Articles

NAMPI LUNGPHAWNG

NAMPI LUNGPHAWNG
By: Kattie Mawite | www.thaikawitongluan.com


▪Diktatna in nam a tawisang a, himahleh khelhna tuh namchih a di'n zahlakna tuntu ahi.
Paunakte 14:34▪

I gam ah, a diak in Paitete lak ah halhthakna hong tung chi leng genkhial lawmlawm ding in ka kigingta kei. A diak in August 31, 2015 a Manipur Government in eilawi hetkha ding bill 3 a hon passed uapan in nasatak in khanlohna thak kinei a, tuma sang mah in i nam leh gam itdan i hon theihloh ua, tunitan in a gah muh ding om lawmlawm kei mahleh, nengchik bek i lungtang uah hoih deihna hon tun hi in ka thei hi.

Tuni in Tribal Unity Day chi in August 31 in hun i zang ua, zat ding mah ahi. Gam humna ding a hinna manpha tak ana pia Salphate zahna sangtak i pia hi. A huchih kawmkawm in a kipiakna uh bangchituk a manpha i suah ua chih mimal leh pawl chih a heutute kivel chiat leng deihhuai mahmah hi. Huaiban ah, bangtan kal suanbeh ngai hiam chih leng lungsim in gel thak in, thathak la leng chih deihhuai mahmah hi.

Government a I palai ding telna(MLA election) tukum bul in i zouta a, napi khat khenkhia i hita uhi. Hiai kitelna ziak a ana kitheisiam lou a omkhak zenzen leh leng a pawn damta ding in ka ngaihtuah hi.

Tu in maban ah MLA sang a nep zaw tuanlou kitelna khat a om dek nawn hi. Hiai in nampi lung a phawn khak ngei ka gingta. Bangziak hiam i chih leh, i nam hon khaikhawmtu, si hial mahle hang leng i paih theih louh Paite ihihna ahi a, tua Paite Tribe Council a vaipaw ding, Paite nam a ding a zahtakhuai pen leh i PA ding tel ding ihihna uah kuapeuh i lunglut chiat uh leng ka gingta hi.

Kuamah pa hoih deihlou a omkei. Pa hoihlou(ei theihdan a laithai, khamtheih zu-le-sa, nungak a bual mi, leh a dangdang a kibualte) neikhate i lunggim ua, tansia i kisa ua, khitui naptui toh Siamtu kiang a thum toh, Pate ziak a kingaisia toh i buaipih zen uhi.


A hong tung ding October, 2017 chiang a i zoudawn khopi Bukpi a Paite Tribe Council(PTC) GHQ General Assembly cum Election(2017-2020) om ding ahi chih thu zak in om nawn
a, kipahhuai kasa hi.

Taksa a i pianna pa i tel theihlouh hang in, i nam pa ding bel i tel thei hi. Bangchi'n i kisakhol a? Tomkal lel, kum thum kum li lel di hi chi'n i hou ngaih hia?

Tuma kum nih paisa in i MLA te uh ei sik-le-tang a ding diing a i tel hinapi, ei lunglutna dan a vai hawmlou, teeltute ngeingaihlou chi in i kitom langlang uhi. I vaihawmtute(huailai a congress govenment) bang mohsa in i phaphet kei uhi. A dik mah ahi. Mohsak huai mah ahi.

A hoih teltu ei ihi a, a hoihlou teltu leng eimah ihi. Tel thei dingte'n kua i tel dia? Bangchi bang in i tel dia? Kitelna neih dek chiang a hai zual, tel khit chia pil thak sawm i hi hia? I Khristianna zuak ding i diam? I Pathian i zuak kha diam? I pianthakna i zuak kha diam?

Diktatna poimoh dan theilou i om kei. I zat dek hial chiang a haksa lua hia ahihkeileh bang in sam ahia chih theih ding khop in, i gentam hu in kizangkhe tawm a bang hi.

