Articles

DELHI to LAMKA

DELHI to LAMKA

~ ZM Tonsing | www.thaikawitongluan.com

December 15 ni a dia ticket kila ahihman in huai ngaklah deuh a ngak chu thilnuam liai ahi kei. Leitung kipei le dinkhawl houh hita hia chihsim in om. December 12 a exam zou di chihdan himahle ung huaini pen government in holiday chi a ahon khonung puanphing ziak un ka exam hun d’uh December 13 a di’n ahon suanthak phing ua. Kipahhuai kholkei.

December 13 a exam zou, 15 a inlam pai di a kihihna ah 14 kia hun-awl kinei suak hi. Mun tuamtuam hohna di bang tam piansim, tua banah ATM ah va ding ngai zo-mah ding, zingkal thoh zohlouh lah theihsa ahihman in nikhat nna di’n chu thilbaihlam liai ahikei chih theihsa ahi.

Genzek laile, December 14 a lawmte pai di om, zingkal baihtak a airport a va khak ngai ahihman in zinglam dak 3 lakvel in ka kipan khia uhi. Ka tunkik a baihsim lai chi a ka ihmut leh khangma kha, dak 10 pel a thoupah tingteng! Thouphet, hulou-halou a pawt dia kisakpah thethu ngai. Hun tomchik sung a Delhi khopi mun tuamtuam ihon pha zaw naksam a sihtheihna ahi. I kin tata chia traffic bang buai nuamse hileh kilawm. Hiaiteng zoh a khua mialta, ATM a va din teitei ngai bangchu huai Modi le ana piangdah leh ka chisim aka.

ATM a va ki-line, ngeina dan a mi tam a na tam mai. ATM nasan kimu banlou hilele ginna toh va ding ringot! Vangphat huaitak hia ahihkeh vangsiat huai ahi zaw diam ah theizou khang ATM hong kisia maimah. Mi pai zungzung mahle uh ke’n bel ginna toh hoihnawn di ngaktop. Bangtan hiam nung a honghoih nawn, a lakhe masa pen pawl a bang va pangkha thethup.

Nnapi teng zoupian kihi mahleh vanpuak dite saklouh a om nenaw lai ahihman in tutkhawl hithiat theih hituanlou hi. Inlam kikpah vengveng di chi’a bus i ngakleh hongpai ngeita mawngmawng lou zel. Huai DTC bus telawi le inlam Auto ngak toh kibang – i deihlouh tata tam; deih tata sak a kisa thei!

Tarik 15 hongtung petmah. Inlam pai di nana-na chu kilawpten kihi peuhmah inte ka train uh dak 9:20 AM a taikhe di himahleh dak 7 ginma a station tung lehluh. Khovot nuaipi a New Delhi Train Station a dak 9:20 ngak charchar. Hilele mi ka tam vanglak ua chimhuai kholkei. Avot deuh chihman thu.

Dak 9 lakvel a ka train d'uh hongtung, India-te paidan a ki-line deudau nawn in awl-awl a kizuilut naihnaih. Train a khatvei paina ahihman in nuam kisa veve hi. Etnop tam, gam - mun leh mualte muhpatna ngen ahihman in kikhodak ut khemkhem lah zan 2 bang zanhak zom a kihihna ah dakdak i kisak sung ale mang bang ana kinei man. Huan, ka train uh Rajdhani 3AC ahihman in nek di tam banah thoveng tak a ki-om thei ahihman in nuam mahmah chih di hi. Ka coach-mate uh pitek khat a veih a uih khengval deuh chihman thu!

Nuam i chihhang a nikhat bang i hongtai hial chiang in zaw kining thei veve hi. Ka pamlak ua nungak, Senapati-te khat hoih deuh keileh houh a kichimlum hial diam ka chisim a. A puan-ak lum pink colour, a jean khekor tight sim iuh-euh leh a sana buh te khawng a bawltu (company) te'n amah en vengveng kawm a, a kilawmpih theipen dia a bawl uh mah a bang hial hi. A ngou kilhkelh a, ataksa pianzia bangkim chu 'hichi zodeuh leh' chihna di himhim a om kei. Ihmut suak deuh a hong haknou ngiingei zo-mah bang zaw A bawltu pa'n le a kisaktheihpih ngot di. Huan, hiainu bawlna ding in zaw Pathian in le hunsawt ala deuh diam maw? Ngai dih, Dimapur kongtun dek ua kou coach a hongtu zo mah eive hilele kei ihmu ing a bangmah phawklou. Ka khanloh a ka lupna nuai ana tu bihbiah i hon mu chuh damman a om telmai, lah Dimapur a kum di ka hizel ua. Ka lawmte kia hiai nu hongtu in bang dia n'on phawnglouh uh la chi'n heh deuhmai in ka sal gaga alah hon thulak tuan kholkei uh.

