Articles

KUMLUI MANGPHA

KUMLUI MANGPHA

 

www.thaikawitongluan.com

Kum 2016 sung a ni 365 omlak ah ni bangzah na hinkhua a ding a phatuam leh na kim na kiang a te lamtouhna in na zang a? Ngaihtuah kik le, suuttak mahmah leh kilawm hunkhop om ding in gintak huai hi. Hunlui liamsa lakkik theih hileh ni 365 lak a ni bangzah na lakik ut dia? Hunlui mualliamsa lak a hunnuam na zat na ngaih vongvong hun bangzah na sam kik ut dia? Ahihkei leh, bawlkhelh hih diklouh na neih bawlthaktheih hileh ni bangzah na bawldik thak nuam dia?

Pathian in a mah kibatpih in a hon siam a himahleh lungsim neihdan kibang veklou hi. Zalenna diktek, Sia leh Pha khentatna ei khut a hon nga a hihna ah, I hinkhua zatliam te eimah hoihsak leh deihdan a zang kihi dan hi. A deihdan leh A lungtunna I chih te ngaihtuah thak mah le, eimah lungsim ngaihtuahna a a hoih leh hoihlou khenkak a eimah ngaihtuahna a hinkhua I zat hun a tamzaw mai diam? Suut kik thak mah dih…

Na hoihlouhna ki musuah in chih lam hizolou in, na hunzat ah na pilvang hiam chihdan in la inla, ngaihtuah vengveng mah dih lawm, na hinkhua pailiamsa te hoihhun in na thei hia? Nang hinkhua khek ka sawm kei, bawldik leng ka sawm kei, nangsang a theizaw le kahi tuansam kei. Himahleh, a genkhiak hihthei ka hilel ve. I kiim leh kiang I en a, khovel hindan haksa sa tuntun in khenchiang in lungkia in I om a, a kal inlah, haksatna in hon tuamngei lou bangzen hial in khovel a mi hampha pen bangmai in I omthei jel a. A haksat hnchiang in bangziak ahia? Kua hiam ngoh bang I ut sek a… Himahleh, ngaihtuah thak le, ei hinkhua zaw ei a mah ana hi petmah ahi. Kuaman hong bawldik sak theilou dia, a suksiat bel hong suksiatsak thei uh eive. Huai I chih man in, eimah hinkhua sia pen midang va ngoh theih ahikei. Ei hinkhua eimah in enkai zoulou kisuak hi. Mi khat in hoih deihsak a hon taihilh na hiam hon thumop te hiam en lasiam le, ama ziak a hoih hilou in, eimah in thuhoih la hoih la nuam a zuinuam I hih ziak in I hoih dia, kua hiam in I siatna ding hong hih a hong gen leh a na huai tuansam kei le, siatna in ei hon bawmzou tuanlou ding hi.

Zamtak a I ngaihtuah leh khovel hindan zaw haihuai pi leh thulim lou chik a batton om hi. Himahleh, ngaihtuahna zang kawm a chiimtak a I suut leh bel, goubawm hong a thil manpha leh lamdang pi muhsuah ding tam mahmah hi. Ahi alah, mihing te’n I khuak pilna I zangsiam kei ua, a kimchiang lel leng I ban kei uh! Sum leh pai, nek leh tak, ding mah I buaipih kal un, eimah hinkhua a muanna leh lungkimna taktak I zongkha kei uh. Angmasial na lel tan ah I tawp ua, khovel kipahna tanlel I mitsuan ua, khakham vei in I omzaw leltak uhi.

Omzia neitak a hinkhua zang a hoihlam ngaihtuah a gamtang tem ah hinkhua a lohching leh thilpuakdan siam te ana hi uhi. Lohsap hiam, deihdan a leh ngaihdan a thil pailouh hun a vui a khasia te mah mi vangsia ana hi uhi. Sum leh pai hauh ziak in thil tampi I hihthei maithei himah leh, eimah mimal tak a lungkimna neih na di’n bel, eimah kitheihsiam a lungsim tawng a kipahna neih in I chi hon damask a, I hinkhua zat hon nuamsak ana hizaw hi.

Thil sia a tam mahmah lai in thil hoih leng tam mahmah ahi chih haihlou in, eimah deihtelna a, a sia-a pha khensiam in hinkhua zang leng a hampha khat suak ding ana ki hilel hi. Hinkhua a a nuamlou, lungsim hon kam na maituah chiang in kua tung ah mohsakna na koih a, nang ut na tellou a thil na hih a om hia? Sawlluih in na om hia? Hinna tandi zen hial a sawlluih a na om leh bel gendi dang tuan ka thei kei. Ka theihna in leng a ban kei. Himahleh, huchi lou a haksatna ziak a nang midang na ngohkhak leh bel, nang a diklou hiding na hi. Na sia-le-pha theihna zangkhial hizaw ding nahi.

Tu kum bei sung in na hinkhua velthak inla, Mangpha na chihkawm in hun thak ah nangmah lungsim tawng a kipahna neithei di’n na hinkhua zang le chin chidamna in hon zui peuhmah ding hi. Siamna leh hauhna sang in na sia-le-pha zatdan ah pilvang masa lechin a hoih thil ngaihtuahna in hon zui dia, na maban kalsuan na ding hong vakzaw diam?

Kumlui Mangpha na chih kawm in na mailam hun ding nang khut liauliau a om ahi chih thei gige in. Na hinkhua nangmah makaih ahi a, a siat leh nangmah siamlouh hiding a, a hoih leh, nangmah kipahna hi ding hi.

Theihsiamna in pilna hon tun a, pilna in sia-le-pha khensiamna hon tun hi. Himahleh, theihsiamna tellou pilna bel mawlna chikhat ahi.

 © thaikawitongluan.com

Add comment


Security code
Refresh

© 2017. Thaikawitongluan.

We have 29 guests and no members online