Articles

TALENT SHOW

Talent Show
ZM Tonsing © www.thaikawitongluan.com


Khatvei mawngmawng a minthang Mega Trade Fair a hoh himhim di chi’n Pathianni, nitaklam ann nekzoh in ka kuan hi. Lawmte khat toh Dorcas Hall kong lak a lawm dangte ngak a ka om lai un pasal hon bangzah hiam lampi lian zeizoi ah tazoulou phial in hongpai naknak uhi. Tua pasalte lak ah numei bangzah hiam leng tel hi. Lamlian naih bengbung a electric khuam kiphuh khat ah kingai ngeihngaih kawm a lungkim tak a nahtang ka nek nuaunuau lai in tua lawmta hong paite lak a khat in hong enghou in hong choubawl lele khemkhem mawk hi. Naihpheipah gegek a, a kizom a thumvei khawng back kick zezet di’n hoihsasim mahle’ng kamkhat lelle dawnglou in ka dai dide hi. Amau le lohngaihna honthei tuanlou ahi ding ua, ahon paisan maimah uhi. Toh lawzen ua!

Hoihtak a le dingtang theilou phial na pi a khovel a hatpen bangmai a kingaihtuah hiai lawmtate a di’n dawilok leh simmoh huai ka hih ka gingta. Huanah, a kitonpih uh nungaknoute a di’n leng ‘paa’ lou leh ngaihsan huailou ka hi maithei himahleh hiai hun a phunlou-paulou a om a, ka daih dide zoh pen hat ka kisa a, kuama’n hon pakta kholkei lele kei-le-kei nakpitak in ka kipakta veve.

Teddim Road zuisuk a saulou ka taisuk nung un traffic nasan leng buaithei hialkhop a mipi kipunkhopna ka tung uhi. Dorka Khawmpi le nop leh lohchin tuakna maizen e ka chihsim leh Hmuia Veng a trade fair omna mun tung ka hi maimah uhi. Mipi a tam petmah a, ka hohpatna ahihziak in lamdang bang ka sa zozen hi.

Gate neuchik khat ah a lut leh pawt kihelhtuah zengzung, khenkhat bang kizawnpawt thoh zozen in khuai vaitung mah bang lutlut hial hi. A trade fair lamlam sang in leng talent show in mi’ lungsim luahdim zaw abang hi. A sung leh pua, lamlian lai nasan a talent show dim! A ‘trade’ pen ‘fair’ hia ‘fair lou’ chih zaw theikhang, lohchingtak zaw aka!

Mega Trade Fair a hohkhin, Thingkangphai a mela om, huai mun leng va hoh ngal di chi’n ka taitou nawn uhi. Saulou taipan, UCO Bank phakma deuh mun khat ah talent show hon khat ana om nawn uhi. WrestleMania 2017 Lamka-te’n kizintun bangmai in mipite’n ki-en depdup a, amau alai ah lohbei in kibohtuah ziahziah mai uhi. Etnop petmah! Amun mahmah a live ngat a en sapsap di’n tuh kimantak ahi, ticket chihte lah om sese lou lah ut dandan a ki-en theithou.

Kivakna dia zat taklouh talent chituam deuh neite ka etlai un High School kailai a lawmte mi thum toh ka kimaikha uhi. Hunlui bang phawkkhiat tultul in om a, lunglen huai zozen hi. Bangbang hiam gen in houlim nilouh mahle ung amin ua sam gaihgaih theilai dinmun a ka omlouh ziak in ka kisuanglah gu tentun hi. Mihing’ lungsim tuh khat veivei buaihuai tak ahi – theih dia kilawm tata mangngilh; mangngilh vengveng dia kilawm sim khenkhat bang kithei gengun nilouh. Ahi a, lehlamtak a mangngilh theihna lungtang i neih bangleng thilhoih ahi, ke’n tuh ka chi. Thil mangngilh chih himhim neilou in thei den nilouh mawkle lungkham huai zaw daih ding hi. Huaiziak in, mangngilh theihna lungtang hoihtak hon petu’ Pathian min ka phat hi!

Ka lawmte’n bel kei hon theihoih lai mahmah ahi ding ua, ka min mahmah in ahon sam zatzat geuh uhi. High School kailai a ana chiin zongsat thilte uh tawpsan thei nailou ahi peuhmah di ua, paunuam thei mahmah uhi. Thulimlou chikchik gen a nui kulhkulh nilouh thei ahihman un noptuak abang zawzen hi. “Khawlsan thei nai mahmah lou na d’uh maw?” chi’a chiamnuih-thutak a ka gen leh khat in “Kikhawlsan thei mahmah lou aka. Eile zaw ngolh ki-ut lawtel ahi hilele hitheilou. Honna thumpih zel in aw” chi’n ahon dawng zat a. Ahon dawndan in ka lungtang ahon dendan atuam riau. Amau ka selphouna hilou in, ahihtung lai ua zaw ut hunhun a tawp theihlel aka chi vavat zaw hive un, tua lah amau utthu a tawp theimawk hinawnlou, amau nek kia hilou a thil nekte un amau lehnek hizawta hi.