Dimapur tung, gari mu pahlou zo mah. Khat a ticket la himhim hilele a gari hongtung ngeita mawnglou zel. Station a ka dindin ua leh ka mai ua Meitei nungak, dawm hoihlou khat hong dingnawn ta zel. Mit zaw taimah ve aw hilele ngaihtuahna a gim deuh a hive'n. Huainu le mitdim zenzen in ka en nawn ua, va houpih a a phone number va nget di, lei a ngaih lele lei mai dia hoih khat ahi. Hilele huaile ngamlou zel. A tawp a a geilak a Burma Bike sedeuhmai, Vai supply te a khat om hiven huaitung ah ka va tuang a lim bang ka va kila deuhvel a. Huai bike sia lim kilakpih ut ka hi kei a, a kei mahmah le lim kilak ut hi kholkei mahle'ng ka nung a Meitei nungak, melhoihnu ding ahihman in amah le dawkkha di chihman a kila ka hi zaw. Huaile, kei sang a ka nung a nungak melhoihnu a camera in a focus zawk di chihdan khawng hi.

A tawptawp a ka tuanna d'uh gari hongtung khongsam. Vante ka guanzoh un ka taikhe pah ua, kihawkdak si lah ihmut suak si, a buaihuai e. Nagaland lampi a bawl sanlai uh ahih man in khu petmah a, Zogam bang phawkhuai zozen. Ahi a, migam a khut leh ahoih nang naita chihna ahi. Eigam bel kum khotawn a khu, khu deuhdeuh diing hilai!

Kohima phakma munkhat (amin thei nawnlou) ah zing ann ka nek ua leh mehthak law tel petmah, keibang in ne-ngam phalou. Adang lah om tuanlou ahih chia nek teitei ngai. Neksuk chiang a a tunna chiangchiang bang kitheisuk gulgul zozen, amhai miaimuai a ann kine. Nuamkhol kei.

Net tungtawn a bandh khauh dan khawng kizaza mai, Manipur i naih deuhdeuh leh lung nuamlou deuhdeuh. Dak 4 pelzek a Sekmai tung huaimun a nitak dak 7, bandh bei hun di ngaktop chihleh bandh extend chihthu hong om nawn leuleu. Driver te lah zu dawn a buai a buai mai huchi kawmkal a kei sungkhoh a ana buai taget. Zingkal a ka mehnek uh thaklua ahihchia huai in ka sung hon zial. Dak 7 gingdek, eilah dailen suak thithe tamai chu a beidot huai e. Sekmai a ka khawlsung unle 5 veibek ka daileng man di.

Dak 7 gingta gari bangzah hiamle paita hilele kou Driver pa melmuh a om nailou. Zu buk a zu dawn a buai a buai mai, pai di himhim awlmoh a neikha hetlou, eilah Lamka tan paisuak theih teitei khakleh chi a kikin gu mahmah. Huchi kawmkal a Driver te toh pasal khat hong kisel buaikha uh, kisel buaikia hilou hong kisual zo mah uh! Buaina zaw tuam theitak ahi.

Bangtan hiam zohnung a ka Driver pa uh le khamdeuh a hongpai nenaw mai chu 'Toupa tuak di'n ka kiman taktak hia?' chih dotna poimawh tak a suak thraps. Ahimhim a passenger pua, passenger-te' hinna driver' khut a kinga chihtoh kibang ahihna ah zu dawnmi in leng gari a tawllai in dawndah hamham maile uh. Amah bang kimuang mahmah na lai.

