Exclusives

MOBY DICK - VI

MOBY DICK

www.thaikawitongluan.com

BUNG VI

Nantucket ka nawtsiat nung uh ni bangzahhiam a paita hi. Nitaklam khat, long tuang tung apan a kei ven ding ni a hi a, huchia ka kaltouh leh captain Ahab ka mukha hi.

Tuangtung ah a dingkip mahmah a, milim ding ka sa hial hi. A chihtak mel mahmah a, a din sang in a thau hi. A sam a kang a, a mai leh ngawng lak a meima pawn ngou ka muthei hi. A meima pawnte, kekkia in singkung a denkhakna ma mah a bang uhi. A khe langkhat tuh ngapi khaguh apan bawl ahi. Amah ka muh in ka chi bang a ling zozen a, a khe bawltawm toh, a diak in long a tai lai a a huchi dinkip theih lamdang kasa hi. Hoihtak in ka en a, lamdang tak in a khe bawltawm nalam tuang vang khat a kiphut ahihdan ka musuah hi. Hiaiziak tak ahi kiptak a a hichi din theih. Tuipi lianpi lam a en vungvung hi.

Lungkhamluatna khat nei hileh a kilawm hi.

Huaini apan captain Ahab ka mumun mahmah ta uhi. Sim lam manoh in ka pai zel ua, khua bang leng a lum deuhdeuh hi. Huaiziak tak in a pindan apan hong vakkhe mun mahmah hi.

A khenchiang in tutna ah a tu a, a khen chiang in a khelem toh dingkip in a khen chiang in hatlou sasa in a vakkual zel hi. A khen chiang in lauthawng guih in, a khelem bang long tuangtung khawng ah khen ekek zel a, longsung a semte phawng kha vek zel hi.

Khatvei Stubb in chiamnuih in, "na khaguh khe le na tuam ngai hive aw" a chih leh Ahab leng heh in, "nang ui, na kul ah va paisuk aw" chi in dawng hi.

Hiai a zak in Stubb in lamdang a sa a, "hichi bang mizia nei kiang ah ka pau utkei" chi hi.

Ahab a heh semsem a,"huchi ahihleh sabengtung chi in kon sam di. Tu in ka muhna apan paimang in, ahuchih kei leh na hinna taan di nahi" chi in dawngthuk hi.

Stubb leng dai in huai apan paikhia a, kou kiang ah, "bang loh di ahia chih le ka theikei. A khen chiang in khet ek ka ut a, huai ka chih chiang in lah ka hehpih a, ka thumpih ut zel. A lungsim mansuah hita ding in ka ngaihtuah. A lungsim ngaihtuahna lamdang ka sa. A ihmu vang mahmah a, dakkal thum khawng lum a, huai hunsung nasan in a khanglou zihzeh. Mi lamdang tak ahi"

Zing khat, Ahab hong pawtkhia a, long tung ah kivialleh den hi. A khaguh khe in tuang a sikkhakna te ah a lim nawsia a, sik duk zou hi. Ngaihtuahna thuktak nei hi in a lang hi. Zankhua a banghiam khat ngaihtuah hi in a lang a, huai in amah lungtang a khamuanna a susia hi. Sunkhua in a kivialleh den a, sun annek hun nasan in a khawl kei hi. Nitaklam hong hih in Starbuck a sam a, long a sem teng long nunglam a paikhawm sak ding in thu a pia hi.

Huchi in kou leng ka kingakbkhawm ua, Ahab' thupiak nawn ding ngak in ka om uhi. A kivialleh ngei in a kivialleh lai a, kou ahihleh ka lawmte uh toh kana kihuau suausuau uhi. Thakhat in Ahab koulam ah hong kihei in, "ngapi i muh chiang a bang hih ding ahia?" Chi in hon dong hi.

"Ngapi a dinga la sak ding ahi" chi in tuipi tunga zinzel mi teng in kituak tak in a dawng uhi. Hiai dawnna lungtung leh kipak in a langthei hi. "A zoh chiang a bang hih nawn ding" chi in dong kik nawn hi.

"Nga betna longneute khahkhe suk a, ngapi delh ding"

"A hoih e. Thil teng na thei uhi" chi in kipaktak in Ahab in gen hi. Ka dawnnate uh a lungtung mahmah a, sumeng hon lakhia in a hon lak hi. Sek a hon ngen a, sek a hon lak tak un hichin hon gen hi,"hiai sumeng na mu uhia? Ngapi lu kang mu masasa kiang a ka piak ding ahi. Ngapi a mit tung vuai, a khaguh kilawi, a taksa tung a vang thum om. Huai mu masa penpen tuh hiai sumeng tang ding ahi"

Tuitung mite'n hiai a zak un kipak mahmah uhi. Captain Ahab in leng huai sek in a sumeng tuh long khuam ah hon kilhbelh a, tuitung mite lam a kihei kawm in, "ka gen thei gige un. Ngapi a lou kang pen ahi ka deih. Tuipi lam hoihtak in en gige unla, tuitung ah hong soutou na muh ualeh leng a la sa pah un" chi in gen hi.

