Articles

JESU ANA KILHLUM NAMAH UA!

JESU ANA KILHLUM NAMAH UA!

Written by: Kattie Mawite | www.thaikawitongluan.com

 

I gam ah diktatna poimoh chi a naktak a I tangkoupih lai in, hiai Laisiangthou ana sim phot mah dih. Ka hon hilh ahi: na diktatna un dan sinsakmite leh Pharisaite diktatna a khup kei lezaw vangam ah na lut kei hial ding uh [Matthai 5:20]

Haksat chituak chi ua? Hichituk a diktat hinapi in, amaute'n Pathian pen a kam kia in pahtawi ua, himahleh a lungtang un gamlat uhi [Marka 7:6]. Eilawi toh kituak thou maw?

Ken kana ngaihtuah dan in eilawite'n Pharisaite sun ka kisa mahmah hi. Jesu hunlai bang tangthu theih in I thei ua, a diak in Pharisaite bang kidiktatsak, kihoihsak, lah a lungtang ua Pathian gamlat mahmah uh hidan in I thei chiat ua, kuamah gen leng a poimoh nawn lawmlawm kei. Dik leng a dik hi.

Jesu mahmah in leng hiai Pharisaite tuh mi lepchiah, gul' suan, han pawlam nuh ngou, kilawmtak a kilang, asunglam lah misite guh leh natna chiteng a dimte, nou leh kuang a pawlam hihsiang a, a sunglam lah lepgukna leh kideklouhna a dimte[Matthai 23] chi in a hihna uh ana genkhe toihtoih mai hi.

Tua ban ah, 'thousi khisiang a sangawngsau nawmvalhte, meithaite' innte lok, mikhemna dia sawtpipi thumna neite' khawng a chih khum zialzial hi. Hehhuai chithou chi ua?

Eilawi toh bang a I kilamdanna uh?

Sum tampipi I nei ua, huaite koi a ilak uh ahia? Dikloupi in sum I mu ua, huai selna ding in saptuamte a ding chi in van mantam taktak I pia ua. Pharisaite, mi khemna dia sawtpipi thumte mah I bang ve uale maw?

Thohlawm poimoh lou chi khang. Sawm-a-khat poimoh lou chi khang. Pathian in leng sawm-a-khat keia ahi ana chi a, piak luat ding mah ahi. Pathian' a ahihziak in.

Ahihleh, diklouhtak a I muhte sawm-a-khat I piak, Pathian a din a namtui diam?

Denchiang in Pathian in I golhgukna sumte ziak in Annania leh Saphirate nupa bangmai in hon that zenhouh leh kha!

I khotang bangziaka hichi lawmlawm a puksia a hi dia! Hoihtak a ngaihtuah detdette' a dingin lung hin a hin theih hinawnlou hi. Mimal chih in I khotang leh saptuam hoihna dinga kalkhat bek suan poimoh mahmah hi in ka thei hi.

Saptuam leh khovel vai khentuam lailai ding I hi di'uam? Saptuam nasemte'n khotang vai leh khovel vai, vei taktak a nei a, Pathian leh I tenna khovel kal a palai a I pan mateng zaw I gam in damni a nei ngekei ding. Saptuam leh khotang vai kikal a 'gap' a letluat laiteng I gam a dam ngeikei ding.

Bangziak hiam I chihleh, I gam ah za-a-za Khristian I hi a, I Khristianna pen biakin sung tan chauh a daih ding hilou ahi.

Ginglou mite lak ah kineksiatna uang mahleh, ei gingtute chiin ding a hi keihial.

Laisiangthou in, 'na vak uh mi' mitmuh in vak hen' ana chi hi.

Mi'n simleivai pen kineksiatna toh mekmat mahle uh, diktattak a, Pathian lungtuak a simleivai sai theih ahihdan kichiansak ding eite mah hilou ihi uh hiam?

Huainak sang in. Ginglou mite nuihzabuk lel I suak ta uh.

I gam ah ki-itna a om nawnkei. 'Kei ka hin nakleh', 'kei ka khosuah nakleh', ken nek di ka neih a, nuam kasak nakleh' chihna ngen in a dimta. Kihuaituah leh I pu-le-pa apan I mizia uh tawndan hoih mahmahte uh, ki-itna, kikhotuahna leh kideihsakna chihte mang chih ding a hita.

I gam tunding ahihnawnna din, MLA hoih I poimoh lotel uh. Vaihawmtu hoih, ami-asate zuausan lou ding, a mite' a dia palai na diktak a sem ding, a mite' aw ngaikhetu ding a poimoh lotel. Himahleh huaite sanga I gam in a poimoh zawk tuh Pathian ahi.

Pathian nawlkhin a, thildang I ngaihpoimoh zawk lai teng I dam ngeikei ding a, kineksiatna, golhgukna chihte a bei ngeikei ding.