Mosi in Pharoah insung a nuamsa tak a hinkhua zang ding lai a chipih-sapih, a u-le-nau diktakte itna ziak in a dinmun a nawse ngam hilhial hi. Thupi hina maizen e! Ei a ding in Nampi Mosi chik chiang in a piang de aw?? Tutung kitelna ah a hong telkha ta mai diam?

Hiai kitelna a telkha dingte lak ah thukhah nop ka hon nei hi. Khatna ah, teltu ding nahihkhak leh, thumkawm zel in, I nam a ding a muanhuai, zattak, hangsan, sum-le-pai leh milian milal mai a kun lou, thudik gum a, itna toh sem ding mi hon teel un. Tua ding in Pathian nei, Pathian lau leh Pathian apan a mihinpihte itna nei mi hon telkhia un. Huai ding in thumna nasatak in nei ni.

A nihna ah, tel a omkha ding, candidate a pangkha khempeuhte'n na ching in na chingta kei zong, I zoudawn khua Bukpi a kitelna nei a kuan ding nahihna uah hiai in halhthakna hon tun mahmah leh ka deih petmah hi. Na hong ching zenzen leh, i zoudawn khuate a unau pianpih laizomte haksatna ah hiai Nampi Pa kahih toh kiton a haksatna uah bangchin pan ka lakpih thei dia? A kipahna uh bangchi'n ka kipahpih thei sam dia? I zoudawn khua omte bangchin a khantouhna din pan ka lakpih thei dia? Kikawmtuahna lampite bang dinmun ah a om a? Bang chi'n pan la leng ka pianpih unaute'n kong bangkim ah hon phattuampih thei ding ua? Chih lungsim hon nei mahmah ding in ka hon ngen hi. A thumna ding in, hihtheih neilou chi a nautang ommun leh social media khawng a awlmoh dan, hoihsak dan leh i nam a ding a vei leh awlmoh dan gengente'n hiai kitelna siangthou leh diktat tak a a kineih a, kuahiam mai-et na hilou, nam a ding a kipe taktak mi a kitel khiat theihna ding in bangkim hihthei tu Pathian kiang ah lungtang taktak in thumna toh ana pang ni. Banah, kuahiam lamtouh sang a sukniam theihna ding lungsim neilou in, kidomkang thei ding houlim leh thukup lam pibawl zaw ni.

Mi kilik supsup a, ba ei dai dide tuan ding? Mi'n a nam a ding a na hah tak a asep lai ua bangziak a ei dai dide sam ding?

'Heutu' chih hi ringot lou a, 'MAKAI' MIPITE' MA KAI DING, LAMHILH DING, THUDIK GUM A PAIPIH NGAM DING in heutu kuapeuh kisa chiat ni.

PA chi tampi a om a, himahleh PA hoih in a tate a khentuam kei a, itna toh a tate hoihna ding in a sem a, taan a ngaih leh a taan ngam a, thuak a ngaih leh a thuak ngam a, a tate hoihna ding in it a neikei. PA hoihlou bel a tate a ding in lungngaihna, dipkuatna leh mangbatna a tun a, a vaisai peuh in a lung uh a phawng hi.

Huaiziak in, PAITE NAM a ding a lungphawng lel PA hilou a, Paite nam in PA/PTC chih a ngaihtuah mai ua leng kipahhuai, khamuanhuai leh bit kisakna lungsim a hon neihtheihna ding un tua hong tung ding Paite Tribe Council vaipaw ding kitelna tuh hong lamzang henla, Khristianna toh kituak in kitelna hong kisai henla, Siamtu' lungtunna hileh chih ka thumna ahi.
PTC in a tate hoihna leh khantouh sem na ding in na hon semzom tou zel hen aw!!

"Paite kahi a, diklou tak a thilhih kei a ding in a kilawm kei."

©www.thaikawitongluan.com

Add comment


Security code
Refresh

© 2017. Thaikawitongluan.

We have 68 guests and no members online