det man in hon ngaidam in aw, Julie,” chih in ka gen a, amah kawiphei ding bang ka ut mahmah a himahleh kei a hi thei tadih lou ahihman in ka kawi ngam kei hi.

“U Pau, mipil khat in ‘mihing pen zalensa a piangkhia ahi’ chi ahi. Na pianna gam India ngei in leng kum sawmguk-le-kua bang zalenna ana zangta a, bang ding a nang na ngaihdan leh na lungtang a thu omte genkhe thei lou ding a hen a omom lai na hi hiam,” chi in Julie in pilhuaitak in hon dong hi.

Julie thugen dik ka sa mahmah a himahleh ‘zalenna i chih bang leng chi tuamtuam omkha ding hi a maw’ ka chi lungsim zel hi.

“Na thugen adik mah ahi, Julie aw,” ka chi a, “Himahleh kei pen thildang teng ah zalen mah leng khosakna leh nekzonna ban ah sum-le-pai a zalen lou ka hih ziak ahipen mai ding e,” ka chi hi.

Huai thu ka gentak in Julie in awl in a lu hon phongkhia a, kei lam hon en in a taklam khut in ka veilam biang hon zutsak thiamthiam hi. Khavak milmial nuai a a nuihmai etlawmtak hon lak chiang in lungsim tengteng hon zou mahmah a, a ha ngou siang sitset kilang hilhialte etlawm diak hi.

“Nezonna kichi i dam peuhleh a thanuamte a ding a om vek ahi. Kei nekzonna pen tuam maithei himahleh nang nekzonna leng nekzonna hi veve ahi. Tunitak bang in nang om kei leteh kuan hiai mun a kei hon pawtpih ding hiam? Gari heekte bang leng simmohna ding om tuanlou, amau hihtheihte a hih thei lou tamtak om veve ahi ka chih nopna ahi.”

“Huaizaw himah e maw.”

“Huaiziak a, Pasian in mihing khat a a hon siam ngalleh kingaihsiat leh banghiam ziak khawng a lungsim buai a om mawkmawk ding hi lou ahi.”

“Kei maw, Julie, ka nu om keileh a khenchiang bang a kithah khawng ka ut hun om mawkmawk ahi.”

“Zenzen! Huai bangte himhim lungsim a leng koih sawm louh ding ahi. Setan vanzat ahi a, mahni kithah kichi zaw angmasialna chi khat hi in ka koih.”

“Lungkham leh mangbang a i om chiang a zaw kithah maimah bang ki-ut zel eive…”

“U Pau, lungkham-mangbang a na om chiang ahi Pasian na zot ding. Mahni kithah ding chih pen a dawnna dik hi ngeingei lou ahi.”

Julie in hiai thu a hon gen toh kiton in ka veilam liang ah hong kibaat nawn a, hiai hun in bel ka kidek zou nawn kei hi. Huchi in, ke’n leng ka veilam khut liktou in awl in ka kawi a, a ban ka zutsak thiamthiam hi.

“U Pau ei, paunak khat in ‘dawilokte a sih ma ua tamveipi si uh ahi’ a chih na zakha ngei hia?”

“Zakha ngei mah ing ei.”

Julie pau nawn lou in om a, banghiam ngaihtuah nei hileh kilawm in ka thei hi. Huai nung in…

“Na dawilokna na hon paihkhiat hun ding ka ngaklah lua, u Pau,” chih toh a veilam khut in amah ka kawina ka veilam khut kilh litlet hon thuah hi.

Hangsanna tasam ka hi chih kei leh kei leng ka kithei a, Julie in zaw hon na suizuizui mah eive chih ka theichian semsem hi.

“Sir John kha,” ka chih patleh Julie in ka liang apat a lu lakhe pah a, a hon letna khut leng hon khah geih hi.

A zaknop louh thu genkha ka hingei ding a, ka dinna mun ua kipan hon paikhiat san hi. Ke’n leng ka sam a himahleh lamsuk lam zuan in khe in taisuk hi. Khavak pen deih bang zou chiah lou ahihman in bangtan hiam a taisuk nung in amah ka mupha nawn kei hi. Kei leng patau thak in amah delh ding in ka kisa hi. Huchih laitak in Julie patauhna aw ka za hi.

“U Pau, u Pau ei… Hong huhve, u Pau…”

“Julie, Julie… Koi a om na hia? Bangchi e…?”

