Articles

KA PA HON THU VAIKHAK; "SOMETHING'S BEST LEFT UNSAID"

KA PA HON THU VAIKHAK; "SOMETHING'S BEST LEFT UNSAID"

By: Siam Tonsing | www.thaikawitongluan.com

Ziltawpni nitak, dak 5:30pm a gintoh kiton in laisim ding in ka kisa hi. A zingchiang kiginni a test nei ka hihman in ut leh utlouthu hilou a simngai maimah. Tuhun khawng a i ngaihtuah leh high school kailai ate mah hoihtak a theihdet di Ana hi eive chih ka musuah pan phing. Hun in lah hon liamsanta. Sapkik theih ahi nawnkei. Ka pa, sih ngak a lupna a lum ahihlam ka lungsim in a ngaihtuah pha ban Kei. A damkei a, a hat hetkei chihtuh ka haihkei hi. Himahleh, hun sawtlou chik nung a hon beisan di ahihlam ngaihtuah in leng ka neikei himhim. Ka innkuanpih ten zaw thei di uh hiven maw... Khitui naptui nul a, a kiang a tutu mah zaw ahi ve ua.

Ka nu ahihleh ka pa kiang chin ah a tu a, a tal a dapsak zel hi. A chang in ka nite leh ka pite toh a ki khek tuah uhi. Ka mangngilh theih hetlouh, tep leh muam, nek leh dawn ki suum tinten tuh ka pa a dia damna ahoihpen ahi. Ahi a, tha nei hetlou napi in laizial a duh luat hun in dailenbuk a naih teitei hi. Khengchiang in hon gal sap a, a guk a laizial lei di’n hon sawl hi. Ka pa ahihna ah, ka deihsak mahmah a, thumangtak in kava tai pah vengveng sek hi. Chiangkhun mongkoi te a hon deih a, amah lah thabei ta, paizou nawn di a hi kei. Ka sungkuan ten kamnem in a khemkhem ua, himahleh a lunggulhna beilou ahi ngei ding. A hon sam a, "Siam, hiai sum 100 tawi inla chiangkhun va lei in aw, na hohna di hon kan ua leh genlou in na va pai dia non lei teitei di. Leilou a nong kiklouh di ahi." Ka zotna dilam ka theikei. “Awle pa”, chi in bazaar lam ka manoh suk a, himahleh chiangkhun koi a ki zuak hiam chih ka theikei. Bazaar ka lut di in ka mangbang a ka ki nungleh heizel a pai ka sawm chiang in lah, thawnkik theih vual ahi Kei.

Kiginni nisuak kilawmtak hong suak khe singseng a, skul kuan ding in ka kisa khin ta. Ann nezou ka skul kuan ma deuh in ka pa kiang ah omnuam chi in a vualzawlna la in skul ka kuan kheta hi. Test ka hon nei ua, Test neizou, inn ka zuanta hi. Test hihhoih ka hihdan ka pa kiang a report ka piak khit in kimawl ding in ka diangkhia hi. Nitaklam khomuikuan in ka kisil siang a ann ka ne hi. Ann ka nezou, room a pai in ka pa kiang ah kava pai hi. Himahleh Ana gim mahmah ta ahi ding, tanau laina leng a tam mahmah. Room sung ah a nawl tuak ah lupna nih a om a, agal khat ah ka tu hi. Lupna kal ah dohkan feet 3 ding a sau a kikoih a lupna tegel kal ki gamlatdan feet 5 lel khawng ahiding. Ka pa mel ka galmuhthei geih hi.

Kimawlzou kisil siang ka hihman in zangtuan in ka kithei hi. Ka pa kiang a va tut tuh ka utpen ahi huai huntak ah. Himahleh hon awlmoh tanau te a om ziak un agal ah kana tukha hi. Doctor te'n ka pa hun neih sawtnawnlou ahihdan gen uh tuh a hingei ding. Ka pa bul ah ka nu tu hiven, ka pa a hong zoi luattak in houpih din a kisa ua, lah ka pa'n a aw a suah zou nawn kei. Ka nu'n "uthang ei, uthang" chia a mai khoihkawm a, a sap hang in a dawng nawn kei. A tawpna ding in ka pan awlkha in tawldam huai hileh kilawm tak in hu a la a, nitaklam dak 5:15 ding vel in a kha a khahta!

