Articles

GOOD FRIDAY: BANGZIAK A JESU KHROS A HONGSI AHIA?

GOOD FRIDAY: BANGZIAK A JESU KHROS A HONGSI AHIA?

By: Siam Tonsing | www.thaikawitongluan.com

Jesu Khros ah a hong si. Nang leh kei khelna man pia a hong si ahi. A hong sihna santak bang ahia? Tuni chiangtan ah Jesu hondampa a i saandan a dikna hia? Nang leh kei adia hong si chihmawk in ei hinkhua ah omzia nei in phattuamna a nei hia?

Johan 3:18 – “Amah gingta peuhmah, mohtansak in a om kei ding.. a gingta loute bel mohtangsa ahi uh.” Hiai taangtel ma I sim leh Pathian in khovel mohtangsak ding a, a Tapa hon sawl ahi kei hi. Himahleh, Jesu Khrist tungtawn a khovel hotdam ahihtheihnang ahi zaw. Leitung mite hinkhua Pathian mitsipna ahihman in, a tapa tungtawn a Amah gingta te peuhmah siamtansaktheih a hihnang ahi. A lehlamtak en nawn le, …A tapa ginta lou peuhmah in hinna (Tangtawn hinna) anei kei ding. A kha uh bel hing ding a himah leh, a kha meidil tung ding hiven. Pathian mitmuh a hoihlou peuhmah tuh sihna ahi chihtuh a chiang mahmah hi. Hoih leh dam a om ikisak kal in Pathian etna ah a Si I hikha lel di e?

Mitengteng a ding a hong si I chih vettak un omzia nei in ka koih thei kei. Himahleh, A tapa Jesus Khrist hong sihna tungtawn in Pathian itna a lianlua chih a chethuai zaw, A itna in khentuam a nei kei, a neu a lian, a zawng a hau, a tek a chih omlou in, a gingta peuhmah a ding in mun a omvek! I Peter 3:18 na ah,  “ Tangtawn daihding I khelna sawpsiang na ding in Jesu Khrist in khatvei a thuakkhinta.” A thuakna in ei ah kikhekna a hontun hia? Khalam hinkhua ah a neu tuam a lian tuam om chibang in I gensek dekzel ua, ngaihtuah huai pi a bang hi. Himahleh, Jesu in tatna anna a sep I tan uh kibang ahihman in a I khatam uh kibang hi. Huai kawmkawm in, a tangtu ten amau a hihtheihna a neih uh a suahdan zil un khalam hinkhua a hong langkhia chihthu lel ahi. “Na hotdamna” diklou hiding hiveh aw… Biakinn kaiziak a hotdamna kichian sem, Thum mun ziak a, hotdam hihna ki langchiang sem, Bible sim a Pathian thu hat mahmah a gending tasam lou, a dik na chiang om kha in teh. Himahleh, Mathai 7:15 in ivengsiam ding in a hon hilhdaih mai hi. Pathian toh iki naih semna ding a A tapa hon piak ahi a, himahleh hiai leitung a I hinsung in, I khovel ngaihtuahna in hon taisan lou a hihna ah, huntamzaw ah khemna leh ze-etna in hon tuam ahihman in, I ngaihtuahna I lungsim te khensiam kisam lo mahmah hi. A hi a, nang toh ton in pai leng, bangkim ah muanna om ana kichih bang in muanna I koihna ding ah koih peuh leng, I lampi a haksat hun inleng, a hon itpan hon taisan lou ding hi.

Pathian in hon it mahmah a, A tapa tang neihsun hilhial hon piak bangziak… Adam khang apan a Pathian toh kal kizopna a na tatsa, Pathian in pona mahmah in a siamsa mihingte itlua in, huai a kizopna tansa pen bawllem kikna ding a A tapa hong si ana hi dan ahi. Romte 5:10 na ah a gen chiang mahmah. Van hoih I lei a, a lui hun chiang a ithuai sim lo lele a thak leinawn chihbang dan hilou in, Pathian in lungsim khekkhek lou a, a sesa bawlkik ding in a kisa zaw hi. Setan lalgam dinsuah ding pona mahmah na pi in Pathian zaidamna thupi hi. Setan kiang ah zalenna a pia a khovel kilchih ah a gamtang hi. Huai a muhziak tak mah in, a siamsa mite a lainatna ziak in Setan sang a a tungnunna hong kilat na thupi pen setan in a hihtheihlouh A tapa sisan tungtawn in a khialsa te a angsung ah a hon sam hi.  Sisan luang ziak in mihing teng Setan apan zalenna I neitu uh. Kuapeuh maingaltak leh kisuanglah lou a Jesu Khrist tungtawn in Pathian kiang I zuanthei ta hi. Galatia 2:20; Mathai 20:28 te ah, itna I tandan a muh theih ding.