Laisiangthou in, 'gam tuh Toupa a ahi' ana chi hi. Gam neitu tuh Toupa a hitaktak hi.

Vote zong a na diang doidoi ziak in gam I nei kei ding.Mikhat thauna ding a na vote na zuak ziak in I gam a lungvei zaw hi. Golhgukna piak khelhna ahih bang in golhgukna san leng khelhna a hi ve thou!

I vote zuakna ah Pathian zuaktel kha ihihlam I kitheih uh poimoh mahmah hi.

Thukhunlui hun ah Pathian in khalam leh salam pitu ding in mikhat, Mosi a zang lel hi. Gamchiam lutpih ding in Mosi a zang a, tua mah bang in Pathian' kianga kithoihna leh khalam vai, Pathian toh kal a thu sai ding omte ah leng Mosi mah a zang hi. Hiai in a hon etsak tuh, Pathian hing biate a dingin khalam leh salam vaihawmna kikhenthei hilou hi.

Khotang puksia kua ziak a hi dia? Saptuam ziak ahi. Saptuam a puksiat chiang in khotang leng a sesa ahi hi. Huaiziak in, saptuamte'n hiaibang hun haksa a gal-et a kidangkoih thei mai I hikei.

Khotang le ei ihi a, saptuam leng ei mah ihi.

Pathian lam zong a, Pathian mai a I kituklut kei uleh I mangthang taktak ding uhi.

A pawlawng kia a huntawk nawkei. Han pawlam nuhngou hinawnkei ni.

'Pathianni Khristian' chauh hi nawnkei ni. Biakin sunga I siangthou bang in Biakin pua ah leng  siangthou ta ni. 

Saptuamte'n leng, siangthou taktak I ut aleh, I sawm-a-khat piakna receipt te uah 'muhna' gelhna ding mun awngsak leng a hoih di e.

Saptuamte'n muhna diklou kipahpih in, nekguk-takguk selna dinga thilpiakte kipahpih nawnkei ni

Nekgukna sumte thohlouh ziak a I budget kiamzou ding ahih lele kiam phot mai heh. Dikloutak a muh sumte saptuam a piaklouh ziaka I sum dinmun a niamphah lele poikei. I biak Pathian hausa ahi. Amah lungkim sak phot ni.

Jesu tuhun a hongpai bang hileh eilawi bangchi'n hon chi taphet diam maw?

Pharisaite leh laigelhmite a chihna sanga nepzaw in a hon chi tuan din a gingtakhuai kei.

'Na nekguk sumthohte uh keia din a luaksuah huaita, na hon it uleh na kiletsakna, dik kisakna lungsimte uh hon paikhe masa un, biakin a an ngawl a thumte vote zong din alanglang ah diang doidoi nawnkei un, na tualthah utna lungsimte uh hon paikhe phot un, na nekguk zumzelna ding in saptuam hon zang nawnken, na maiphaw din hon zang nawnkei un' a hon chi toihtoih kha mai ding e!

Jesu vualzou a Jerusalem a lut ni a 'hosana' chi a kikoute mah,  a Nipini a, 'khros ah kilhlum un' chi in a kikou zel ngal ua.

Kikhamisak, 'kei lou ngal' chite leh, Biakin a kilangtam lah Pathian phawk I chihte mah lah setan nungzui muanhuai ina hikha naksek ua!

Mi kidiktatsak leh, amau lou ngal diktat omlou bang khop a kingai a, 'Toupa, hiai a siahkhonpa bang a mikhial kahihlouh ziak in ka kipak' chi a thum ging lualuate, Jesu'n 'gul' suan, lepchiah, han pawlam nuhngou' khawng ana chi toihtoih a, Jesu a muhdah loh hithet ua, thah dingdan lampi a gelgel nung un, Khros a kilhlup theihna hunlem a hon mu ua, Pathian' tangtawn thilgel tangtungsak tu ana suak maimah uhi.

Tuate mah Toupa Jesu'n a tung uh gik a chihte ahi hi.

Huai hunlai in Jesu ana kilhlum namah ua, tuhun a Jesu hong pai hi a, I hihna uh dawmlou hial in hong genkhe maizen leh, I kilhlum lou tuan ding ua hia? Amau sang in lah I hoih zaw tuan ngal kei ua.

Pathian i zon kei ua, a thilgel  I nam puksiatna a hong tung leh, a tangtung sak tu a ding in a tung a gik hi.

© thaikawitongluan.com [Thugelh, tangthu tuamtuam; itna thu, khovel vai, khotang vai, hinkhua thu na sim ut leh chiklaipeuh in www.thaikawitongluan.com ah lut in a sitheih gige ding.]

Add comment


Security code
Refresh

© 2017. Thaikawitongluan.

We have 39 guests and no members online