Hon dawn sawm ahi ngei ding a, himahleh mi a kamhum om bangsim in om a, a hong kikou chiang in kiza chiang thei ngellou hi. Huchia ka delhsukleh pasal bangzahhiam in Julie ana man uh ahi chih ka thei hi. Ke’n leng ‘Julie’ chih toh amah omna lam delhsuk ka thuah top mai hi. Amau kiang ka naihsimtak in, ka kigin louh kal in, thakhat in mi khat in ka veilam apan in hon na bohpai hi. Ka kibuan ua, amah a hat mahmah ziak in deih bang in ka zou pah zou kei hi.

Ke’n tuakkha a va muta suak ka hihman in Julie mantute’n leng a kam humsakna pen khah thak ua, huaitak in Julie aw ka za pah hi.

“U Pau, hong hunkheve. U Pau ei…”

Julie lam ka etkal in ka kisualpih pa’n hon sawnthal a, hon thalsial in ka maitang khawng hon tupsak zialzial hi. Ka lu ka hei a, Julie pen a muk puan a tuam pasal nih in len uh ahi chih ka thei hi. Midang ka muh louh man in hiai migiloute mi thum chauh hi ding ahi uh chih ka gingta hi.

Thathak la in ka tung a tuang pen ka khe in ka tepkhia a, a maituamna pen ke mahleh khomial sim toh a mel bel ka muchian thei taktak kei hi. Dendrite gim khawng nam thengthung in ka thei a, ke’n leng hiai maimaite khawng zoh louhdan om kei chi in ka kipei vutvut maimah hi.

Julie in a khut taklam a a sumbawm a tawi lai migiloute lak a khat in suhsak a, a mobile leng laksak hi. Huaizoh in mi khat kia in a khutte a nunglam a letsak in dinpih a, khat in temta dokkhia in kei lam hon delhphei hi. Huaitak in Julie patau gawp in hong kikou khe nawn a, “U Pau, temta toh nang hon delhphei ei…,” chi hi. Ka kihei a, hon dawt ding a hong taiphei pen khut ka khe in ka peksak a, a temta khahsuah hi. Ke’n leng amah ka bohpai phei ek a, huchi in Julie lam manoh in ka kibuan vutvut uhi. Julie lah kah-aw toh kikou a, “Ka u Pau vaw nawn kei un. Hehpihtak in vaw nawn mahmah kei un,” chi a, “Sum ka puak teng leh ka sana bilbahte leh ka mobile leng ka hon pe vek ding,” chi hi. Naktak a kitung ahihman in a lentupa’n lenkip zou ngellou in khahkha dekdek hi.

Kei mi nih in hon bom uh ahi chih a theih chiang in Julie in amah lentu khe nakpi in totsak ek a, huai toh kiton in thakhat in kipek vut a, a lentu in leng lenkip zou lou in khahsuah hi. Huchi in keilam ah hong tai in ka kisualpihte lak a khat pen hong khoih sawm hi. Himahleh huai mipa’n ana bengpuk geih hi.

Julie omna apan lam khat lel ding khawng a gamla a ka om lai un, denlam a amah lentupa’n va mankha thak nawn hi. Ke’n leng huai mipa khoih phak sawm in ka khut bang in ka sawk suamsuam a himahleh ka kisualpih lel pen in hon sukbuai ziak in ka khoih ban kei hi. Ka kisualpih masak pen in huai temta ke pen tawm ahi ngei ding a, kei hon dawtsawm in hon delhphei a, Julie in ana mu pah hi.

Julie in, “U Pau ei, na nung lam ah temta in hon dawtdek nawn uh ei,” a chih lamtak ka zak man in ka kisualpih pen ka buanpuk vutvut hi.

Himahleh vangsiathuaitak in huai temta tawi pa khe in kou hon palkha in a mailam bohsuk ek a, Julie dawtkha phei guih hidan in ka mu hi. Huaitak in Julie lenpa’n leng khah in taikhiatsan hi. Huaitak in Julie leng naa sa in kikou a, ka min hon sam kongkong hi. Temta tawipa leng taikhia a, ka kisualpih pen leng ka ngaihsak nawn kei. Kintak in Julie kiang lam ah ka taiphei hi. Julie ana kipuk a, a gillak hum tenton a, “U Pau, u Pau…,” chi hi. Ka kisualpih lellel pen leng a taikhiat ziak in kuamah hon subuai ding om nawn lou in ke’n Julie ka buaipih thei hi.