Khelna a kidim te hondam ding a hong pai Jesu Khrist lou khovel ah omlou hi. Salam ah I khelh chiang in khat leh khat iki tankhe thei a, himahleh tua I gen bel I khalam hotdamna ahi. Kha hotdam a omlou tuh salam ah hoihna tampitak om lehleng Pathian mitmuh in a ching bangmah a om kei. Hiaitak ahi, Jesu Khrist hondampa ding a pomte tungnun na. Ei Khristian te chi a iki min voh mai bangleng, I khalam uh mitdelna hi maimah diam maw? Tangthupha hong lut apan tunitan in enleng, Khristian min I neihdan uh vel tuak mahmah leh kilawm. A minpu lel a Sahkhua hihna nei I hihlel khak uh lauhhuai mahmah hi. Johan 3:16 a I muhbang in Pathian in a siamsa mihing te a itluat man a A Tapa hon sawl I chi hi. Huai theisiam lou a khelhna lampi I zot lailai in leng hon siam Pa’n a itna thu Romte 5:8 ah hon taklang nawn hi.

Galtiate 3:13 in honna hilhchian mahmah hi. Mihing khelna ziak a Pathian thangpaihna tangtawn a om ding lai, Jesu sisan in hon tan hi. Adam leh Eve khelhna ziak a Pathian Dan bohsia I hihman in, hiai Dan in a hon henna phelsat theih a hihna ding a Jesu Khrist sisan poimoh ana hi hi. Leitung ah dan I nei a, dan bohsiat hun in liau leh pan I pia a, huai in I hihkhelhna apan hon suaktasak hi. Himahleh, Dan apan suakta hilehang leng, I khelna pen a bei hilou in siamtansak ihizaw hi. Hiaidan mah ahi, Pathian toh kal a I omdan, I khelhna sawpsiang ahi chi a, hotdamna tang chikawm pi a I hinkhua midangte a ding a ethak leh theihsiam hak a I hin leh bel, thununna a pan I suahtakna zangkhial I hi ding hi. I sia leh pha theihna zangsiam ding in kuapeuh iki vaikhak hi. Galatia 2:16 ah simle, Dan apan a suahtaktheih nang hon genchiang mahmah hi. I nasep hoihte I thugen hoihte ziak a hotdam leh Pathian thangpaihna apan a suakta ding ihi kei. Hihna sangte mai a kamsiam mahmah kawm a beizoutak a om, a tasam te mimuhlou leh simmoh tak a I om lailai leh bel, Dan apan I suakta naikei chih a chiang mahmah. Pathian thangpaihna apan na suaktak theihna ding Amah a ginna na koihdan dungzui a teh hiding hi. Romte 6:23 leng en mah dih.

Nang leh kei a ding a hong si ahi I chih pen amasa pen ana hi khinlou ahi. Himah leh hamphana tungtuan tangkha I hihna ikiphawk ding ahi. Bangziak in; mikhial ihihziak in. Pathian in a mitmuh a khialte siamtansakna ding a A tapa hon sawl ahihman in. Pathian mitmuh a khial hihlam iki phawk kei in zaw a khialte lak ah I telkha kei ding. Hamphatna tungtuan I tanna enle, Mathai 15: 21-28 sung ah Kanan numei nu leh Jesu ki dawnna I mu hi. Kanan numei in Jesu kiang a panpihna a nget in Jesu in, “Tate’ tanghou di’ng, uite kiang a piak a kilawmkei” ana chi hi. Hiai in hon theihsak tuh, Pathian namtel, Juda te a ding a Jesu Khrist hong pai ahihdan a chiang hi. Himahleh, Juda te a Kumpipa uh ana deihlouhman ua, Pathian itna khut zak hong lian in khovel kilchih a hon zel suak hi. Efesate 2:14-16 na ah en leng, Gingtu/gentel te leh Juda te kal a lemna omtheihna ding in laikhak a om hi. Kuapeuh Jesu Khrist tungtawn a sakhat lungsim mun khat nei a pawl tuamtuam te kilem a Khrist tungtawn a lemna omtheihna ding a Jesu Khrist sisan ana poimoh ahi hi. Pathian in kua peuh it a, Amah tuh lemna ahihziak in. Amah it a, Amah gingtu hihna a khat leh khat ki ittuah, Amah a ki hihhat theihna lampi omna Jesu Khrist sisan ahi.

A bul a dotna I bawl - Nang leh kei adia hong si chihmawk in ei hinkhua ah omzia nei in phattuamna a nei hia? enkikthak ni. Jesu sisan in nang hinkhau ah kikhekna taktak a hon tun hia, unau. Hehpihna hun a ding I hihlai man in hampha ihi. Denchiang chise ken zekai thei ihi, Jesu sisan loungal in i khelna apan siam hontangsak theilou ding hi.

Simtu te, theihsiamna leh vualzawlna nou a hita hen. 

© thaikawitongluan.com | Siam Tonsing

Add comment


Security code
Refresh

© 2017. Thaikawitongluan.

We have 38 guests and no members online