Articles

TUGALEN HIGH SCHOOL

TUGALEN HIGH SCHOOL

By:- Kattie Mawite | www.thaikawitongluan.com

Nidanglai in I pi-le-pute a siamsinte uh tulai in zat ding ana tam lawmlawm nawnlou hi. Huai hunlai in numei siam ganthei lou, khau khekthei lou, an suthei lou, an hawithei lou chihte a zatna dinga om vakkei.

Tuate mah a kisinsak uh ahi a, siam leng ana siam petmah uhi.

Tua teng ban ah, louna hahtak in ana sem ua, a khamkhop uh khoukhe mahmah uhi.

Amau hunlai in mithadah bang tuh bangmah ding ana chilou phial dan uh ahi. Khovakma a vaikuan a, khomial nung a vai tung a, mahni tate nasa haih thei ding khop a a nekzonna ua pang petmah uh ahi. 

Kuhkal leh chitaktak a ana sep ziak mah un a sepgah uh leng khum in, kipaktak in, kua hin kua sih leng phawklou in ana omthei uhi.

Himahleh, tu, ei khangthak hun ah bang I chita ua le? Khaukhek I zillai uhia?an suthei bangzah I om dia? Tempi tawi a loulam manoh duaiduai lai bangzah I om ua?

Hiaite khawng ei khang adin a 'oudated' lota. Ahihleh, en bang hihta ding? Oudated lua, thring lua chi a nu-le-pa sepsa ne a lum pihpiah mai ding maw? Mawkmawk. Hilou hial.

Kha khat bang hong paizek leh pawl sawm, sawm-le-khat leh sawm-le-nih te'n hon exam pah ta ding uhi.

Tuhun tuh, lou nasepna toh tehkak leng, lou a ham leh a thual zohsa, a buhvui ngak a, a min ngak a, alak di ngak kawm a susethei apan venbit hun hi ding hi.

Kumkhat pumlum I simsa, zilsa te a gah lohtheih dinga exam pe dia kisa ihihna ah, bangchi'n susethei apan I kiveng dia?

Susethei tuh laisimte a din ngal a hinawnkei a, vasate leh sazute a hinawkei. Susethei tuh I khut a I tawi mahmah I mobile phone bang, ei lungtang a suak thadahna bang, laisimloupi a kimuanna bang, leh dikloutak a hih sawm a, kianga tute a teisawn utnate bang ahi hi.

Hiaite apan bangchidan a kiveng ding?

Lou nasem mite a ihmut uh a suahlouh ziak a thoupah tingteng a, lou kuanpah uh a hi diam? Phalbi lai diakdiak in,nisa lum awi a paallam tunga khekhuang dildel a tut utlou a hi di uam?

Hilou hial.

Huchi'n om le uh a nasep uah a lohching kei ding ua, a maban uah 'puktaw' a a kuan ding uh a himai ding.

Tua bang mah in, laisimte leng, 'ihmut suak lolai', 'khua votlua nisalum kon awi zek lai ding' chichi thei I hikei uhi. Lou nasem ten kumkhat chauh a etna ziak un ihmut suak pipi, gim pipi in leng pang teitei uhi.

Eilawi in kum bangzah ahia I khual uh? I laisim uh kum bangzah daih dinga I sim ahia? Na zing thohhak in na damsung haksatak a nasem ding in na khawng mai ding maw? Na mobile phone pahtak ziak in officer ding lai, damsung jugali in na kuan maimah dia hia? Na damkum a sawt ngial leh, na kisikna ding hun sawt law ding ahi.

I nu-le-pate'n bawn lou nasep in honna khankhiakpih ua, kumkhat leltak leh nang maban leh tunung hinkhua ding ana khual ziak un, haksatna teng tate itna ziak in ana thuak uhi. Huchi ahihleh, en I damsung daih ding I siamsinna pen bang loh I sawm a?

Kumkhat tan lel ente bawn hichituk a ana pan uleh, ei siamsinte, gah limchitak lou dinga kisate bangchituk in I pang ua?

Hiai I theih gige ding uh ahi:singkung kal a kapi tunglou in a dawn a tung ngeikei.

I nu-le-pate'n Tugalen High School apan bang, Mualmet College apan bang in hiaitan a hon tun ua. En I tate koitan I tun zou dia?

I nu-le-pate'n singat in a hon tenpih uleh, en bang in ah I tenpih zou dia?

Hiaite tengteng ngaihtuah detdet kawm in lai sim leng, thumna leh Pathian muanna toh, lohchinna tuh eia hong hi ding ahi.

Lehkha sim lou pi a pass ding kinep louh ding ahi.

Buh I tuhlouhna ah buh I aat mah sam a maw?

Thupil in, "lohchinna tuh a kuhkalte a ahi" ana chi hi.

Takheh! Siamsinte. Siamsinna mah awle!

 © thaikawitongluan.com { Mundang a na tuah leh, hiai copyright koih tel teitei in.}

Add comment


Security code
Refresh

© 2017. Thaikawitongluan.

We have 25 guests and no members online