Panpihtu ding bei a leilak a lum dildel lai Julie tuh ka khut in ka domtou a, ka phei tung ah ka kingasak hi. Ama’n ka mailak a si pawtte a taklam khut in hon hulsak a, “U Pau, hon paisan phut thei ka hita. Gen ut na neihleh hon genve maw?,” chi in, gim mahmah hileh kilawm in hon gen hi.

Kei leng ka patau mahmah a, hiai kiim alah kuamah om lou. Ka gari uh omna ngei leng tua ka omna ua kipan kigamla simta zawmah ahihman in ka buai kholdiak hi. Kei phone lah koilak tung hiam chih ka thei kei a, Julie a pen ngei leng laksak uh ahihman in kuamah ka thuzak thei kei zawmah uhi.

Ka lungsim ah Julie in hon beisan phut taleh bangchi ding chi in ka ngaihtuah a, “Julie, hon paisan mahmah kei in aw?,” ka chi hi. A khut a ka mai a hon khoihna pen sisan baang ahihman in man tuptup hial a, a liamna maa apan sisan luangte ziak hi ding a ka gintak man in ka patau deuhdeuh hi. A puanakte leng sisan baang nengnung hi in ka thei hi.

“U Pau,” chi in Julie in hon sam nawn a, “K’on na paisan mai ding aw?,” hon chi a, “Khovel a mi dawilok khat ka zuihkhak ka vangse lua maw, u Pau,” hon chi hi.

‘Dawilok’ a chih pen kei hi ngei ding a ka kikoih man in ka ut hetkei a, himahleh a hon beisan taktak khak ding bel ka lau mahmah mai hi. Ka buai tengtung a, ka hih masak ding pen leng ka thei kei hi. Gari tan pawtou ding a ka gen chiang inlah ‘ka ngap mahmah kei, ka ut kei’ hon chihsan zel hi.

Julie in a mit hon siing a, hon beisan taktak ding bang maimah hi. Ke’n leng a kikhel ma in chi in…

“Julie, aw..,” kapkawm in ka chi a, “Hon paisan mahmah kei in aw, Julie. Nang lou a hing zou lou ding ka hi,” chih toh kapkhiat ka thuah hi.

Huai ka gen toh kiton in Julie khatvei hong khuh khauh a, a mit hong hak kuau hi. Huai ka muhtak in ka kahnuih pelhpulh a, huaitak in hon mitsitsan nawn hi.

Julie ka pumkawi a, “K’on itna thu leng chiangtak a hon kum man nailou keive, Julie aw. Hehpihtak in na mit hong hak inla houlim thak ni,” chi in mittui-naptui toh kap kawm in ka houpih hi. Ama’n leng, a mit leng hak ngap lou in, “U Pau, zekai lawta na hi,” hon chi a, keilah hon beisan ding lauh chihtak a lau in ka om hi.

“K’on it lua, Julie aw, ka hon it tawntung ding. Hehpihtak in hon paisan mahmah kei in, k’on it lua… Sir John in bang teng gen lehleng ka hon itna ka im nawn kei di’a ka puangkhe ding. Julie aw, ka itna hon sansakve maw,” chi in ka kapkhe keuhkeuh mai hi.

Julie in hon dawng kei a, a mit leng a hak samkei. A chi leng khing hiaihiai hileh kilawm in ka thei a, a mai khawng ka zut hang in bangmah a hon gen kei. Alohngaihna ka theih louh man in ka kikoukhe vomvom maimah hi.

“Julie aw, k’on it lua… Khovel a ke’n nang lou it ka nei kei a, kei hon it midang nang chauh na hi. Hon paisan mahmah kei in… Hehpihtak in, hon paisan mahmah ke’n…”

Julie mit awl in hong hak kiau a, “Na taktak hia, u Pau?,” hon chi a, nuisim heuhau a, hak lahpipi a hong hakkhia ahi chih ka thei mai hi.

Kei leng ka kipak gawpzak a, a biang ka tawpsak toh, a muk ka tawpsak toh, a ngawng a ka tawp toh ka kahnuih phemphom maimah hi. Awl a hong halh beh deuh thak hi in ka thei a, a chii leng hong lum kik nawn in ka thei hi. Huaitak in ka kipak gawpzak a, kipahna luankhi toh ngaihtak in ka kikoukhia hi.

“JULIE, AW JULIE!”

(Beita)

[Ataktak bang thei di’a phuahtawm pumlum ahi.]

©Valte Ginkhenpau, 2016 | thaikawitongluan.com

Add comment


Security code
Refresh

© 2017. Thaikawitongluan.

We have 22 guests and no members online