Dimapur a kipan Sekmai tan gari sung a Meitei laa, a thu hoih mahmah dia gintak ngen kingai tou charchar, Sekmai a kipan Driver pa sermon kingai tou nawn. A sermon kia hileh phave, a khutvai lah awlmoh chihtak a awlmoh. Passenger te chu tumuang hit-hiat thei ki-om nawn selou, aneupen a kipan a lianpen tan in pau hetlou leh dip hawmsa a ka paina duh lampi ki-en gikgek mai. Kou a last line a te ngial bangchu tut le tu-ngam nawnlou; dingkawm a ka taina uh lampi et himai. Tua kawmkal a kei ka eksuak inlah 'na lunggim toh k'on subuai kha di' chi a kisuanlahna chang himhim theilou, hon engbawl hileh kilawm hialkhop a phut a hon phu tetaw mai!

Imphal lah kilut theihtuak mawklou. Gari bangzah hiam kizui ka hih man un Driver te'n khawlzen a pai didan kikup khopna honnei thithe uh....eilah eksuak in daihsawm mawklou. Passenger te'n le lau; driver tele huchi bang bok, a tai masa di bang om ngellou hileh kilawm a a om lai a kou driver pa'n 'kei a gumpen ka hi' chi hileh kilawm awmtak a masak bang phul viau. Kelpa tei mahmah -  amuhpeuh houpih, car sia khat bang va bawlpih thethup. Lampi tuamtuam zong a alanglang a ka taituah tuahna lam ua ka kizuipih uh gari dangte toh kisumang, kimu kha nawnlou vengveng, kou kia khaat chet kha maimah.

Imphal khosung lah kitailut thei tuanlou ahih chia munkhat a hon kumsak maimah. Ke'n chu phaze ana sasim dailen suaklua ahih chia. Kum toh kiton a van le ngaihsak manlou zen a dailenna di zongpah hehu, vang a vang zo mah. Atawp a huansung khat a tawmlut thrauh in va tha zarrrrzarrrrrrr...lawmte kin gawp uh ahih chia dailen zohma a hongsam uh, dinkhiat maimah ngai!

Gari in honkhakna a kipan a khe a pai mai ngai. Van lah kihau sim ahihchia inlam paikhak bang kisik huai dek zozen. Nung le ma a vanpua, trolley khat kai duapduap mai. A pamlam a Meitei nupi hon duty ana om uh hilele bangzaw hon chih kholkei uh. Ka om dan uh amit mahmah ua honmu ahih chiang ua hon hehpih kik zozen di un ka gingta.

Bangtan hiam ka paikhit nung ua lawmte' tanaute hongpi dia Bolero a hongkuan toh kituakkha chu a kipahhuai telmai. Hilele kou mi tamlua van hauzo mah ka hihman un buaihuai mahmah zel. Ka vanteng uh bolero a k'on guan ua leh dim sim maimah, kou tuanna di awng nawnlou di hong bang hilele kihen teitei mai. Ka vanteng utoh Bolero a mi 8 k'ong kihen uchu sawttuang le ung naktheilou in ka si duh! A thuahthuah a kipom, khente lah a tu lah bang, a ding lah bang om kawi ngiaunguau mai, khenkhat lah vanpuakte kawm a amai kia uh hongdawkkhe keukau! Taipan i kichihleh police te'n ka nunglam ua honsam uh, bang hon lohdek uh a dia aw i chihsim leh ka van guan ua guiter guangkha lou, lamlai anuse kha, huai hon hilh uh ana hi maimah. Kimangngilh hakve.

Kou kia hilou, mi tamtakte leng Airport a tang chih ahi. Tuate paitheih nang SSPP, Pu Dr. R. Sanga-te leh mi tuamtuam te'n panla ahi chihleng kithei mahleh kou Imphal tun hun di kigen theilou ahihman in kithuzak ngamlou hi. Himahleh, vangphat huaitak in winger khat ana om zenzen a, bahara 200 himahleh huai a kiguang pah hehu in Lamka lam ah ka taipah tonton uhi. Ka winger tuanna uh a hatkhiat dan chu kilometer per speed bek hinte! Imphal toh Lamka kikal dakkal 1 le tailou! Huchia intung.

19 Dec., 2016 | ZM Tonsing © thaikawitongluan.com

Add comment


Security code
Refresh

© 2017. Thaikawitongluan.

We have 33 guests and no members online