Articles

AHOIHLAM THUTE GEN IN GELH TAMNI

AHOIHLAM THUTE GEN IN GELH TAMNI

Eimi thugentu leh laigelhtu tamtakte'n tuchiang in i khotang siatna lam kia uh mu hileh kilawm in nasatak in huailam a awnzaw pian ngen in thu tamzaw gen leh gelh sek uh bang hi. Hiai in mi lungsim kip zoulou leh hinkhua a aselam tuahkhak ana nei mi bangzahhiamte lungsim ah beidotna leh maban diing om lou hiam ahihkeileh kinepna ding om nawn lou leh binggawp sakna pia in kingaihsiatna lampi ah huchibang mite pilut khathei ding in muanmohhuai hi. Hiai in aselam a gahsuah tamtak a neihtheih dingte lak a khat tuh mahni hinna natawm kilak mai poisak louhna hi ding in ka gingta hi.

Bang ding a i thugentu leh laigelhtu tamtakte'n i mi leh sate lak a ahoih tampi omte, ahihkeileh ahoih om sunsunte beek tawisang a naktak a genthang zaw a, simtute leh mite lungsim a lungmuanna leh mailam a lametna hoihzaw tampi omlai ahihdan thute theihsak sawm zawlou bang ahi ua? A selam toh kisai thute naktak a gen leh gelh thaang zengzung a, a theiloute nasan theihsak sangmah in i lak ua (ahoih tampi om lou bang ana hita himhim lehleng) ahoih om sunsunte beek gengen in gelh thaang zengzung zaw maile agah hoihzaw lou ding adiam? Lamka khopi a zu leh khamtheih omte sangmah in Biakin leh Bible sinna mun omte gengen in, niik siing lua leh puanak pan lua silh numeite gengen sangmah in puanten teeng a kikhawm kuante khawng gentam zawle bang achi ding? Kholai a vakthapte sangmah in Library khawng a tu kinken a laisimte leh zingkal baihtaktak a biakin a niteng a thuum gigete thu khawng gen in gelh tamzaw leng bang achi di'a? Khosakna haksat ziak hiam ahihkeileh khamtheih hihzongsat ziak a gutate thu sangmah in diktatna toh gu-chitchiat-lou-a khutnasep a nekzong tampi omte genpen in neile bang achi ding? Van kiguksak thute gengen sangmah in van sukmang a om muhkik nawn thute leh ginomtak a piakkik nawn a om thute bang gentam zawle bang achi di'a?

Niteng thukizakna leh tanchinbute i sim chiang a 'thuthak' leh 'ngaihnophuai' i chih diakte uh leh i sim nop diakte uh bang 'tualthahna thu,' 'kisualluihna thu,' 'huham deuhmai a kisoisakna thu,' chihte khawng hileh kilawm mawk! Lungkhamhuai hilou hiam? Niteng tanchinbute a kisuah 'Editorial' kichi bang ah thu hoih, laa hoih tamtak niteng in kigelh gige om a himahleh huaite pen, hun tamzaw ah, sim louh a om hileh kilawm maimah hi.

Kuamah in a tate hiam ahihkeileh a inkuan sung ua siatna leh buaina omte mite theih ding in gelhgelh hiam ahihkeileh gen khiakhia lou hi. Gelh leh genkhiat malak ah mite theih ding laugu in a insung ah, aguuktak in, pan nasatak in a lazaw hi. Insung a a mihoih deuhte phat tuam pawl nei in a mi hoihlou deuhte a gense kei. Guptuam nei omna insung tuh insung chidam ahi thei kei hi. A sia omleh amaute phat kawmkawm in hanthawn a, a hong hoih theihna ding in thumna toh a pang hi. Siatna bawltu leh a gilou deuhte va tawlemlem in inkuan bawlhoih zaw lou ding hi. Khotang i chih pen inkuan lianzaw bang in a gen theih ding.

Hiai bang thu ka hon gelh khiat ziak in i lak ua gitlouhna leh siatna thute immang ding chi ka hi kei. Himahleh, i hoihna uh tampi omte gengen leh gelhgelh zawk ding a hoih lua hi nazenpi, i lak ua siatna omte naktak a genthang zaw a a thute bang veng zok thei lou ding hialkhop a i gen peih sek uh poisa leh pawna ka hi zaw hi. Hichibang a siatna omte i gen vengvung chiang un Setan lohching kisa mahmah in ana nui ding hi. Aziakbel, Khrist' Tanchin Hoih gentu dingte'n Setan' thusia gengen khazaw maimah i hihman un. I lak ua siatna leh gitlouhna omte saitu ding in heutute leh sorkal lamte i nei ua, niteng tanchinbute'n a thu hon gelhkhe zel mai ding uh ahi.

Tangthu simtu tamtak in 'sikha thu' sim nuamsa ua, nial hialkei mahle uh Bible thu bel sim peih ngellou uhi. Kei mimal ngaihdan in tuh, 'sikha thu' leh siatna thute gen, sim leh kikum a i om chiang in, i theihlouhkal in, Setan' thunasemtu in ana kipangkha maimah hi.

Mi bawlhoih a tungding thei ding lam thute gen leh gelh tam poimoh hi. I thugen leh gelhte'n ngaikhetu leh simtute lungtang ah nna nasatak in ahoihlam hiam ahihkeileh a selam in leng semthei hi. Huaiziak in, thugentute leh laigelhtute'n a selam thute sangmah in ahoihlam thute gelh tamzaw zou gige leng i khotang un, bangtanhiam in, hoihlam hon manoh zou ding in lametna liantak ka nei hi. Khovel ah gitlouhna leh siatna i beisak zou kei maithei, himahleh bangtanhiam in i deek zou ngei ding hi.

"...unaute aw, ...thil hoih peuhmah, ...hoihna himhim a om a, phatna ding a om a leh, huai thilte tuh ngaihtuah un." (Philippite 4:8)

©Valte Ginkhenpau, 2017 | www.thaikawitongluan.com

Add comment


Security code
Refresh

© 2017. Thaikawitongluan.

We have 38 guests and no members online