Khamtheih-guihtheih, thilchin hoihlou tuamtuamte’n ei hong naih hilou in e’n i va naih hizaw hi. Ei deihtelna himhim omlou in kuaman i kamsung ah hong guanglut sak laizang lou ding hi. Kiphatna hilou in tua ka kimuhpih lawmte toh High School ana kaikhawm a, amaute toh kithuah a hunzang a, ana khangkhia himahle’ng amau bangbang a kisik ngoihngoih theihna di thilchin hoihlou ka na hih khaklouh ziak in hampha ka kisa. Amau leng ahon ngawltheih ua, ahinkhua uh ahon bawlhoih thak uh ka deihsak mahmah.

Talent Show tuamtuamte enzou in Thingkangphai a mela omna mun a hoh di’n ka taitou nawn uhi. Huai ah leng mi tawm liailou, kiphu notnot mai. Mela a thil tuamtuamte en a ka vak kualh lai un talent show hon khat hong om nawn taget zel uhi. Omna lamlam a talent show!

Eilawi in thil khat sai, a diak a nitak program khawng i bawl chiang un thoveng leh lohching tak a saizou chihte vang mahmah hi. Buaina kichi i hunsehte lak ua telkha bangmai in buaina om deuh zut hi. Blue Star a kailai, sport chiang a school a nektheih kizuak, ut dandan a kinethei ahihman in principal-pa’n ‘eating festival’ chihial hi. Tua mahbang in eilawi in le banghiam khat sai i neihchiang un numei-pasal kal thangtatna kia mai hilou, “Drug/Alcohol Festival” chile kikhial lawmlawm kholkei leh kilawm.

Kichangkang sak in namdangte’ om dan leh tawndan zui i kichipeuh sekna ua himahleh hiaibang thilte’n ahoihlam sang in siatna lam ah hon pilut zaw hi. Sum-le-pai, neih-le-lam banah khosak dan in mi phalahlou i kichi maithei himahleh i om dan leh gamtatdan, i lungsim putzia un mi phazou nai mahmah lou hi.

Khatvei, nitak kholak pawt ka pailam in theih ngeite khat toh kholai ah ka kituak kha uhi. A gari a tuang di’n hon zawn a, ka paina di a gamlat thou toh chi’n ke’n le lemchang sa in ka tuangpah hi. Mipa’n a poimoh leh mi toh kibohtuah ngal dia mansa bangphial in a khut ah ‘knuckle/chain’ bunsa in om gepgop maimah hi. Lamkal khawng a hon kumsak a, ahon sukpuak fokfok di bang ka lausim a. Kisual utna lungsim toh khangkhia a, omna lamlam a kisual di mansa bangmai a hinkhua zang i hitel uhi.

Mi toh kisual utna lungsim toh kidim, kisual chihkhawng tawndan bangmai a ngaihtuah hile kilawm ihihman un i khotang un bel hoihlam sang a siatlam a hon lutpih lai diing bang hi. Nam changkang leh khangtou, a diak a Vaite khawng bang a kisuk heh tawp un leng nak (nose) kihetkha phialphial in kisel ek-ek lel ua, kisual hial khollou uhi. A kisual khak zenzen ua leh leng a sang ua lianzaw leh upa zaw, thulai gen a om ngeingei leh dai pah sipsip mai uhi. Eilawi bel daih malak ah ahong phelh a, thulai gen a hong kineihte bang vuaksawm lai!

Mi toh kisual chihkhawng va vuallel lelah thuak di ban ah damsung poihlong bang a le om theih; vualzou law zozen lelah liau theih hizel. Lohtak himhim omlou. Huanah, miteng muh leh theih a sia-le-pha thei, piching zet kisual lunglung chihkhawng thil zumhuai mahmah khat ahi. Zu-le-sa kham i hih leleng i kham bangbang in lungkim tak in om ni, mi toh va kisual a, buaina va bawl teitei ngai hetlou hi.

A hatlua leh mizou di chihle hi khollou, bang hiam kham neihzek chia kiphasak in miteng ban chou, omna lamlam a buaina bawl chihkhawng ngaihtuahna neithei chiang khat a di’n tuh thil zumhuai mahmah khat hi’n ka koih. Khenkhat ngial amau hatna ziak a mi chou hilou, lawmte muan ziak khawng a mi chou neknak. Huai Dorcas Hall konglak a hon chou lela pa’n le a lawmte a muanziak ahihlouh taaaaaaaaakkk leh. Deldol, vuak khaklouh kisik khonung na’ng e! Hong kuanthak leh hoih di hia, ki-single pih di’n. Ka ngaihtuah thak leh ka heh dedeuh, hunsak maini. Dedop!

14092017

Add comment


Security code
Refresh

© 2017. Thaikawitongluan.

We have 17 guests and no members online