Articles

BABEL INNSANG

BABEL INNSANG

By: Siam Tonsing | www.thaikawitongluan.com

Babel ichih a tamzaw in a khiakna i thei ding. Babel i chih bel atom a gen in Buai; theikaklou; Laisiangthou i imuh dan in tuh mipi pau khawm noinoi te thawmging; amau pau chiat a pau in a ki theituah zosam omlou. Babel Innsang tungtang laisiangthou a i et nuam leh Genesis 11: 1 – 9 ah simtheih ding hi. Kuahiam ginna suk ling sawm hizaw lou in simlei vai paizia vantang sutzek leng i chi hi. Bangziak a itenna leitung a Saptuam chi tuamtuam hizahta a tam lopetmah ahi dia le? Na ngaihtuah kha ngei hia? Ei Manipur Singtang mi Lamka sung kia lel et in leng Saptuam, Pathian khat bia, gindan kibanglou bangzah i phaphet di uam maw, 50 a ching thei diam? Biakinn bangzah a om dia? Veng khat sung ah nih leh thum bek om. Saptuam leh Biakinn et in tuh khalam vah kihkiah ngen i hihtuak uh. Eimah mimal lam en le hang leng huchibang bok in i sia-leh-pha theihna zang in iki siamtan theizel lai zomah uhi. Saptuam gindan kibanglou hichi lawmlawm a a tamtel! I biak uh lah khat hingal.

Ngaihdan masa genle, eimah deihdan leh theihdan dik leh Laisiangthou thu lakdan paipih nuamziak a pawl bawl ihi kha diam? Hoihtak in sut lehang ei singtangmi te’n Pathian thu ina zakkhak uh kum 100 valzek pan lel ahihman in, a sulnung sut ding chileng suttheih lotham lai hi. Pipu a damlai om khenkhat a gen thei le omlai ding in gintakhuai hi. Saptuam hong piangkhiak dan leh Tangthupha hong tundan a kip a koi a a thei leh gelhthoh a nei bangle omkha ven chia. Saptuam in damna hon tun hia? Khrist in i tatlekna te pua a Khros a kilhbelh a om a, a sisan a I khelnate hon sawpsiang sak a, huai ngei tuh gingta a i khelhna te ki phawk a i hondampa ding a i sanna in i khalam damna hontun hi. Hiai ahi a dik a gingtute hotdamna omsun.

Ngaihdan dang en nawn le hang, Saptuam hong dinkhiak theihna san tuh, pau leh ham ziak chi leng i khial kholkei ding. Hotdamna thu za a mahni mi le sa te lak a phuangzak a gingtu hong ki behlap chiang in, huai gingtu bangzah hiam omte hong kipawlna uh hong piching hiai hiai in Saptuam khat hong suakthei hi. Adiak in Missionary te nasepna gah tungtawn in hichibang Saptuam hong piang thei hi. A sia ichihna hilou in Saptuam khat a dinkhiak theihna san i genna ahi. Ahi a, pau leh ham ki theituahlou hinapi in Saptuam khenkhat sung ah pau ki theituah hilou napi in pau zatkhoptheih ding khat seh a Biakna neikhawm bang om veve hi.

Laisiangthou pansan Romete 1:19-21 ah Saptuam; hong painkhiak zia i mu thei hi. Huai tuh Paul in gingtu te khat leh khat ki hihhat tuah leh lungsim munkhat pu a a omtheihna ding ua kipawlkhamna ahi. Hiai pansan in en lehang tuhun a Saptuam gindan kibanglou tampi tak hong piang ahimawk dia le… Eimah hoihsakdan leh deihdan zang a Pawl makaih nuam i hihman ahikha diam? Neugen suk lai le, Local Saptuam ah; Bial khat sung ah. Saptuam mipi lungsim khat a omkhawm lou. Sau sutlua i hizaw hia leh…

Pathian i chih a thilsiamte a lunglut, Innkuan kikepna a lunglut Khotang a lunglut, Nam leh zat a lunglut Pathian ahihman in, hiai te enkai ding a Saptuam kichi om a hi chileng i khial lawmlawm ding in I gingta kei. Ei tenna khotangsung en kimvel le hang, Saptuam tamzia tuk in i khotang a se pha mahmah mai hi. Saptuam i genchian in a pawlpi khaikhawmtu ahi a, a poimohpen bel Innkuan ah a hong tusuk thouthou hi. Huai kawmkawm in Khotang vai ah nam leh zat kikhenna ah leng pawl tuamtuam i om a, huai a mi tem ah tuh Saptuam khat a mi leh sa tem ah i hi. A kua a kua ki zomtuahvek i suak uhi. Huai teng lak ah Saptuam (Church) a lianpen a hihlam phawksuahthak le hang chih i deih mahmah hi.

Khotang sung vaihawmna ah Saptuam in i nnasep ding bang sem zoulou ihi kha mahmah ding e. Saptuam sung ah kahiang tampi i nei a, khovel thil vai ahihchiang in Saptuam sung, abiktak in tanmun;hihna neite chiang in thaunilh ihihna nelhsiah i hi kha ding uh e. I khotang hindan uh Saptuam in i etkai kei leh denchiang a vaihawmna ni a i tunggik ding ahihdan muphalou i hi kha ding e. I gindan ki bangta se kei leh Saptuam pawlkhat ihihna zal ah, i Saptuam sung a i belampu leh i belam honte enkai leng Saptuam dik ihi diam?

Thupi na, lalna, thuneihna, ki neksiatna, angmasialna, sum leh pai deihtakna te ziak  a Saptuam china a om om lai ding ihi uhia? I innsung ah hi in, i khotang a nam leh zat a kikhenna pawl tuamtuam te leh Saptuam tuamtuam ki pawlkhawm te’n bang innsang ahia i lam uh? Babel innsang bang a eimah thupina di leh lalna di lel lam ihi uhia? Lungngai thak dihve ni. Ki thakpat sawm lou in i pukna mun ah thathak la in dingtou thak chiat leng i gam leh nam hong khangtou dia, i Saptuam hong chidam dia, i khotang hindan hong nuamsem ding hi. Tuhun hilou in khangsawn tusawn te tanpha a ding lunggel nei a kalsuan hun mahmah ta hi.

© thaikawitongluan.com

Add comment


Security code
Refresh

© 2017. Thaikawitongluan.

We have 34 guests and no members online