Ka pa houzohlouh a a omlaitak in a gal a pat ana en kahi a, kana ki ip sam hi. A kiang ka naih nuam ah lah, ka lungsim guktak ah hangsanna ka neikei. A hon kaikik om a bat kawmkawm in a kiang ka utna a lian mahmah hi. Pa ei bangchi e? chihbek gen ut hi in ka kithei. Ka pa'n ka tate koi a om uh ahia chi ut hi kha maithei hia... Gen ut, kam khat kam nih bek zaw nei ngei ding hi a....

Kham zoh vuallouh in ka biang ah ka mittui hong kai zoihzoih ta mai hi. Kah di lah haksa bang, khasepetmah in ka om a, ka khut tum zial in ka ang a table tung bang ka tum sukzel a, ka khasiatna a theng thei tuankei. Ka kiang a hon mukha ten ahon en thohlel mai uhi. Hehnem ding dantuan omlou ahihman in. Ka nu hong pau khia a, "I dai phot uh aw... Thumna ko’n nei ding," chi in Pathian kiang ah khamuanna ngen in a thum hi.

Kum 10 lel ding ka hi a, himahleh, ka pa'n kha a khah ni a thil omdan tunitan ka mitkha ah manglou hi. Ka ngaihtuah kikzel a, mi tampi te, nu leh pa mel theilou omnalak a ken ka pa toh, sawt hikei mahleh hun zangkhawmkha kahihna uah, hampha kakisa veve hi. Ahi a, ka lungsim nuamsaklou khat tuh, ka pa'n a tate kiang ah bang thu a vaikhak nuam mah diam maw chih ahi. Siatna lam sang in a hoihlam in ka laksawm sek a himahleh, ka hinkhua hunkhat tuh hiai ziak in kana sesak kha hi. Ka lungsim tawng a ka ki hehnepna omsun tuh, sapte thupil in a gen, "something's best left unsaid" ahimai hi. Pathian lemgel theihsiam ahak ngei chia ki ngaihsiattheih luatmah ana hi a, himahleh huaituh a tawpna ana hi nailou dan ahi.

Tuni in, nu leh pa damlai a khosa khawm te'n bang hinkhua zang in a ki ngai dia? Hinkhua haksa sa i hi hia? Bangziak a haksa, haksatna eimah leh eimah ki guantawm ihilel zaw hia? Ka pa'n thu vaikhak hon nei louh hang in, nang nu leh pa chia sap ding na neih lai thumanna hinkhua zatsawm in. Nu leh Pa ten i tate bang vaikhak nop i nei dia, zingchiang thu ah thuneihna i neikei. Nu leh Pa kamkhum khat leh nih lel ziak a i tate hinkhua lamzangthei a, kamsia khat leh nih ziak lel a leng hinkhua lohsam tunthei hi. Nu leh Pa na hi hia? ta na hi hia? inkuan khat sung ah, a kikhel ma in, ki deihsak na kampau leh thu vaikhak neih sehetlou ding hi.

Ka pa'n a kam in bangmah hon thumopkei mahleh, a daih dide na in ka hinkhua ah tampi a hon zilsak veve hi. Hinkhua haksa leh nuam ki helhtou vingveng ding mah ahi chih thei kawm in, mailam ding en in kalsuan leng, i hunlui sapkiktheihlouh te i lamlak tu suak thei ding hi. Ka pa hon omlouh sang nung kum 20 val hithei ta mahleh, ka itna leh ka ngaihna a beituankei. Ama omlouhnung a hinkhua ka zatdan a nuam leh a haksa tampi ka tuah a omsam a, himahleh “Something’s best left unsaid” chi a hinkhua a hoihding lam ikipiak zel tuh damna hoihpen ana himai zel dan eive...

© thaikawitongluan.com | Author: Siam Tonsing

Add comment


Security code
Refresh

© 2017. Thaikawitongluan.

We have 46 guests and no members online