Articles

TAWLDAMNA NUAM

TAWLDAMNA NUAM

By: SD Khuptong | www.thaikawitongluan.com

Bible tangtel:

Jeremiah 33:3 Hon sam lechin ka hon dawng ding, thil thupi leh thil kisel na theih ngeilouh ka hon ensak ding.

Matthai 11:28-30 Nou semgin leh puakgik paw tengteng aw, ka kiang ah hongpai unla, keiman khawlna kon pe ding. Ka hakkol pua unla, kei a kipan zil un. Thunuailut leh lungtang a kingainiam tak kahi. Huchin na kha ua ding in khawlna namu ding uh. Ka hakkol a nuam a, ka puak leng a zaang ahi, achi a.

Na hun paisa a kipan tuhun tan en in ngaihtuah vengveng mah dih. Hiai khovel ah haksatna thupitak tuak a, bah leh tawl kisa a khoisa vungvung a na om chiang in koilam a kipan panpihna leh hotkhiakna hong tung din nana lamen a? Na lametna bang geih leh na lamet hun bangzel in a hongtung taktak na hia? Na lungkhamna leh na puakgikte hon puakpih ding in kua na zuan a? Na zot miten kilawp tak in a hon puakpih zelna uhia?

Sa a hing i hih ziak in sa a i hinpihte mah ah a lametna ngak khak baihlam zaw leng ahi ding. Mi tampite’n haksatna tawpkhawk tuak a, beidong leh mangbang kisa a i om chiang in Lawm leh vual, kim leh kiang a tanaute ah lametna kinei masa kha sek hi. A hon panpihna uh i lamen a, a hon hehnepna uh i kinem a, i mittuite hon nulhul sak uh i kilamen ua, Himahleh huchibang i tuah laitak in zaw lawm hoih mahmah i chihte nangawn in nidang bangloutak in hon gamlat huaihuai ua, tanau nai mahmahte nangawn in leng Ak in Gul a muh chiang a, a et gekgawk bang in hon galet gekgawk thei mawk uhi.

Khenkhat leuleu in lah, lungsim a puakgik puakzoh vuallouh a hongtun chiang a Lawm leh vual ahihkeileh mi muanhuai khatpeuh kiang ah genkhiak zel pen zangkhai tuam ahi achi uh. Khenkhat in lah nakpitak a i kah khiak leh i lungsim tawldam deuh ahi achi leuleu uhi. Tuabang gindan neite tuh sa a i hinpihte mah a lametna ngate i hi veve, himahleh i lamet uh a batlouh chiang in tuailai tampite career in a siatloh a, a tawp ah hinna tanpha kila in phaktawp kitung thei veve.

Himahleh i Bible tangtel te hoihtak a i sim leh lungmuanhuai lawtel hiveh o… A biktak in, Semgim leh puakgik pua a i om laitak a, Toupa kiang i zot leh i poimawh pen tawldamna piak ding hon chiam ngam i chih chiang in hiai kan a thupizaw leitung ah lungmuanna dang himhim omlou ding in ka ngaihsun hi. I mihinpihte lak ah bel puakgik i puak laitak tuh i ngaihhuai louh laitak ahi chileng genkhial din ka kigingtakei hi. Himahleh i Toupa lak ah bel i haksatna in bangmah gen aneikei, i puakgik te ziak in leng a hon ngailou samkei a, i kihhuainate ziak in leng a hon nawlkhin ngeikei himhim ding. I mihinpihte a dia i ngaihhuai louhna pente tuh Toupa a din i ngaihhuai na pen a suak maimah hi. Leitung a belhding maimong i kisak nung a amah kiang zuanpante a ding in leng a iitna a kilamdang tuankei. Amah sam peuhmah dawng dia mansa ahi a, amah zuan peuhmah in lah thil thupi leh thil kisel, chikmah a theih ngeilouhte thei ding uh hilai. Tuakia hilou in, leitung mite’n a hon dawnzangkhai theihlouh uh i puakgikte dawn zangkhai a om dia, aman ei hakkol pawta ding a, amah hakkol zangkhai tak ei hon pawsak heuhheuh ding i chih chiang in hiai sapna kankan a sapna thupi leh naih taak omlou ding hilou a de aw… Amah kiang a tawldamna kankan a tawldamna nuamzaw omlou ding hilou a de aw chih nakpitak in a hon ngaihtuah sak hi. Huaiziak in sa a hing himahleng Tawldamna nuam a i tawldam theihna din Kha ah lametna ngah masak poimawh hi. 

Add comment


Security code
Refresh

© 2017. Thaikawitongluan.

We have 34 guests and no members online