Articles

DAMDAWI KHAMTHEIH BIBLE IN A KHAAM HIA?

Damdawi khamtheih bible in a khaam hia?
By: V. Ginkhenpau | www.thaikawitongluan.com

 

Mahni kisiamtan utna a dim khawvel ah thil hoihlou hih mi tampite’n kisiamtan theihna tuamtuam paulap in a khelhna uh seel a sawm sek uhi. Etsakna ding in, mi pawlkhatte’n Bible ah zukhamna mohpaih in a om, himahleh damdawi khamtheih a khaam a hia? a chi guih kha mai thei. Hiaibang dotna tuakkha phut hita leng bangchi’n i dawng diale? Laisiangthou in “a khaam” i chi diam, ahihke’h, “a khaam kei” i chi zaw diam? Peter in na lamet pen uh hon dong peuhmah dawng ding in mansa gige in om un (I Pet. 3:15) a chih man in hiai a tung a dotna i dawn theih poimoh hi.


Bible ah “khamtheih” chih thumal chiah i mu kei chih thudik ahi. Hitamahleh, hiai toh kinaih a zat thumal bel muh theih in om hi. “Damdawi” i chih chiang in sappau in “drugs” ahihke’h “medicine” achih theih ding hi. “Damdawi khamtheih” genna in leng “drug(s)” chih thumal mah zat in om sek hi. Hiai “drug” kichi thumal pen Thukhun Thak kigelhna Greek pau in “pharmakon” (farmakon chi a sim ding ahi; i.e., ph=f) kichi hi. Hiai damdawi genna pharmakon kichi thumal ahihleh ahoihlam a damdawi zatna genna in zat theih a, huan a selam a damdawi kizangte genna in leng kizang thei tuaktuak hi.


Hiai a tung a i genlel pharmakon thumal leh akinaihpih thumalte pen Thukhun Thak Greek Bible ah mun thum (3) chauh ah kimu a, huaite ahihleh Galatiate 5:20 (pharmakeia); Kilakna 9:21 (pharmakawn); 18:23 (pharmakeia) ahi (Interlinear Bible– New Testament ah etchet beh theih ding). Thukhun Lui Greek Septuagint ah bel Exodus 7:11,22; 8:7,18; Isaiah 47:9,12 chihte ah hiai thumal kimu hi. New King James Version leh American Standard Version ah sorcery chi in kilet a, himahleh New International Version ah bel magic arts leh magic spell chi in kilamdang lawtel lou in kilet hi. Paite Bible ah hiai thumal mah tuh bumna (Gal. 5:20), mibumna (Kil. 9:21), leh bumsiamna (Kil. 18:23) chi in, kituam lawtel lou in kilet chiat hi. Ahihleh, hiai pharmakon chih thumal leh damdawi khamtheih in bang kisaikhakna nei hiam?


Sorcery chi a lehkhiak a na om pharmakon thumal apan in tulai a pharmacy i chih thumal hong piang hi (Barnes’ Notes en in). Pharmacy i chih nawn leuleu chiang in “Damdawi zuakna” chihna kawk a, huaiziak in hiai pharmakon thumal leh “damdawi khamtheih” chi-a i gen in kinaihkhakna nei ahi uh chi nuam i hi. Adam Clarke in Galatiate 5:20 a hilhchetna ah “bumna” (pharmakeia) kichi thumal pen pharmakon kichi apan hong piang ahi a, “damdawi” ahihke’h “gu” chihna ahi chi hi. Mi bumtheite’n mi a bum chiang un lou (damdawi) zang zel uhi. Kibum pen a hoih ding lam hiam ahihke’h a selam ding hiam in hi thei a; ahihke’h kingaihna ding hiam ahihke’h kihuatna ding hiam in kibum chih nidang pek apan in na kithang mahmah hi. Hichibang a kibumnate pen pharmakawn kichi hi (Kil. 9:21). Bible in hichibang a kibumna (damdawi khamtheih zatna chihna toh kibang) pen deih lou a na mohpaih ahihdan atung a i Bible chang gente apan i chian thei hi.


Hiai a tung a i suutnate apan in “Bible in damdawi khamtheih zatna khaam ahi” chih i mu thei hi. Huaiziak in, damdawi khamtheih zatna tuh bumna toh kibang/kikim in Thukhun Thak Laisiangthou in na ngai/koih ahihman in kuapeuhmah in athak in ngaikhawk thak ni. Damdawi hih zongsatna leh khristian hinkhua kituak thei mahmah lou ahihban ah Bible in damdawi zatkhelhna pampaih ahi chih i lungtang uah keem chiat leng uthuai i sa ahi.
“Huan sa thilhihte tuh a kilang chian ahi, huaite tuh hiaite ahi uh: angkawmna, kingaihna, thanghuaina, hukna, Milimbiakna, bumna, huatna, kinakna, hajatna, hehna, kilanna, omtuamna, gintuamna Deihgohna, tualthahna, zumunnopna, zukhamna, hichite khawng; huchibanga thil hih chingten Pathian gam a tang kei ding uh...” (Gal. 5:19-21).


Ahihleh, bangchidan a “damdawi khamtheih hihzongsatna” apan kiveng thei ding? Sawltak Paul in hichi’n gen hi: “Huchiin hiai ka chi ahi, Kha ah om un, huan sa utna tuh na hihtangtung kei ding uhi” (Gal. 5:16).
Amah hon hihhatpa ah thil tengteng ka hih thei hi (Phil. 4:13).

Add comment


Security code
Refresh

© 2017. Thaikawitongluan.

We have 37 guests and no members online