Articles

ANA HUCHIKHA LOU IN ANA HUCHIKHA LENG ZAW HICHILOU DI HIA…

ANA HUCHIKHA LOU IN ANA HUCHIKHA LENG ZAW HICHILOU DI HIA…

By:- Siam Tonsing | www.thaikawitongluan.com

Nupi khat, sengpua in hong paisuk hi. A sengsung ah mehzuak ding pua in Bazar lam hon zuan suk hi. A mel et in lametna hau mahmah leh kilawm in abang, a tuni nitha muhding dan ngaihtuah leng a hikha ding e. Nnasep taima mi a hihtuak a, himahleh a mel a mualsim mawk hi. A innsung khosakna bangchibang hihiam chihzaw va theihmawk theih ahikei. Himahleh, a melputdan apan in puakgik khat nei hileh kilawm in alang hi. A tapa khamtheihhih lunggimpih hia? Ahihkeileh, a tanu khaksa lunggaihpih hia? A lunggimna va kan din keileng bangmah kahituansamkei, mi haksatna dawnzangthei di hilou khat.

Huai nupi hong paima tham in, tekpu khat hong paisuk kana mu a, hotel ah lut in singpi dawn hi. A tutna a Newspaper om la in a sim a, a simzoh in singpi noukhat a sapbeh nawn hi. Kei omna apan ki galmuhthei ahihman in a omdan tatdan teng ka mu hi. Zingkal teng a a duty hi awmtak a hong paisuk gige ahihman in kana mu gige a, a zia a tong kana mat nachiang om hi.  Khenchiang in dahmel apu a, a lampai bang a awlsim hi. Akhenchiang in lah, kipahmeltak in a hong paisuk a, nuihmai meltak aput hun bangleng omsam. A singpi dawnzou, dingkhe dia a kisakleh, papi-la khat in akhou a, singpi a khilai nawn hi. Singpi dawnkawm in a kihou ua, a thugen uh bang ahia chihzaw ka zaban kei. Himahleh, huai papi-la pen in dotnei a hingei dia, tekpu pen in khenchiang in akhut bang vai kawm in apau hi. Teknung vuainung a bangthu thei ding ahia? Tekkuan hita, naupang neu bangmai a lungsim naungek thak, kua tu kua ta in bang thudot a va nei ahia? Mipil misaim a tamna lak a huai tekpu pentak in bangthei ding a hiam aw… chihsim in om hi. A kihou khit un, papi-la in tekpu liang khoihzauh in kipak chi hileh kilawm in paisan hi. Tekpu leng dingkhia in innlam azuan hi. A innsung omdan va mukhalou leh koi a teng ahia chihleng ka theiban kei. A innsung a thu leh la genthei le hihchinawnlou napi a khollak a kuahiam in thudot dia neithei tuh ngaihtuahna chimtak nei tekpu a hih kalam en.

Ni hong sangsim in hong tang singseng a, skul kai ding te asuk atou ah hong diang vingveng ta uhi. Huchihlai in, lampi a gari neu khat ahatlua tuh hizenlou a hong tai in, lampi kuaklak ah hong kissing buk in lampi lai ah hong ki tholh henhen mawk hi. Gari kipuk ging hong ngaih ahihman in kim leh kiang a lampi a paite bang kiguih zot hial uhi. A mawk etlou pawl te’n awlmohna toh a kipukpa va delh in va panpihpah uhi. Vangphathuai tak in a liamkei vanglak. Lampi kuak ana omlou hileh, a kipuk kholkei maithei, ahihkei leh a mailam a koisan hiam a gari dangtoh ki phutuah khading a hizaw kha diam ah. Khenkhat in lampi a kuak a ngohbawl ua, a dikna chiang a om. Himahleh, kenbel gari hekpa hiaisang in awltai zodeuh leh kipuk din ka koih kei, a break man a a kuakna pelthei lai dia gingta ka hihman in, himahleh, a gari hehtupa ngaihtuahna a bang om hiam chihbel ka theihpih kei. Lungsim thovengtak a hong tai a hihlouhziak leng a hikha maithei.

Accident a hong vennung in, naupang khat leh a nu hong kikai leng pian in hong pai ua, naupangpa kapkhe ngellou in a mittui pawt nulkawm in a nu alehkaih gaigai zel a, a nu’n bangmah a ngailou hileh kilawm in kaih toh thuah in skul lam manohpih teitei hi. Naupangpa tuh skul kai utlou ahi chih haihvual ahi kei. Bangziak a kai utlou ahia chihbel ka thei kei. Homework hih khalou hia? Ahihkei leh damlouhna nei? Huchi lou a, a skul ua lawmte nellou a kuahiam in ana khoihkhoih kha leng hithei hi. Anu a pan te’n naupangpa lungsim thei ad’uam a’ihkeh ngaihtuah sau lou a, skul kailouh phallou, kaisak sawm teitei ahizaw d’uam? Lampi a ki kai gawngawng lou deuh a naupang lungsim mana khemdan omlou adiam chi in ken kana guk ngaihtuah mawkmawk hi. Himahleh, va awlmoh a kava genna di thuneihna nei mawklou kahi chih ka haihkei.

Suntanglai ahi a, singpi ka sam hi. Ka sapzohnung dakkal kimkhat nung in hongpe pan a, sawt isak nakkal a, dawrsung ahong luttoh kiton in hong kipal pheimalam zomah a, singpi teng a bobei hi. Kalungsim ah hong pepah leh hichilou di hiven maw kachisim hi. Himahleh, amahleng a dawr a bangchituk a buai ahia chih katheihpih kei. Ka singpi dawndi minute bangzahhiam a kikhelsak hinawn mai. Ka duhna tuh a beituan kei. Va lathak din a kuan nawn!