Tashtego, Daggoo leh Queequeg in leng lungluttak a ngaikhia uh ahihdan ka mu hi. Ahab in a mittung vuai leh a khaguh kilawi ahi chih a gen leh, amau leng a ngapi gen meltheih chiat hile uh kilawm hi. Hun paisa a thiltuah khat a mangngilh theihlouh uh om hi in lang hi.

Tashtego kilawp lua, kidek zou nawnlou in, "Heutupa, Moby Dick thu gen hi in kon thei" hon chikhia hi.

"Hi, na gen dik. Nang Moby Dick thei maw? Mukha ngei maw?"

 "Mukha hi in ka kithei" chi in Tashtego in dawng hi. "Tui a zah ma in a mei a vailam in a pei zel hia?"

"Hi, na thei lua Tashtego" chi in Heutupa kokoukhe hial hi.

"Aman lamdang tak in tui a kikhohkhe sak thei a, kintak in a kikhiin thei zomah hi" chi in Daggoo in hon gen nawn a, "Aw Daggo. Nang le na thei. Mukha neive maw?" Chi in captain in ana dawng hi.

Tun tuh Queequeq' pau hun a hita. "A taksa tung ah thaltang nih leh thum hiam a om a, huai in a mel khengzou hi" chi in hon gen hi. Huaitak in Captain Ahab leng kilawplua in hong kikoukhia a, huchih lai in hoihtak a ana ngaikhia Starbuck in, "ka theihkhelh keileh, na khe hon pehtan sak tuh Moby Dick a hi maw?" Hon chi hi.

"Hi, a hilua. Huai dawisia. Mibangloua hon suah hi. Ka beng ding a, a paina lam teng ah ka delh ding. Vuallelhna himhim ka pom kei ding. Hiai i khualzinna uh tuh hiai dawisia beng ding a kisa ihi uh. Ka mite aw, bang a hia na ngaihdan uh? Hiai dawisia beng ding in na man uhia? Na hangsan huntawk uhiam?"

"Hi, ka man uh" chi in thalkaptu teng in dawng uhi.

A kithalawpna uh a muh chiang in Ahab kipak mahmah hi. Long a nasemte khat sam in, "hiaite a ding in zu hon tawi in" chi in thu pia hi.

Hiai hunsung teng in Starbuck dai dide in ana ding hi. Ahab in a theih tak in, "Bangziak a hichia chitak gemgum leh dah a om nahia? Hiai thilhihna ding ah tel sawmlou nahi hia?" Chi in dong hi.

"Hiai dawisia tuh ka beng ding. Hichi bang ngabenna te ka lau kei. Himahleh, ngapi a sumdawnna a hoihsema ding a hiai i khualzinna ua tel kahi. Nang phuba lakna a panpihtu ding a om ka hikei" chi in dawng hi. Hiai captainpa lungsim leh thilsawm ana dal tuh Starbuck kia ahi. Himahleh a hel bel a hikei. "Toupa'n hon humbit vek hen" a chih ka za hi.

Ahab in nasemte zu nou liante a sung ding in thu pia hi. Zu a man tak in a nou la in chiip zek a, ama ban a om pen pia in, aman a zoh chiang a pesawn zel ding in hilh hi. A bei chiang in nasemte sungdimsak zel hi.

Kuapeuh in a dawn zoh vek tak in heutu a aneih mi thum teng samkhawm a, a mittang tak uah, a pupa uapan ana chiindan un, en kilkel hi. A tup haihuai tak amau a chituh sawm hileh a kilawm hi. Himahleh amau ana enkik ngamlou uhi.

Tua zoh in thalkapsiam teng thum sam nawn a, "Nou teng ka mi hat leh thathou teng na hi uh. Tun na thalte uh na koihna uapan hon lakhia uale" chi in thu pia hi.

Queequeg, Tashtego leh Daggoo in sawla a om bang un hih uhi. A thalbawm uh hawm na ahi chih lahna in hon lehbut ua, Ahab in tua a thalbawm ua zu sundim sak ding in thu pia hi. Tua zoh in Moby Dick that ding in thukhun bawlpih hi.

"Dawn un, ka mihangsante aw. Dawn unla, kichiam un. Hiai Moby Dick i thah zoh kei uleh Pathian in ei hon beng hen" chi in kithalawpna toh Ahab kikoukhia hi.

 

Lettu: Kattie Mawite © thaikawitongluan.com

Add comment


Security code
Refresh

© 2017. Thaikawitongluan.

We have 60 guests and no members online