Ka singpi dawnkhit nung sawtlou in nupi khat hong pai a photocopy hong bawlsak hi. Documents te a etet chiang in apoimoh di pen chitchiat hon tawikha kei hi. Kizenhuai kei na e maw ka chi sim a lah, mi va mawk mohsak theih thil le ahikei. A hong kuankhiakdek a bangchi dinmun a om ahia chih ka theihlouhman in. Poisa kawm in “kizen louhle a poitel mai…” achi vungvung hi. A thilhihding zaw kathei kei himahleh, a zekaina di sawnsawn banghiam om ahi chihbel akilang.

Khua hong mui pianta hi. Tuni zaw ki khakbaih deuhheh chikawm in ka kakisa ngal hi. A poimoh lua delhdi zaw nei kahi kei. Himahleh mi omvaklouhtoh chihziak a kisa baihdeuh kahi. Dawr kakhak a ka paita hi. Gari neu a tai kahi a, lamkawi na zawn ka tuntoh kiton in ka gari pei hong ling doldol a, ka theihlouhkal in ka puksuk hi. Ka khukbawk taklam ka tatkha a, na chihbangtuh nepte ahi. Ka doi-dide a, ka gari phongtou in innlam ka zuan hi. Ka ngaihtuahna ah tuni sese… paibaih sawmkei leng hichibang tuakkha chitchiat lou di zaw kei ve chi in ka kimohsa sim hi.

A tung a thute enthak mah dih. Zingkal a Nupi sengpua hong pai pen na lungsim ah suangtuahthak mah dih. A hinkhua I theihpih kei himahleh, a nuam ahaksa pal a nekzong a buai ahi chihtuh I thei. Himahleh, a tak a thiltuah I theihlouhman in atung ah thutanna bangmah I bawlthei kei. A nnasep ah a ginom mel chihtuh a theihtheih.

Huai tekpu hinkho zatdan theihpih kei hang, himahleh, a khovelzatdan ah bel mifel leh kizen tuh ahingei ding. Tekkun nung a mi thudot thamching a omthei lai. A innsung ah zahtak in a omlai diam chihzaw I theipha kei. Himahleh, upa lutung a samkang thei chiang in zaw a sia a pha khenkak siam mahmah ding in gintakhuai a, a thu uh mawk sellouh tuh vualzawlna chikhat ahi.

Nuta skul kai dia kisa te, ngaihtuahthak le, Naupang lungsim a bang om hiam chihtuh nu leh pate mohpuak ahihdan hon ngaihtuahsak hi. Naupang ikichihsung a, I ngaihtuahna I khoheidan ana lamdang man hi. Thilpeuhmah a kikheltheilou a omkei. Himahleh, a kailuatma a thilbawldik theih ahi chih theithak ni.

Singpi hong pedia kisa nu ka mohsa thei himahleh, a utziak a hong ki palkha ahihlouhman in mohsakna dingsan a omkei. Eimah lungsim loulam a hihchiang a mi va mohsakpah pen a dikkim hilou hi. Amau bang a enleng thil diklou I hihkhak le tampi mahmah omding hi. Theisese kei leleng, I mihinna a hoihna lam pawtkhesak peuhle zaw, huchitheimah hi chihtheih gige ding hitah e chih hon ngaihtuahsak hi.

Photocopy hong bawlsak nupi in a utmawng a a lehkha poimoh hon tawikhalou ahikei. Hon tawikha hileh, a nnasep di nonkailou a zoupahthei hina zenpi, a mangngilh ziak a a hunk i suang sawnsawn kha suak hi. Inn a pawtkhiakdek a vel hoih masa hileh leng a ethoihsung a a hun bangzahhiam mangsak veveding hi.

Zinglam a lampi a garineu hek a hong pukpa mahbang in kenleng, lametlouh in lampi ka baohsuk kha hi. Paibaihdeuh sawmkei leng, tuakkha khollou maithei kahi. Himahleh, ka mailam hunding ka theihkhol bangmah aomkei chihtuh ka haihkei hi. Lemgelna I neithei a himahleh eideihdan a thiltengzaw paithei lou ahi chihbel theihkilkel dia hoihkhat ahi.

I thulu pansan leh hiai a thu tamlou I simte tungtawn in bang thutanna na bawlthei dia? I tung a thil hongtung peuhmah zaw I tuahdingmah ana hilim lou hia chih hon ngaihtuahsak hilou hia? I thiltuahhun a vuui leh lungkia a gen lehsak I neihchiang in I maban kalsuanna ding hon bingsak zaw bang hi. I tung a thiltungte a hibangbang in pomsiam le ei a hampha ihi zawdiam? Haksatna pumpelhtheih gige lou hi. Haksatna I tuahhun chiang in vuuimailou in hiai apan in ken bang sinlai ka lathei dia chihlam ngaihtuahsawm leng a hampha kihi lel ding hi. Na hun paisa te ziak a kisikna na hauhluat leh na mailam hun leng bing mahmah suak ding hi.

Lungsim tawng apan a ngaihtuahna gelhkhiak tawm ahi. Himahleh, i simkhit toh kiton in thuhoih zuihding omte zuithei ding in kisa chiat ni.

“Tai hilh a na omchiang hiam in, nangmah dikna suang kenla, nang adia thu kigen te hoihtak in ngaikhe le teh nang mah a hampha na hiding. Hilh a I omtheihlai tuh, mihampha I hihlam hon langsak hi.” ~ Siam Tonsing ~

© thaikawitongluan.com 

Add comment


Security code
Refresh

© 2017. Thaikawitongluan.

We have 44 guests and no members online